ʼE Pule Ia Sehova ʼAki Te Manavaʼofa

LOLOTOGA te hisitolia, tokolahi te ʼu tagata pule neʼe nātou puleʼi te hahaʼi kae mole nātou fakahā he lotoʼofa ki tonatou ʼu mamahi. Kae neʼe mole feiā ia Sehova ʼi tana fili te puleʼaga​—ko Iselaele—​he neʼe ina puleʼi te puleʼaga ʼaia ʼaki te manavaʼofa.

ʼI te lolotoga nofo popūla ʼo te kau Iselaelite ʼi te Esipito ʼāfea, neʼe logoʼi e Sehova tanatou ʼu kalaga ʼaē ke tokoni age kia nātou. “Lolotoga tonatou ʼu mamahi fuli, neʼe mamahi mo ia. . . . ʼI tona ʼofa pea mo tona manavaʼofa neʼe ina toe totogi nātou.” (Isaia 63:⁠9) Neʼe hāofaki e Sehova ia Iselaele, mo foaki faka milakulo age kia nātou he meʼa kai, pea mo fakahū nātou ki tonatou fenua.

Ko te kalitate ʼa Sehova ʼaē ko te manavaʼofa, neʼe hā ki muli age ʼi te ʼu lao ʼaē neʼe ina foaki ki te puleʼaga ʼaia. Neʼe ina fakatotonu ki te kau Iselaelite ke nātou gaohi fakalelei te ʼu fānau ʼaē neʼe hala mo tāmai pea mo faʼe, mo te ʼu fafine vitua, pea mo te kau matāpule ʼaē neʼe nonofo mo nātou. Neʼe mole tonu ke nātou gaohi koviʼi ia nātou ʼaē neʼe māʼimoa.

Neʼe fakamaʼua e te Lao ke fakahā te manavaʼofa kia nātou ʼaē neʼe nonofo ʼi te faigataʼaʼia. Ko ia ʼaē neʼe masiva neʼe feala ke ina tae te ʼu fulumeto ʼaē neʼe toe ʼi te ʼosi tānaki ʼo te taʼukai. ʼI te taʼu faka Sapato (te fitu taʼu), neʼe molehi ai te ʼu maʼua ʼaē neʼe tonu ke huʼi e te hahaʼi. Ko te ʼu kele fuli ʼaē neʼe maʼu ʼi he tofiʼa pea neʼe fakatau, neʼe tonu ke toe liufaki age ʼi te taʼu ʼo te Supileo (te 50 taʼu). ʼE ʼui fēnei e te tohi Les institutions de lʼAncien Testament: “ ʼI Iselaele neʼe mole ʼi ai he ʼu tuʼulaga kehekehe ʼi te hahaʼi, ohage ko totatou temi.” “ ʼI te kamata, neʼe teitei tatau te faʼahiga maʼuli ʼo te kau Iselaelite fuli.”​—Levitike 25:10; Teutalonome 15:​12-​14; 24:17-​22; 27:18.

Tou Faʼifaʼitakiʼi Te ʼOfa ʼa Sehova

ʼE faʼifaʼitakiʼi e te kau kaugana ʼo te ʼAtua tona manavaʼofa. Ohage la ʼi te lolotoga ʼo te hisitolia, ko te ʼu hau ʼaē neʼe hoki fakanofo neʼe nātou matehi te ʼu kāiga ʼaē neʼe kei maʼuʼuli ʼo te tagata ʼaē neʼe hau ki muʼa atu. Kae ko te kaugana ʼa Sehova ko Tavite neʼe mole ina fai te meʼa ʼaia. ʼI te ʼosi mate ʼo te Hau ko Saulo, neʼe puipui e Tavite ia Mefiposete, te mokopuna ʼo Saulo ʼaē neʼe tonu ke fakanofo hau. “Neʼe manavaʼofa te hau kia Mefiposete te foha ʼo Sonatane, te foha ʼo Saulo.”​—2 Samuele 21:⁠7.

Neʼe mole he tahi age tagata neʼe ina faʼifaʼitakiʼi lelei age te manavaʼofa ʼo Sehova, ohage ko tona fai e Sesu. Neʼe lahi te ʼu milakulo neʼe ina fai ʼuhi ko tana manavaʼofa fakaʼatua. ʼI te tahi lakaga, neʼe kole mamahi age e te tagata kilia: “Kapau ʼe ke loto ki ai, pea ʼe feala ke ke fakaliliu ʼau ke ʼau maʼa.” Neʼe ʼofa mamahi ia Sesu pea neʼe fāfā kia te ia, ʼo ʼui maʼana: “ ʼE ʼau loto ki ai. Ke ke liliu ʼo maʼa.” (Maleko 1:​40-​42) ʼI te tahi lakaga, neʼe mulimuli te hahaʼi tokolahi ia Sesu. ʼI te gatutu ʼaia ʼa te hahaʼi, neʼe fakatokagaʼi e Sesu te ʼu tagata kivi e toko lua neʼe nā kalaga fēnei: “ ‘ ʼAliki, ʼofa mai kia māua, ʼAlo ʼo Tavite!’ . . . ʼI te malave ʼo te fakaʼofaʼofa ia te ia, neʼe fāfā ia Sesu ki ʼonā mata, pea ʼi te moʼi lakaga pe ʼaia neʼe nā sisio ai.”​—Mateo 20:29-​34.

Logope la te kaugamālie ʼa te hahaʼi, kae neʼe ʼofa aipe ia Sesu ki te hahaʼi. ʼI tanatou mole heʼeki kakai, neʼe ina ʼui fēnei ʼi te tahi lakaga: “ ʼE ʼau ʼofa mamahi ki te hahaʼi nei.” Koia neʼe ina fakahoko ai te milakulo moʼo fafaga ia te hahaʼi ʼaia. (Maleko 8:​1-8) ʼI tana foli te ʼu kolo, neʼe mole faiakonaki pe ia Sesu ki te hahaʼi, kae neʼe ina tokagaʼi mo te ʼu meʼa ʼaē neʼe ʼaoga kia nātou. (Mateo 9:​35, 36) ʼI tanatou ʼosi foli ʼaia ia te ʼu kolo, neʼe mole maʼu e Sesu mo ʼana ʼu tisipulo he temi ke nātou kakai ai. ʼE ʼui fēnei mai e te Tohi-Tapu: “Pea neʼe ʼolo ai ʼi te vaka ki he koga meʼa ʼe lāvaki, ke nātou ʼāteaina. Kae neʼe sisio te hahaʼi ki tanatou ʼolo, pea neʼe ʼiloʼi e te tokolahi, pea mai te ʼu kolo fuli, neʼe nātou feleleʼi lalo kiai pea neʼe nātou muʼamuʼa ia nātou. Pea ʼi tana hifo ifo, neʼe sio ia ki te hahaʼi tokolahi, kae neʼe ʼofa mamahi kia nātou, koteʼuhi neʼe nātou hage ni faga ōvi ʼe mole ʼi ai honatou tagata tauhi. Pea neʼe ina kamata ai tana akonaki kia nātou te ʼu meʼa lahi.”​—Maleko 6:​31-​34.

Neʼe mole fai e Sesu te ʼu meʼa ʼaia ʼuhi ko te ʼu mahaki ʼaē neʼe tau mo te hahaʼi pea mo tonatou māsisiva, kae neʼe ina fai te ʼu meʼa ʼaia ʼuhi ko tonatou ʼaluʼaga fakalaumālie. Neʼe kākāʼi nātou e tonatou ʼu takitaki lotu, koia neʼe “ ʼofa mamahi [ia Sesu] kia nātou.” Ko te kupu faka Keleka ʼaē neʼe fakaliliu ʼaki te kupuʼi palalau “neʼe ʼofa mamahi,” ʼe faka ʼuhiga ki te “hanu ʼo te loto.” Ko Sesu neʼe ko he tagata manavaʼofa lahi!

Te Manavaʼofa ʼi He Mālama Agakovi

ʼI te temi nei, ʼe ko Sesu Kilisito te Hau ʼo te Puleʼaga ʼo Sehova ʼi selo. Ohage ko tana fai ki Iselaele ʼi te temi muʼa, ʼe puleʼi e te ʼAtua tana hahaʼi ʼi te temi nei ʼaki te manavaʼofa. “ ‘ ʼE nātou liliu anai ko taku ʼu hahaʼi,’ ko te ʼui ʼaia ʼa Sehova ʼo te kautau, ‘ ʼi te ʼaho ʼaē ka ʼau fakatupu anai te meʼa makehe. Pea ʼe ʼau manavaʼofa anai kia nātou.’ ”​—Malakia 3:⁠17.

Ko nātou ʼaē ʼe nātou fia maʼu te manavaʼofa ʼo Sehova, ʼe tonu ke nātou faʼifaʼitakiʼi tana ʼu aga. ʼE moʼoni, ʼe tou maʼuʼuli ʼi he mālama ʼe tokaga pe te hahaʼi kia nātou totonu, kae mole nātou tokoni kia nātou ʼaē ʼe nonofo ʼi te faigataʼaʼia. ʼE tautau kumi e te ʼu tagata pule ke nātou maʼu paʼaga, kae mole nātou tokagaʼi te maʼuli ʼo te hahaʼi gāue pea mo nātou ʼaē ʼe nātou totogi te ʼu meʼa ʼaē ʼe fakatau e te ʼu tagata pule ʼaia. Ia 2 Timoteo 3:​1-4, ʼe fakahā lelei ai e te Tohi-Tapu te aga ʼa te hahaʼi ʼi totatou temi, ʼo ina ʼui ʼe puli anai ʼi te loto ʼo te tokolahi, te kalitate maʼuhiga ʼaē ko te manavaʼofa.

Kae ʼe kei feala pe ke tou maʼu he ʼu faigamālie ke tou fakahā ai te manavaʼofa. ʼE feala koa ke tou tokoni ki totatou kāiga? ʼE ʼi ai koa he tahi ʼe mahaki pea ʼe feala ke tou ʼolo ʼo ʼaʼahi? ʼE feala koa ke tou fakaloto fīmālie ia nātou ʼaē ʼe lotomamahi, ohage ko te tokoni ʼaenī: “Koutou fai he ʼu palalau fakaloto fīmālie ki te ʼu nefesi ʼaē ʼe lotomamahi, mo koutou lagolago kia nātou ʼe vaivavai”?​—1 Tesalonika 5:​14.

ʼE toe tokoni foki anai te manavaʼofa kia tatou ke ʼaua naʼa tou hoko ʼita mokā lākahala mai niʼihi. ʼE ʼui fēnei mai e te Tohi-Tapu: “Ke toʼo ia koutou te lotokovi fuli pe, te ʼita fuli pe, te hāūhāū fuli pe, te kalaga fuli pe, te leakovi fuli pe, pea mo te agakovi fuli pe. Kae ke koutou liliu ʼo feagaleleiʼaki, fonu ʼi te manavaʼofa, ʼo koutou fefakamolemoleʼaki, ohage ko te fakamolemole ʼa te ʼAtua kia koutou ʼaki ia Kilisito.”​—Efesi 4:​31, 32.

ʼE tokoni mai anai te manavaʼofa kia tatou ke ʼaua naʼa tou fakaʼaogaʼi kovi totatou tuʼulaga. ʼE ʼui fēnei e te Tohi-Tapu: “Koutou kofuʼi foki ia koutou ʼaki te ʼu ʼofa mamahi ʼo te manavaʼofa, pea mo te agalelei, te manatu agavaivai, te agamālū pea mo te kātaki fualoa.” (Kolose 3:​12) Kapau ʼe tou maʼu te manatu agavaivai, pea ʼe feala ai ke tou mahino ki te ʼaluʼaga ʼo nātou ʼaē ʼe tou takitaki. Kapau ʼe tou fia maʼu te manavaʼofa, pea ʼe tonu ke tou agavaivai pea mo fakapotopoto, kae ʼaua naʼa tou liliu ko he ʼu hahaʼi ʼe faigataʼa. ʼE mole tonu ke gaohi te hahaʼi ohage ko he ʼu masini, ʼi totatou loto ʼaē ke fakahoko he gāue lelei. Pea ʼi te famili, ʼe manatuʼi e te ʼu tagata ʼohoana manavaʼofa ko tonatou ʼu ʼohoana ʼe ko he ʼu ipu vaivai. (1 Petelo 3:⁠7) Ko te metitasio ki te faʼifaʼitaki manavaʼofa ʼo Sesu, ʼe tokoni anai kia tatou ʼi te ʼu faʼahi fuli ʼaia.

Mai tona ʼaluʼaga ʼaē neʼe lahi te manavaʼofa ʼa Sesu ki te hahaʼi lolotoga tona minisitelio ʼi te kele, ʼe feala ke tou tui papau ʼe ko he Hau manavaʼofa ʼi te temi ʼaenī pea ʼe hoko atu anai tana manavaʼofa ʼaia. ʼE tala fakakikite fēnei ia Pesalemo 72 ʼo ʼuhiga mo ia: “Ke ina fakamāu ia nātou ʼaē ʼe mamahi ʼi te lotolotoiga ʼo te hahaʼi, ke ina hāofaki te ʼu foha ʼo ia ʼaē ʼe masiva, pea mo ina fakaʼauha ia ia ʼaē ʼe kākā. Pea ʼe ʼi ai anai tana hahaʼi fakalogo mai te tai ki te tai pea mai te Vaitafe ki te ʼu potu taupotu ʼo te kele. ʼE fakaʼofaʼofa anai kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva.”​—Pesalemo 72:​4, 8, 13.

ʼE fakakikite fēnei e te Folafola ʼa te ʼAtua: “ ʼE tonu anai ke ina fakamāuʼi ia nātou veliveli ʼaki te faitotonu, pea ʼaki te faitotonu ʼe ina fai anai he fakatonutonu maʼa te kau agavaivai ʼo te kele. . . . ʼE ina matehi anai te agakovi.” ʼI te ʼosi fakamatala ʼaē peʼe fetogi feafeaʼi anai te ʼu aga ʼa te hahaʼi ʼaē ʼe nātou hage ko he ʼu manu fekai, ʼe hoko atu fēnei te lea faka polofeta: “ ʼE mole nātou fai anai he meʼa kovi pea ʼe mole fakatupu anai he maumau ʼi toku moʼuga maʼoniʼoni katoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.” (Isaia 11:​4-9) ʼE fakapapau mai e te lea faka polofeta ʼaenī, ʼe ʼi ai anai he sosiete fakatagata ʼi te kele katoa ʼe nātou ʼiloʼi ia Sehova pea mo nātou faʼifaʼitakiʼi tona manavaʼofa!