Ko He Manavaʼofa ʼi He Mālama Agakovi

ʼI BURUNDI neʼe maʼu e te tagata ia te mahaki kovi ʼe higoa ko te malaria. Pea neʼe tonu ke foimo telekaki ki he lōpitali, kae neʼe faigataʼa he neʼe mole ʼi ai he motokā moʼona ʼave kiai. Ko tona ʼu kaumeʼa lelei e toko lua neʼe nā tokoni ki ai, ʼo nā fakaheka ia ia ki te lōlue pea iā hola e nima neʼe nā kinakina ʼi tona toho ʼi te ʼu koga meʼa moʼugaʼia. Neʼe nā ʼave ia ia ki te kā, ke kaku ia ia ki te lōpitali ʼaē ʼe tuʼu ovi mai. Hili pē kiai te ʼu ʼaho, pea neʼe lelei tona mahaki.

ʼI te tahi potu ʼo te kele, ʼi te ʼu maumau ʼi te Golfe ʼo Amelika ʼi te ʼosi tō ʼo te ʼafā ko Katrina ʼaē neʼe hoko ʼi te māhina ʼo ʼAukusitō ʼi te taʼu 2005, neʼe maʼu e te ʼu tagata e toko nima ia te fale neʼe tataʼo e te ʼu fuʼu ʼakau he neʼe toka ifo kiai. Ko te ʼu tagata ʼaia e toko nima neʼe mole natou feʼiloʼiʼaki pē lā mo te tagata ʼo te ʼapi, kae ʼi te ʼaho kātoa ʼaki te ʼu masini tuʼusi ʼakau neʼe natou fakaʼātea ia te ʼu fuʼu ʼakau pea mo te ʼu ʼotaʼota. Neʼe ʼui fēnei e te tagata ʼo te ʼapi: “ ʼE mole he fakamālo ʼe tuha mo te gāue ʼaē neʼe fai e te [hahaʼi] ʼaia.”

ʼE fakamaʼuhigaʼi tāfito e te ʼu tala logo ia te ʼu tuʼutāmaki pea mo te ʼu agamālohi ʼaē ʼe hoko, kae ʼe tahitahiga tanatou palalau ki te ʼu gāue manavaʼofa pea mo agalelei ʼaē neʼe fai ʼi te ʼaho fuli e ʼihi. Kae ko te meʼa ʼaē ʼe tou logo tuʼumaʼu kiai, ko te hahaʼi ʼi te ʼu potu fuli ʼo te kele ʼe natou kumi tuʼumaʼu ia te ʼofa pea mo te lotomahino. ʼE tou loto fuli ki te manavaʼofa! ʼE feala ke tou logo ki te ʼu fakaʼamu ʼaia ʼi te ʼaho ʼo te Pō Tapu, ʼaē e tokolahi ia te hahaʼi ʼe natou palalauʼi peʼe natou hivaʼi ʼo ʼuhiga mo te ‘tokalelei pea mo he ʼu meʼa lelei ki te tagata.’—Luka 2:14, King James Version.

ʼE lagi ʼe mole faigafua ia te fakahā ʼo te manavaʼofa ʼi he mālama ʼe mole kei fakamaʼuhigaʼi ia te ʼofa pea mo te loto fia foaki. Ko te aga ʼaē kua māhani kiai te hahaʼi fuli, ko te aga fekai mo te aga fefeka ʼo he tahi pea ʼo lava lelei aipē anai tana ʼu gāue. Tokolahi ʼe natou maʼuli ohagē ko te tākuga lea neʼe fai e Niccolò Machiavelli: ʼE mata fakapotopoto age hata aga fekai ʼi hata maʼu ia te manavaʼofa. ʼE faigafua ki te loto mānumānu pea mo te manatu pē kiā kita totonu moʼo tekeʼi ia te manavaʼofa.

Koia, tokolahi ʼe natou fakamuʼamuʼa pē ia nātou totonu, tatau aipē peʼe mole tokagaʼi nātou ʼi te ʼu meʼa ʼaē ʼe loto kiai te hahaʼi. ʼI te agamāhani, ko te ʼu tagata pea mo te ʼu hahaʼi ʼaē ʼe ʼiloa ʼi te ʼu faigaoʼi, ʼe ʼui ko te ʼu “tagata” ʼe mole natou fakahā ia tonatou ʼofa. Ko ʼihi takitaki fakapolitike ʼe natou fēia.

Koia, ʼe lelei ke tou fai ia te ʼu fehuʼi ʼaenī: He koʼē ʼe tonu ke tou maʼu ia te manavaʼofa? Ko te manavaʼofa ʼe fua lelei koa? Koteā ʼaē kā tokoni mai ke tou maʼu ia te manavaʼofa? ʼE tou vakaʼi anai ʼi te ʼalatike ʼaē kā hoa mai ia te ʼu tali ki te ʼu fehuʼi ʼaia.

[Talanoa ʼo te pasina 3]

• ʼE ko he vaivaiʼaga koa mo kapau ʼe tou maʼu ia te manavaʼofa?

• ʼE ʼi ai koa he ʼu fua lelei ʼo te manavaʼofa?

• Ko te ʼu ʼaluʼaga fea ʼaē ʼe feala ai ke tou maʼu ia te manavaʼofa?