Te ʼu Fehuʼi ʼa Te Kau Lautohi
He koʼe neʼe kole e Eliseo he ʼu “vahe e lua” ʼo te laumālie ʼo Elia?
ʼI muʼa ʼo te fakagata e Elia tana gāue faka polofeta ʼi Iselaele, neʼe kole e te polofeta tūpulaga ko Eliseo kia te ia: “Fakalelei siʼi ʼou loto, kae ke ʼau maʼu te ʼu vahe e lua ʼo tou laumālie.” (2 Hau 2:9) ʼI te faʼahi fakalaumālie, ʼe mahino mai, neʼe kole e Eliseo ia vahe e lua ohage ko te meʼa ʼaē neʼe foaki ki te foha ʼuluaki tupu. (Teutalonome 21:17) Kapau ʼe tou vakaʼi fakanounou te fakamatala, pea ʼe tou mahino lelei anai kiai pea mo tokoni anai kia tatou ke tou tāʼofi he ʼu ako mai te meʼa ʼaē neʼe hoko.
ʼO mulimuli ki te takitaki ʼa Sehova, neʼe fakanofo e te polofeta ko Elia ia Eliseo ke ina fetogi ia ia. (1 Hau 19:19-21) Lolotoga teitei taʼu e ono, ko Eliseo neʼe ko te tagata faifekau agatonu ʼa Elia pea neʼe loto moʼoni ke ina fai te gāue ʼaia ʼo ʼau ki tona mate. Māʼiape la ʼi te ʼu ʼaho fakaʼosi ʼo Elia ʼi tona ʼuhiga polofeta ʼo Iselaele, neʼe pipiki ia Eliseo ki tana tagata faiako pea mo fai tokoni ʼaia. Logola neʼe fakaloto mālohi e Elia ia Eliseo ke mole muli ia te ia, neʼe ʼui tuʼa tolu fēnei e te polofeta tūpulaga: “ ʼE mole ʼau mavae anai ia koe.” (2 Hau 2:2, 4, 6; 3:11) Koia maʼa Eliseo ko te polofeta ʼaia kua matuʼa neʼe ko tana tāmai fakalaumālie.—2 Hau 2:12.
Kae ko Eliseo neʼe mole ko te foha fakalaumālie pe ʼaia e tahi ʼo Elia. Neʼe fakatahitahi ia Elia pea mo Eliseo mo te kau tagata neʼe higoaʼi ko “te ʼu foha ʼo te kau polofeta.” (2 Hau 2:3) Ko te fakamatala ʼo te Lua Hau ʼe ina fakahā ai ko te ʼu “foha” ʼaia neʼe nātou toe felogoi lelei mo tanatou tāmai fakalaumālie, ko Elia. (2 Hau 2:3, 5, 7, 15-17) Kae ʼuhi ko ia ʼaē neʼe fakanofo moʼo fetogi ia Elia, koia ko Eliseo neʼe hage ko te ʼuluaki foha, ko te foha maʼuhiga ʼaia ʼi te ʼu foha fakalaumālie ʼo Elia. ʼI te Iselaele ʼo te temi muʼa, ko te foha ʼuluaki neʼe ina maʼu te ʼu vahe e lua ʼo te tōfiga ʼo tana tāmai, kae ko te ʼu foha ʼaē, neʼe nātou maʼu pe te vahe e tahi. Ko te tupuʼaga ʼaia ʼo te kole e Eliseo ia vahe e lua ʼo te tōfiga fakalaumālie ʼo Elia.
He koʼe neʼe fai e Eliseo tana kole ʼi te temi tāfito ʼaia? Koteʼuhi neʼe tonu ke ina fakahoko te gāue maʼuhiga—ke ina fetogi ia Elia ʼi tona ʼuhiga polofeta ʼi Iselaele. Neʼe ʼiloʼi e Eliseo ke feala hana fakahoko te ʼu maʼua ʼo ʼuhiga mo te gāue maʼuhiga ʼaia, neʼe ʼaoga kia ia te mālohi fakalaumālie ʼaē neʼe feala pe ke foaki e Sehova, pea ʼe lahi age ʼi tona mālohi fakatagata. Ohage ko Elia, neʼe mole tonu ke mataku. (2 Hau 1:3, 4, 15, 16) Koia, neʼe ina kole ai ia vahe e lua ʼo te laumālie lototoʼa ʼo Elia, pea mo tana “maheka moʼoni ʼo ʼuhiga mo Sehova”—ʼaē ko he ʼu kalitate lelei ʼe kita maʼu ʼaki te laumālie ʼo te ʼAtua. (1 Hau 19:10, 14) Neʼe tali feafeaʼi e Elia?
Neʼe ʼiloʼi e Elia ko te meʼa ʼaē neʼe kole age e Eliseo ʼe mole feala ke ina foaki age, gata pe ki te ʼAtua. Koia ʼaki he agavaivai, neʼe tali fēnei e Elia: “Neʼe ke kole mai te meʼa faigataʼa. Kapau ʼe ke sio kia te ʼau ʼi te temi ʼaē ka toʼo ʼau mai ia te koe, pea ʼe hoko anai te meʼa ʼaē neʼe ke kole mai.” (2 Hau 2:10) Pea ki muli age neʼe fakagafua e Sehova ke sio ia Eliseo ki te hake ʼa Elia ʼi te afā. (2 Hau 2:11, 12) Neʼe tali te kole ʼaē neʼe fai e Eliseo. Neʼe foaki e Sehova kia ia te laumālie ʼaē neʼe ʼaoga kia ia moʼo kamata tana gāue foʼou pea mo ina tauʼi te ʼu ʼahiʼahi ʼaē ka ʼamanaki hoko.
Ia ʼaho nei, ko te kau Kilisitiano fakanofo (ʼaē ʼe fakahigoa ʼi ʼihi temi ko te kalasi ʼa Eliseo) pea mo te ʼu kaugana fuli ʼa te ʼAtua, ʼe feala ke nātou maʼu he fakaloto mālohi mai te fakamatala ʼaia ʼo te Tohi-Tapu. ʼI ʼihi temi, ʼe lagi faigataʼa fau kia tatou peʼe tou manatu ʼe mole feala ke tou fakahoko he gāue faka teokalatike foʼou neʼe hinoʼi mai, peʼe lagi mole kei tou lototoʼa moʼo hoko atu te gāue fai faka mafola ʼo te Puleʼaga, ʼuhi ko te tuputupu ʼo te mole fia logo, peʼe ko te fakafeagai ʼa te hahaʼi ʼi totatou telituale. Kae kapau ʼe tou kole kia Sehova ke tokoni mai, pea ʼe ina foaki mai anai te laumālie maʼoniʼoni ʼaē ʼe ʼaoga kia tatou, moʼo tauʼi te ʼu faigataʼaʼia pea mo te ʼu fetogi ʼaē ʼe hoko. (Luka 11:13; 2 Kolonito 4:7; Filipe 4:13) Ei, ohage pe ko te fakaloto mālohiʼi e Sehova ia Eliseo ʼi tona ʼu maʼua lahi, ʼe tokoni mai anai kia tatou, tūpulaga pea mo matutuʼa, moʼo fakahoko totatou minisitelio.—2 Timoteo 4:5.