Tou Ako Mai Te Folafola ʼa Te ʼAtua

ʼE Fakatuʼu Anai Koa e Te ʼAtua Ia He Puleʼaga ʼe Ina Puleʼi Ia Te Mālamanei Kātoa?

ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega Tohi-Tapu ʼo kotou maʼu ai ʼona tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.

1. He koʼē ʼe ʼaoga ke ʼi ai he puleʼaga ʼe ina puleʼi ia te mālamanei kātoa?

Iā ʼaho nei, ʼe tau ia te mālamanei kātoa mo te ʼu mamahi. ʼI ʼihi fenua, tokolahi te hahaʼi ʼe natou māsisiva pea mo maʼuli mamahi. Kae ki ʼihi fenua, tokolahi ʼe lahi maumau ʼonatou koloa. Kae ʼe gata pē ki he puleʼaga ʼe ina puleʼi ia te mālamanei kātoa ʼe feala ke ina vaevae lelei ia te ʼu koloa ʼo te kele ki te ʼu fenua kehekehe.—Lau ia Ekelesiasi 4:1; 8:9.

2. Ko ai ʼaē ʼe feala ke falala ki te taʼi puleʼaga ʼaia?

ʼE mole tou māhani ʼe takitaki e he puleʼaga e tahi ia te mālamanei kātoa, heʼe mole feala ki he tahi ke ina fakahoko ia te faʼahi ʼaia. ʼE mole feala ke fakalogo ia te hahaʼi kehekehe ki he tagata pē e tahi. ʼE toe feala ke liliu ia ia ʼaē ʼe takitaki ʼo agakovi ʼuhi ko te tuʼulaga ʼaē ʼe ina maʼu. Pea ʼe fakamataku mo kapau ʼe takitaki ia te mālamanei kātoa e he tagata agakovi.—Lau ia Taaga Lea 29:2; Selemia 10:23.

Neʼe filifili e Sehova ia Sesu, tona ʼAlo ke ina takitaki ia te mālamanei kātoa ʼo talu ai. (Luka 1:32, 33) Neʼe kua mahino ia ki te faʼahiga maʼuli ʼo te hahaʼi. ʼI tana ʼi te kele, neʼe ina fakamālōlō ia te hahaʼi māhahaki, neʼe ina akoʼi ki te hahaʼi ia te agamalū, neʼe ina toʼo he temi ke fakatahi ai mo te tamaliki. (Maleko 1:40-42; 6:34; 10:13-16) Ko te tupuʼaga lā ʼaia ʼo tatatou ʼui ʼe ko Sesu ia te Takitaki lelei.—Lau ia Soane 1:14.

3. ʼE feala koa ke fakatuʼu he puleʼaga fēia?

Neʼe fakanofo e te ʼAtua ia tona ʼAlo ke ina puleʼi ia te kele mai te lagi. (Taniela 7:13, 14) ʼE mole feala ki he tagata takitaki ke nofo iā faʼahi fuli ʼo te kele, kae ʼe mole ʼaoga ke hifo mai ia Sesu ki te kele ʼo takitaki.—Lau ia Mateo 8:5-9, 13.

ʼE lotolelei anai koa te tagata fuli ke takitaki e Sesu ia te mālamanei? Kailoa. ʼE tali pē anai e te hahaʼi ʼaē ʼe natou fia fai ia te meʼa ʼaē ʼe lelei. ʼE fakamaʼa anai e Sehova ia te kele ia nātou ʼaē ʼe natou fakafisi ki te takitaki ʼofa mo te faitotonu ʼa Ia ʼaē neʼe ina fakanofo.—Lau ia Mateo 25:31-33, 46.

4. Koteā ʼaē kā fai anai e te Takitaki ʼaia?

Ohagē ko te tagata tauhi ovi mo tana faga ovi, neʼe kua tānaki e Sesu ia te hahaʼi agamalū ʼo te ʼu puleʼaga fuli pea mo akoʼi age kiā nātou ia te ʼu fakatuʼutuʼu ʼofa ʼa te ʼAtua. (Soane 10:16; 13:34) ʼE natou fiafia ʼi tanatou lagolago ki te takitaki ʼa Sesu. (Pesalemo 72:8; Mateo 4:19, 20) ʼI te kele kātoa, ʼe tala fakatahi e te hahaʼi fakalogo agatonu ʼa Sesu kua liliu ia Sesu ko te Hau.—Lau ia Mateo 24:14.

Kā ʼamanaki fakaʼāteaina pē nei e Sesu ia te mālamanei kātoa mai te ʼu takitaki agakovi. Neʼe ina filifili ʼihi ʼi ʼana kaugana agatonu ke natou kaugā hau mo ia ʼi te lagi ki te takitaki ʼo te kele kātoa. (Taniela 2:44; 7:27) ʼE fakafonu anai ia te kele kātoa ʼaki te ʼatamai mālama ʼo ʼuhiga mo Sehova pea mo toe fakatuʼu ia te palatiso ʼaē neʼe fakatuʼu ʼi te kamataʼaga.—Lau ia Esaia 11:3, 9; Mateo 19:28.

Kapau ʼe kotou fia maʼu he tahi ʼu fakamahino, vakaʼi te kāpite 8 ʼo te tohi ʼaenī Koteā ʼAē ʼe Akoʼi Moʼoni Mai ʼi Te Tohi-Tapu?, neʼe tā e te kau Fakamoʼoni ʼa Sehova.