Lua Fehuʼi: Koteā ʼAē Kā Hoko Mokā ʼe Au Mate?

NEʼE kei tūpulaga ia Roman ʼi te temi ʼaē neʼe mate ai tona kaumeʼa ʼi te fai fakaʼī. ʼE ina ʼui fēnei: “Neʼe au lotomamahi ʼaupitō ʼi te mate ʼo toku kaumeʼa. Lolotoga ni taʼu, hili kiai te fai fakaʼī, neʼe au feʼuiʼaki pe koteā ʼaē kā hoko mokā tou mamate.”

He koʼē ʼe mole tou punamaʼuli ʼi te fai ʼo te fehuʼi ʼaia? Tatau aipē peʼe kei tou tūpulaga peʼe kua tou mātutuʼa, ʼe mole he tahi ʼe fia mate. Tokolahi ʼe natou tuʼania pe koteā ʼaē kā hoko anai ʼi te hili ʼo te mate.

Koteā te tali ʼe fai e ʼihi? Ki te manatu ʼa te tokolahi, ʼe ʼi ai te potu ʼo te tagata ʼaē ʼe mate, ʼe hoko atu tona maʼuli. ʼE natou tui ʼe maʼu anai e te hahaʼi agalelei ia te ʼamanaki ʼaē ki selō, kae ʼe fakamamahiʼi anai ia te hahaʼi agakovi ʼo talu ai ʼuhi ko ʼanatou agahala. Ki te manatu ʼa ʼihi ko he tahi ʼe mate ʼe mole toe hoko atu tona maʼuli pea ʼe mole kei tou manatuʼi.

Ko te faʼahiga manatu fea ʼaē ʼe hā ʼi te ʼu tali ʼaia? ʼE hā mai ʼi te ʼuluaki tali, ʼe hoko atu te maʼuli ʼo he tahi mokā mate. Pea ʼi te lua tali, ʼe mole he ʼuhiga ʼo te maʼuli. Ko nātou ʼaē ʼe natou maʼu ia te taʼi manatu ʼaia, ʼe feala ke natou fakatui ki te ʼu palalau ʼaenī: “Tou kai pea tou inu, koteuhi e tou mate anai i [te] apogipogi.”—1 Kolinito 15:32.

Koteā ʼaē ʼe akoʼi mai ʼi te Tohi-Tapu? ʼE mole akoʼi mai ʼi te Tohi-Tapu, ʼe ʼi ai he potu ʼo te tagata ʼaē ʼe mate, ʼe hoko atu tona maʼuli. Neʼe uga e te ʼAtua ia te Hau ko Salomone ke ina tohi fēnei: “E iloi e te kau mauli e natou mate anai; kae e mole iloi he mea e natou ae kua mate.” (Ekelesiasi 9:5) ʼE mole kei feala ki te kau mate ke natou logoʼi he meʼa peʼe ke natou fai he meʼa. Koia ʼe mole feala ke natou tokoni peʼe ke natou gaohi koviʼi ia te hahaʼi māʼuʼuli.

ʼE mole ko he fakatuʼutuʼu ʼa te ʼAtua ke mate ia te tagata, ʼo kehekehe ia mo te manatu ʼa te hahaʼi. Neʼe ina fakatupu ia Atama, te ʼuluaki tagata, ʼaki te fakatuʼutuʼu ʼaē ke maʼuli ʼo heʼegata ʼi te kele. Neʼe hoki talanoa pē ia te ʼAtua ki te mate ʼi te temi ʼaē neʼe ina fai ai te fakatokaga kiā Atama. Neʼe ina tapuʼi age kiā Atama ia tana kai ki te fuaʼi ʼakau pea neʼe ina fakatokaga age, kapau ʼe kai kiai ʼe “mate anai.” (Senesi 2:17) Kanapau lā neʼe fakalogo ia Atama mo Eva, neʼe feala pē kiā nāua pea mo tonā hōloga ʼaki tanatou agatonu ki te ʼAtua ke natou māʼuʼuli ʼo heʼegata ʼi te kele.

Neʼe fakatuʼutuʼu pē ia e Atama ke mole fakalogo ki te ʼu fakatokaga ʼa te ʼAtua. Neʼe agahala ʼi te temi ʼaē neʼe talagataʼa ai ki te ʼAtua, ko te tupuʼaga lā ʼaia ʼo tana mate. (Loma 6:23) Neʼe mole he koga ʼo Atama neʼe hoko atu tona maʼuli ʼi tana mate. Koia neʼe mate ai ʼo talu ai. Neʼe ʼui fēnei e te ʼAtua kiā Atama: “E ke kai anai tau pane i te [kavakavahia] o tou lae, o kaku ki te aho ae e ke liliu ai anai ki te kele, ae nee too mai ai ia koe; koteuhi ko te efu ia koe, pea e ke liliu anai ki te efu.” (Senesi 3:19) Mai tona ʼaluʼaga ʼaē ʼe tou hifo fuli mai ia Atama, neʼe tou maʼu ai te agahala pea mo te mate.—Loma 5:12.

Pea logolā te kovi ʼo te filifili ʼa Atama, ʼe fakahoko pē anai e te ʼAtua ia Tana fakatuʼutuʼu ʼaē ke fakafonu ia te kele e te hōloga ʼo Atama. (Senesi 1:28; Esaia 55:11) Kua toe vave fakatuʼuake pē e Sehova ia te tokolahi ʼaē kua mamate ki te maʼuli. Neʼe ʼui fēnei e te ʼapositolo ko Paulo ʼo ʼuhiga mo te temi ʼaia: “E i ai anai he toe tuuake o te kau agatonu mo te kau agahala.”—Gaue 24:15.

Ko Roman ʼaē neʼe tou talanoa ki ai ʼi muʼa atu, neʼe ina ako ia te Tohi-Tapu pea mo ina ʼiloʼi ia te moʼoni ʼo ʼuhiga mo te mate pea mo Sehova ʼAtua. Neʼe malave ki ai ia te ʼu meʼa ʼaē neʼe ina ako.

Kapau ʼe kotou fia maʼu he tahi ʼu fakamahino ʼo ʼuhiga mo te ʼaluʼaga ʼaē ʼe hoko ʼi te hili ʼo te mate, vakaʼi ia te kāpite 6 ʼo te tohi ʼaenī Koteā ʼAē ʼe Akoʼi Moʼoni Mai ʼi Te Tohi-Tapu? ʼE feala ke kotou toe toʼo ʼi te tuʼasila ʼaenī ʼi te Neti www.jw.org

[Fakamatala ʼo te pāsina 7]

Koteā ʼAē Neʼe ʼUi e Sesu ʼo ʼUhiga Mo Te Mate?

Neʼe mole manatu tahi ia Sesu mo te kau takitaki lotu ʼo tona temi ʼaē neʼe natou ʼui ʼe mole fakatuʼuake ia te kau mate. (Luka 20:27) Pea neʼe mole akoʼi e Sesu ki te hahaʼi ʼe ʼi ai he koga ʼe maʼuli ʼi te hili ʼo te mate. Kae, koʼenī te ʼu akonaki neʼe fai e Sesu.

ʼE hagē ia te mate ko te moe. ʼI te kua mate ʼo tona kaumeʼa ko Lasalo, neʼe ʼui fēnei e Sesu: “Ko totatou kaumea ko Lasalo e moe, kae e au alu nei o fafagu ia.” Neʼe mole mahino ʼana tisipulo ki ʼana palalau, ʼo natou tali fēnei: “Aliki, kapau e moe ia, e lelei anai ia.” ʼE fakamahino fēnei ʼi te Tohi-Tapu: “Nee palalau ia Sesu ki tona mate, kae nee natou manatu e palalau ia ki te malolo o te moe. Pea nee ui fakahagatonu leva e Sesu kia natou: Kua mate ia Lasalo.”—Soane 11:11-14.

ʼE toe fakatuʼuake anai te kau mate. ʼI te tau atu ʼa Sesu ki te kolo ʼo Lasalo, neʼe ina fakanaʼanaʼa ia Maleta, te tokolua ʼo Lasalo, ʼo ina ʼui fēnei age: “E toe tuuake anai tou tuagaane.” Pea neʼe fai e Sesu ia te fakapapau maʼuhiga ʼaenī: “Ko au ko te toe tuuake mo te mauli, ko ae e tui mai kia au e mauli anai ia, tatau pe e mate ia.” Neʼe mole hoko palalau pē ia Sesu. ʼI muʼa ʼo te kaugamālie, neʼe toe fakatuʼuake e Sesu ia Lasalo, logolā ia te kua ʼaho fā ʼo tana kua mate.—Soane 11:23, 25, 38-45.

ʼI te ʼaluʼaga ʼaē neʼe hā ki te ʼapositolo ko Soane, neʼe toe fai e Sesu ia te fakapapau ʼaē ʼe toe fakatuʼuake anai ia te kau mate. Neʼe ina fakamatalatala ia te ʼaluʼaga ʼe hoko anai ʼi te kā haʼu mokā toe liufaki age anai e te mate ia te kau mate.—Apokalipisi 20:13.