Ke Fakafimalieʼi Tatou Pea Ke Tou Fakafimalieʼi ʼIhi

Ko te tokoni lahi ʼe tou maʼu ʼe ko te fakalotomalohi ʼae ʼe fai mai e ʼotatou famili, mo ʼotatou kaumeʼa pea mo ʼotatou tehina mo tuagaʼane.

Ko he kaumeʼa agalelei pea mo ni palalau lave lelei ʼe feala ke hage ko he faitoʼo ʼe tou logo lelei ai pea mo lotomalohi ai. (Taag. 16:24; 18:24; 25:11) Ko he Kilisitiano moʼoni ʼe mole tonu ia ke ina kumi pe tona fimalie. Kaʼe ʼe tonu ia ke ina faigaʼi “te fakafimaliei o natou e nofo i te u mamahi, aki te fakafimalie nee [ina] tali mai te Atua!” (2 Ko. 1:4; Luka 6:31) Pea ʼe kau ia Antonio ia natou ʼae neʼe natou fakaʼaogaʼi te tokoni ʼaia.

Neʼe lotomamahi ʼaupito ia Antonio ʼi te temi ʼae neʼe fakaha age ai tona mahaki ia te lymphome, ʼe ko te faʼahiga kosea ʼo te toto. Logola te faʼahi ʼaia, kaʼe neʼe ina faigaʼi ke ina tauʼi tona lotomamahi. ʼO feafeaʼi? Neʼe faiga ia ke ina fakamanatu te ʼu katiko ʼo te Puleʼaga pea mo ina hivaʼi ke ina logoʼi pea mo metitasioʼi te ʼu kupu ʼi palalau. Neʼe ina toe maʼu te lotomalohi ʼi tana faikole leʼo lahi pea mo tana lau leʼo lahi te Tohi-Tapu.

Kaʼe ʼe fakamoʼoni ia Antonio ʼi te temi nei, ko te faʼahi ʼae neʼe tokoni lahi kia ia ʼe ko te tokoni ʼo ʼona tehina Kilisitiano. ʼE ina ui fenei: “ ʼI te temi ʼae neʼe au lotomamahi ai pea mo toku ʼohoana, neʼe ma kole ke haʼu he tagata ʼafeā ʼo he kokelekasio ʼo faikole mo maua. Neʼe tokoni lahi te faʼahi ʼaia kia maua pea neʼe ma lotofimalie ai.” ʼE ina hoko atu fenei: “ ʼI tona fakahagatonu, ʼe ma fakafetaʼi ki te tokoni ʼo toma famili pea mo ʼoma tehina fakalaumalie, he neʼe feala ai leva ke puli vave toma lotomamahi.” ʼE mahino ia, neʼe loto fakafetaʼi te tehina ʼi tana maʼu te ʼu taʼi kaumeʼa ʼofa mo loto tokaga ʼaia.

Ko te tahi tokoni ʼe ʼaoga ki te ʼu temi faigataʼa ʼe ko te laumalie maʼoniʼoni ʼae neʼe fakapapauʼi mai. Neʼe ui e te apositolo ko Petelo ko te laumalie maʼoniʼoni ʼo te ʼAtua ʼe ko he “meaofa” ia. (Gaue 2:38) Neʼe moʼoni te faʼahi ʼaia ʼi te temi ʼae neʼe fakanofo ai te kau tisipulo ʼa Kilisito ʼi te Penikosite ʼo te taʼu 33 H.T.S.a Logola neʼe talanoa ia Petelo ʼo ʼuhiga mo te kau fakanofo, kaʼe ko te laumalie maʼoniʼoni ʼe ko he meʼa ʼofa ʼe feala ke tou maʼu fuli. ʼE mole fakatuʼakoi te foaki ʼo te meʼa ʼofa ʼaia, koia tou kole ke tou maʼu lahi ia te laumalie maʼoniʼoni.—Esa. 40:28-31.

TOU TOKAGA FAKAMALOTOLOTO KIA NATOU ʼAE ʼE MAMAHI

Neʼe katakiʼi e te apositolo ko Paulo ia te ʼu mamahi fakamataku, pea ʼi ʼihi temi neʼe haofaki ia ia mai te mate. (2 Ko. 1:8-10) Kaʼe neʼe mole tuʼania fau ia Paulo ʼo ʼuhiga mo tona maʼuli. Neʼe lotomalohi ia ʼi tana iloʼi ʼae ʼe tokoni age anai te ʼAtua kia ia. Neʼe ina tohi fenei: “Ke tapuaki ki te Atua, te Tamai o totatou Aliki ko Sesu-Kilisito, te Tamai o te manavaofa fuli pea mo te Atua o te fakafimalie fuli, ia ia e ina fakafimaliei maua i oma mamahi fuli.” (2 Ko. 1:3, 4) Neʼe mole tuku e Paulo ʼona fihifihia ke ina fakalotomamahiʼi ia ia. Kaʼe ko tana katakiʼi te faigataʼaʼia neʼe tokoni kia ia ke ina maʼu te manavaʼofa, ko he kalitate maʼuhiga moʼo fakalotomalohiʼi ia natou ʼae ʼe mamahi.

ʼI te lelei ʼo tona mahaki, neʼe toe feala kia Antonio ke ina hoko atu tana gaue taupau feʼaluʼaki. Neʼe tokaga lelei ki ʼona tehina mo tuagaʼane Kilisitiano kaʼe ko ia mo tona ʼohoana neʼe nā faiga tuʼumaʼu ke nā ʼaʼahi pea mo fakalotomalohi ia natou ʼae ʼe mahahaki. Ohage la, ʼi te hili ʼo tana ʼaʼahi te tehina neʼe tau mo tona mahaki kovi, neʼe iloʼi ai e Antonio neʼe mole kei fia alu te tehina ki te ʼu fono. ʼE fakamahino fenei e Antonio: “Neʼe mole tupu ia ko hana mole kei ʼofa kia Sehova pe ʼe ki ʼona tehina, kaʼe ʼi te lahi ʼo tona mamahi ʼuhi ko te mahaki neʼe manatu ia ʼe mole ke ʼi ai he ʼaoga ʼo ia.”

Ko te puleʼaki neʼe fai e Antonio moʼo fakalotomalohi te tehina ʼaia ʼe ko tana kole age ke ina fai te faikole ʼi tanatou fono ʼae ka fai. Logola tana tuʼania, kaʼe neʼe tali e te tehina ke faikole. ʼE fakamatala fenei e Antonio: “Neʼe lave loto ʼosi tana faikole, ʼosi ʼaia pea neʼe mata fiafia koteʼuhi kua ina logoʼi ʼe kei ʼaoga.”

ʼEi, pe ʼe kovi pe ʼe mole faʼa kovi fau, kaʼe ʼe tou tau fuli mo te ʼu mamahi kehekehe. Kaʼe ohage ko tona ui e Paulo, ʼe natou fakakatoa ia tatou ke tou fakalotomalohiʼi ia natou ʼae ʼe mamahi. Koia, tou tokagaʼi te mamahi ʼo ʼotatou tehina Kilisitiano pea ke tou foaki te fakalotomalohi kia natou ohage ko Sehova totatou ʼAtua.