Kau Tagata ʼAfeā, ʼe Kotou Fakalotomalohiʼi Anai Koa Ia Ia ʼAe ʼe “Gaegae”?

Ko Angela,a ʼe ko he tuagaʼane selipatea ʼe taʼu 30 tupu, ʼe hoha. ʼE fakaʼatalitali ki te kau tagata ʼafeā. Kotea ʼae ka natou ui age anai ki ai? ʼE moʼoni, neʼe mole kau ki ʼihi fono, kaʼe neʼe gaʼegaʼe ʼuhi ko tana tokaga ʼi te ʼaho katoa ki te hahaʼi matutuʼa. Logo la te ʼu faigataʼaʼia ʼo te maʼuli, ʼe toe tokaga ki te mahaki ʼo tana faʼe.

Kanapau la neʼe ko koutou ʼae neʼe kotou ʼaʼahi ia Angela, ʼe feafeaʼi anai hakotou fakalotomalohiʼi ia te tuagaʼane ʼaia ʼe lolotoga gaʼegaʼe? (Sel. 31:25) ʼUluaki, ʼe feafeaʼi anai hakotou teuteuʼi ia he ʼaʼahi ʼe fakalotomalohi?

KOTOU FAKAKAUKAUʼI IA TE ALUʼAGA ʼO TONATOU MAʼULI

ʼI ʼihi temi, ʼe tou gaʼegaʼe fuli ʼuhi ko tatatou gaue peʼe ʼuhi ko ʼotatou maʼua ʼi te kokelekasio. Ohage la, neʼe gaʼegaʼe ia te polofeta ko Taniela ʼi te temi ʼae neʼe sio ai ki te meʼa neʼe ha kaʼe neʼe mole mahino ki ai. (Tan. 8:27) Neʼe ha age ki ai ia te ʼaselo ko Kapeliele ʼo tokoni ki ai. Neʼe tokoni ia te ʼaselo ʼave folafola ʼaia kia Taniela ke mahino ki te faʼahi ʼaia pea mo ina fakalotomalohiʼi ia ia ʼo ina ui age neʼe logo ia Sehova ki ʼana faikole, pea neʼe ina ui age ki ai ko ia “ko he tagata ofainai.” (Tan. 9:21-23) ʼI te tahi aluʼaga, neʼe fakalotomalohiʼi ia te polofeta ʼaia e te ʼu palalau fakalotomalohi ʼa te tahi age ʼaselo ʼi te temi ʼae neʼe gaʼegaʼe ai.—Tan. 10:19.

ʼO toe feia aipe, ʼi muʼa ʼo takotou ʼaʼahi he tahi ʼe lagi gaʼegaʼe peʼe lotovaivai, kotou toʼo he temi ke kotou fakakaukauʼi te aluʼaga ʼo tona maʼuli. Kotea te faigataʼaʼia ʼae ʼe tau mo ia? He ko ʼe neʼe lotovaivai ai? Kotea ʼona kalitate? Koʼeni ia te meʼa ʼae neʼe ui e Richard, kua taʼu 20 ia tana tagata ʼafeā: “ ʼE au tokagaʼi tafitō ia te ʼu kalitate ʼo ʼoku tehina mo tuagaʼane. Kotou fakakaukauʼi fakalelei ia te aluʼaga ʼo tonatou maʼuli ʼi muʼa ʼo takotou fai ia te ʼaʼahi, pea ʼe faigafua anai ia takotou maʼu ia te ʼu puani ʼae ʼe feala ke ina fakalotomalohiʼi natou.” Kapau ʼe kotou fai ʼaʼahi mo he tahi age tagata ʼafeā, ʼe lelei ke kotou teuteuʼi fakatahi ia te ʼaʼahi.

KOTOU FAIGAʼI KE ʼAUA NAʼA NATOU HOHA

ʼE tou iloʼi ʼe mole faigafua hatatou fakamatala ia totatou maʼuli. Tou toʼo he faʼifaʼitaki: ʼE mole faigafua ki he tehina hana fakamatala tona maʼuli ki he ʼu tagata ʼafeā ʼi te temi ʼae ʼe fai ai te ʼaʼahi. ʼE feafeaʼi anai hatatou tokoni ki ai ke ʼaua naʼa ufiufi ʼi te palalau? ʼE feala ke tou mata malimali pea mo tou fai he ʼu palalau ʼe ina logoʼi ai ʼe tou fia tokoni age ki ai. ʼE tautau ui e Michael, ʼae kua taʼu 40 ia tana tagata ʼafeā ia te ʼu palalau ʼaeni ʼi te temi ʼae ʼe fai ʼaʼahi ai: “ ʼE ke iloʼi, ko te pilivilesio maʼuhiga ʼe maʼu e he tagata ʼafeā ia tana ʼaʼahi ia te ʼu tehina mo tuagaʼane ʼi ʼonatou ʼapi pea mo ina iloʼi lelei natou. Koia, ʼe au fiafia ʼi taku ʼaʼahi koe ʼi te ʼaho ʼaeni.”

ʼE feala ke kotou fakatuʼutuʼu ke kotou fai ia he kole ʼi muʼa ʼo te kamata ʼo te ʼaʼahi. ʼI ʼana faikole, neʼe fakaha lelei ai ia te apositolo ko Paulo ia te tui, mo te ʼofa pea mo te faʼa kataki ʼo ʼona tehina. (1 Tes. 1:2, 3) Kapau ʼe kotou fakaha ʼi takotou faikole ia te ʼu kalitate ʼo te tehina, ʼe kotou teuteuʼi ia tokotou loto pea mo ʼa ia ki he faipalalau ʼe fakalotomalohi. ʼE feala ʼaki ʼakotou palalau ke kotou fakalotomalohiʼi ia ia. Neʼe fakatokagaʼi fenei e Ray, ʼe ko he tagata ʼafeā fakapotopoto: “ ʼI ʼihi temi, ʼe mole kei tou manatuʼi ia te ʼu gaue lelei neʼe tou fai. Koia, ka fakamanatuʼi mai e he tahi ia te ʼu gaue ʼaia, ʼe tou lotomalohi ai.”

KOTOU FOAKI AGE HE ʼU MEʼA OFA FAKALAUMALIE

Ohage ko Paulo, ʼe feala ke tou foaki he ʼu meʼa ʼofa fakalaumalie ʼaki he manatu Fakatohi-tapu, tatau aipe pe ko he vaega pe ʼe tahi. (Loma 1:11) Ohage la, ko he tehina ʼe lotomamahi ʼe feala ke ina ui ʼe mole hona ʼuhiga, ohage ko te tagata faipesalemo ʼae neʼe ina fakatatau ia ia totonu ki he “utele,” peʼe ko he ʼaiʼaga vai ʼi te ʼahu. (Pes. 119:83, 176) ʼI te hili ʼo takotou fakamahino ia tona fakaʼuhiga, ʼe feala ke kotou ui age, ʼe kotou falala neʼe mole ina galoʼi ia te ʼu fakatotonu ʼa te ʼAtua.

ʼO toe feia aipe, ʼe lelei anai ke kotou toʼo ia te faʼifaʼitaki ʼo te lea fakata ʼo ʼuhiga mo te foʼi talame ʼae neʼe puli, moʼo tokoni ki he tuagaʼane kua lotovaivai peʼe kua toto ʼi te ʼu fono ʼo te kokelekasio. (Luka 15:8-10) Ko te foʼi talame ʼaia neʼe puli neʼe lagi ko he foʼi talame neʼe to ʼi he kahoa talame maʼuhiga. ʼI takotou faipalalau ʼo ʼuhiga mo te lea fakata ʼaia, ʼe feala ke mahino ai, ʼe maʼuhiga tana kau ki te kokelekasio Fakakilisitiano. ʼI te hili ʼo takotou faipalalau ki te faʼahi ʼaia, ʼe feala ke kotou fakaha age ʼe tokaga ia Sehova ki ai, ʼi tona ʼuhiga ʼae ko ia ko tana kiʼi ovi.

ʼE leleiʼia e ʼotatou tehina mo tuagaʼane ia te fakaha ʼo ʼanatou manatu ʼo ʼuhiga mo he vaega Tohi-Tapu. ʼAua naʼa kotou palalau pe koutou! ʼI te hili ʼo te vakaʼi ʼo te vaega ʼae ʼe alu tahi mo ʼonatou aluʼaga, kotou lau age ia te ʼu kupu tafitō pea kotou kole age kia natou ke natou fakamahino. Ohage la, ʼi te hili ʼo takotou lau ia 2 Kolinito 4:16, ʼe feala ke fai e he tagata ʼafeā ia te fehuʼi ʼaeni: “Neʼe kua ke felaveʼi koa mo he aluʼaga neʼe tokoni atu ai ia Sehova ke ke fetogi?” ʼE ko he fefakalotomalohiʼaki ia te taʼi faʼahiga fai ʼaia.—Loma 1:12.

ʼE feala ke kotou fakalotomalohiʼi he tahi ʼo kotou palalau ki he tahi ʼi te Tohi-Tapu ʼe tatau tona aluʼaga pea mo ia. Ko he tahi ʼe lotovaivai, ʼe feala ke fakatatau ki te ʼu faʼifaʼitaki ʼo Ana mo Epafolotito, ʼae neʼe nā lotovaivai kaʼe neʼe nā haga maʼuhiga kia mata ʼo te ʼAtua. (1 Sam. 1:9-11, 20; Filp. 2:25-30) Kapau ʼe fealagia, kotou faipalalau ki ni faʼifaʼitaki Fakatohi-tapu lelei.

KOTOU HAGA TOKAGA KIA NATOU

ʼE kotou fakaha ia takotou loto tokaga ki ʼokotou tehina mo tuagaʼane, ʼo kotou loto tokaga kia natou maʼiape la ʼi te hili ʼo te ʼaʼahi. (Gaue 15:36) ʼI te temi ʼae ʼe kotou fakaʼosi ai takotou fai ʼaʼahi, ʼe feala ke kotou fakatuʼutuʼu ke kotou faifakamafola mo natou. ʼI te temi ʼae ʼe toe felaveʼi ai ia Bernard, ʼae ko he tagata ʼafeā fakapotopoto pea mo he tehina peʼe ko he tuagaʼane neʼe hoki ina ʼaʼahi pe, ʼe ina fai age ia te fehuʼi ʼaeni: “Kua feafeaʼi, ʼe ke lelei pe?” ʼI takotou fai ia te faʼahi ʼaia, ʼe kotou iloʼi ai pe ʼe kei ʼaoga ki ai he tahi age tokoni.

Ia ʼaho nei, ʼe ʼaoga ke logoʼi e ʼotatou tehina mo tuagaʼane ʼe tou tokakaga kia natou, ʼe tou iloʼi ʼonatou aluʼaga pea mo tou ʼoʼofa kia natou. (1 Tes. 5:11) ʼI muʼa ʼo te fai ʼo he ʼaʼahi fakatauhi ovi, kotou toʼo he temi ke kotou fakakaukauʼi ia te aluʼaga ʼo te tehina peʼe ko te tuagaʼane. Kotou faikole ʼo ʼuhiga mo te faʼahi ʼaia. Kotou filifili fakalelei ia te ʼu vaega ʼae ʼe ʼaoga. Pea ʼe kotou maʼu anai ia te ʼu palalau ʼae ʼe tuha moʼo fakalotomalohiʼi ia ia ʼae ʼe “gaegae.”