Te Fakaʼuhiga ʼo Te ʼIloʼi ʼo Te Huafa ʼo Te ʼAtua
ʼE ʼI AI koa he fakaʼuhiga ʼo tokotou higoa? ʼI ʼihi potu ʼo te kele, ʼe ko he agamāhani te foaki ki he tamasiʼi ia he higoa ʼe lahi tona ʼu fakaʼuhiga. ʼE feala ʼaki te higoa ʼaē ʼe filifili ke hā ʼaki ai te ʼu akonaki ʼaē ʼe tui kiai te ʼu mātuʼa peʼe ko te ʼu kalitātē ʼaē ʼe maʼuhiga kiā nātou, peʼe ko te ʼu meʼa ʼaē ʼe natou ʼamanaki kiai, pea mo tanatou ʼu fakaʼamu ʼaē ʼo ʼuhiga mo te kā haʼu ʼo tanatou fānau.
ʼE mole ko he meʼa foʼou te foaki ʼaē ʼo he ʼu higoa ʼe lahi honatou ʼu fakaʼuhiga. ʼI te temi muʼa, ʼi te agamāhani neʼe foaki he higoa ki he tahi ʼuhi ko te fakaʼuhiga ʼo te higoa ʼaia. Neʼe feala ke fakahā ʼaki te higoa ʼaē neʼe fakatoʼo age ki he tahi, ia te ʼu gāue peʼe ko te ʼu agaaga ʼaē neʼe fakaʼamu ke ʼalutahi mo ia. Ohagē lā, ʼi te palalau age ʼa Sehova kiā Tavite ʼo ʼuhiga mo te kā haʼu ʼo tona foha ko Salomone, neʼe Ina ʼui fēnei: “[ʼE] higoa anai ko Salomone [ko tona fakaʼuhiga ko “Tokalelei”]; ʼi tona ʼu ʼaho, ʼe maʼuli anai ia Iselaele ʼi te tokalelei pea mo te fakatokatoka.”—1 Fakamatala 22:9.
ʼI ʼihi temi neʼe foaki e Sehova ia te higoa foʼou ki he tahi neʼe ina maʼu hona tuʼulaga foʼou. Ko te ʼohoana ʼaē neʼe paʼa ʼo Apalahamo, neʼe fakahigoa ko Sala, ko tona fakaʼuhiga “Taʼahine ʼAliki.” Koteā tona tupuʼaga? Neʼe fakamahino fēnei e Sehova: “ ʼE au tapuakiʼi anai ia ia pea ʼe au foaki atu anai ʼaki ia ia hou foha; ʼio, ʼe au tapuakiʼi ia ia pea ʼe liliu anai ko he ʼu puleʼaga; ʼe ʼomai anai ni ʼu hau mai iā te ia.” (Senesi 17:16) ʼE mahino mai, kapau ʼe tou mahino ki te tuʼulaga foʼou ʼaē neʼe foaki age kiā Sala pea ʼe tou mahino ai pe koʼē neʼe foaki age tona higoa foʼou.
ʼE feafeaʼi ki te huafa ʼaē ʼe maʼuhiga age ʼi te ʼu higoa fuli pē, ʼaē ko Sehova? Koteā tona fakaʼuhiga? ʼI te fehuʼi age e Moisese ki te ʼAtua ʼo ʼuhiga mo Tona huafa, neʼe tali fēnei age e Sehova: “E au fakahā anai pe ko ai au.” (Ekesote 3:14) Ko te Tohi-Tapu ʼo Rotherham ʼe ina fakaliliu fēnei te vaega Tohi-Tapu ʼaia: “ ʼE au liliu anai ko meʼa fuli ʼe au leleiʼia ke au fai.” Ko te huafa ʼo Sehova ʼe ina fakahā ko ia ko he ʼAtua ʼe lahi ʼaupitō tana ʼu gāue. Tou toʼo ia te fakatā ʼaenī: Ko he faʼē ʼe lagi ʼaoga anai ke ina fai he ʼu tuʼuga gāue kehekehe ʼi te ʼaho fuli, ʼi tana taupau tana fānau, ʼo mulimuli ki te ʼu meʼa ʼaē ʼe ʼaoga kiā nātou, ʼe feala ke liliu ko he afilimie, he fafine fai kuka, he fafine faiako. ʼE toe fēia mo Sehova, kae ʼi hona ʼaluʼaga ʼe māʼoluga age. Moʼo fakahoko tana fakatuʼutuʼu ʼofa maʼa te mālamanei, ʼe feala ke liliu ko te meʼa pē ʼe ina leleiʼia, ʼo ina fai ia te gāue ʼaē ʼe ʼaoga ke ina fai. Ko te ʼiloʼi ʼo Sehova ʼi tona huafa, ʼe fakaʼuhiga ai ke tou mahino, mo fakaʼapaʼapa pea mo fakafetaʼi ki tana ʼu tuʼuga gāue ʼaē ʼe ina fai.
Meʼa fakaʼofaʼofa heʼe ko te matalelei ʼo te ʼulugaaga ʼo te ʼAtua ʼe ū kiā nātou ʼaē ʼe mole natou ʼiloʼi ia ia ʼaki tona huafa. Kae ʼaki takotou ako ia te Tohi-Tapu, ʼe feala ai ke kotou fakafetaʼi ki te ʼu gāue ʼa Sehova ʼi tona ʼuhiga Tagata Fai Tokoni poto, Tagata Haofaki mālohi, pea mo Tagata Foaki Lahi, pea mo ʼihi atu ʼu gāue. Ko te fakaʼuhiga lahi ʼo te huafa ʼo Sehova ʼe mahino ia ʼe fakaofoofo.
Kae ʼe mole faigafua tuʼumaʼu ia te ʼiloʼi lelei ʼo te ʼAtua. ʼE fakahā anai ʼi te ʼalatike ʼaē kā hoa mai ia te tupuʼaga ʼaē ʼo tona mole faigafua.