Tolu Fehuʼi: He Koʼē ʼe Fakagafua e Te ʼAtua Ke Au Mamahi?

KO TE tamai ʼa Ian neʼe ko he tagata ʼinu kava. Logope lā ʼi tana lahilahi ake, neʼe ina maʼu te meʼa fuli ʼi te faʼahi fakasino, kae neʼe mole ʼofainaʼi e tana tamai. ʼE ʼui fenei e Ian: “Neʼe mole au faʼa ʼofa ʼi taku tamai ʼuhi he neʼe ko he tagata ʼinu kava pea neʼe ina gaohi koviʼi taku faʼe.” ʼI tana lahilahi ake, neʼe ina feʼuiʼaki peʼe maʼuli moʼoni koa te ʼAtua. Neʼe manatu fenei: “Kapau ʼe maʼuli moʼoni te ʼAtua, he koʼē ʼe ina fakagafua ke maʼuli mamahi te hahaʼi?”

He koʼē ʼe mole tou punamaʼuli ʼi te fai ʼo te fehuʼi ʼaia? Tatau aipē peʼe mole kotou tau mo he ʼu faigataʼaʼia fēia, kae ʼe lagi kotou ʼiʼita mokā hoko he ʼu ʼaluʼaga heʼe faitotonu ʼo tupu ai te mamahi ʼo te hahaʼi. Kae ʼi te temi ʼaē ʼe hoko ai kiā koutou ia he ʼaluʼaga faigataʼa ohagē ko ʼaē neʼe hoko kiā Ian peʼe ko he tahi ʼe kotou ʼoʼofa mamahi ai ʼe mahaki peʼe neʼe kua mate, ʼe kotou feʼuiʼaki pe koʼē ʼe kotou mamahi.

Koteā te tali ʼe fai e ʼihi? Ko ʼihi ʼe natou tui ʼe fakagafua e te ʼAtua te ʼu mamahi moʼo akoʼi mai kiā tātou ia te agavaivai pea mo te manavaʼofa. Ko ʼihi ohagē lā ko te kau Hindouistes, ʼe natou manatu ʼe mamahi te hahaʼi ʼuhi ko te ʼu agahala ʼaē neʼe natou fai ʼi tonatou maʼuli ki muʼa atu.

Ko te faʼahiga manatu fea ʼaē ʼe hā ʼi te ʼu tali ʼaia? ʼE hā mai ai, ʼe mole tokagaʼi e te ʼAtua ia te mamahi ʼo te tagata koia ʼe faigataʼa ai ki te hahaʼi tanatou ʼoʼofa ki ai. Ko te ʼAtua ʼe loto fefeka.

Koteā ʼaē ʼe akoʼi mai ʼi te Tohi-Tapu? ʼE ʼui fakahagatonu mai ʼi te Tohi-Tapu ʼe mole fakamamahiʼi e te ʼAtua ia te hahaʼi. “Ke aua naa ui e he tahi moka e fakahalai ia ia: Ko te Atua ae e ina fakahalai au. Koteuhi e mole feala ke fakahalai te Atua e te kovi, pea e mole ina fakahalai he tahi.” (Sakopo 1:13) Ko te taʼi manatu ʼaē ʼe fakamamahiʼi e te ʼAtua ia te hahaʼi, ʼe mole ʼalutahi mo te ʼuluagaaga ʼo te ʼAtua ohagē ko tona fakahā mai ʼi te Tohi-Tapu. ʼO feafeaʼi?

Ko te ʼofa ʼe ko te kalitātē maʼuhiga ʼaia ʼo te ʼAtua. (1 Soane 4:8) ʼE hā lelei ia te faʼahi ʼaia ʼi te Tohi-Tapu heʼe fakatatau ai ia te ʼAtua ki he faʼē ʼe tokaga fakalelei ki ʼana fānau. ʼE ʼui fēnei e te ʼAtua: “Pe e galoi e he fafine tana fanau ae e ina [fāgai]? Pe e mole ofa ia ia ki te fua o tona fatu? Ka galoi anai e te fae tana fanau, ko au e mole pe au galoi anai ia koe.” (Esaia 49:15) ʼI takotou manatu lā, ʼe feala koa ki he faʼē ʼofa ke ina fai ia he meʼa ʼe kovi ki tana fānau? Kailoa, kae ko he faʼē peʼe ko he tamai ʼofa ʼe faiga anai ke ina fakafīmālieʼi te ʼu mamahi ʼo tana fānau. ʼE toe fēia pē mo te ʼAtua, ʼe mole ina fakamamahiʼi ia te hahaʼi.—Senesi 18:25.

Kae logolā te ʼofa ʼo te ʼAtua, neʼe mole ina pulihi te mamahi. Koia ʼe lagi kotou feʼekeʼaki pe koʼē ʼe mole pulihi e te ʼAtua ia te ʼu tupuʼaga ʼo te mamahi kapau ʼe māfimāfi pea mo ʼofa ki te tagata.

ʼE fakagafua e te ʼAtua ke hoko atu te mamahi heʼe ʼi ai ʼona tupuʼaga tāfito. Tou vakaʼi te aluʼaga ʼaenī: ʼi te agamāhani ko te tagata pē ʼe fakatupu kovi ki te tagata. Tokolahi te hahaʼi agamālohi mo agakovi ʼe mole natou fia fetogi ʼanatou aga. Koia, ʼe tonu anai ke fakaʼauha e te ʼAtua ia nātou ʼaia moʼo pulihi ia te tupuʼaga ʼo te mamahi.

Neʼe fakamahino e te ʼapositolo ko Petelo pe koʼē neʼe heʼeki fakaʼauha e te ʼAtua ia te hahaʼi ʼaē ʼe natou fai ia te ʼu meʼa ʼe kovi, ʼo ina tohi fēnei: “E mole tuai [ia Sehova] i te fakahoko o tana fakapapau, o hage ko te lau a ni ihi; kae e kataki fualoa ia kia koutou, koteuhi e mole loto ia ke mate he tahi, kae ke kaku fuli ki te fakahemala.” (2 Petelo 3:9) ʼE hā ʼi te kātaki fualoa ʼa Sehova ʼAtua ia tona ʼofa mo tona manavaʼofa.

Kae kua vave pulihi e Sehova ʼAtua ia te mamahi. ʼE ina “liufaki [anai] te mamahi kia natou ae e natou fakamamahii” te hahaʼi. Pea “e tautea anai natou ki he maumau heegata.”—2 Tesalonika 1:6-9.

ʼE fiafia ia Ian ʼaē neʼe tou talanoa ki ai, ʼi te ʼu tali ʼaē neʼe ina maʼu ʼo ʼuhiga mo te mamahi. Neʼe fetogi tana faʼahiga manatu ki te ʼuhiga ʼo tona maʼuli ʼaki te ʼu meʼa neʼe ina ako ai.

[Paki ʼo te pāsina 9]

Kapau ʼe kotou fia ʼiloʼi pe koʼē ʼe fakagafua e te ʼAtua ia te mamahi pea koteā ʼaē kā ina fai anai moʼo pulihi te mamahi, vakaʼi ia te kāpite 11 ʼo te tohi ʼaenī Koteā ʼAē ʼe Akoʼi Moʼoni Mai ʼi Te Tohi-Tapu? ʼE feala ke kotou toe toʼo ʼi te tuʼasila ʼaenī ʼi te Neti www.jw.org

[Fakamatal ʼo te pāsina 9]

Koteā ʼAē Neʼe ʼUi e Sesu ʼo ʼUhiga Mo Te Mamahi?

Neʼe mole tukugākoviʼi e Sesu ia te ʼAtua ʼo ʼuhiga mo te ʼu mamahi ʼaē neʼe tau mo te hahaʼi. Tou vakaʼi te ʼu faʼahi ʼaē neʼe ina fakahoko.

Neʼe fakahā e Sesu ʼe mole fakatūʼā e te ʼAtua ia te hahaʼi ʼo fakamamahiʼi nātou. Neʼe fakamālōlō e Sesu ia te hahaʼi māhahaki mo te kau ketu pea mo te kau kivi. (Mateo 15:30) ʼAki te ʼu milakulo ʼaē neʼe fakahoko e Sesu ʼe tou tāʼofi ia te ʼu ako maʼuhiga ʼaenī e lua: ʼUluaki, neʼe fakaʼaogaʼi e Sesu ia te mālohi ʼaē neʼe tuku age e te ʼAtua moʼo fakafīmālieʼi te ʼu mamahi ʼo te hahaʼi, kae neʼe mole ina fakaʼaogaʼi te mālohi ʼaia moʼo fakatupu mamahi. Lua, neʼe fakamālōlō e Sesu te hahaʼi he neʼe ʼofa kiā nātou. Neʼe “ofa mamahi” ia ki te hahaʼi ʼi tana sio ʼaē ki tanatou mamahi. (Mateo 20:29-34) Neʼe faʼifaʼitakiʼi lelei e Sesu ia te ʼofa ʼo tana Tamai. Koia ʼaki te ʼu palalau pea mo te ʼu aga ʼa Sesu, ʼe tou ako ai ʼe lotomamahi ʼaupitō ia te ʼAtua ʼi Tana sio ʼaē ki te mamahi ʼo te hahaʼi pea ʼe Ina fia fakafīmālieʼi nātou. —Soane 14:7, 9.

Neʼe fakahā e Sesu ko te tupuʼaga tāfito ʼo te ʼu mamahi ʼo te tagata, ʼe ko Satana te Tēvolo. Neʼe ina ʼui fēnei: “Nee fakapo ia talu mai te kamataaga.” (Soane 8:44) Pea neʼe toe fakamahino e Sesu ko Satana ia te Tēvolo ʼe ko “te pule o te malama aeni” pea ko ia ʼaē ʼe ina “kakai te kele katoa.”—Soane 12:31; Apokalipisi 12:9.

Neʼe fakahā mai e Sesu ia te ʼamanaki ʼo ʼuhiga mo te temi ʼaē kā pulihi ai anai te mamahi. Neʼe ina akoʼi ki tana kau tisipulo ke natou faikole fēnei: “Tamatou Tamai ae e nofo i te atu lagi! . . . ke aumai tau pule; ke fai tou finegalo i te kele o hage ko selo.” (Mateo 6:9, 10) ʼI te temi ʼaē kā hoko mai te Puleʼaga ʼo te ʼAtua, ʼe pulihi anai te mamahi ʼi te kele, ohagē pē ko tona kua pulihi ʼi selō.

ʼI te ʼaluʼaga ʼaē neʼe hā ki te ʼapositolo ko Soane, neʼe fakahā e Sesu peʼe feafeaʼi anai ia te maʼuli ʼo te hahaʼi mokā pule anai te Puleʼaga ʼo te ʼAtua. ʼI te temi ʼaia, ʼe “holoholoi anai [e te ʼAtua] te u loimata fuli mai onatou mata, pea e mole toe mau anai te mate: e mole toe mau anai he tagi, mo he lauga, mo he mamahi, koteuhi kua puli leva te u uluaki mea.”—Apokalipisi 1:1; 21:3, 4.