Te ʼu Fehuʼi ʼa Te Kau Lautohi
Mai tona ʼaluʼaga ʼaē ko Sehova ʼe ina tapuʼi te tauhi tamapua, he koʼē neʼe mole ina fakatūʼā ia Alone ʼi tana faʼu te vītulo ʼaulo?
Ohagē ko tona fakamatala iā Ekesote kāpite 32, neʼe maumauʼi e Alone ia te lao ʼa te ʼAtua ʼo ʼuhiga mo te tauhi tamapua ʼi tana faʼu ia te vītulo ʼaulo. (Eke. 20:3-5) Koia, “ ʼi te ʼita lahi ʼaē a Sehova [kiā Alone], neʼe ina fia fakaʼauha ia ia; kae [ko Moisese] neʼe kole mamahi ʼo ina hūfaki ia Alone ʼi te moʼi temi pē ʼaia.” (Teu. 9:19, 20) Neʼe “mālohi ʼaupitō” koa ia te kole mamahi ʼa te tagata faitotonu ko Moisese ʼo ʼuhiga mo Alone? (Sake 5:16) ʼEī. ʼUhi ko te kole mamahi ʼaia pea mo te tahi age ʼu tupuʼaga e lua, neʼe tali e Sehova ki te faikole ʼa Moisese pea neʼe mole ina fakatūʼā ia Alone.
Ko te tahi tupuʼaga ʼo te mole fakatūʼā ʼo Alone ʼuhi ko tana nofo agatonu kiā Sehova. ʼI te fakatotonu ʼaē kiā Moisese ke ʼalu kiā Falaone pea mo fakamavae ia te kau Iselaele mai Esipito, neʼe fili e Sehova ia Alone ke kaugā fagona mo Moisese pea ke ʼalu ʼo fakahoko palalau kiā Falaone. (Eke. 4:10-16) Ko te ʼu tagata talagafua ʼaia e toko lua neʼe nā ʼolo ki te hau ʼo Esipito tuʼa lahi, logolā ia te loto lahi ʼa Falaone. Koia, ʼi te kei nofo ʼa Alone ʼi Esipito neʼe tauhi agatonu pea mo falala mālohi kiā Sehova.—Eke. 4:21.
Tou toe vakaʼi peʼe koteā ʼaē neʼe ina uga ia Alone ke ina faʼu te vītulo ʼaulo. Neʼe nofo ia Moisese ʼi te moʼuga ʼo Sinai lolotoga ʼaho e 40. ʼI te “sio [ʼa] te hahaʼi neʼe tuai te hifo mai ʼa Moisese mai te moʼuga,” neʼe natou fakalotoʼi ia Alone ke ina faʼu he fakatātā maʼa nātou. Neʼe lagolago ia Alone ki te faʼu ʼo te vītulo ʼaulo ʼaia. (Eke. 32:1-6) Kae, ko te aga ʼaē neʼe fai e Alone ʼe hā mai neʼe mole ʼalutahi tana manatu mo te ʼu tauhi tamapua ʼaia. Neʼe tō ki te fakahala ʼaia, he neʼe fakaneke e te kau Iselaele. ʼI te fakatokatoka e Moisese te fihifihia ʼo ʼuhiga mo te tauhi tamapua ʼaē neʼe iku ki he mātea, ko te ʼu foha fuli ʼo Levi—ʼo kau ai mo Alone—neʼe natou lagolago mālohi kiā Sehova. Kae ko te toko tolu afe kau tauhi tamapua ʼaē neʼe tupu mai ai te fihifihia ʼaia neʼe natou mamate.—Eke. 32:25-29.
Ki muli age, neʼe ʼui e Moisese ki te hahaʼi: “Neʼe kotou agahala koutou, ki he agahala mamafa.” (Eke. 32:30) Koia, neʼe mole feala ke tukugākoviʼi pē ia Alone ki te agahala mamafa ʼaia. Ko Alone pea mo te hahaʼi ʼo Iselaele neʼe natou maʼu ia te manavaʼofa lahi ʼo Sehova.
Hili te tauhi tamapua ʼa te kau Iselaele ki te vītulo ʼaulo, neʼe fakatotonu e Sehova ke fakanofo Alone ke liliu ko te pelepitelō lahi. Neʼe ʼui fēnei e te ʼAtua kiā Moisese: “ ʼE tonu anai ke ke fakatui kiā Alone ia te teu taputapu, pea ʼe tonu anai ke ke tākai ia ia pea mo ke fakatapuʼi, pea ʼe tonu anai ke tauhi kiā te au ko he pelepitelō.” (Eke. 40:12, 13) ʼE mahino papau ia, neʼe fakamolemole e Sehova kiā Alone tona vaivaiʼaga. Ko Alone neʼe lagolago agatonu ki te tauhi moʼoni ʼaki he loto kātoa kae neʼe mole kau ki te ʼu tauhi tamapua ʼaē neʼe fiatuʼu kiā Sehova.