Neʼe Sio Ia Eliseo Ki Te ʼu Saliote Afi, Kaʼe ʼe Feafeaʼi Koutou?

Neʼe tuli e te hau ʼo Silia ia Eliseo, te polofeta ʼa te ʼAtua pea neʼe ina maʼu ia ia ki te kolo ko Totane. ʼI te po ʼaia, neʼe ʼave e te hau ʼo Silia ki Totane te kau solia mo ni hosi pea mo ni saliote tau. ʼI te kei hegihegi, neʼe natou ʼa takai te kolo.—2 Hau 6:13, 14.

ʼI te uhu ake, neʼe alu leva te tagata faifekau ʼa Eliseo ki tuʼa pea neʼe sio ki te kua ʼa takai ʼo te kolo. Pea neʼe kalaga fenei: “Oi! toku aliki, kotea ke ta fai?” Neʼe tali fenei age e Eliseo: “Aua pe naa ke tuania, koteuhi e kaugamalie age natou ae e kau mo taua ia natou ae e nonofo mo natou.” Pea neʼe faikole fenei te polofeta: “[Sehova], avahi ona mata, o tupu ke sio ia ia.” ʼE hoko atu fenei te fakamatala: “Pea nee avahi leva e [Sehova] te u mata o te tagata faifekau, ae nee sio leva ki te mouga kua fonu i te u hosi mo te u saliote afi ae kua natou takatakai ia Eliseo.” (2 Hau 6:15-17) Kotea te ako ʼe feala ke tou taʼofi mai te aluʼaga ʼaeni pea mo ʼihi atu aluʼaga neʼe hoko kia Eliseo?

Neʼe mole mataku ia Eliseo ʼi tana sio ʼae ki te ʼa takai e te foʼi solia ʼo Silia ia te kolo, koteʼuhi neʼe falala ia kia Sehova pea neʼe sio ai ki te puipui ʼa te ʼAtua. ʼE moʼoni, ʼe mole tou fakatalitali ki he ʼu milakulo ke tou tokagaʼi ai ʼe puipui e Sehova tana hahaʼi. Ohage pe, ʼe ʼa takai tatou e ni hosi pea mo ni saliote afi. Kapau ʼe tou sioʼi ʼaki te ʼu mata ʼo te tui pea mo falala tuʼumaʼu ki te ʼAtua, ʼe tou maʼuli “malolo” anai pea mo tou maʼu tapuakina mai ia Sehova. (Pes. 4:9) Tou vakaʼi he ʼu ako mai te tahi ʼu aluʼaga neʼe hoko kia Eliseo.

NEʼE KAMATA GAUE IA ELISEO KIA ELIA

ʼI te tahi aluʼaga, neʼe lolotoga fakamalu e Eliseo ia te kele, neʼe fakaovi age te polofeta ko Elia ʼo li atu ki ai tona pulupulu fakapolofeta. Neʼe mahino ia Eliseo ki tona fakaʼuhiga. Neʼe ina fai he kaitahi, mo tauʼine ki tana tamai mo tana faʼe, pea neʼe mavae leva mai tona ʼapi ʼo mulimuli ia Elia pea mo gaue kia ia. (1 Hau 19:16, 19-21) ʼUhi ko te lotolelei ʼa Eliseo ke ʼateaina fakavilivili ki te tauhi ʼae ki te ʼAtua, neʼe fakaʼaogaʼi ia ia e Sehova pea ki muli age neʼe ina fetogi ia Elia ʼi tona ʼuhiga polofeta.

Neʼe lagi taʼu ono ia te gaue ʼa Eliseo kia Elia. Lolotoga te temi ʼaia, neʼe ko Eliseo “ae nee ina liligi te vai kia nima o Elia.” (2 Hau 3:11) ʼI te ʼu temi ʼaia, neʼe ko he agamahani ʼa te hahaʼi tanatou toʼo nima tanatou meʼa kai, neʼe mole natou fakaʼaogaʼi he huki peʼe ko he hele. ʼI te ʼosi ʼo tana kai, neʼe haʼu te tagata faifekau mo he moʼi vai ke fanofano tona pule. Logo la ko ʼihi gaue ʼa Eliseo neʼe ko he ʼu gaue neʼe mole faʼa maʼuhiga, kaʼe neʼe maʼuhiga kia ia tana gaue ʼae kia Elia.

ʼO toe feia ia ʼaho nei, tokolahi te kau Kilisitiano ʼe natou kau ki te ʼu faʼahiga selevisi temi katoa. ʼE natou fakahoko te ʼu gaue ʼuhi ko tanatou tui pea mo tanatou loto ʼae ke natou fakaʼaogaʼi tonatou malohi katoa ki te tauhi ʼae kia Sehova. Ko ʼihi selevisi ʼe fakamaʼua ke natou mavae mai ʼonatou loto fale pea mo gaue ʼi te Petele, peʼe ko te laga fale pea mo ʼihi atu selevisi, pea ʼe lahi te ʼu gaue ʼe ko he ʼu gaue ʼe mole faʼa maʼuhiga. ʼE mole tonu ke meʼa noaʼi e he Kilisitiano te ʼu gaue ʼaia, koteʼuhi ʼe maʼuhiga ʼaupito kia Sehova.—Hep. 6:10.

NEʼE FAKAHOKO KATOA E ELISEO TANA GAUE

ʼI muʼa ʼo te toʼo ake e te ʼAtua ia Elia ki te lagi ʼi he ʼahiohio, neʼe ina fekauʼi te polofeta ke mavae mai Kilikale ʼo alu ki Petele. Neʼe kole age e Elia kia Eliseo ke nofo, kaʼe neʼe ina tali fenei: “E mole au mavae anai ia koe.” ʼI tanā folau ʼaia, neʼe kolekole tuʼa lua age e Elia kia Eliseo ke nofo, kaʼe neʼe fia alu pe ia. (2 Hau 2:1-6) Ohage pe ko te mole fia lituʼa ʼa Lute kia Naomi, neʼe toe agatonu ia Eliseo kia Elia. (Lute 1:8, 16, 17) Kotea tona tupuʼaga? ʼE mahino ia, neʼe maʼuhiga kia Eliseo ia te pilivilesio ʼae neʼe foaki age e te ʼAtua ke gaue kia Elia.

Neʼe tuku mai ʼi heni e Eliseo he faʼifaʼitaki lelei. Kapau ʼe foaki mai he gaue ʼi te kautahi ʼa te ʼAtua, ʼe tou fakamaʼuhigaʼi anai mo kapau ʼe tou manatuʼi ʼe ko he gaue maʼa Sehova. ʼE ko he toe pilivilesio kia tatou.—Pes. 65:5; 84:11.

“KOLE MAI TE MEA AE E KE LOTO KE AU FAI KIA KOE”

ʼI tanā folau ʼaia, neʼe ui e Elia kia Eliseo: “Kole mai te mea ae e ke loto ke au fai kia koe, ia mua o taku mavae maia koe.” Neʼe tatau te kole ʼa Eliseo mo te kole fakapotopoto ʼae neʼe fai e Salomone ʼi he ʼu taʼu ki muʼa atu. Neʼe ina kole ke foaki age ʼo liuga lua he koga ʼo te laumalie fakakikite ʼo Elia. (1 Hau 3:5, 9; 2 Hau 2:9) ʼI Iselaele, neʼe maʼu e te ʼuluaki foha ʼo he tagata ia vahe ʼe lua ʼo te tofiʼa. (Tet. 21:15-17) ʼO toe feia pe, neʼe kole age e Eliseo kia Elia ke ina fakamoʼoni ia ia ko hona foha fakalaumalie. Pea tahi, neʼe toe loto foki ia Eliseo ke ina toe maʼu te lotomalohi ʼo Elia, ʼae neʼe lahi tona ʼofa kia Sehova.—1 Hau 19:13, 14.

Neʼe kotea te tali ʼa Elia ki tana tagata faifekau? Neʼe ina ui fenei age: “E ke kole he mea faigataa. Kae kapau e ke sio anai kia au i te temi ae e too ai au maia koe, pea e hoko anai te mea aena kia koe; pea kapau e mole ke sio anai ki toku ave, pea e mole hoko anai te mea aena.” (2 Hau 2:10) ʼI tona fakahagatonu, ʼe ko fakaʼuhiga ʼe lua ʼo te tali ʼa Elia. ʼUluaki, ʼe fakalogo pe anai ki te ʼAtua tana foaki te meʼa neʼe kole e Eliseo. Lua, kapau ʼe fia maʼu e Eliseo tana kole, pea ʼe maʼua anai ke nofo agatonu kia Elia, tatau aipe pe kotea ʼae ʼe feala ke hoko.

KOTEA ʼAE NEʼE SIO KI AI IA ELISEO?

Neʼe kotea te manatu ʼa te ʼAtua ʼo ʼuhiga mo te kole ʼa Eliseo? ʼE tou lau fenei: “Nee na hoko atu leva tana haele, o fai-palalau, pea fokifa leva kua vaei naua e he saliote afi mo ni hosi afi, pea nee hake leva ia Elia ki lagi i he ahiohio. Nee sio ia Eliseo.”a Neʼe ko te tali ʼaia ʼa Sehova ki te kole ʼa Eliseo. Neʼe sio ia Eliseo ki te hake ʼa Elia, pea ina maʼu te ʼu vahe ʼe lua ʼo tona laumalie fakakikite pea mo liliu ko te foha fakalaumalie ʼo te polofeta.—2 Hau 2:11-14.

Neʼe toʼo leva e Eliseo te pulupulu fakapolofeta ʼae neʼe fakato e Elia ʼo fakatui kia ia. Ko te fakaʼiloga leva ʼaia ʼo tona ʼuhiga polofeta ʼa te ʼAtua. Ko te tahi fakamoʼoni ʼo tona ʼuhiga polofeta ʼe ko tana fakahoko te milakulo ʼae ko te vaeluaʼi ʼo te Vaitafe ʼo Solotane.

ʼE mahino ia, neʼe malave ʼaupito kia Eliseo tana sio ʼae ki te ʼave ʼo Elia ʼi te ʼahiohio. Koteʼuhi neʼe heʼeki sio he tahi ki ni hosi mo he saliote afi. Neʼe ko te ʼu fakamoʼoni ʼaia ʼo te tali e Sehova ia te kole ʼa Eliseo. Ka tali e te ʼAtua ki ʼatatou kole, ʼe mole tou sio anai ki ni hosi mo he saliote afi. Kaʼe ʼe feala ke tou mahino ʼe fakaʼaoga e te ʼAtua tona mafimafi moʼo fakahoko tona finegalo. Pea ka tou sio ki te tapuakiʼi e Sehova te koga ʼo tana kautahi ʼi te kele, ʼe tou “sio” ki te gaue ʼo tana saliote fakalaumalie.—Esk. 10:9-13.

Neʼe lahi te ʼu aluʼaga neʼe sio ai ia Eliseo ki te mafimafi ʼo Sehova. Neʼe fakafealagia e te laumalie maʼoniʼoni ʼo te ʼAtua ke fakahoko e te polofeta ia milakulo ʼe 16, ʼo tuʼa lua age ia ʼi ʼae neʼe fai e Elia.b Neʼe toe sio ia Eliseo ki ni hosi pea mo ni saliote afi ʼi te temi ʼae neʼe ʼa takai ai te kolo ko Totane, ohage ko tona fakamatala ʼi te kamata ʼo te alatike.

NEʼE FALALA IA ELISEO KIA SEHOVA

Logo la te ʼa takai e te ʼu fili ia Totane, kaʼe neʼe mole mataku pe la ia Eliseo. Kotea tona tupuʼaga? Koteʼuhi neʼe malohi tana tui kia Sehova. ʼE toe ʼaoga ke tou maʼu te taʼi tui ʼaia. Koia, tou kole te laumalie maʼoniʼoni ʼo te ʼAtua ke feala hatatou maʼu te tui pea mo te ʼu kalitate ʼae ʼo te fua ʼo te laumalie.—Luka 11:13; Kal. 5:22, 23.

ʼAki te aluʼaga ʼae neʼe hoko ʼi Totane, neʼe toe mahino ai kia Eliseo ʼe feala ke falala ki te puipui ʼa Sehova ʼaki tana kau ʼaselo. Neʼe mahino ai te polofeta neʼe fekauʼi e te ʼAtua tana kau ʼaselo ke natou ʼa takai te kolo pea mo te ʼu fili. ʼAki tana fakakiviʼi te ʼu fili, neʼe haofaki fakamilakulo ai e te ʼAtua ia Eliseo pea mo tana tagata faifekau. (2 Hau 6:17-23) ʼI te aluʼaga fakamataku ʼaia pea mo ʼihi atu, neʼe maʼu e Eliseo te tui pea mo ina tuku katoa tana falala kia Sehova.

Ohage ko Eliseo, tou falala kia Sehova ʼAtua. (Taag. 3:5, 6) Kapau ʼe tou fai feia, pea ʼe ʼofa mai anai te ʼAtua mo ina tapuakiʼi tatou. (Pes. 67:2) ʼE moʼoni, ʼe mole ʼa takai tatou e ni saliote mo ni hosi afi. Kaʼe lolotoga te “mamahi lahi” ʼae ka haʼu, ʼe puipui anai e Sehova tana hahaʼi. (Mat. 24:21; Apk. 7:9, 14) ʼO aʼu ki te temi ʼaia, tou manatuʼi tuʼumaʼu ko te ʼAtua ʼe ko totatou “nonoaga.”—Pes. 62:9.