ʼE ʼAta Koa Iā Koutou Te Kolōlia ʼo Te ʼAtua?

“E tou ata te kololia o te Aliki.”—2 KO. 3:18.

ʼE KOTOU TALI FEAFEAʼI ANAI?

Logolā totatou ʼuhiga agahala, he koʼē ʼe feala pē ia ke tou fakakolōliaʼi ia te ʼAtua?

ʼE tokoni feafeaʼi mai te faikole pea mo te kau ki te ʼu fono ke ʼata iā tātou te kolōlia ʼo te ʼAtua?

Koteā ʼaē ʼe feala ke tokoni mai ke tou haga fakakolōliaʼi ia Sehova?

1, 2. He koʼē ʼe fakapotopoto tatatou manatu ʼaē ʼe feala hatatou faʼifaʼitakiʼi ia te ʼu kalitātē ʼo Sehova?

ʼI TE ʼu ʼaluʼaga fuli, ʼe tou tahi hoko fuli ki ʼana mātuʼa. Koia ʼe mole tou punamaʼuli mokā tou logo ki he tahi ʼe ina ʼui ʼo ʼuhiga mo he tama: “ ʼE ke hoko ki tau tamai.” ʼE feala ke ʼui ki he taʼahine: “Kā au sio kiā koe pea ʼe au manatuʼi tau faʼē.” Pea ʼi te agamāhani ʼe faʼifaʼitakiʼi tuʼumaʼu e te ʼu fānau ia te ʼu meʼa ʼaē ʼe fai e ʼanatou mātuʼa. Kae ʼe feafeaʼi kiā tātou? ʼE feala koa hatatou faʼifaʼitakiʼi ia Sehova, tatatou Tamai ʼaē ʼe ʼi selō? Logolā ʼe mole tou lava sisio ki ai, kae ʼe feala ke tou tokagaʼi ʼona kalitātē maʼuhiga ʼaki tatatou sisio mata ki tana fakatupu, mo tatatou akoʼi pea mo metitāsioʼi tana Folafola, kae tāfito ia te ʼu akonaki pea mo te ʼu gāue ʼa Sesu Kilisito, te ʼAlo ʼo te ʼAtua. (Soa. 1:18; Loma 1:20) Koia ʼe feala ke ʼata iā tātou te kolōlia ʼo Sehova.

² ʼI muʼa ʼo te fakatupu ʼo Atama mo Eva, neʼe falala ia te ʼAtua ʼe feala ki te hahaʼi hanatou fakahoko ia tona finegalo, pea mo natou ʼata ʼona kalitātē, pea mo fakakolōliaʼi ia ia. (Lau ia Senesi 1:26, 27.) ʼI totatou ʼuhiga Kilisitiano, ʼe tonu ke tou fakahā ia te ʼu kalitātē ʼo totatou Tupuʼaga. Kapau ʼe tou fai fēia, pea ʼe tou maʼu ia te pilivilēsio ʼaē ke ʼata te kolōlia ʼo te ʼAtua ʼi tatatou agaʼi fenua, ʼi te faʼahiga ako ʼaē neʼe fai kiā tātou, peʼe ʼi totatou haʼuʼaga. Koteā tona tupuʼaga? Koteʼuhi “e mole fai e te Atua he fakakehekehe ki he tahi, kae i te puleaga fuli, ko ae e ofa kia ia mo haele i te maonioni, e lelei ia ki ona mata.”—Gaue 10:34, 35.

3. Koteā ʼaē ʼe logoʼi e te kau Kilisitiano ʼi tanatou tauhi ʼaē kiā Sehova?

³ ʼE ʼata ʼi te kau Kilisitiano fakanofo ia te kolōlia ʼo Sehova. Koia lā ʼaē neʼe tohi fēnei ai e Paulo, ia te ʼapositolo ʼaē neʼe fakanofo ʼaki te laumālie: “Pea ko tatou fuli, ae kua too kehe te pulou mai otatou fofoga, e tou ata [ohagē he sioʼata] te kolōlia o te Aliki, pea kua tou liliu ko he paaki e tahi mo ia, mai te kololia ki te kololia, aki te Laumalie o te Aliki.” (2 Ko. 3:18) ʼI te temi ʼaē neʼe hifo mai ai ia Moisese mai te Moʼuga ʼo Sinai mo te ʼu maka ʼaē neʼe tohi ai te ʼu Folafola e Hogofulu, neʼe gigila tona fofoga koteʼuhi neʼe palalau mo Sehova. (Eke. 34:29, 30) Logolā ʼe mole feala ke hoko he meʼa fēia ki te kau Kilisitiano ohagē ko Moisese kae ʼe ʼiloga ʼi ʼonatou fofoga ia te fiafia ʼi te tala ki te hahaʼi ia te ʼu kalitātē pea mo te fakatuʼutuʼu fakaofoofo ʼa Sehova. Koia peʼe tou kau ki te kau Kilisitiano fakanofo peʼe ki te tahi ʼu ovi, ʼe tou hagē ko he sioʼata mo kapau ʼe ʼata ia te kolōlia ʼo Sehova ʼi totatou maʼuli pea mo tatatou minisitelio. (2 Ko. 4:1) ʼE ʼata koa ia te kolōlia ʼo Sehova ʼi tokotou maʼuli pea mo takotou minisitelio?

ʼE TOU LOTO KE ʼATA IĀ TĀTOU TE KOLŌLIA ʼO TE ʼATUA

4, 5. (1) Ohagē ko Paulo, ko te tau fea ʼaē ʼe hoko iā tātou? (2) ʼE malave feafeaʼi ia te agahala kiā tātou?

⁴ ʼI totatou ʼuhiga kaugana ʼa Sehova, ʼe tou loto moʼoni anai ke tou fakaʼapaʼapa pea mo fakakolōliaʼi totatou Tupuʼaga ʼi te ʼu ʼaluʼaga fuli ʼe tou fai. Kae ʼi te agamāhani, ʼe mole ko te meʼa ʼaia ʼaē ʼe tou fia fai. Neʼe tonu ke tauʼi e Paulo ia tona vaivaiʼaga ʼaia. (Lau ia Loma 7:21-25.) ʼE ina fakamahino fēnei ia te tupuʼaga ʼo te tauʼi ʼo ʼatatou holi ʼaē ʼe kovi: “Koteuhi kua natou agahala fuli pea kua natou hala i te kololia o te Atua.” (Loma 3:23) Koia, ʼuhi ko te agahala ʼa Atama, kua nofo te mālamanei ʼi te mālohi ʼo te pule ʼo te agahala.—Loma 5:12; 6:12.

⁵ Koteā koa ia te agahala? ʼE ko te ʼu meʼa fuli ʼaē ʼe fakafeagai ki te ʼuluagaaga ʼo Sehova, mo ʼona ala, mo ʼana lēkula pea mo tona finegalo. Ko te agahala ʼe ina maumauʼi ia te fēlogoi ʼa he tahi pea mo te ʼAtua. ʼE ina toe fakaleluʼi ke ʼaua naʼa ʼata te kolōlia ʼo te ʼAtua iā tātou, ohagē ko he tagata fai fana ʼe mole ʼī te meʼa ʼaē neʼe ina fakaʼaʼata ʼuhi ko he meʼa neʼe ina fakaleluʼi. ʼE feala ke tou agahala heʼe tou loto kiai peʼe fakafuanoa. (Num. 15:27-31) ʼE mālohi te agahala ʼi te hahaʼi pea ʼe ina fakatuʼu ia he kaupā iā nātou pea mo tonatou Tupuʼaga. (Pes. 51:7, [Pes. 51:5, MN]; Esa. 59:2; Kol. 1:21) Koia ʼe mole ʼalutahi te maʼuli ʼa te tokolahi mo ʼaē ʼa Sehova pea ʼe mole natou maʼu ia te fealagia fakaofoofo ʼaē ke ʼata iā nātou te kolōlia ʼo te ʼAtua. ʼE mahino papau ia, ʼe malave mālohi ia te agahala ki te mālamanei.

6. Logolā totatou ʼuhiga agahala, he koʼē ʼe feala pē ke tou fakakolōliaʼi ia te ʼAtua?

⁶ Logolā totatou ʼuhiga agahala, kae neʼe fakahā e Sehova tona ʼuhiga “Atua o te amanaki.” (Loma 15:13) Neʼe ina foaki te puleaki moʼo pulihi ia te agahala: te sākilifisio faitotogi ʼa Sesu Kilisito. ʼAki te tui ki te sākilifisio ʼaia, ʼe mole kei tou “popula ki te agahala,” pea kua feala leva ke ʼata iā tātou te kolōlia ʼo Sehova. (Loma 5:19; 6:6; Soa. 3:16) Ko te taupau ʼo te fēlogoi lelei ʼaia mo te ʼAtua, ʼe tou tui papau ai ʼe tou maʼu anai te ʼu tapuakina ʼa Sehova ʼi te temi nei pea mo te kā haʼu, ia he maʼuli haohaoa pea mo heʼegata. Logolā ʼe kei tou agahala fuli, kae ʼe tou fiafia heʼe fakagafua mai e te ʼAtua ke ʼata iā tātou tona kolōlia.

KE ʼATA IĀ TĀTOU TE KOLŌLIA ʼO TE ʼATUA

7. He koʼē ʼe tonu ke tou mahino kiā tātou totonu ke feala ke ʼata iā tātou te kōlolia ʼo te ʼAtua?

⁷ Ke feala hatatou maʼu te fealagia ʼaē ke ʼata iā tātou te kolōlia ʼo te ʼAtua, ʼe tonu ke tou ʼiloʼi lelei totatou ʼuhiga agahala. (2 Klk. 6:36) ʼE ʼaoga ke tou mahino lelei ki ʼotatou vaivaiʼaga pea mo tou faigaʼi tona lolomi, ke feala ke kātoa ia tatatou fakakolōliaʼi te ʼAtua. Ohagē lā, kapau kua tou tō ki te agahala fakaufiufi ʼaē ko te sioʼi ʼo te ʼu pāki pea mo te ʼu ʼata ʼe hā ai ia te ʼu felāveʼi fakasino heʼe ʼaoga, pea ʼe tonu ke tou tali ia te manatu ʼaē ʼe ʼaoga kiā tātou he tokoni fakalaumālie pea mo tou kumi ia te faʼahi ʼaia. (Sakp. 5:14, 15) Pea ʼe ko te ʼuluaki puleʼaki ʼaia ʼe ina taki anai tātou ki he faʼahiga maʼuli ʼe ina fakakolōliaʼi kātoa ia te ʼAtua. ʼI totatou ʼuhiga kau atolasio ʼa Sehova, ʼe tonu ke tou haga vakavakaʼi ia tātou takitokotahi peʼe tou mulimuli ki ʼana lēkula faitotonu. (Taag. 28:18; 1 Ko. 10:12) Tatau aipē peʼe koteā ʼotatou vaivaiʼaga, kae ʼe tonu ke tou haga tekeʼi ia te ʼu faʼahi ʼaia ke feala ai ke ʼata iā tātou te kōlolia ʼo te ʼAtua.

8. Logolā ʼe mole tou haohaoa, koteā ʼaē ʼe tonu ke tou fai?

⁸ ʼI tana maʼuli ʼi te kele, neʼe mole feala ʼi he temi kiā Sesu ke tōtō tana fakafiafiaʼi pea mo fakakolōliaʼi tana Tamai. Logolā ʼe mole tou haohaoa ohagē ko Sesu, kae ʼe feala hatatou faiga mālohi ke tou mulimuli ki tona faʼifaʼitaki. (1 Pet. 2:21) ʼE tokagaʼi e Sehova ia tatatou tuputupu pea mo ʼatatou faiga ʼaē ke tou fakakolōliaʼi ia ia, pea ʼe ina tapuakinaʼi ʼatatou faiga.

9. ʼE tokoni feafeaʼi mai te Tohi-Tapu ke lelei age te ʼata ʼo te kolōlia ʼo te ʼAtua iā tātou?

⁹ ʼE tokoni mai te Folafola ʼa Sehova ke tou mahino peʼe koteā ʼaē ʼe tonu ke tou fai ke lelei age ia te ʼata ʼo te kolōlia ʼo te ʼAtua iā tātou. ʼE ʼaoga ke tou ako pea mo metitāsioʼi te ʼu manatu Fakatohi-tapu. (Pes. 1:1-3) Ko te lau ʼo te Tohi-Tapu ʼi te ʼaho fuli ʼe tokoni mai ke tou fakahoko ia te ʼu fetogi ʼaē ʼe ʼaoga ke lelei age totatou ʼuhiga Kilisitiano. (Lau ia Sakopo 1:22-25.) Ko te ʼu meʼa ʼaē ʼe tou ako ʼi te Tohi-Tapu ʼe ina fakamālohiʼi ai tatatou tui, mo tatatou holi ʼaē ke tou tekeʼi ia te ʼu agahala mamafa pea mo fakafiafiaʼi ia Sehova.—Pes. 119:11, 47, 48.

10. ʼE tokoni feafeaʼi mai te faikole ke tou tauhi fakamālotoloto kiā Sehova?

¹⁰ Ke ʼata iā tātou te kolōlia ʼo te ʼAtua, ʼe toe ʼaoga ke tou “agatonu i te faikole.” (Loma 12:12) ʼE tonu pea mo ʼaoga ke tou kole kiā Sehova ke tokoni mai ke tou fai age kiā te ia he tauhi ʼe ina leleiʼia. ʼE feala ke tou kole ke ina foaki mai tona laumālie māʼoniʼoni, mo he tui ʼe mālohi age, mo te mālohi ʼaē moʼo tekeʼi ia te fakahala, pea mo te fealagia ʼaē ke tou “ave fakahagatonu te folafola o te mooni.” (2 Tim. 2:15; Mat. 6:13; Luka 11:13; 17:5) Ohagē pē ko he tamasiʼi ʼe ʼaoga kiai te tokoni ʼa tana tamai, ʼe toe ʼaoga kiā tātou te tokoni ʼa Sehova, tatatou Tamai ʼaē ʼe ʼi selō. Kapau ʼe tou kole ki ai ke tokoni mai ke tou tauhi fakamālotoloto kiā te ia, ʼe feala ke tou tui papau ʼe ina fakahoko anai ia te faʼahi ʼaia. ʼAua naʼa tou manatu ʼe fakahohaʼa anai kiā te ia. Kae ke tou haga faikole, mo fakafetaʼi, mo kole kiā te ia ke ina takitaki tāfito tātou ʼi te ʼu temi faigataʼa, pea ke tokoni mai ke tou foaki age he tauhi ʼe ina fakakolōliaʼi tona huafa māʼoniʼoni.—Pes. 86:12; Sakp. 1:5-7.

11. ʼE tokoni feafeaʼi mai ia te ʼu fono ke ʼata iā tātou te kolōlia ʼo te ʼAtua?

¹¹ Neʼe foaki e te ʼAtua ki te “tagata faifekau agatonu mo poto” ia te maʼua ʼaē ke tokaga lelei ki tana faga ovi. (Mat. 24:45-47; Pes. 100:3) ʼE fia tokoni mai ia te tagata faifekau agatonu ʼaki ia te ʼu fono ke hikihiki ia totatou ʼuhiga Kilisitiano ke feala ai he ʼata iā tātou te kolōlia ʼo Sehova, ohagē pē ko te ʼaoga ʼo te tukutuku ʼo he teu ke tou hao lelei ai. (Hep. 10:24, 25) Koia ʼe tonu ke tou tautonu mai ki te ʼu fono ke tou maʼu ai ia te ʼu tokoni fakalaumālie ʼaē ʼe ʼaoga moʼo hikihiki ʼo totatou ʼuhiga kaugana ʼa Sehova.

TOU FAʼIFAʼITAKIʼI IA TE ʼATUA

12. ʼE feafeaʼi hatatou faʼifaʼitakiʼi te ʼAtua?

¹² Kapau ʼe tou loto ke ʼata iā tātou te kolōlia ʼo Sehova, ʼe tonu ke tou “liliu ko te u faifaitaki o te Atua.” (Efe. 5:1) Ko te faʼahiga faʼifaʼitakiʼi ʼo Sehova ʼe ko te maʼu ʼo tana faʼahiga manatu. Ko te mulimuli ki tatatou manatu ʼe fakaufiufi ki te ʼAtua pea mo fakatupu kovi kiā tātou. Talu mai te mālōlō ʼo te mālamanei ʼi te mālohi ʼo Satana te Tiapolo, kua tonu ke tou faiga mālohi ke tou fēhihiʼa ki te meʼa ʼaē fehiʼa kiai ia Sehova pea mo tou ʼoʼofa ki te meʼa ʼaē ʼe ʼofa kiai. (Pes. 97:10; 1 Soa. 5:19) ʼE tonu ke tou tui papau, ko te faʼahiga tauhi pē ʼaē ʼe leleiʼia e te ʼAtua ʼe ko te fai ʼo meʼa fuli moʼona fakakolōliaʼi.—Lau ia 1 Kolonito 10:31.

13. He koʼē ʼe tonu ke tou fehiʼa ki te agahala, pea ʼe ina uga tātou ke tou fai tea?

¹³ ʼE fehiʼa ia Sehova ki te agahala pea ʼe tonu ke toe fēia mo tātou. Koia ʼe tonu ai ke tou fakamamaʼo mai te ʼu aga ʼaē ʼe kovi naʼa tou tuʼutāmakiʼia ai, ohagē lā ko te aposetasia, ʼaē ʼe ina fakaneke tātou ke tou fakafisi ki te tauhi ʼaē kiā Sehova. Pea ko nātou ʼaē ʼe aposeta ʼe mole kei natou fakakolōliaʼi te ʼAtua. (Tet. 13:6-9). Koia lā ʼaē ʼe mole tonu anai ke tou fakatahi mo he aposeta peʼe ko he tahi ʼe ʼui ko he tehina kae ʼe mole fakaʼapaʼapa ia ki te ʼAtua, tatau aipē peʼe ko he tahi ʼo totatou fāmili. (1 Ko. 5:11) ʼE mole ʼaoga ke tou faiga ke tou fakatonutonuʼi ia te ʼu tala manatu ʼa te kau aposeta peʼe ko ʼaē ʼa nātou ʼe laukovi ki te kautahi ʼa Sehova. ʼI tona fakahagatonu, ʼe ko he ʼaluʼaga ʼe fakatupu tuʼutāmaki ʼi te faʼahi fakalaumālie pea ʼe mole tonu ke tou lau he ʼu manatu neʼe natou tā ki he ʼu tohi peʼe ki te Neti.—Lau ia Esaia 5:20; Mateo 7:6.

14. ʼI tatatou faigaʼi ʼaē ke ʼata iā tātou te kolōlia ʼo te ʼAtua, ko te kalitātē fea ʼaē ʼe tonu ke tou maʼuliʼi, pea koteā tona tupuʼaga?

¹⁴ Ko tatatou faʼahiga fakahā ʼe tou faʼifaʼitakiʼi tatatou Tamai ʼaē ʼe ʼi selō ʼe ko tatatou maʼuliʼi te ʼofa. ʼEī, ʼe tonu ke tou maʼu te taʼi ʼofa ʼaia ohagē ko ia. (1 Soa. 4:16-19) ʼI tona fakahagatonu, ko te ʼofa ʼaē ʼe tou femaʼuʼaki ʼe ko te fakamoʼoni ʼaia ko tātou ʼe ko he ʼu tisipulo ʼa Sesu pea mo he ʼu kaugana ʼa Sehova. (Soa. 13:34, 35) ʼI ʼihi temi ʼe faigataʼa te fakahā ʼo te ʼofa ʼuhi ko totatou ʼuhiga agahala. Kae ʼe tonu ke tou faiga ke tou fakahā ia te ʼofa ʼi te lakaga fuli pē. Pea ko te maʼuliʼi ʼo te ʼofa pea mo te ʼu kalitātē fakaʼatua ʼe ina puipui anai tātou mai te agahala pea mo te ʼu aga ʼaē ʼe kovi.—2 Pet. 1:5-7.

15. ʼE malave feafeaʼi ia te ʼofa ki ʼatatou felōgoi mo te hahaʼi?

¹⁵ Ko te ʼofa ʼe ina uga tātou ke tou fai te meʼa ʼaē ʼe lelei ki te hahaʼi fuapē. (Loma 13:8-10) Ohagē lā, ko te ʼofa ki tokita ʼohoana ʼe ina taupau maʼa ia te maʼuli fakataumātuʼa. Ko te ʼofa ʼaē ki te ʼu tagata ʼāfea ʼo kau kiai te fakaʼapaʼapa ki tanatou gāue ʼe tokoni mai anai ke tou fakalogo mo talagafua ki tanatou takitaki. Ko te ʼu fānau ʼaē ʼe ʼoʼofa ki ʼanatou mātuʼa ʼe natou fakalogo mo fakaʼapaʼapa pea ʼe mole natou laukoviʼi nātou. Kapau ʼe tou ʼoʼofa ki te hahaʼi pea ʼe mole tou meʼa noaʼi anai ia nātou peʼe tou fai kiā nātou he ʼu palalau ʼe matamatakovi. (Sakp. 3:9) Pea ko te kau tagata ʼāfea ʼaē ʼe ʼoʼofa ki te faga ovi ʼa te ʼAtua ʼe natou tōkakaga anai kiā nātou ʼaki he agalelei.—Gaue 20:28, 29.

16. ʼE tokoni feafeaʼi mai ia te ʼofa ʼi tatatou minisitelio?

¹⁶ ʼE tonu ke toe hā ia te kalitātē ʼaē ko te ʼofa ʼi tatatou minisitelio. Ko totatou ʼofa lahi ʼaē kiā Sehova, ʼe tokoni mai anai ke ʼaua naʼa tou lotovaivai mokā ʼe mole fia logo peʼe mole tali e te hahaʼi ia tatatou gāue. Kae ʼe tou haga hoko atu anai ia te fakamafola ʼo te logo lelei. Ko te ʼofa ʼe ina uga tātou ke tou teuteu lelei pea mo tou faiga ke fua lelei tatatou minisitelio. Pea kapau ʼe tou ʼoʼofa moʼoni ki te ʼAtua pea mo te hahaʼi, pea ʼe mole tou fai fakakinau anai ia te gāue ʼaia. Kae ʼe tonu ke liliu ko he pilivilēsio ʼe tou maʼu ai te fiafia.—Mat. 10:7.

TOU HAGA FAKAKOLŌLIAʼI IA SEHOVA

17. He koʼē ʼe lelei ke tou mahino ki totatou ʼuhiga agahala?

¹⁷ Tokolahi ʼe mole natou mahino ki te kovi ʼo te agahala, kae ʼe tou mahino tātou kiai. Koia lā ʼaē ʼe tonu ai ke tou tekeʼi ʼotatou vaivaiʼaga. Pea ko tatatou mahino lelei ki totatou ʼuhiga agahala ʼe tokoni ki te akoʼi ʼo totatou leʼo loto ke feala hatatou foimo fai he puleʼaki mo kapau ʼe hake ʼi totatou loto pea mo totatou ʼatamai ia te manatu ʼaē ke tou fai ia he aga ʼe kovi. (Loma 7:22, 23) ʼE moʼoni ʼe tou vaivai gafua kae ʼe feala ki te ʼAtua ke ina fakamālohiʼi tātou ke tou fai ia te meʼa ʼaē ʼe lelei ʼi te lakaga fuli pē.—2 Ko. 12:10.

18, 19. (1) Koteā ʼaē ʼe ina fakafealagia ke tou mālo ʼi tatatou fakafeagai kiā Satana mo ʼana laumālie agakovi? (2) Koteā anai hatatou fakatuʼutuʼu?

¹⁸ Kapau ʼe tou loto ke tou fakakolōliaʼi ia Sehova, pea ʼe tonu foki ke tou fakafeagai ki te ʼu laumālie agakovi. Pea ke feala ke tou mālo ʼi te tau ʼaia pea ʼe tonu ke tou fakaʼaogaʼi te u mahafu tau fuli a te Atua. (Efe. 6:11-13) ʼE faiga tuʼumaʼu e Satana ke ina faʼao ia te kolōlia ʼaē ʼe tuha mo tāu mo Sehova tokotahi pē. Pea ʼe toe haga hoko atu ia tana faiga ʼaē ke ina maumauʼi tatatou fēlogoi mo Sehova. Kae ʼe ko he toe puli kiā Satana ʼi tana sio ʼaē ki te toko lauʼi miliona tagata, mo fafine pea mo fānau ʼe natou taupau maʼu tanatou agatonu pea mo fakakolōliaʼi te ʼAtua. Koia lā ʼaē ʼe tonu ke hoko atu tatatou fakafetaʼi kiā Sehova, ohagē ko te ʼu āselō ʼaē ʼe natou ʼui fēnei: “E gali mo koe, siomatou Aliki mo tomatou Atua, e ke mau te kololia, pea mo te fakamauhiga, pea mo te mafimafi; koteuhi nee ke fakatupu te u mea fuli, pea ko tou finegalo ae e natou mau ai pea e natou mauuli ai.”—Apk. 4:11.

¹⁹ Tou haga taupau maʼu ia tatatou fia fakakolōliaʼi ia Sehova. ʼE fiafia lahi ʼi tana sio ʼaē ki te faiga fakamālotoloto ʼa ʼana kaugana ke natou faʼifaʼitakiʼi ia ia pea ke ʼata iā nātou tona kolōlia. (Taag. 27:11) ʼE lagi tatau anai ʼakotou manatu mo ʼaē ʼa Tavite, ʼi tana hiva fēnei kiā Sehova: “E au fakavikiviki anai kia koe i toku loto katoa, Aliki, toku Atua! Pea e au fakakololia anai ki tou huafa o heegata.” (Pes. 86:12) Kua vave hoko mai te temi ʼaē kā ʼata kātoa anai iā tātou te kolōlia ʼo Sehova pea mo tou fakavikiviki kiā te ia ʼo talu ai. Pea ʼe ko he ʼaluʼaga fakafiafia anai ki te hahaʼi ʼaē neʼe fakalogo ki te ʼAtua. Iā ʼaho nei, ʼe ʼata koa iā koutou te kolōlia ʼo Sehova ʼAtua pea mo kotou fakaʼamu ke kotou haga fai fēia ʼo heʼegata?

[Paki ʼo te pāsina 30]

ʼE ʼata koa iā koutou te kolōlia ʼo Sehova ʼi te ʼu ʼaluʼaga ʼaenī?