“E Mole Kotou Iloi Te Aho Mo Te Hola”

“Koia, kotou alaala, koteuhi e mole kotou iloi te aho mo te hola.” —MAT. 25:13.

KOTEĀ TAKOTOU TALI?

Ko te ʼu ʼaluʼaga fea ʼaē ʼe lelei ai ke mole tou ʼiloʼi ia te ʼaho peʼe ko te hola ʼo te fakaʼosi?

Neʼe fakahā feafeaʼi e te kau Kilisitiano fakanofo ia tanatou nonofo teuteu?

Ko te ʼu ʼaluʼaga fea ʼaē ʼe feala ke tou fakahā ai kua tou nonofo tokalelei ki te fakaʼosi?

1-3. (1) Koteā te ʼu ʼaluʼaga ʼe feala ke tokoni mai ke tou mahino ki te ako ʼe tou maʼu mai te ʼu lea fakatā ʼaia e lua ʼa Sesu? (2) Ko te ʼu fehuʼi fea ʼaē ʼe ʼaoga ke tou tali kiai?

FAKAKAUKAUʼI age muʼa ʼe fakaʼui atu e he pātolō ke ke ʼave ia ia ki he fakaafe maʼuhiga. Koia, ʼi muʼa ʼo tau ʼalu ki ai, ʼe ke fakatokagaʼi ʼe ʼago tau motokā pea ʼe ke foimo ʼalu fakavilivili ʼo ʼuʼutu, pea ʼi te temi ʼaia, ʼe haʼu te pātolō ʼo fakasiosio ʼe ke puli, mole feala ia ke fakatalitali, koia neʼe ina pāui ai he tahi age ke haʼu ʼo ʼave ia ia. Pea ʼi tau toe liliu mai, ʼe ke fakatokagaʼi kua ʼalu te pātolō. Koteā ʼaē ʼe ke logoʼi ʼi te temi ʼaia?

² ʼI te temi nei, fakakaukauʼi age ko koe ko he pātolō, ʼi muʼa ʼo tau fai folau, ʼe ke filifili ni tagata e toko tolu ke natou tōkakaga ki he gāue maʼuhiga. Pea ʼe ke fakamahino age kiā nātou ia te meʼa ʼaē ʼe tonu ke natou fai pea mo natou ʼio toko tolu kiai. Kae ʼi tau liliu mai, ʼe ko te toko lua pē iā nātou ʼaia neʼe nā fai ia te gāue ʼaē neʼe ke fakatotonu age. Pea ko ia ʼaē neʼe mole ina fakahoko ia tana gāue ʼe ina kumi he ʼu takuʼaki. ʼI tona fakahagatonu, neʼe mole faiga pē lā ia ke ina fai tana gāue. Koteā ʼaē ʼe ke logoʼi ʼi te temi ʼaia?

³ ʼE tatau te ʼu ʼaluʼaga ʼaenī mo te ʼu lea fakatā e lua ʼa Sesu ʼo ʼuhiga mo te kau tāupoʼou pea mo te ʼu taleta. ʼE talanoa te ʼu lea fakatā ʼaia ʼo ʼuhiga mo te ʼu temi fakaʼosi pea mo fakahā mai te tupuʼaga ʼaē ʼo te nofo agatonu mo poto ʼa ʼihi kau Kilisitiano fakanofo, kae noa ʼihi.a (Mat. 25:1-30) Neʼe fakahā mai e Sesu ia te ako ʼe tou maʼu mai te ʼu lea fakatā ʼaia ʼi tana ʼui fēnei: “Koia, kotou alaala, koteuhi e mole kotou iloi te aho mo te hola.” Neʼe ʼui e Sesu ʼe mole ʼiloʼi anai e tana kau tisipulo ia te temi ʼaē kā haʼu ai anai ʼo fakaʼauha ia te mālama ʼa Satana. (Mat. 25:13) ʼE tonu mo tātou ke tou nonofo ʼalaʼala. He koʼē ʼe lelei ke tou mulimuli ki te ʼu palalau ʼa Sesu? Ko ai ʼaē ʼe tonu ke nofo ʼalaʼala? Pea koteā ʼaē ʼe tonu ke tou fai ʼi te temi nei ke feala hatatou nonofo ʼalaʼala?

HE KO’Ē ʼE LELEI KE TOU NONOFO ʼALAʼALA?

4. He koʼē ʼe mole fakalogo tatatou nonofo ʼalaʼala ki tatatou ʼiloʼi ia te hoko mai ʼo te fakaʼosi?

⁴ ʼI ʼihi temi, ʼe maʼuhiga ke tou ʼiloʼi lelei te hola. Ohagē lā, mokā ʼe tou gāue papalagi, peʼe tou ʼolo ki te tōketā, peʼe tonu ke tou toʼo te kā, ʼe tonu ke tou ʼiloʼi te hola naʼa fokifā ʼe tou tauhala. Kae ko he tahi ʼe ina faigaʼi ke ina tāmateʼi he afi peʼe ina lolotoga haofaki he maʼuli, ʼe mole nofo ia ʼo sioʼi te hola. Heʼe feala ke fakalelu peʼe fakatupu tuʼutāmaki. ʼI te ʼu ʼaluʼaga ʼaia, ʼe maʼuhiga age ia te tokaga ki te gāue ʼi te sioʼi ʼo te hola. ʼE tokoni tatatou gāue fai fakamafola ki te hahaʼi ke natou mahino ki te ʼu fakatuʼutuʼu ʼaē neʼe fai e Sehova moʼo haofaki ia te mālamanei. ʼE maʼuhiga tāfito ia te gāue ʼaia ʼi te temi nei, heʼe kua ovi mai te fakaʼosi ʼo te tuʼu ʼaenī. Tatau aipē peʼe mole tou ʼiloʼi ia te temi ʼo te fakaʼosi, kae ʼe feala ke tou nonofo ʼalaʼala pea mo fai ia te meʼa ʼaē ʼe fakamaʼua mai e Sehova. ʼI tona fakahagatonu, ko ʼaluʼaga e nima ʼe lelei ai kiā tātou ke ʼaua naʼa tou ʼiloʼi ia te ʼaho pea mo te hola.

5. He koʼē ko te mole ʼiloʼi ʼo te ʼaho ʼo te fakaʼosi ʼe ina fakafealagia mai ke tou fakahā ia te ʼuhiga ʼo totatou loto?

⁵ ʼUluaki, ko tatatou mole ʼiloʼi ia te ʼaho ʼo te fakaʼosi, ʼe ina fakafealagia mai ke tou fakahā ia te ʼuhiga moʼoni ʼo totatou loto. ʼE fakaʼapaʼapa ia Sehova kiā tātou ʼi tana tuku ʼaē ke tou filifili ke tou agatonu age kiā te ia. ʼE tou tauhi kiā Sehova heʼe tou ʼoʼofa kiā te ia, kae mole ʼuhi pē ko tatatou fia fakalaka maʼuli ʼi te fakaʼosi ʼo te tuʼu ʼaenī pea mo maʼu ia te maʼuli heʼegata. (Lau ia Pesalemo 37:4.) ʼE tou fiafia mokā tou fai te finegalo ʼo te ʼAtua pea mo mahino ʼe ina akoʼi tātou heʼe ina loto ke fua lelei kiā tātou. (Esa. 48:17) Pea ʼe mole faʼa mamafa fau ʼana fakatotonu kiā tātou.—1 Soa. 5:3.

6. Koteā ʼaē ʼe logoʼi e te ʼAtua mokā tou tauhi age kiā te ia heʼe tou ʼoʼofa ai? Koteā tona tupuʼaga?

⁶ Lua, ko tatatou mole ʼiloʼi ia te ʼaho pea mo te hola ʼe ina foaki mai ia te faigamālie ʼaē ke tou fakafiafiaʼi te loto ʼo Sehova. Kā tou tauhi kiā te ia ʼuhi ko tatatou ʼoʼofa ki ai kae mole ʼuhi ko te ovi mai ʼo te fakaʼosi peʼe ko tatatou fia maʼu he tapuakina, ʼe feala ai kiā Sehova ke ina fakamoʼoni ko Satana, tona fili, ʼe gutu loi. (Sopo 2:4, 5; lau ia Taaga Lea 27:11.) Kua mahino kiā tātou ia te ʼu mamahi fuli ʼaē neʼe fakatupu e Satana, koia ʼe tou fiafia ai ʼi te lagolago ki te takitaki ʼa Sehova pea mo fakafeagai kiā Satana.

7. He koʼē ʼe tou fia fakaʼaogaʼi totatou maʼuli ki te tauhi ʼaē ki te ʼAtua pea mo tokoni ki ʼihi atu?

⁷ Tolu, ko tatatou mole ʼiloʼi ia te ʼaho totonu ʼo te fakaʼosi, ʼe ina fakafaigafua mai ke tou māʼuʼuli fakasākilifisio pea mo fakaʼaogaʼi totatou maʼuli kātoa ki te tauhi kiā Sehova pea mo tokoni ki te hahaʼi. Iā ʼaho nei, ko ʼihi ʼe mole tui ki te ʼAtua kae ʼe tui nātou ki te fakaʼosi ʼo te mālamanei. ʼE natou mātataku naʼa hoko he tuʼutāmaki fakanukeleʼea ʼe ina maumauʼi kātoa te kele, koia ʼe natou maʼu ai te taʼi manatu ʼaenī: “Tou kai pea tou inu, koteuhi e tou mate anai i apogipogi.” (1 Ko. 15:32) Kae ʼe mole tou mātataku pea mo manatu pē kiā tātou totonu. (Taag. 18:1) Kae ʼe takimuʼa kiā tātou ia te finegalo ʼo Sehova pea mo tou lotolelei ke tou fakaʼaogaʼi ia meʼa fuli ʼe tou maʼu, ohagē ko totatou temi, mo totatou mālohi moʼo tala ia te logo lelei ʼo te Puleʼaga ʼo te ʼAtua. (Mat. 16:24) ʼE tou maʼu te fiafia ʼi tatatou tauhi ki te ʼAtua, tāfito lā ʼi te ʼu temi ʼaē ʼe tou tokoni ai ki ʼihi ke natou ʼiloʼi ia ia.

8. Ko te faʼifaʼitaki Fakatohi-tapu fea ʼe ina fakahā mai ia te ʼaoga ʼaē ke tou falala kātoa kiā Sehova pea mo tana Folafola?

⁸ Fā, ko tatatou mole ʼiloʼi ia te ʼaho pea mo te hola, ʼe tokoni mai ke tou falala kātoa kiā Sehova pea mo faiga fakamālotoloto ke tou mulimuli ki tana Folafola. ʼE tou agahala fuli, koia ʼe lahi age tatatou falala ʼaē kiā tātou totonu. Neʼe fakatokaga fēnei e te ʼapositolo ko Paulo ia te kau Kilisitiano fuli: “Ko ae e manatu e tuu ia i oluga, ke tokaga ia naa higa!” Neʼe talanoa ia ʼo ʼuhiga mo te toko 23 000 kau Iselaele ʼaē neʼe talagataʼa kiā Sehova pea neʼe mamate kae kua natou ovi atu pē ki te Kele ʼo Te Fakapapau. Neʼe toe ʼui e te ʼapositolo ko Paulo neʼe tohi te ʼu meʼa fuli ʼaia “ko ni fakatokaga mai kia tatou” ʼaē ʼe lolotoga māʼuʼuli ʼi te fakaʼosi ʼo te tuʼu ʼaenī.—1 Ko. 10:8, 11, 12.

9. ʼE fakamālohiʼi feafeaʼi e te ʼu ʼahiʼahi ia tatatou tui pea mo ʼatatou felōgoi mo Sehova?

⁹ Nima, ko tatatou mole ʼiloʼi peʼe ko ʼāfea ʼaē kā hoko mai ai te fakaʼosi, ʼe ina fakafealagia mai ke tou lava tauʼi te ʼu ʼahiʼahi ʼi te ʼu temi faigataʼa pea mo fakamālohiʼi tatatou tui. (Lau ia Pesalemo 119:71.) ʼI te ʼu ʼaho fakamuli ʼo te tuʼu ʼaenī, ʼe ʼi ai anai “he u temi faigataa.” (2 Tim. 3:1-5) Tokolahi ʼi te mālama ʼa Satana ʼe natou fēhihiʼa iā tātou, koia ʼe natou gaohi koviʼi ai tātou ʼuhi ko tatatou tauhi. (Soa. 15:19; 16:2) Ohagē pē ko te tokoni ʼa te afi ki te fakamaʼa ʼo te ukamea, ʼe toe tokoni ia te ʼu ʼahiʼahi ke mālohi age tatatou tui. Kapau ʼe tou agavaivai mo mulimuli ki te takitaki ʼa Sehova pea ʼe mole feala anai ke tāʼofi e te ʼu ʼahiʼahi ia tatatou tauhi ʼaē kiā te ia. Pea ko ʼatatou felōgoi mo ia ʼe liliu anai ʼo mālohi age.—Sakp. 1:2-4; 4:8.

10. He koʼē ʼe hagē kiā tātou ʼe fakalaka vave ia te temi?

¹⁰ ʼE feala ke fakalaka vave peʼe māmālie ia te temi. Kapau ʼe tou maʼumaʼua pea mole tou sioʼi tuʼumaʼu te hola, pea ʼe tou tokagaʼi ia te fakalaka vave ʼo te temi. ʼI hona ʼaluʼaga ʼe tatau, kapau ʼe tou maʼumaʼua ʼi te fakahoko ʼo te gāue fakaofoofo ʼaē neʼe foaki mai e Sehova pea ʼe lagi tou tokagaʼi ia te vave hoko mai ʼo te fakaʼosi. Tokolahi te kau Kilisitiano fakanofo neʼe natou foaki mai he ʼu faifaitaki taulekaleka ʼi tanatou maʼumaʼua ʼi te gāue ʼaē ki te ʼAtua. Tou vakaʼi fakanounou ni ʼaluʼaga neʼe hoko ʼi te taʼu 1914, te taʼu ʼaē neʼe fakanofo Hau ai Sesu, pea mo te tupuʼaga ʼaē ʼo te nonofo teuteu ʼa ʼihi kau Kilisitiano fakanofo kae noa ʼihi.

ʼE FAKAHĀ E TE KAU KILISITIANO FAKANOFO KUA NATOU NONOFO TEUTEU

11. ʼI te taʼu 1914, he koʼē neʼe manatu ʼihi ʼe tauhala mai ia Sesu?

¹¹ Tou toe liliu mai ki te ʼu lea fakatā ʼa Sesu ʼo ʼuhiga mo te ʼu tāupoʼou pea mo te ʼu taleta. Kapau neʼe ʼiloʼi e te ʼu tāupoʼou peʼe ko te ʼu tagata kaugana ʼo te ʼu lea fakatā ʼaia ia te temi ʼaē kā liliu mai ai te tagata ʼohoana peʼe ko te tagata pule, pea neʼe mole ʼaoga ke natou haga nonofo teuteu. Kae neʼe mole natou ʼiloʼi, koia neʼe ʼaoga ai ke natou nonofo teuteu. Lolotoga ni taʼu, neʼe ʼiloʼi e te kau Kilisitiano fakanofo ia te makehe anai ʼo te taʼu 1914, kae neʼe mole natou mahino lelei ki te ʼu ʼaluʼaga ʼaē kā hoko anai. ʼI te mole hoko ʼo te ʼu meʼa ʼaē neʼe ʼamanaki kiai te kau Kilisitiano fakanofo, ko ʼihi iā nātou neʼe natou manatu ʼe tauhala mai ia Sesu. ʼO ʼuhiga mo te māhina ʼo ʼOketopeli 1914, neʼe ʼui leva e te tehina ki muli age: “Ko ʼihi iā mātou neʼe natou tui papau ʼe matou ʼolo anai ki selō lolotoga te ʼuluaki vāhaʼa ʼo ʼOketopeli ʼo te taʼu ʼaia.”

12. Neʼe fakahā feafeaʼi e ʼihi kau Kilisitiano fakanofo ia tanatou agatonu mo tanatou popoto?

¹² Kotou fakakaukauʼi age muʼa tanatou fakaʼofaʼofa ʼi tanatou manatu ʼaē ʼe hoko anai te fakaʼosi ʼi te temi ʼaia kae neʼe mole hoko ia. Neʼe toe faigataʼa mo te temi ʼaē neʼe tau ai ia te ʼu tehina mo te ʼu fakataga lolotoga te ʼUluaki Tau Fakamālamanei. Neʼe kua teitei pē ke gata ia te gāue fai fakamafola. Neʼe hagē ia kua māʼumoea ia te kau Kilisitiano fakanofo. Kae ʼi te taʼu 1919, neʼe hoko ia te ʼaluʼaga neʼe ina fakaʼala ai nātou. Neʼe haʼu ia Sesu ʼo ʼaʼahi ia nātou fuli ʼaē neʼe natou lau ko nātou ko te kau Kilisitiano. Pea ko ʼihi ʼi te kau Kilisitiano fakanofo neʼe mole filifili nātou e te Pule ko Sesu pea neʼe mole toe fakafealagia ke natou gāue maʼa ia. (Mat. 25:16) Neʼe mole natou nonofo ʼalaʼala, neʼe natou hagē ko te kau tāupoʼou vavale ʼaē neʼe mole natou fakafonu ʼanatou mālama ʼaki te lolo. Pea ohagē ko te tagata kaugana piko ʼaē neʼe mole agatonu ki tona pule, neʼe mole natou fia fakahoko he ʼu sākilifisio maʼa te Puleʼaga. Kae tokolahi te kau Kilisitiano fakanofo neʼe natou fakahā he agatonu fakaofoofo pea mo he holi mālohi ke natou tauhi ki tonatou Pule lolotoga te ʼu taʼu faigataʼa neʼe hoko ai te tau.

13. Ko te faʼahiga manatu fea ʼaē neʼe maʼu e te kau Kilisitiano fakanofo ʼi te taʼu 1914? Pea koteā tanatou faʼahiga manatu iā ʼaho nei?

¹³ Neʼe fakamahino ʼi Te Tule Leʼo Fakapilitānia ʼo te ʼaho 1 ʼo Fepualio 1916 ia te faʼahiga manatu neʼe maʼu e te tokolahi ʼo te kau Kilisitiano fakanofo ʼi te temi ʼaia. Neʼe ʼui ai ko nātou ʼaē neʼe natou maʼu te faʼahiga manatu lelei, neʼe mole natou lotomamahi. Neʼe hoko atu fēnei: “Neʼe mole matou loto ke hoko ʼamatou fakaʼamuʼamu; koia ʼi te temi ʼaē neʼe matou mahino ai neʼe mole matou fakaʼatalitali ki te meʼa ʼaē neʼe tonu ke hoko ʼi te māhina ʼo ʼOketopeli 1914, neʼe matou fiafia ʼi te mole fetogi e te ʼAliki ia Tana Fakatuʼutuʼu mo ʼomatou fakafiafiaʼi. Pea neʼe mole matou fakaʼamu ke ina fakahoko ia te faʼahi ʼaia.” Neʼe natou loto pē nātou ke natou mahino lelei age ki te ʼu fakatuʼutuʼu ʼa te ʼAtua. Iā ʼaho nei, ʼe fakahā e te kau Kilisitiano fakanofo ia te taʼi agavaivai pea mo te holi ʼaia ki te fai ʼo te finegalo ʼo te ʼAtua. ʼE mole natou logologo ʼe natou felōgoi tonu mo te ʼAtua. ʼE natou loto pē nātou ke natou fakahoko ʼi te kele kātoa ia te gāue ʼaē neʼe fakatotonu age e Sesu. Pea ʼi te temi nei, ʼe faifaitakiʼi nātou e te kau Kilisitiano ʼaē ʼe natou maʼu te ʼamanaki ki te maʼuli heʼegata ʼi te kele, ia te “hahai kaugamalie osi” peʼe ko te toe hahaʼi tokolahi ʼo te tahi ʼu ovi.—Apk. 7:9; Soa. 10:16.

ʼE TOU FAKAHĀ KUA TOU NONOFO TEUTEU

14. He koʼē ʼe lelei ke tou fakalogo ki te ako ʼe foaki e Sehova ʼaki te tagata kaugana agatonu mo poto?

¹⁴ Neʼe filifili e te ʼAtua ia he tagata kaugana agatonu mo poto ke ina foaki ia te meʼa kai fakalaumālie ki tana hahaʼi, peʼe ko te akoʼi ʼo nātou ke natou maʼu tapuakina mai tana Folafola pea mo tona laumālie. Ko te kau Kilisitiano fakanofo mo nātou ʼaē ʼe kau ki te toe hahaʼi tokolahi ʼe natou fakahā tanatou nonofo teuteu ʼi tanatou fakalogo ki te ako ʼe foaki e Sehova ʼaki te tagata kaugana. ʼE hagē pē ʼe natou fakafonu ʼanatou mālama ʼaki ia te lolo. (Lau ia Pesalemo 119:130; Soane 16:13.) ʼE mahino ia, ʼe feala mo nātou ke natou nonofo teuteu ki te fakaʼosi, te temi ʼaē kā toe liliu mai ai ia Kilisito. Pea tahi, ʼe natou maʼu te mālohi ke natou taupau tanatou agatonu, māʼiapē lā ʼi te ʼu ʼaluʼaga faigataʼa ʼaupitō. Ohagē lā, ʼi te fale pilisoni Nasi, neʼe ko te Tohi-Tapu pē e tahi maʼa te ʼu tehina. Koia, neʼe natou faikole ai ke natou maʼu ia he meʼa kai fakalaumālie ʼe lahi age. Mole faʼa fualoa kiai, neʼe natou logo ʼe ʼi ai te tehina neʼe hoki tau mai pē ki te fale pilisoni mo te ʼu ʼalatike foʼou ʼo Te Tule Leʼo neʼe ina fufū ʼi tana foʼi vaʼe ʼakau. Neʼe ʼui ki muli mai e te tehina fakanofo ko Ernst Wauer, ʼaē neʼe hao mai te ʼu fale pilisoni Nasi, neʼe tokoni ia Sehova ki te ʼu tehina ʼi he ʼaluʼaga fakaofoofo ke natou tāʼofi he ʼu manatu fakalotomālohi mai te ʼu ʼalatike. Neʼe ina toe ʼui fēnei: “Iā ʼaho nei, kua faigafua ʼosi ia te maʼu ʼo te meʼa kai fakalaumālie kae ʼe tou fakamaʼuhigaʼi tuʼumaʼu koa? ʼE au tui papau, ʼe mahu ia te ʼu tapuakina ʼaē ʼe maʼu e Sehova maʼa nātou ʼaē ʼe falala kiā te ia, mo nonofo agatonu pea mo kai ʼi tona laupapa.”

15, 16. Neʼe tapuakinaʼi feafeaʼi te faʼafai ʼa te taumātuʼa ʼi te minisitelio? Koteā te ako ʼe feala ke tou maʼu mai te ʼu taʼi fakamatala ʼaia?

¹⁵ ʼE tokoni te tahi ʼu ovi ki te ʼu tehina ʼo Kilisito ʼaki tanatou maʼumaʼua tuʼumaʼu ki te gāue fai fakamafola. (Mat. 25:40) ʼE mole natou hagē ko te tagata kaugana agakovi pea mo piko ʼo te lea fakatā ʼa Sesu. ʼE natou fia gāue mālohi pea mo fai ni sākilifisio ke feala hanatou fakamuʼamuʼa ia te Puleʼaga ʼi ʼonatou maʼuli. Ohagē lā ko Jon mo Masako, ʼaē neʼe fakaafe ke nā ʼolo ʼo tokoni ki te fakamafola ki te kau Siaina ʼaē ʼe māʼuʼuli ʼi te fenua ko Kenya. ʼI te kamata, neʼe mole nā ʼiloʼi papau peʼe nā ʼolo anai. Kae ʼaki tanā vakavakaʼi tonā maʼuli pea mo faikole ʼo ʼuhiga mo te faʼahi ʼaia, neʼe nā fakatuʼutuʼu leva ke nā ʼolo kiai.

¹⁶ Neʼe tapuakinaʼi nāua e Sehova ʼuhi ko tanā faʼafai ʼi te minisitelio. Neʼe nā ʼui neʼe lelei ʼosi tanā gāue. Neʼe nā kamata ia ako Tohi-Tapu e fitu pea mo maʼu ʼihi atu ʼaluʼaga fakafiafia. Neʼe nā hoko atu fēnei: “ ʼE mā fakafetaʼi ʼi te ʼaho fuli kiā Sehova ʼi tana fakafealagia ke mā ʼomai ki henī.” Tokolahi te ʼu tehina mo tuagaʼane neʼe natou fakahā tonatou loto ʼaē ke natou maʼumaʼua ki te gāue ʼaē ki te ʼAtua, logolā tanatou mole ʼiloʼi ia te temi ʼaē kā hoko mai anai te fakaʼosi. Ohagē ko te toko lauʼi afe tupu ʼaē neʼe kau ki te Ako ʼo Kileate pea mo natou liliu ʼo misionea. ʼE feala ke kotou mahino ki te gāue fakamisionea ʼaki te ʼalatike “ ʼE Tou Fai Te Meʼa ʼe Tou Lavaʼi!” ʼi Te Tule Leʼo ʼo te ʼaho 15 ʼo ʼOketopeli 2001. ʼE kotou lau anai ʼi te ʼalatike lelei ʼaia ia te ʼuhiga ʼo te ʼaho gāue ʼo he misionea, pea mo fakakaukauʼi peʼe feafeaʼi hakotou hikihiki takotou gāue ʼaē ki te ʼAtua. Ko takotou gāue ʼe ina fakakolōliaʼi anai ia te ʼAtua pea mo kotou maʼu lahi ai anai te fiafia.

ʼE LELEI MO KOUTOU KE KOTOU HAGA NONOFO ʼALAʼALA

17. ʼE liliu feafeaʼi ko he tapuakina kiā tātou ia tatatou mole ʼiloʼi ʼaē te ʼaho peʼe ko te hola ʼo te fakaʼosi?

¹⁷ Koia, ko tatatou mole ʼiloʼi ʼaē te ʼaho peʼe ko te hola ʼo te fakaʼosi ʼo te tuʼu ʼaenī ʼe mole tonu ke fakatupu lotomamahi kiā tātou. Kae ʼe feala ia ke liliu ko he tapuakina kiā tātou, koteʼuhi ʼe tokoni mai ke tou haga fai te finegalo ʼo te ʼAtua, pea ʼe mālohi ai anai ʼatatou felōgoi mo tatatou Tamai ʼofa ʼaē ko Sehova. ʼI tona ʼaluʼaga ʼaē ʼe tou tōkakaga lelei ki te gāue ʼaē neʼe fakatotonu mai e Sesu pea mo tou tekeʼi ia te ʼu meʼa ʼaē ʼe ina fakaleluʼi tātou, koia ʼe tou maʼu ai he maʼuli fiafia ʼi te tauhi ʼaē kiā Sehova.—Luka 9:62.

18. He koʼē ʼe tou fia nonofo agatonu ʼi tatatou tauhi ʼaē ki te ʼAtua?

¹⁸ Kua ovi ʼaupitō mai te fakaʼosi ʼo te tuʼu ʼaenī, koia ʼe tou fia nonofo agatonu ai ʼi tatatou tauhi ʼaē ki te ʼAtua. ʼE mole tou loto anai ke tou fakalotomamahiʼi ia Sehova pea mo Sesu. Neʼe nā foaki mai ia te gāue maʼuhiga ʼaē ke tou fakahoko ʼi te ʼu ʼaho fakaʼosi ʼaenī. Koia ʼe tou loto fakafetaʼi ai kiā nāua ʼo ʼuhiga mo te falala ʼaē kua nā tuku kiā tātou!—Lau ia 1 Timoteo 1:12.

19. ʼE feafeaʼi hatatou fakahā kua tou nonofo tokalelei ki te fakaʼosi ʼo te tuʼu ʼaenī?

¹⁹ Peʼe tou maʼu ia te ʼamanaki aē ko te maʼuli ʼi selō peʼe ko te maʼuli ʼi te Palatiso ʼi te kele, kae ʼe tou hoko atu anai tatatou fakalogo ki te fakatotonu ʼaē ʼa te ʼAtua ke tou fai fakamafola pea mo fai ni tisipulo. ʼE mole ʼaoga ke tou ʼiloʼi te ʼaho peʼe ko te hola ʼaē kā hoko mai ai te ʼaho ʼo Sehova. Kae ʼe feala pē ke tou nonofo teuteu kiai, pea ʼe tou tokalelei anai! (Mat. 24:36, 44) ʼE tou tui papau ʼe mole tou fakahemala anai mo kapau ʼe tou tuku kātoa tatatou falala kiā Sehova pea mo fakamuʼamuʼa tona Puleʼaga.—Loma 10:11.

[Nota]

[Paki ʼo te pāsina 26]

ʼE tonu ke tou kumi te meʼa kai fakalaumālie māʼiapē lā ʼi te ʼu temi faigataʼa

[Paki ʼo te pāsina 27]

ʼE fakalaka vave te temi mokā ʼe tou maʼumaʼua ʼi te tauhi ʼaē ki te ʼAtua