Kei koutou manatuʼi koa?

Neʼe koutou leleiʼia koa te ʼu alatike fakamuli ʼo Te Tule Leʼo? Kapau koia ʼaia, pea koutou faiga ke koutou tali ki te ʼu fehuʼi ʼaenī:

◻ Koteā te fakatuʼutuʼu tāfito ʼa te kau tūpulaga Kilisitiano ʼo ʼuhiga mo te ako?

Ko te fakatuʼutuʼu tāfito ʼo te ako, ko te teuteuʼi ʼo he tūpulaga ke liliu ko he minisi faiva ʼa Sehova. Pea ko te ako ʼaē ʼe maʼuhiga tāfito moʼo fakahoko ʼo te faʼahi ʼaia ʼe ko te ako fakalaumālie.​—15/8, pasina 21.

◻ Koteā te ʼu tupuʼaga ʼaē ʼe tonu ai ke tou fakahā ki te kau tagata ʼāfea te agahala mamafa ʼaē neʼe fai e he kaugā fagona Kilisitiano?

Ko te ʼuluaki tupuʼaga ʼaē ʼe tonu ai ke tou fakahā te aga ʼaē ʼe kovi, koteʼuhi heʼe lagolago te faʼahi ʼaia ki te taupau maʼa ʼo te kokelekasio. Ko te tahi tupuʼaga, ʼe ko he fakaʼiloga ʼaia ʼo te ʼofa faka Kilisitiano ʼaē ʼe fakatafito ki te ʼu pelesepeto, pea ʼe toe hā ai ʼe tou ʼofa ki te ʼAtua, ki te kokelekasio pea kia ia ʼaē neʼe agahala.​—15/8, pasina 28, 30.

◻ Koteā te faka ʼuhiga ʼo te ʼui ʼaē ʼe tonu ke tou ‘taupau lelei ʼi totatou ʼatamai te hoko mai ʼo te ʼaho ʼo Sehova’? (2 Petelo 3:​12)

Ko tona faka ʼuhiga ʼaē, ʼi totatou ʼatamai, ʼe mole tonu ke tou lotolotolua ʼo ʼuhiga mo te “ ʼaho ʼo Sehova.” ʼE mole tonu ke galo kia tatou, kua ōvi mai te ʼaho ʼaē ka maumauʼi ai anai e Sehova te tuʼu ʼo te ʼu faʼahiga meʼa ʼaenī. ʼE tonu ke moʼoni kia tatou te ʼaho ʼaia, ʼo feala ke tou sio lelei kiai, ohage ʼe tuʼu tuʼumaʼu ʼi ʼotatou muʼa. (Sofonia 1:​7, 14)​—1/9, pasina 19.

◻ He koʼe koa ʼe loaloaga te ʼu ʼaho fakamuli ʼo te tuʼu ʼaenī?

ʼE tokaga ia Sehova ki te ʼu meʼa ʼaē ʼe lelei ʼaupito maʼa te hahaʼi fuli. ʼE tuʼania ki te maʼuli ʼo te hahaʼi. (Esekiele 33:11) ʼE feala ke tou falala ʼe hoko mai anai te fakaʼosi ʼi tona temi totonu moʼo fakahoko te fakatuʼutuʼu ʼo totatou Tupuʼaga ʼaē ʼe poto pea mo ʼofa.​—1/9, pasina 22.

◻ ʼE lava feafeaʼi kia nātou ʼaē ʼe gāue temi katoa ki te Puleʼaga ke nātou taupau tonatou fiafia logope la te ʼu fihifihia ʼaē ʼe hoko kia nātou?

ʼE tonu ke nātou manatuʼi te ʼu tapuakina lahi ʼaē ʼe nātou maʼu pea mo manatuʼi te tahi ʼu lauʼi afe tēhina mo tuagaʼane ʼaē ʼe lahi age tonatou ʼu mamahi. (1 Petelo 5:​6-9)​—15/9, pasina 24.

◻ Neʼe koteā te fakatuʼutuʼu ʼa William Tyndale ʼi tana fakaliliu te Tohi-Tapu?

Neʼe fakatuʼutuʼu e Tyndale ke maʼu e te hahaʼi māhani te Tohi-Tapu ʼe fakaʼaogaʼi ai he ʼu kupu ʼe totonu pea mo faigafua.​—15/9, pasina 27.

◻ ʼE lava feafeaʼi hatatou fakahā hatatou lagolago agatonu ki te Folafola ʼa te ʼAtua?

ʼE tou fakahā ʼe tou lagolago agatonu ki te Tohi-Tapu, ʼi tatatou fai faka mafola fakamalotoloto ki te hahaʼi. ʼE tou fai te faʼahi ʼaia ʼi totatou ʼuhiga faiako, ʼi tatatou fakaʼaogaʼi fakalelei te Tohi-Tapu, ʼo mole tou pikohi peʼe tou hilifaki he tahi ʼu manatu ki te meʼa ʼaē ʼe ina ʼui, ke ʼalutahi mo tatatou ʼu manatu. (2 Timoteo 2:​15)​—1/10, pasina 20.

◻ ʼE lava feafeaʼi ki te ʼu manatu kākā ʼo te mālama ke nātou fakavaivaiʼi tatatou agatonu?

ʼE feala ke fakavaivai tatatou agatonu ʼuhi ko te ʼu manatu ʼa te mālama, mo kapau ʼe mole tou fiafia ʼi te ʼu meʼa ʼaē ʼe tou maʼu, pea mo tou fakamuʼamuʼa te ʼu meʼa ʼaē ʼe tou loto kiai, kae tou tuku keheʼi te ʼu meʼa ʼa te ʼAtua. (Vakaʼi ia Mateo 16:21-​23.)​—1/10, pasina 29.

◻ Koteā te faka ʼuhiga ʼo te ʼui ʼaē ke tou tauhi kia Sehova ʼaki totatou nefesi katoa?

Ko te “nefesi” ʼe faka ʼuhiga ki te tagata katoa, mo tona ʼu fealagia ʼi te faʼahi fakasino pea mo te fakakaukau. Koia ko te tauhi ʼaki te nefesi katoa, ko tona faka ʼuhiga ko te foaki ʼo tatou totonu, ʼo tou fakaʼaogaʼi totatou ʼu fealagia fuli pea mo totatou mālohi katoa ke feala ai hatatou fai katoa te gāue ʼa te ʼAtua. (Maleko 12:29, 30)​—15/10, pasina 13.

◻ Koteā te puani ʼaē ʼe maʼuhiga tāfito ke feala ai hakita liliu ko he tahi ʼe mulimuli ki te ʼu pelesepeto fakaʼatua?

ʼIo, ko te puani tāfito ʼe ko te ʼiloʼi moʼoni ʼo Sehova, mo te ʼu meʼa ʼaē ʼe ina leleiʼia, mo te ʼu meʼa ʼaē ʼe mole ina leleiʼia, pea mo tana ʼu fakatuʼutuʼu. Ka takitaki totatou maʼuli e te ʼu pelesepeto maʼuhiga ʼaia ʼo ʼuhiga mo te ʼAtua, ʼe liliu ai ko he ʼu pelesepeto ʼe maʼuli. (Selemia 22:16; Hepeleo 4:​12)​—15/10, pasina 29.

◻ Koteā te manatu fakapotopoto ʼa te kau kaugana ʼa Sehova ʼo ʼuhiga mo te ʼu pule fakatagata?

ʼE mole nātou kau ki te ʼu meʼa faka politike koteʼuhi ʼe ko he ʼu hahaʼi ʼe nātou fakafofoga te Puleʼaga ʼo te ʼAtua. (2 Kolonito 5:​20) ʼI te tahi faʼahi, ʼe tonu ke nātou fakalogo kia nātou ʼaia ʼe pule.​—1/11, pasina 17.

◻ Koteā te ako ʼaē ʼe tou maʼu ʼi te tonu ʼaē neʼe fai e te polofeta ko Eliseo?

ʼI te temi ʼaē neʼe pāuiʼi ai ia Eliseo ke ina fakahoko he gāue makehe mo Elia, neʼe ina foimo tuku atu aipe tana gāueʼaga ke feala hana tauhi kia Elia, logope la neʼe tonu ke ina fai ʼihi gāue neʼe mole faʼa maʼuhiga. (2 Hau 3:​11) Ko te tokolahi ʼo te ʼu kaugana ʼa te ʼAtua ia ʼaho nei, ʼe nātou fakahā te faʼahiga loto faka sakilifisio ʼaia ʼo nātou tuku te faʼahiga maʼuli ʼaē neʼe nātou māhani kiai, ke feala hanatou ʼolo ʼo faka mafola te logo lelei ʼi te ʼu telituale mamaʼo.​—1/11, pasina 31.

◻ Koteā te ʼu tokoni ʼaoga ʼaē ʼe tuʼu ʼi te tohi ʼa Sake?

ʼE fakahā mai e tana tohi peʼe feafeaʼi te tauʼi ʼo te ʼu ʼahiʼahi, mo ina tokoniʼi tatou ke ʼaua naʼa tou fakapalatahi, pea ʼe ina fakaloto mālohiʼi tatou ke tou fai he ʼu gāue ʼe faitotonu. ʼE fakaloto mālohiʼi tatou e Sake ke tou tātāʼofi totatou ʼalelo, pea ke tou tauʼi te ʼu aga ʼo te malamanei, pea mo kumi te tokalelei. Ko tana tohi ʼe tokoni mai foki kia tatou ke tou loto faʼa kātaki pea mo faikole tuʼumaʼu.​—15/11, pasina 24.

◻ He koʼe ʼe “fakamolemole gafua” ia Sehova? (Pesalemo 86:5)

ʼE fakamolemole gafua ia Sehova heʼe mole galo kia ia, ko tatou ko te ʼu efu ʼo te kele, pea ʼe ʼi ai totatou ʼu vaivaiʼaga, ʼuhi ko totatou ʼuhiga agahala. (Pesalemo 103:12-​14)​—1/12, pasina 10, 11.

◻ He koʼe koa ʼe tonu ke tou fakamolemole ʼaki he lotolelei?

Kapau ʼe tou fakafisi ke tou fakamolemole ki ʼihi kae ko he meʼa ʼe feala, pea ʼe feala ke fakatupu kovi ki tatatou ʼu felogoi mo te ʼAtua. (Mateo 6:​14, 15)​—1/12, pasina 17.