“Te Tau ʼAē Kā Ina Fakagata Anai Te ʼu Tau Fuli”
‘ ʼE au fakapapau atu ʼe ko te tau fakaʼosi ʼaenī,—te tau ʼaē kā ina fakagata anai te ʼu tau fuli.’—WOODROW WILSON, PELESITĀ ʼO AMELIKA (1913-1921).
NEʼE ko te ʼu fakaʼamu lahi ʼaia ʼa te tahi tagata takitaki ʼo te mālamanei, ʼi te fakaʼosi ʼo te ʼUluaki Tau Fakamālamanei, kua hili nei kiai taʼu e 90. Ko te fihi fakamālamanei ʼaia neʼe fakamataku ʼaupitō, koia ko nātou ʼaē neʼe mālo ʼi te tau neʼe natou loto, pea neʼe ʼaoga kiai, ke natou tui ko te ʼu sākilifisio lahi ʼaē neʼe natou fai ʼe maʼu ai tona ʼu tapuakina ʼe tologa. Kae neʼe mole feala ki te ʼu tau fakatagata ke natou fakatokatoka kātoa te ʼu fihifihia, pea tāfito ʼe mole feala hanatou pulihi te ʼu fihifihia ʼaē ʼe tupu ai te ʼu tau.
Hili ʼaia taʼu e 20 ki te fakapapau fakapunamaʼuli ʼaē neʼe fai e te Pelesitā ko Wilson, pea hoko ai leva te Lua Tau Fakamālamanei. Pea ʼi te tau ʼaia, neʼe lahi age ia ʼi te ʼuluaki tau ia te kau mātea pea mo te ʼu maumau. ʼAki te ʼu masini foʼou ʼaē neʼe faʼu e te tagata ʼi te ʼu taʼu e ʼuafulu ʼaenī kua hili, neʼe tupu ai te kua ʼāsili age ʼo te mamate ʼa te tokolahi. ʼI te fakaʼosiʼosi ʼo te lua tau fakamālamanei, neʼe mahino ki te kau takitaki ʼo te mālamanei ia te fealagia ʼaē ke hoko he ʼu tau ʼi te temi fuli pē.
ʼI te taʼu 1945, ko te Senelale Amelika ko Douglas MacArthur, neʼe ina ʼui fēnei: “Ko totatou faigamālie fakaʼosi pē ʼaenī moʼo fakagata ia te ʼu tau. Kapau ʼe mole tou fakakaukauʼi he puleʼaki ʼe lahi age pea mo lelei age, ʼe hoko moʼoni mai anai ia Halamaketone.”
Neʼe ʼiloʼi e te Senelale ko MacArthur ia te ʼu maveuveu ʼaē neʼe hoko ki Nagasaki pea mo Hiroshima ʼi te tō kiai ʼo te ʼu foʼi pulu atomike e lua ʼi te ʼu ʼaho fakaʼosi ʼo te lua tau fakamālamanei. Ko te fakaʼauha fakamataku ʼaia neʼe hoko ki te ʼu kolo ʼaia e lua ʼo Saponia neʼe tupu ai tana foaki ia te fakaʼuhiga foʼou ki te kupu “Halamaketone,” ʼe ko he fakaʼauha kātoa ʼaki he tau nukeleʼea, ʼe feala ai ke pulihi ai te tagata ʼi te kele.
ʼE kei tuʼaniaʼi pē e te mālamanei naʼa pulinoa te tagata ʼi he tau fakanukeleʼea. ʼI te ʼu taʼu 1960, ko te ʼu mālohi fakamālamanei e lua neʼe nā fai te puleʼaki ʼe fakaʼuhiga ko te “hoko moʼoni ʼo tanā fematehiʼaki.” Neʼe nā fakatuʼutuʼu ke feʼauga tanā ʼu foʼi pulu tū fenua peʼe ko he ʼu faʼahiga puleʼaki moʼo fakaʼaluʼalu te ʼu mahafu ʼaia, ke hoko moʼoni ai te fakaʼauha ʼo te toko 25 ʼi te teau ʼo te hahaʼi sivile ʼaē neʼe fakafeagai kiā nātou pea mo maumauʼi te 50 ʼi te teau ʼo te mālohi faʼu masini, tatau aipē peʼe ko te faʼahi fea ʼaē kā kamata ai te fihi. Tokosiʼi pē te hahaʼi neʼe falala ki te puleʼaki ʼaia moʼo puipui ia te tokalelei ʼo te mālamanei.
Iā ʼaho nei, kua ʼāʼāsili age ia te ʼu mahafu fakanukeleʼea pea ʼe kei hoholo atu pē ia te mamate ʼa te hahaʼi tokolahi, ʼuhi ko te ʼu tau ʼaē ʼi te ʼu kolo. ʼE kei feala pē ke hoko ki te mālamanei ia he fakaʼauha kātoa fakanukeleʼea. Logolā ko te hahaʼi ʼe natou fakaʼamu ke fakagata lā te tau, kae tokosiʼi ʼe natou tui ʼe feala ke hoko te fakatuʼutuʼu ʼaia ʼaki he tau peʼe ko he tahi age puleʼaki.
Tahi ʼaē meʼa, ʼe ʼui ʼi te Tohi-Tapu ʼe ko te tau pē e tahi ʼaē kā ina fakagata anai ia te ʼu tau fuli. ʼE ina fakahigoaʼi ia te tau ʼaia ko “Halamaketone,” pea ko he kupu ʼe fakaʼaogaʼi māhani e te hahaʼi ki he tuʼutāmaki fakanukeleʼea. ʼE feafeaʼi anai te haga ʼa Halamaketone ʼo fakagata moʼoni ia te tau? Ko te ʼalatike kā hoa mai, ʼe tali anai ki te fehuʼi ʼaia.
[Haʼuʼaga ʼo te paki pasina 3]
DTRA Photo