ʼE ʼAmo e Sehova Taku Kavega ʼi Te ʼAho Fuli

Neʼe au tupu ʼi te taʼu 1956 mo te mahaki ko te spina-bifida ʼi toku hui tuʼa tofu, ʼo tupu ai te faigataʼa ʼo taku feʼaluʼaki mo te tahi ʼu mahaki faigataʼa.

ʼI muʼa ʼo taku tupu, neʼe kamata ako te Tohi-Tapu e ʼaku matuʼā mo te taumatuʼa misionea Fakamoʼoni ʼa Sehova. ʼI taku kei veliveli, neʼe mole faʼa hahaʼi te kau Fakamoʼoni ʼa Sehova ʼi tomatou kolo ko Usakos ʼi Namibie. Koia, neʼe matou fakahoko ai fakafamili te ʼu fono. ʼI toku taʼu fitu, neʼe fai kia au te urostomie, ko he tafa ʼe fakafaigafua ai taku fekau vai. ʼI toku taʼu 14, neʼe au kau ʼi te mahaki moa. ʼI te mamaʼo fau ʼo te lise pea mo te ʼaoga ʼae kia au te tokoni ʼo ʼaku matuʼā, neʼe mole feala ai ke au fakaʼosi taku ako.

Kaʼe neʼe au fakatuʼutuʼu ai ke malohi age ʼaku felogoʼi mo Sehova. Neʼe mole heʼeki lahi ʼatatou tohi Fakatohi-tapu ʼae neʼe fakaliliu ki taku lea, ia te lea Afrikaans. Koia neʼe au ako ai te lea Fakapilitania ke feala ai haku ako he ʼu tohi Fakatohi-tapu ʼe lahi age. Neʼe au kamata faifakamafola pea mo au papitema ʼi toku taʼu 19. Lolotoga te ʼu taʼu ʼe fa ʼae neʼe hoa mai ki ai, neʼe au tau mo te ʼu mahaki pea neʼe faigataʼa fau kia au. Pea tahi, mai tona aluʼaga ʼae ʼe matou feʼiloʼiʼaki fuli ʼi tomatou kolo ko te mataku ki te tagata neʼe ina taʼofi taku faʼafai ʼi te minisitelio.

ʼI te temi ʼo toku taʼu 20, neʼe matou hiki leva ki Afelika Saute, pea neʼe ko taku hoki fakatahi ʼaia mo he kokelekasio. Neʼe ko he aluʼaga fakafiafia. Kaʼe neʼe tonu ke toe tafa au, ʼi te temi leva ʼaia neʼe ko te tafa ʼo toku gakāu.

Ki muli age, neʼe au logo ki te palalau ʼa te taupau ʼo te siliko ʼo ʼuhiga mo te selevisi pionie. Neʼe malave ʼosi kia au ʼana palalau. Neʼe au iloʼi pe taku mahamahaki, kaʼe neʼe mole galo kia au te tokoni mai ʼa Sehova ʼi te ʼu aluʼaga ʼaia. Koia neʼe au kole ai ke au pionie katoa. Kaʼe neʼe faigataʼa ʼosi ki te kau tagata ʼafeā tanatou tali taku kole ʼuhi ko taku mahamahaki.

Logo la te ʼu faʼahi ʼaia, neʼe au fakatuʼutuʼu ke au gaue malohi ʼi te faifakamafola. ʼAki te tokoni ʼa taku faʼe mo ʼihi atu, neʼe au lava fai te ʼu hola ʼae ʼe fakamaʼua ki he pionie katoa lolotoga mahina ʼe ono. ʼO fakamoʼoni ai toku loto ʼae ke au pionie katoa pea mo te fealagia ʼae ke au fakahoko taku selevisi logo la taku mahamahaki. Neʼe au toe fai taku kole pea ʼi te temi leva ʼaia neʼe tali ai. ʼI te ʼaho 1 ʼo Sepetepeli 1988, neʼe au liliu ai ko te pionie katoa.

Lolotoga taku gaue pionie, neʼe au logoʼi tuʼumaʼu te tokoni ʼa Sehova. Neʼe tokoni mai kia au te ako ʼo te moʼoni ki te hahaʼi ia faʼahi ʼe lua. ʼUluaki, neʼe ina puipui au mai te lotovaivai. Lua, neʼe tokoni mai ke malohi age ʼaku felogoʼi mo Sehova. Neʼe au maʼu he toe fiafia lahi ʼi taku tokoni ʼae ki te hahaʼi ke natou foaki tonatou maʼuli kia Sehova pea mo papitema.

ʼE kei au mahamahaki pe, kaʼe ʼe ʼamo e Sehova taku kavega ʼi te ʼaho fuli. (Pes. 68:19, MN) Neʼe mole gata ʼaki pe tana tokoni mai ke au ʼutakiʼi ʼoku mamahi, kaʼe neʼe ina toe foaki mai te fiafia.