ʼE Feala Koa Ke Tou Aga Fakahagatonu ʼi He Mālama ʼe Aga Faka Kakā?

“E matou loto ke [aga fakahagatonu] tuumau te u mea fuli e matou fai.”—HEPELEO 13:18.

LOGOLĀ te mālohi ʼo te ʼu fakaneke ʼo totatou ʼuhiga agahala, mo te mālama ʼaē ʼe tou māʼuʼuli ai pea mo te Tēvolo, kae ʼe feala pē ke tou tauʼi. ʼO feafeaʼi? Mo kapau ʼe tou fakaovi ki te ʼAtua pea mo maʼuliʼi ia te ʼu pelesepeto ʼaē ʼe tuʼu ʼi tana Folafola, te Tohi-Tapu. Tou vakaʼi ia faʼifaʼitaki e lua.

TE PELESEPETO FAKA TOHI-TAPU: “ ʼAua naʼa kotou fakatatau ki te mālama ʼaenī.”—Loma 12:2, La Bible de Jérusalem.

Te meʼa neʼe hoko: Ko Guilherme, ʼe ko he tagata mai Pelesile ʼe haʼele lelei tana fai koloa. Ki tana manatu, ʼe mole faigafua hakita aga fakahagatonu. Neʼe ina ʼui fēnei: “ ʼE faigafua pē ki he tagata fai koloa ke ina fai he ʼu aga faka kakā ʼuhi ko te ʼu fakaneke moʼo fakahoko ia te ʼu fakatuʼutuʼu ʼo tana sōsiete peʼe ke feala hana hoko atu ia tana fakataupiepie ʼi te faʼahi ʼo te ʼu koloa. Maʼa te tokolahi, ko te tali peʼe ko te foaki faka kakā ʼo he falā, ʼe ko he aga ia ʼe mole kovi. Kapau ko kita ko he pātolō pea mo lahi te ʼu meʼa ʼaē ʼe tonu ke kita totogi, ʼe faigataʼa takita aga fakahagatonu.”

Kae neʼe lava tauʼi e Guilherme ia te fakaneke ʼo te aga faka kakā. Neʼe ina ʼui fēnei: “Tatau aipē peʼe tou gāue ʼi he mālama ʼe aga faka kakā ʼi te faʼahi ʼo te ʼu koloa, kae ʼe feala pē ke tou aga fakahagatonu. ʼE tonu ke tou fia fai ia te meʼa ʼaē ʼe faitotonu. Pea ʼaki te Tohi-Tapu, neʼe au mahino ai ki te ʼu lelei ʼo te aga fakahagatonu. Ko he tahi ʼe aga fakahagatonu ʼe maʼa tona leʼo ʼo loto, ʼe tokalelei tana fakakaukau pea ʼe ina leleiʼia te ʼu gāue ʼaē ʼe ina fai. ʼE feala ke ina tuku he faʼifaʼitaki lelei ki ʼihi.”

TE PELESEPETO FAKA TOHI-TAPU: “Kae ko natou ae e fia maukoloa, e natou fetooki ki te fakahala, mo te matahele, pea mo te u manumanu kehekehe fakavale mo fakatupu tuutamaki, ae e natou fakauku te hahai ki te auha mo te malaia. Koteuhi ko te manumanu paaga ko he aka aia o te u kovi fuli.”—1 Timoteo 6:9, 10.

Te meʼa neʼe hoko: Ko André, ko he pātolō ʼo he sōsiete ʼe ina tau te ʼu masini ʼe ina fakaʼilo te kau kaihaʼa. ʼE gāue maʼa te foʼi aka. ʼI te tahi ʼaluʼaga, ʼi te hili ʼo te aka maʼuhiga, neʼe ʼalu ia André ki te pilo ʼo ʼave ia tana pepa ke totogi ia ia. Kae neʼe natou maʼumaʼua he neʼe natou lau ia te falā ʼo te ʼu tikite ʼo te aka. ʼI te kua tauhala, neʼe totogi fakavilivili e te pule ʼo te foʼi aka ia te ʼu sōsiete fuli, ʼo kau ai ia André.

ʼE fakamatala fēnei e André: “ ʼI taku liliu ʼaē ki fale, neʼe au fakatokagaʼi neʼe lahi age ia toku totogi ʼaē neʼe foaki mai e te pule ʼo te foʼi aka. Ki taku manatu neʼe mole feala ke ina ʼiloʼi peʼe ko ai ʼaē neʼe ina maʼu ia te foʼi falā fakalaka. Kae neʼe au fakaʼofaʼofaʼia te pule ʼo te foʼi aka heʼe tonu leva ia ke ina huʼi ia te falā ʼaē neʼe puli. Koia, neʼe au toe liliu ai ki ai. Neʼe faigataʼa taku fakakaku ki te pilo ʼo liufaki ia te falā ʼuhi ko te kaugamālie ʼo te hahaʼi. Neʼe punamaʼuli ia te pule ʼo te foʼi aka. Neʼe mole heʼeki he tahi kua ina toe liufaki age he falā.”

ʼE hoko atu fēnei ia André: “Neʼe fakaʼapaʼapaʼi au e te pule ʼuhi ko te ʼaluʼaga ʼaia. Kua hili kiai ni taʼu, iā nātou fuli ʼaia ʼaē neʼe gāue maʼa te foʼi aka ʼaia, ko au pē tokotahi ʼe kei toʼo gāue maʼa nātou. ʼE au fiafia ʼi taku maʼu he matagafua lelei ʼuhi ko taku maʼuliʼi ia te ʼu pelesepeto maʼuhiga ʼo te Tohi-Tapu.”

ʼE ko he faka lotomalohi ʼi tatatou ʼiloʼi ʼaē ʼe feala ke tou tauʼi ia te ʼu fakaneke kovi ʼaki te tokoni ʼa te ʼAtua. Kae ʼaki ʼatatou faiga takitokotahi, ʼe mole feala anai kiā tātou ʼi totatou ʼuhiga agahala ke tou pulihi kātoa ia te aga faka kakā ʼuhi heʼe kovi age ʼona tupuʼaga. Ko tona fakaʼuhiga koa ʼe mole pulihi anai ia te aga faka kakā? ʼE tou maʼu anai he tali faka lotomalohi mai te Tohi-Tapu ʼi te ʼalatike ʼaē kā hoa mai.