ʼE Fakalogo Koa He Tahi Ki Te ʼu Faikole?

“Neʼe faigataʼa kiā au haku tui ʼe ʼi ai he ʼAtua. Kae neʼe au faikole pē ʼi ʼihi temi. Neʼe mole au ʼiloʼi papau pe neʼe logo mai he tahi, kae ʼe moʼoni, neʼe au fakaʼamu pē ke fakalogo mai he tahi. Neʼe mole au fiafia pea neʼe mole he ʼuhiga ʼo toku maʼuli. Neʼe mole au fia tui ki te ʼAtua heʼe kiā au, neʼe gata pē ki te hahaʼi ʼaē ʼe mole faʼa popoto ʼe tui ki te ʼAtua.”—PATRICIA,a ILELANI.

ʼE TATAU koa ʼakotou manatu mo Patricia? ʼE kotou faikole koa logolā ʼe kotou lotolotolua ʼo ʼuhiga mo te maʼuli moʼoni ʼo te ʼAtua? Kapau koia, pea ʼe mole ko koutou pē ʼaē ʼe manatu fēia. Kotou tokagaʼi te ʼu sivi ʼaenī neʼe fai.

◼ Neʼe fai te sivi ki te toko 2 200 hahaʼi Pilitānia, pea neʼe ko te teitei toko 500 pē ʼaē ʼe natou tui ʼe ʼi ai te ʼAtua neʼe ina fakatupu ia te kele pea mo fakalogo ki te ʼu faikole. Kae iā nātou ʼaia neʼe fai ki ai te sivi, neʼe ko te toko 1 200 tupu neʼe faikole ʼi ʼihi temi.

◼ ʼI te sivi neʼe fai ki te toko 10 000 hahaʼi ʼi te ʼu fenua kehekehe ʼe hā ai, ko te toko 30 ki te teau ʼe natou ʼui ʼe mole natou tui ki te ʼAtua, kae ʼe natou faikole.

He Koʼē ʼe Lotolotolua Te Hahaʼi?

ʼE ʼui fēnei e Allan, te tagata Pilitānia: “Neʼe au tau ʼui ʼe mole au tui ki te ʼAtua heʼe maʼa ʼaku, neʼe fakatuʼu te ʼu lotu moʼo puleʼi te hahaʼi pea mo maʼu paʼaga ai. Pea neʼe au nofo ʼo fakakaukau, kapau lā neʼe ʼi ai he ʼAtua pea ʼe mole lahi fēia anai te aga heʼe faitotonu. Kae ʼi ʼihi temi neʼe au palalau tokotahi ai, naʼa meʼa age pē ʼe logoʼi ʼaku palalau. Pea neʼe au toe feʼekeʼaki foki peʼe koteā te tupuʼaga ʼo toku maʼuli.”

Ko te hahaʼi ʼaē ʼe hagē ko Allan, ʼe natou tahi maʼu he ʼu tupuʼaga ke natou lotolotolua ai peʼe tali e he tahi ʼanatou faikole. Kae tokolahi iā nātou ʼe lagi toe lahi age tonatou lotolotolua heʼe mole natou maʼu he ʼu tali ki te ʼu fehuʼi ʼaenī, ohagē lā:

◼ ʼE ʼi ai koa he Tahi neʼe ina fakatupu ia meʼa fuli?

◼ He koʼē ʼe tupu tāfito te ʼu mamahi mai te ʼu lotu?

◼ He koʼē koa ʼe fakagafua e te ʼAtua te ʼu mamahi?

Kapau neʼe feala lā hakotou ʼiloʼi te ʼu tali ki te ʼu fehuʼi ʼaia, pea ʼe kotou toe lotolotolua anai koa mokā kotou faikole?

[Nota]