ʼE Ko He Tohi Fēia Pē Koa?

“E hau te Tohi tapu katoa mai te tuku manava a te Atua, pea e aoga . . . ke katoa te tagata a te Atua, pea ke lelei tona teuteui o uhiga mo te u gaue lelei fuli.”—2 TIMOTEO 3:16, 17.

KO ʼIHI ʼe mole natou maʼu te taʼi manatu ʼaia ʼo ʼuhiga mo te Tohi-Tapu. Kae ʼe feafeaʼi kiā koutou? ʼI te ʼu manatu ʼaē ʼe hoa mai, ko te manatu fea ʼaē ʼe ʼalutahi mo takotou manatu ʼo ʼuhiga mo te Tohi-Tapu?

• Ko he tohi neʼe lelei tona tohi

• Ko he tohi ʼe kau ki te ʼu tohi taputapu

• Ko he tohi fāgana ʼe tou maʼu ai he ʼu ako ki te aga ʼaē ʼe tonu ke tou fai

• Ko te Folafola ʼa te ʼAtua

Ko te tahi fehuʼi ʼe feala ke tou fai: ʼE maʼuhiga koa ia te faʼahi ʼaē ʼe kotou tui kiai? Kotou tokagaʼi pe koteā ʼaē ʼe ʼui ʼi te Tohi-Tapu: “Ko te u mea fuli nee tohi fakatomua, nee tohi natou ki totatou akoi, ke tou mau ai te amanaki lelei, i te kataki fualoa pea mo te fakapelepele ae e foaki e te Tohi.” (Loma 15:4) Koia ʼe ʼui ʼi te Tohi-Tapu, neʼe fakatuʼutuʼu ke ina foaki mai ia he ako, mo he fakapelepele pea mo he ʼamanaki.

Kae, kapau ko te Tohi-Tapu neʼe ko he tohi neʼe lelei tona tohi peʼe ko he tohi ʼe tatau mo te ʼu tohi taputapu ʼaē, ʼe kotou tuku anai koa takotou falala kiai ke ina akoʼi koutou pea mo takitaki tokotou fāmili, tāfito lā mo kapau ʼe mole ʼalutahi mo te ʼu meʼa ʼaē ʼe mata faitotonu kiā koutou? Kapau ko te Tohi-Tapu neʼe ko he tohi fāgana, ʼe kotou maʼu ai anai koa he fakapelepele pea mo he ʼamanaki mai te ʼu fakapapau ʼaē ʼe tohi ai?

Pea ʼi te tahi faʼahi, ʼe tui papau ia te toko lauʼi miliona hahaʼi neʼe natou ako te Tohi-Tapu, ʼe ko te Folafola ʼa te ʼAtua. Koteā tona tupuʼaga? Koteā ʼaē ʼe makehe ai te Tohi-Tapu mai te ʼu tohi ʼaē? ʼE matou fakaafe atu koutou ke kotou vakavakaʼi ia te ʼu manatu e nima ʼo ʼuhiga mo te Tohi-Tapu ʼaē ʼe fakamatalatala ʼi te ʼu ʼalatike ʼaē kā hoa mai.