ʼUluaki Fehuʼi: Koteā Ia Te ʼUhiga ʼo Toku Maʼuli?

KO ROSALIND, neʼe lahilahi ake ʼi Pilitānia, neʼe hoholi mālohi ki te ako. Neʼe toe fia tokoni ki te hahaʼi. ʼI tana maʼu tona pepa ako, neʼe ina maʼu he ʼu gāue maʼuhiga ʼo tokoni ki te hahaʼi māsisiva pea mo nātou ʼaē ʼe māʼimoa pea mo te kau vavale. Logolā tana maʼu gāue lelei pea mo te fīmālie ʼo tona maʼuli fakasino, neʼe ina ʼui fēnei: “Lolotoga ni taʼu, neʼe au feʼuiʼaki peʼe koteā ia te ʼuhiga ʼo te maʼuli?”

He koʼē ʼe mole tou punamaʼuli ʼi te fai ʼo te fehuʼi ʼaia? ʼE mole tatau ia te tagata pea mo te manu, heʼe mole feala ki te manu ke fakakaukau. Kae ʼe tou maʼu ia te fealagia ʼaē ke tou tāʼofi he ako mai te temi muʼa, mo fai he ʼu fakatuʼutuʼu ki te kā haʼu pea mo fia mahino ki te ʼuhiga ʼo totatou maʼuli.

Koteā te tali ʼe fai e ʼihi? Ki te manatu ʼa te tokolahi, ko te ʼuluaki fakatuʼutuʼu ʼo te maʼuli ʼe ko te maʼu koloa peʼe ko te faiga ʼaē ke ʼiloa ʼo feala ai ke natou maʼu ia te fiafia.

Ko te faʼahiga manatu fea ʼaē ʼe hā ʼi te tali ʼaia? ʼE hā mai ai, ʼe tou tahi fai tana fakatuʼutuʼu. Pea ʼe maʼuhiga age ia te ʼu meʼa ʼaē ʼe tou loto kiai ʼi te fai ʼo te finegalo ʼo te ʼAtua.

Koteā ʼaē ʼe akoʼi mai ʼi te Tohi-Tapu? Neʼe lahi ʼaupitō ia te ʼu koloa ʼo te Hau ko Salomone pea neʼe ina kumi tuʼumaʼu he ʼu ʼaluʼaga ke fiafia ai kae ki muli age neʼe ina fakatokagaʼi neʼe mole maʼuhiga ki tona maʼuli. Neʼe ina ʼiloʼi ia te faʼahi ʼaē ʼe maʼuhiga tāfito ki tona maʼuli, ʼi tana tohi fēnei: “Fakalogo mai ki te fakanounou o te u mea fuli aeni: Ke ke mataku ki te Atua, pea ke ke tauhi ana folafola. Ko te mea aia e tonu ke fai e te tagata fuli.” (Ekelesiasi 12:15) Koteā te fakaʼuhiga ʼo te ʼui ʼaē ke tou tauhi te ʼu folafola ʼa te ʼAtua?

Ko te tahi fakatuʼutuʼu ʼa te ʼAtua ke tou maʼuli fiafia. ʼE tohi fēnei e Salomone: “Ko te mea e tahi e fiafia ai te tagata: ko te kai, mo te inu, pea mo te fakafiafiai o tona laumalie aki te fua o tana gaue; kae nee au sio foki ko te Atua ae e ina foaki te mea aia.”—Ekelesiasi 2:24.

ʼE toe loto e te ʼAtua ke tou ʼoʼofa pea mo tōkakaga ki ʼotatou fāmili. Tou tokagaʼi ʼe ʼaoga ia te ʼu tokoni ʼaenī kiā nātou takitahi ʼo te fāmili.

“E tonu ke ofa fena te tagata ki tona ohoana o hage ko tona sino totonu.”—Efeso 5:28.

“Ke fakaapaapa te fafine ki tona ohoana.”—Efeso 5:33.

“U fanau, kotou fakalogo ki akotou matua.”—Efeso 6:1.

Kapau ʼe tou maʼuliʼi ia te ʼu pelesepeto Fakatohi-tapu ʼaia, ʼe tou maʼu anai ia te fiafia pea mo te maʼuli fakafeʼauga. Kae, ko te faʼahi ʼaē ʼe maʼuhiga age, ʼe ko te ako ke tou ʼiloʼi lelei ia totatou Tupuʼaga pea mo tou fakaovi kiā te ia, ohagē ko hatatou fakaovi ki hotatou Kaumeʼa. ʼI tona fakahagatonu, ʼe fakalotomālohiʼi tātou ʼi te Tohi-Tapu ke tou “fakaoviovi ki te Atua.” Pea ʼe ina toe fakapapauʼi fēnei: “E fakaoviovi atu anai ia kia koutou.” (Sakopo 4:8) Kapau ʼe kotou fai ia te faʼahi ʼaia, ʼe ʼi ai anai he ʼuhiga ʼo tokotou maʼuli.

Ko Rosalind ʼaē neʼe tou talanoa ki ai ʼi ʼoluga age, ʼi te temi nei kua ina tokagaʼi kua ʼi ai te ʼuhiga ʼo tona maʼuli.

Kapau ʼe kotou fia maʼu he tahi ʼu fakamahino ʼo ʼuhiga mo te faʼahiga maʼuli ʼaē ʼe leleiʼia e te ʼAtua, vakaʼi ia te kāpite 12 ʼo te tohi ʼaenī Koteā ʼAē ʼe Akoʼi Moʼoni Mai ʼi Te Tohi-Tapu? ʼE feala ke kotou toe toʼo ʼi te tuʼasila ʼaenī ʼi te Neti www.jw.org

[Fakamatala ʼo te pāsina 5]

Koteā ʼAē Neʼe ʼUi e Sesu ʼo ʼUhiga Mo Te Fakaʼuhiga ʼo Te Maʼuli?

Neʼe ʼiloʼi e Sesu ia te fakaʼuhiga ʼo tona maʼuli. Neʼe ina ʼui fēnei: “Nee au tupu pea nee au hau ki te malamanei o fakamooni ki te mooni.” (Soane 18:37) Neʼe ina fakaʼaogaʼi ia tona maʼuli moʼo akoʼi ki te hahaʼi ia te moʼoni ʼo ʼuhiga mo te ʼAtua pea mo ʼAna fakatuʼutuʼu.

ʼE ʼi ai anai he ʼuhiga ʼo totatou maʼuli mo kapau ʼe tou mulimuli ki te faʼifaʼitaki ʼo Sesu. ʼI tona fakahagatonu, ʼe fakaafe tātou e Sesu ke tou mulimuli ki tona faʼifaʼitaki. (Mateo 11:29) Tou vakaʼi ia ʼaluʼaga e lua ʼe feala ke tou mulimuli ai ki te ʼu palalau ʼa Sesu.

Neʼe akoʼi mai e Sesu kapau ʼe tou fia maʼu ia te fiafia, ʼe tonu ke tou “fakalogo ki te folafola a te Atua.” (Luka 11:28) ʼE feala ke tou maʼu ai ia te ʼu meʼa ʼaē ʼe ʼaoga kiā tātou ʼi te faʼahi fakalaumālie pea mo te ʼatamai mālama ʼo ʼuhiga mo “te Atua e tahi mo mooni, pea mo ae nee ke fekaui mai, Sesu-Kilisito.”—Soane 17:3.

Neʼe fakatotonu e Sesu ki ʼana tisipulo ke natou akoʼi ki te hahaʼi ia te ʼu meʼa ʼaē neʼe natou ako. Neʼe ina ʼui fēnei: “Koia, koutou olo, kotou fai ni tisipulo i te u puleaga fuli, pea kotou papitemai natou i te huafa o te Tamai, mo te Alo pea mo te Laumalie Maonioni, pea kotou ako natou ki te taupau o te u mea fuli nee au fakatotonu atu kia koutou.”—Mateo 28:19, 20.

ʼE tokagaʼi e ʼihi, kua lelei age tonatou maʼuli ʼuhi ko tanatou ako te Tohi-Tapu pea mo tanatou maʼuliʼi ʼana tokoni. Pea ʼi te temi ʼaē ʼe natou kamata tokoni ai ki te hahaʼi ke natou ʼiloʼi ia te ʼAtua, ʼe natou tokagaʼi ai kua ʼi ai te ʼuhiga ʼo tonatou maʼuli.