Te ʼu Fehuʼi ʼa Te Kau Lautohi

ʼE maʼuhiga feafeaʼi kiā Sehova ia te mate ʼo tana kau agatonu?

▪ Neʼe hiva fēnei ia te tagata fai pesalemo: “E mauhiga osi kia mata o te Eteleno, te mate o natou ae e oofa kia ia.” (Pes. 116:15) ʼE maʼuhiga kiā Sehova ia te maʼuli ʼo te hahaʼi ʼaē ʼe tauhi kiā te ia. Koia iā Pesalemo 116 ʼe mole fakaʼuhiga pē ia ki te mate ʼo he foʼi tokotahi.

Kā fai he akonaki ʼi he ʼavaifo ʼo he tehina peʼe ko he tuagaʼane, ʼe mole ʼaoga anai ke tou fakaʼaogaʼi ia te vaega ʼo Pesalemo 116:15, logolā neʼe mate agatonu. Koteā tona tupuʼaga? Koteʼuhi ko te faʼahi ʼaē neʼe talanoa kiai ia te tagata fai pesalemo, ʼe lahi ʼona fakaʼuhiga. ʼE feala ke fakaʼuhiga ʼe mole fakafealagia anai e te ʼAtua ke mate ia tana kau agatonu fuli ʼaē ʼe maʼuhiga kiā te ia.—Vakaʼi ia Pesalemo 72:14; 116:8.

ʼE fakapapauʼi mai kiā tātou iā Pesalemo 116:15, ʼe mole fakafealagia anai e Sehova ke mamate ia tana kau agatonu fuli. ʼE ʼiloga ʼi te hisitolia ʼo te kau Fakamoʼoni ʼa Sehova ʼo totatou temi, neʼe natou kātakiʼi te ʼu ʼahiʼahi lalahi pea mo te fakataga. Koia ʼe hā ai ʼe mole tuku anai e te ʼAtua ke fakaʼauha fuli tana hahaʼi.

ʼE mole fakatuʼakoi ia te mālohi ʼa Sehova pea ʼe mole tō noa ʼana fakatuʼutuʼu. Koia ʼe mole tuku anai e Sehova ke fakaʼauha ia tātou fuli, heʼe hagē leva ia ʼe mālohi age ʼona fili iā te ia. Pea ʼe mole toe feala anai ke hoko te fakatuʼutuʼu ʼa Sehova ʼaē ke nofoʼi ia te kele e he kau agatonu. (Esa. 45:18; 55:10, 11) Pea ʼe feala ke gata ia te tauhi taputapu ʼaē kiā Sehova ʼi te kele mo kapau ʼe mole toe ʼi ai he hahaʼi ʼe tauhi kiā te ia ʼi te malaʼe fakakelekele ʼo tona fale lotu lahi fakalaumālie. ʼE mole ʼi ai anai he hahaʼi ke natou faʼufaʼu ia “te kele foou,” te hahaʼi agatonu ʼi totatou kele ʼi te takitaki ʼo “te lagi foou.” (Apk. 21:1) ʼO toe fēia aipē ʼe mole feala anai ke hoko ia te ʼAfio ʼa Kilisito Iā Taʼu e Afe mo kapau ʼe mole kei ʼi ai he tahi ʼi te kele.—Apk. 20:4, 5.

ʼE fakalakahalaʼi anai ia te tuʼulaga ʼo te ʼAtua pea mo tona matagafua mo kapau ʼe ina fakafealagia ki ʼona fili ke natou molehi kātoa ia tana hahaʼi ʼi te kele. Kapau ʼe ina fakafealagia, pea ʼe ʼulihi anai e te faʼahi ʼaia ia te ʼuhiga Tuʼi ʼo te ʼAtulaulau ʼo te ʼAtua. Pea tahi, koteʼuhi ʼaē ʼe fakaʼapaʼapa ia kiā ia totonu mo tona huafa taputapu, pea ʼe mole fakafealagia anai e Sehova ke mamate tana hahaʼi agatonu fuli. Koia tou fakatokagaʼi ia te faʼahi ʼaenī: Koteʼuhi ʼaē ʼe ko he ʼAtua ʼe “faitotonu,” ʼe ina haga taupau anai ia te hahaʼi ʼaē ʼe tauhi agatonu age kiā te ia. (Tet. 32:4; Sen. 18:25) Koia, ʼi tana fakafealagia ʼaē ke matematehi fuli ʼana kaugana ʼe mole ʼalutahi mo te manatu ʼaenī ʼi te Folafola ʼa te ʼAtua: “E mole siaki anai e te Eteleno tana hahai, o tupu ko tona huafa lahi.” (1 Sam. 12:22) Koia, “e mole fakanoai e te Eteleno tana hahai, e mole ina siaki tona tofiga.”—Pes. 94:14.

ʼE ko he ʼaluʼaga fakalotofīmālie ia te ʼiloʼi ʼaē ʼe mole pulihi anai ia te hahaʼi ʼa Sehova ʼi te kele. Koia, tou fakahā ia tatatou agatonu ʼaē ki te ʼAtua, ʼo tou falala ki tana fakapapau: “E noa anai te mahafu tau fuli nee fau ke tau kia koe; pea ko te u alelo fuli ae e malaga ake anai kia koe i te fakamaauaga e ke tauteai anai natou. Koena te tofiga o te u tagata faifekau a te Eteleno, koena te fakamauli ae e hau anai maia au kia natou.”—Esa. 54:17.

[Fakamatala ʼo te pāsina 32]

ʼE mole tuku anai e te ʼAtua ke fakaʼauha fuli tana hahaʼi