Koteā ʼAē ʼe Tou Ako Mai Iā Sesu?

ʼO ʼUhiga Mo Te Puleʼaga ʼo Te ʼAtua

Koteā ia te Puleʼaga ʼo te ʼAtua?

Ko te Puleʼaga ʼo te ʼAtua ʼe ko he puleʼaga kā ina puleʼi anai ia te kele kātoa. Neʼe ʼui fēnei e Sesu: “Koia ʼe tonu ke kotou faikole fēnei: . . . ‘Ke hoko mai tou puleʼaga. Ke fai tou finegalo ʼi te kele, ohagē ko selō.’ ”—Mateo 6:9, 10; Taniela 2:44.

Ko ai anai te kau takitaki ʼo te Puleʼaga ʼo te ʼAtua?

Neʼe tupu ia Sesu ke Pule ʼi te Puleʼaga ʼo te ʼAtua. Neʼe ʼui fēnei e te ʼāselo ki te faʼē ʼa Sesu: “ ʼE foaki anai e Sehova ʼAtua kiā te ia te hekaʼaga fakahau ʼo Tavite tana tamai, pea ʼe hau anai ia.” (Luka 1:30-33) Pea tahi ʼaē meʼa, neʼe filifili e Sesu niʼihi ʼo tana ʼu tisipulo ke natou pule fakatahi mo ia. Neʼe ina ʼui fēnei ki tana kau ʼapositolo: “Ko koutou ʼaē neʼe nonofo fakatahi tuʼumaʼu mo au ʼi toku ʼu ʼahiʼahi; pea ʼe au fai he fuakava mo koutou, ohagē ko taku Tamai neʼe ina fai te fuakava mo au, ki he puleʼaga.” (Luka 22:28, 29; Taniela 7:27) Ko tona kātoa ko te toko 144 000 tisipulo ʼa Sesu ʼaē kā pule fakatahi anai mo ia.—Fakahā 5:9, 10; 14:1.

ʼE tuʼu anai ʼifea ia te Puleʼaga?

ʼE pule anai ia te Puleʼaga ʼo te ʼAtua mai te lagi. Neʼe ʼui fēnei e Sesu ki tana kau tisipulo: “Kapau ʼe au ʼalu ʼo teuteuʼi he nofoʼaga maʼa koutou [ʼi te lagi], ʼe au toe haʼu pea ʼe au tali anai koutou iō ʼoku, koteʼuhi ko te potu ʼaē ʼe au ʼi ai, ke toe ʼi ai foki mo koutou. . . . [ʼE] au ʼalu ki te Tamai.”—Soane 14:2, 3, 12; Taniela 7:13, 14.

Koteā anai kā fai e te Puleʼaga ʼo te ʼAtua ʼo ʼuhiga mo te agakovi?

ʼE fakamaʼa anai e Sesu ia te kele mai te hahaʼi agakovi. Neʼe ʼui fēnei e Sesu: “Kā haʼu anai te Foha ʼo te tagata [ia Sesu] ʼi tona kolōlia, pea mo te kau ʼāselo fuli mo ia, pea ʼe heka anai ki tona hekaʼaga fakahau fakakolōlia. Pea ʼi ʼona muʼa ʼe tānaki anai te ʼatu puleʼaga kātoa, pea ʼe ina fevaevae kehe ʼaki anai te hahaʼi. . . . Pea ko nātou ʼaenī [te kau agakovi] ʼe natou ʼolo ai anai ki te pulinoa heʼegata, kae ko te kau agatonu, ki te maʼuli heʼegata.”—Mateo 25:31-34, 46.

Ko ai anai ʼaē kā māʼuʼuli ʼi te kele ʼi te takitaki ʼa te Puleʼaga?

Neʼe ʼui fēnei e Sesu: “Fiafia ia nātou ʼaē ʼe agamalū, heʼe natou maʼu anai te kele.” (Mateo 5:5; Pesalemo 37:29; 72:8) ʼE nofoʼi anai ia te kele e te hahaʼi ʼaē ʼe natou lolotoga ako nei ia te feʼofaʼaki. Neʼe ʼui fēnei e Sesu ki tana ʼu tisipulo: “ ʼE au foaki atu kiā koutou te fakatotonu foʼou, ke kotou feʼofaʼofani; ohagē ko taku ʼofa ʼaē kiā koutou, ke toe fēia foki mo koutou, ke kotou feʼofaʼofani. ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.”—Soane 13:34, 35.

Koteā ʼaē kā fai anai e te Puleʼaga ʼo te ʼAtua ki te hahaʼi ʼo te kele?

ʼE fakamālōlō anai e Sesu ia te mālamanei mai te mahaki. ʼI tana ʼi te kele, neʼe talanoa ia Sesu ki te hahaʼi tokolahi “ ʼo ʼuhiga mo te puleʼaga ʼo te ʼAtua, pea neʼe ina fakamālōlō ia nātou ʼaē neʼe ʼaoga ke fakamālōlō.” (Luka 9:11) ʼI te hili ʼo te mamata ʼa te ʼapositolo ko Soane kiā Sesu ʼaē kua fakatuʼuake ʼi te meʼa ʼaē neʼe sio kiai, neʼe ina tohi fēnei: “Neʼe au sio ki te lagi foʼou pea mo te kele foʼou. . . . Neʼe au logo ki te leʼolahi ʼe haʼu mai te hekaʼaga fakahau, ʼo ina ʼui fēnei: ‘Koʼenī, ko te fale fehikitaki ʼo te ʼAtua ʼe nofo mo te hahaʼi. . . . Pea ʼe ina holoholoʼi anai te ʼu loʼimata fuapē ʼi ʼonatou mata, pea ko te mate ʼe puli anai ia.’ ”—Fakahā 21:1-4.

ʼE fakaliliu anai e te Puleʼaga ʼo te ʼAtua ia te kele ko he Palatiso. Neʼe ʼui fēnei age e te tagata agakovi ʼaē neʼe mate fakatahi mo Sesu kiā te ia: “Sesu, ke ke manatuʼi au mokā ke hū anai ki tou puleʼaga.” Pea tali age e Sesu kiā te ia: “ ʼE au tala moʼoni atu kiā te koe ʼi te ʼaho nei, ʼe ke ʼi te Palatiso anai mo au.”—Luka 23:42, 43; Isaia 11:4-9.

ʼO ʼuhiga mo he tahi age ʼu fakamahino, kotou vakaʼi ia te kāpite 8 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu?a

[Nota]