ʼE Mole Kei Nā Mātataku ʼo ʼUhiga Mo Te Fakaʼosi

ʼI TE fakaʼosi ʼo te ʼu taʼu 1970, ko Gary pea mo Karen neʼe nā tui mālohi neʼe kua ovi mai ia te fakaʼosi ʼo te mālamanei. Koia neʼe nā mavae ai ʼi te kolo ʼo nā ʼolo ki te vao matuʼa pea nā fakatotonu ke nā gāueʼi te kele moʼo tō kiai te ʼu meʼa fuli ʼaē ʼe ʼaoga kiā nāua. Neʼe nā loto ke nā hao ʼi te fakaʼosi ʼo te mālama ʼaenī.

Ke nā liliu ʼo popoto ʼi te ʼu faʼahi ʼaē kā ʼaoga kiā nāua, neʼe nā toʼo te ʼu tohi, mo kau ki te ʼu kalasi ako pea mo te ʼu seminālio, pea mo fai palalau mo te hahaʼi ʼe tokolahi. Neʼe nā fai tanā gāueʼaga pea mo tō ia te ʼu fuʼu ʼakau e 50 ʼe ʼi ai ʼonatou fua. Neʼe nā tānaki te ʼu pulapula pea mo te ʼu meʼa gāue. Neʼe nā ako ia te tō pulapula pea mo te taupau ʼo te meʼa kai. Ko tonā kaumeʼa neʼe ina akoʼi age kiā nāua te matehi ʼo he manu pea mo te taupau ʼaē ʼo te kanoʼi manu. Neʼe ako e Karen ke ina ʼiloʼi ʼi te vao matuʼa ia te ʼu ʼakau pea mo te ʼu aka ʼaē ʼe feala ke nā kai kiai mokā kua ʼosi te meʼa kai ʼaē neʼe nā tānaki kehe. Neʼe ako e Gary te fai ʼaē ʼo te lolo ʼaki te tūlina, te faʼu ʼaē ʼo he poe moʼo fakamāfana pea mo kuka, pea mo te laga ʼo he ʼapi kae mole ʼaoga kiai he ʼu meʼa gāue mai tuʼa atu.

ʼE ʼui fēnei e Karen: “ ʼI te hoko ʼo te ʼu ʼaluʼaga fakamataku ʼo te mālama ʼi te temi ʼaia, neʼe au manatu ai kua vave pulihi ia te mālamanei.” ʼE fakamahino fēnei e Gary: “Ohagē ko tona fai e ʼihi kau tūpulaga, neʼe au lagolago mālohi ki te fakagata ʼaē ʼo te fehiʼa ʼi te ʼu lanu, mo te Tau ʼi Vitename, pea mo te aga fakakākā. Kae mole fualoa kiai, pea neʼe mole kei au maʼu te loto falala. Neʼe hagē ia kiā au kā fakaʼauha te hahaʼi e nātou totonu, mo kapau ʼe hoholo fēia pē te maʼuli ia.”

ʼE ʼui fēnei e Gary: “ ʼI te tahi pō, neʼe maʼu toku temi, pea neʼe au toʼo ai te Tohi-Tapu, ʼo kamata lau mai te tohi ʼa Mateo ʼo aʼu ki te tohi ʼo Fakahā. Lolotoga pō e fā, neʼe au lau liuliuga ʼihi vaega Tohi-Tapu. ʼI te nima ʼaho, neʼe au ʼui fēnei age kiā Karen: ‘ ʼE tou māʼuʼuli nei ʼi te ʼu ʼaho fakamuli. Kua vave fakamaʼa e te ʼAtua ia te kele. ʼE tonu ke tā maʼu ia te hahaʼi ʼaē kā haofaki anai ʼi te ʼaho ʼaia.’ ” Neʼe kamata ʼolo ai ia Karen pea mo Gary ki te ʼu lotu kehekehe, ʼo nā kumi ia te hahaʼi ʼaia ʼaē ʼe fia nonofo teuteu ki te fakaʼosi.

Mole tuai, ko te Fakamoʼoni ʼa Sehova neʼe fisifisi ʼi tonā matapā, pea neʼe kamata atu aipē ia te ako Tohi-Tapu. ʼE manatuʼi fēnei e Karen: “Neʼe lahi ʼaupitō toku fiafia, he neʼe fakamahino fakalelei mai kiā au ia te Tohi-Tapu. Ko te moʼoni ʼo ʼuhiga mo te temi ʼo te fakaʼosi neʼe ko te meʼa ʼaia ʼaē neʼe au kumi, pea neʼe kua au maʼu leva. Neʼe ʼi ai te ʼamanaki moʼoni ki te kā haʼu. Kae ko te meʼa ʼaē neʼe lelei age, neʼe ko taku kamata kaumeʼa mo taku Tamai ʼaē ʼi selō, te Tupuʼaga pea mo ʼAtua ʼo te ʼatulaulau.”

ʼE ʼui fēnei e Gary: “Kua au maʼu ia te fakatuʼutuʼu moʼoni ki toku maʼuli. ʼI te temi ʼaē neʼe au kamata ako ai ia te Tohi-Tapu, neʼe mole kei feala haku tuku. Neʼe au lau ia he lea fakapolofetā ʼi te Tohi-Tapu, mo vakaʼi ia te ʼu fakamoʼoni ʼo te hoko ʼo te lea fakapolofetā ʼaia, pea neʼe au tui ai kua vave fakahoko e te ʼAtua tana gāue. Neʼe au manatu fēnei: ‘ ʼE tonu ki te hahaʼi ke natou nonofo teuteu, mole ki te tuʼutāmaki ʼaē kā hoko mai, kae ke natou nofo teuteu ʼo mulimuli ki te maʼuli ʼaē ʼe loto e te ʼAtua ke tou maʼu.’ ” Neʼe mole kei mātataku ai ia Gary pea mo Karen ki te kā haʼu. Neʼe mole kei nā tuʼania ki te fakaʼosi ʼo te mālamanei, kae neʼe nā tui ko te ʼAtua ʼe ina pulihi anai ia te ʼu fihifihia ʼaē ʼe hoko ʼi te mālamanei pea mo tana fakaliliu ʼaē ia te kele ko he palatiso.

ʼI te temi nei, koteā ʼaē ʼe fai e Gary pea mo Karen, kua hili nei kiai taʼu e 25? ʼE ʼui fēnei e Karen: “ ʼE au haga fakatuputupu toku ʼofa kiā Sehova ʼAtua pea mo taku tui kiā te ia, pea mo au faiga ke au tokoni ki te hahaʼi ke natou fai fēia mo nātou. Ko au mo Gary ʼe mā fetokoniʼaki ki te taupau ʼaē ke mālohi tomā fāmili pea ke logotahi ʼi te tauhi ki te ʼAtua. ʼE mā faiga ke mā fakahoahoa lelei pē tamā ʼu gāue, pea mo faiga ke mā taupau ia he maʼuli ʼe faigafua ke feala ai hamā tokoni tuʼumaʼu ki te hahaʼi pea mo te ʼu meʼa ʼaē ʼe ʼaoga kiā nātou.”

ʼE hoko atu fēnei e Gary: “ ʼE au faikole tuʼumaʼu ke hoko mai ia te Puleʼaga ʼo te ʼAtua pea mo foaki ai he fīmālie ki te hahaʼi ʼe lauʼi miliona. ʼI te temi fuli pē ʼaē ʼe au palalau ai ki te hahaʼi ʼo ʼuhiga mo te logo lelei ʼo te Puleʼaga ʼo te ʼAtua, ʼe au faikole ke au lava maʼu he tahi pē ke au fakahā age kiā ia te ʼamanaki ʼaē ʼe tuʼu ʼi te Tohi-Tapu. Lolotoga taʼu e 25 tupu, neʼe agalelei ia Sehova ʼo tali ki taku faikole. Ko au mo Karen, ʼe mā tui kua ovi mai te temi ʼaē kā fakahoko ai e Sehova he ʼu fetogi ki te kele, kae ʼe mole kei mā mātataku ʼo ʼuhiga mo te fakaʼosi.”—Mateo 6:9, 10; 2 Petelo 3:11, 12.

[Paki ʼo te pasina 9]

Ko Gary pea mo Karen ʼe nā fiafia ʼi te temi nei ʼi te tokoni ki te hahaʼi ke natou maʼu ia te ʼamanaki mai te logo ʼo te Tohi-Tapu