ʼE Fia ʼIloʼi e Te Kau Lautohi . . .

Ko Ai ʼAē Neʼe Ina Fakaʼasi Ia Te “Fetuu”?

▪ Neʼe kua kotou sisio koa ki te ʼu fakatātā peʼe ko te kiʼi gaoʼi ʼo te tupu tagata ʼa Sesu ʼaē ʼe hā ai te ʼu hau e toko tolu, peʼe ko te kau “masi,” ʼe natou ʼolo ʼo fakasiosio ia te kiʼi toe ko Sesu ʼi te kaiʼaga manu? ʼO mulimuli ki te fakamatala ʼaia, neʼe fakaʼaogaʼi e te ʼAtua ia te fetuʼu moʼo taki ia nātou ki te fale manu ʼi Petelehemi. Tokolahi te kau tamaliki neʼe natou fakamaʼumaʼu ia te ʼu higoa ʼo te ʼu hau ʼaia e toko tolu: ko Melekiole, mo Kasipale pea mo Paletasale. Koia, ʼe ʼalutahi koa ia te hisitolia ʼiloa ʼaenī pea mo ʼaē ʼe akoʼi moʼoni mai ʼi te Tohi-Tapu? Kailoa. Heʼe lahi ia te ʼu ʼaluʼaga ʼe mole moʼoni ʼi te hisitolia ʼaia.

ʼUluaki, ko ai ia te ʼu tagata ʼaia? ʼI te lea Fakakeleka, neʼe mole ʼui ia ʼi te Tohi-Tapu neʼe ko he ʼu hau peʼe ko he ʼu tagata fakapotopoto. Neʼe ko te kau masi peʼe ko te kau tagata sivi fetuʼu. ʼE mahino papau ia, neʼe ko te ʼu tagata ʼaia neʼe fakatafito tanatou tauhi fakapagani ki te ʼu fetuʼu. ʼE mole tuʼu ʼi te Tohi-Tapu ʼonatou higoa pea neʼe mole fakahā pe neʼe natou toko fia.

Lua, ko te temi fea ʼaē neʼe ʼomai ai te ʼu tagata ʼaia? Neʼe mole ʼomai ia ʼi te temi ʼaē neʼe kei meamea ai ia Sesu ʼi te kaiʼaga manu. He koʼē ʼe tou ʼiloʼi ia te faʼahi ʼaia? Neʼe ʼui fēnei e te tagata faitohi Evaselio ko Mateo: “Nee natou hu leva ki te fale, nee natou sisio leva ki te kii toe mo Malia, tana fae.” (Mateo 2:11) ʼE tou fakatokagaʼi ko Sesu neʼe mole kei meamea kae ʼe ʼui ʼi te vaega ʼaenī neʼe ko “te kii toe.” Pea tahi neʼe toe ʼui “nee natou hu leva ki te fale” ʼo tou mahino ai neʼe mole kei nonofo ia Malia mo Sosefo ʼi te fale manu.

Tolu, ko ai ʼaē neʼe ina fakaʼasi ia te “fetuu” moʼo taki ʼaki ia te kau tagata sivi fetuʼu? ʼI temi nei, ʼe lolotoga akonakiʼi e te kau takitaki lotu neʼe ko te ʼAtua ʼaē neʼe ina fakaʼasi ia te “fetuu.” ʼE moʼoni koa? Tou manatuʼi, neʼe mole taki fakahagatonu e te “fetuu” ia te kau tagata sivi fetuʼu ki Petelehemi. Kae neʼe ina taki ia nātou ki Selusalemi ki te Hau ko Helote. Neʼe natou fakahā ia te tupu tagata ʼa Sesu ki te tagata maheka pea mo fai fakapō ʼaia, ʼo tupu ai tana fehiʼa lahi ki te tamasiʼi heʼe ko ia ʼaē kā liliu ko “te hau o te kau Sutea.” (Mateo 2:2) ʼAki he aga fakakākā, neʼe ʼui age e Helote kiā nātou ke natou toe liliu mai ʼo fakahā age ia te koga meʼa ʼaē ʼe nofo ai ia te tamasiʼi ʼaia, he neʼe loto ke ina fai he fakaʼapaʼapa ki ai. Ko te “fetuu” ʼaia ʼaē neʼe ina taki ia te kau tagata sivi fetuʼu kiā Sosefo mo Malia. Koia neʼe feala pē ʼaki ia te kau tagata sivi fetuʼu ke mate ia te tamasiʼi mo kanapaulā neʼe mole haofaki ia ia e te ʼAtua. ʼE meʼa lelei ke ina fai ia te faʼahi ʼaia. Koia neʼe ʼitaʼita ia Helote ʼi te temi ʼaē neʼe mole toe liliu age ai ia te kau tagata sivi fetuʼu kiā te ia. Neʼe ina fakatotonu ai ke matematehi ia te tamaliki tagata fuli ʼe taʼu lua peʼe veliveli ifo ʼi Petelehemi kātoa.—Mateo 2:16.

Ki muli age, neʼe ʼui e Sehova ʼo ʼuhiga mo Sesu ʼe “ko ia aeni ko toku Alo ofaina, ae kua au tuku ki ai toku ofa katoa.” (Mateo 3:17) Kotou fakakaukau age, ʼe filifili anai koa e he Tamai faitotonu pea mo ʼofa, ko hana kau tagata ʼave logo, ia he kau tagata sivi fetuʼu pagani, ʼaē ʼe tapuʼi tonatou faʼahiga tauhi ʼi tana Lao? (Tetelonome 18:10) ʼE ina fakaʼaogaʼi anai koa ia he fetuʼu moʼo taki ʼo nātou kiā Helote ia te tagata fakamataku pea mo fai fakapō, ke natou fakahā age ia te logo ke tupu ai tona maheka pea mo tona fehiʼa? Pea ʼe ina toe fakaʼaogaʼi pē koa ia te fetuʼu ʼaia mo te kau tagata sivi fetuʼu ʼaia ke natou fakahā ia te koga meʼa ʼaē ʼe nofo ai tona foha ʼaē kei veliveli?

Tou toʼo he fakatā: Ko he kamutoa ʼe ina fekauʼi hana tagata sōlia faiva ki he gāue fakamataku ʼi te telituale ʼo ʼona fili. ʼE ina fakahā anai koa ki ʼona fili ia te koga meʼa ʼaē ʼe feala ke natou maʼu ai te tagata sōlia ʼaia? Kailoa! ʼO toe fēia aipē, neʼe fekauʼi mai e Sehova ia tona ʼAlo ki te mālama fakamataku ʼaenī. ʼE ina fakahā anai koa ki te Hau agakovi ko Helote peʼe nofo ʼifea Tona ʼAlo ʼi te temi ʼaē kei veliveli ai? ʼE mole feala anai ke ina fai ia te faʼahi ʼaia.

Kae kapau koia, ko ai koa ʼaē neʼe ina fakaʼasi ia te “fetuu”? Ko ai ʼaē neʼe fakaʼamu mālohi ke sio ki te matehi ʼo te kiʼi tamasiʼi ko Sesu, ke mole feala ai hana lahilahi ake pea mo ina fakahoko ia tana gāue ʼi te kele? Ko ai ʼaē ʼe ina fakahalaʼi ia te hahaʼi pea mo ina uga ia te loi mo te agamālohi pea mo te fai fakapō? Neʼe fakamoʼoni e Sesu ʼo ʼuhiga mo Satana te Tēvolo “e loi ia pea ko te tamai ia o te loi,” ko he tahi “nee fakapo ia talu mai te kamataaga.”—Soane 8:44.