ʼE Feala Koa Ke Koutou Pionie?

¹ “ ʼE mole feala ke ʼau fai he tahi meʼa. Pea ʼe ʼau ʼiloʼi papau ʼe mole he tahi age meʼa ʼe ʼau maʼu ai anai taku fiafia ʼaia.” Ko ai ʼaē neʼe ina fai te palalau ʼaia? Ko he tahi ʼe kau ʼi te toko lauʼi teau afe ʼo te kau Fakamoʼoni ʼa Sehova ʼaē ʼe nātou gāue temi katoa ʼi te minisitelio. Neʼe koutou faikole koa peʼe feala ke koutou toʼo te selevisi pionie? Mai tona ʼuhiga ʼaē neʼe tou foaki totatou maʼuli kia Sehova, ʼe mahino ia ʼe tonu ke tou fakakaukauʼi peʼe feala ke lahi age tatatou kau ki te faka mafola ʼo te logo lelei ʼo te Puleʼaga. Koutou fakakaukauʼi te faʼahi ʼaia ʼo vakaʼi te ʼu tali ki te ʼu fehuʼi ʼaē ʼe fai e te tokolahi ʼo ʼuhiga mo te selevisi pionie.

FEHUʼI 1: “ ʼE ʼui e ʼihi ʼe mole feala kia tatou fuli ke tou pionie. ʼE feala feafeaʼi haku ʼiloʼi peʼe feala ke ʼau pionie?”

² ʼE fakalogo ki tokotou ʼu ʼaluʼaga pea mo tokotou ʼu maʼua faka Tohi-Tapu. ʼE mole feala ki te tokolahi ke nātou fai honatou ʼu hola e 90 ʼi te māhina fuli, ʼuhi ko te ʼaluʼaga ʼo tonatou maʼuli peʼe ko tonatou mālohi fakasino. Ohage la ko te tokolahi ʼo te ʼu tuagaʼane agatonu ʼaē kua nātou ʼohoana pea mo maʼu fānau. ʼE nātou kau ki te fai faka mafola ʼo mulimuli ki tonatou ʼu fealagia. Pea kapau ʼe feala, ʼe nātou pionie vaeluaʼi temi ʼi he māhina katoa peʼe laka atu, ʼo fai ʼi te taʼu fuli, pea ʼe nātou maʼu ai te fiafia ʼaē ʼe tupu mai te fakalahi ʼo tanatou kau ki te minisitelio. (Kal. 6:9) Logope la ʼe mole feala kia nātou ke nātou pionie katoa ʼi te temi nei, kae ʼe ko he tapuakina ki te kokelekasio heʼe nātou lagolago ki te gāue pionie pea mo nātou kau fakamalotoloto ʼi te faka mafola ʼo te logo lelei.

³ ʼI te tahi faʼahi, ʼe tokolahi te ʼu tēhina mo tuagaʼane kua nātou pionie heʼe mole lahi fau te ʼu meʼa ʼaē ʼe nātou maʼua kiai, pea neʼe nātou fakafuafua lelei pe koteā te ʼu meʼa ʼaē ʼe maʼuhiga tāfito. E feafeaʼi kia koutou? Kapau ko koutou ko he ʼu tūpulaga, ʼe kua ʼosi koa takotou ako? Peʼe kapau ko koutou ko he ʼu fafine ʼohoana, ʼe feʼauga koa te gāue ʼo tokotou ʼohoana moʼo taupau tokotou famili? Kua koutou ʼohoana koa kae mole koutou maʼu fānau? Kua koutou letelete koa? ʼE ʼa koutou totonu pe te fai ʼo he tonu ʼo ʼuhiga mo te selevisi pionie. Kae ʼe fai atu te fehuʼi ʼaenī, ʼE feala koa ke koutou fai he ʼu fakatuʼutuʼu ʼi tokotou maʼuli ke koutou pionie?

⁴ ʼE fakaʼaogaʼi e Satana te ʼu meʼa ʼo te mālama ʼaenī moʼo fakahēʼi ʼo tatou pea ke tou maʼuʼuli maʼa tatou totonu. Kapau ʼe tou lotomālohi ke mole tou kau ʼi te mālama, pea ʼe tokoni mai anai ia Sehova kia tatou ke tou fakamuʼamuʼa te ʼu meʼa ʼo te Puleʼaga, pea ke tou faiga ke tou maʼu he tahi ʼu pilivilesio faka teokalatike. Kapau ʼe feala ke koutou fetogi tokotou maʼuli ke feala hakotou pionie, pea he koʼe koa ʼe mole koutou fai te faʼahi ʼaia?

FEHUʼI 2: “ ʼE feala koa ke ʼau ʼiloʼi papau peʼe feʼauga anai taku falā lolotoga taku pionie temi katoa?”

⁵ ʼE moʼoni ʼe lahi te ʼu fenua kua lahi age ai te temi gāue ʼaē ʼe maʼua ke kita fai ʼi te vāhaʼa fuli, ke kita maʼu ai te ʼu meʼa ʼe ʼaoga tāfito ki tokita maʼuli. Kae logope la te faʼahi ʼaia, ko te tokolahi neʼe nātou hoko atu tanatou gāue pionie lolotoga te ʼu taʼu ʼe lauʼi hogofulu, pea ʼe haga tapuakinaʼi nātou e Sehova. Ke kita lavaʼi takita gāue pionie, ʼe ʼaoga ke kita tui pea ke kita maʼu he loto faka sakilifisio. (Mateo 17:20) ʼE ʼui papau mai ia Pesalemo 34:​10, ko ‘nātou ʼaē ʼe nātou kumi ia Sehova ʼe mole nātou hoge anai ʼi he meʼa lelei.’ Ko ia ʼaē ʼe ina toʼo te selevisi pionie ʼe tonu ke ina fai ʼo falala katoa ʼe feala ki te ʼAtua ke ina taupau ia ia. ʼE ina fai te meʼa ʼaia maʼa te kau pionie agatonu ʼi te potu fuli pe! (Pes. 37:25) Kae ʼe mahino ia, ko te kau pionie ʼe mole nātou ʼamanaki ke lagolago kia nātou te kokelekasio ʼi te faʼahi ʼo te paʼaga, ohage ko tona fakahā ia 2 Tesalonika 3:​8, 10, pea mo 1 Timoteo 5:8.

⁶ Ko nātou fuli ʼaē ʼe nātou fia pionie, ʼe tonu ke nātou fai te meʼa ʼaē neʼe talanoa kiai ia Sesu: “Nofo ifo muʼa ki lalo ʼo lau te paʼaga ka puli anai kiai.” (Luka 14:28) ʼE ko he agapoto mo kapau ʼe kita fai te meʼa ʼaia. Koutou palalau mo te kau pionie ʼaē kua fualoa tanatou pionie. Ko te tagata taupau faka silikosikilipisio ʼe kua māhani ʼi te gāue pionie, pea ʼe ko he meʼa fakafiafia anai kia ia hana foaki atu kia koutou he ʼu tokoni ʼo ʼuhiga mo te minisitelio ʼi te temi katoa.

⁷ ʼE mole lagi ʼiloʼi anai e he tahi pe koteā te faka ʼuhiga moʼoni ʼo te fakapapau ʼaē ʼa Sesu ia Mateo 6:​33 mo kapau ʼe mole tuku ia ia totonu kia nima ʼo Sehova. Neʼe fakamatala fēnei e te fafine pionie agatonu: “ ʼI tamā tau atu mo toku kaugā pionie ki te potu ʼaē neʼe fekauʼi māua kiai, neʼe ma maʼuli ʼaki pe te ʼu lauʼakau, te foʼi valipane, pea neʼe mole ʼi ai hamā falā. Neʼe ma kai te ʼu meʼa ʼaia ʼi te afiafi ʼosi ʼaia pea ma ʼui fēnei, ‘ ʼE mole kei toe he meʼa ki ʼapogipogi.’ Neʼe ma faikole ʼo ʼuhiga mo te faʼahi ʼaia, pea ma ʼolo ʼo momoe. ʼI te uhu ake ka kei hegihegi, neʼe ʼaʼahi māua e te Fakamoʼoni ʼo te kolo ʼaia, ʼo ina fakahā mai tona higoa pea ina ʼui fēnei mai, ‘Neʼe ʼau kole kia Sehova ke ina fekauʼi mai he kau pionie. ʼI te temi nei kua feala ke ʼau gāue mo koulua ʼi te teitei ʼaho katoa, kae mai tona ʼuhiga ʼaē ʼe ʼau nofo ʼi te vao, ʼe ʼau nofo anai ʼo kakai mo koulua, pea neʼe ʼau haʼu mo tatatou meʼa kai.’ Neʼe ko te ʼu moʼi pipi pea mo te ʼu lauʼakau.” ʼE mole fakapunamaʼuli te ʼui ʼa Sesu ke mole tou ‘hoha ki totatou nefesi’! Pea neʼe ina toe ʼui fēnei: “Ko ai ʼaē ia koutou ʼe ina faʼa fakaloaloa tona maʼuli ʼi he fasiga nima e tahi?”​—Mateo 6:​25, 27.

⁸ Kua fakaʼāsili te loto mānumānu ʼo te malamanei. ʼE ina fakaneke tatou ke tou mulimuli kiai. Kae kapau ʼe tou faka maʼuhigaʼi tatatou gāue temi katoa, pea ʼe feala anai ke tou fakafeauga ki te ʼu kiʼi meʼa ʼaē ʼe tou maʼu. (1 Tim. 6:8) Ko te kau pionie ʼaē ʼe nātou faka faigafua pea mo fakatokatoka tonatou maʼuli, ʼe lahi age te temi ʼaē ʼe nātou fakaʼaogaʼi ki te minisitelio, pea ʼe toe lahi foki mo tonatou fiafia pea mo tonatou mālohi fakalaumālie heʼe nātou akoʼi te moʼoni ki te hahaʼi. Logope la ʼe mole nātou faigaʼi ke nātou maʼuʼuli ohage ko he kau monike, kae ʼe feala ke nātou maʼu te ʼu tapuakina ʼo te gāue pionie, heʼe nātou taupau he manatu fakapotopoto ʼo ʼuhiga mo tonatou ʼaluʼaga faka ekonomika.

⁹ Kapau kua koutou mālama lelei ʼe tou maʼuʼuli ʼi te ʼu ʼaho fakamuli, pea ʼe kua nounou te temi ʼo te mālama agakovi ʼaenī, pea ʼe ina uga anai koutou ke koutou fai te ʼu sakilifisio ʼaē ʼe ʼaoga moʼo fakahā te logo lelei ʼi te ʼu temi faigamālie fuli. Kapau ʼe koutou toe vakaʼi tokotou ʼaluʼaga faka ekonomika, pea mo koutou tuku te faʼahi ʼaia kia nima ʼo Sehova, ʼe lagi koutou sio ai anai ʼe feala ke koutou pionie temi katoa. Māʼiape la peʼe tonu anai ke koutou līaki he ʼu meʼa ʼe koutou loto kiai, ke feala ai hakotou pionie, kae ʼe koutou maʼu anai te ʼu tapuakina taulekaleka ʼa Sehova.​—Pes. 145:16.

FEHUʼI 3: “ ʼE kei ʼau tūpulaga, he koʼe koa ʼe tonu ke ʼau manatu ki te selevisi pionie ohage ko he gāue ʼe feala ke ʼau fai?”

¹⁰ Lolotoga te ʼu taʼu fakaʼosi ʼo takotou ako, ʼe mahino ia, ʼe koutou manatu ki tokotou ka haʼu. ʼE koutou fakaʼamu ki he ka haʼu ʼe koutou fīmālie ai anai mo fakafiafia, ʼaē ʼe feala ai anai ke koutou fai he ʼu meʼa ʼe koutou leleiʼia. Ko te ʼu hahaʼi fai tokoni ʼo tokotou faleako ʼe lagi nātou fakahā atu he ʼu gāue ʼe feala ai hakotou maʼu paʼaga kae ko te faʼahi ʼaia ʼe ina fakamaʼua anai koutou ke koutou fai he ʼu ako loaloaga. Ko tokotou leʼo ʼo loto ʼaē neʼe akoʼi ʼaki te ʼu pelesepeto faka Kilisitiano, ʼe ina fakahā atu ʼe tonu ke koutou fakatuʼutuʼu ke koutou tauhi fakamalotoloto kia Sehova. (Tnk. 12:1) ʼE lagi koutou manatu anai ke koutou ʼohoana pea mo koutou maʼu fānau. Koteā ʼaē ka koutou fai anai?

¹¹ Ko tokotou ka hau ʼe fakalogo ki te ʼu tonu ʼaē ʼe koutou fai ʼi te temi ʼaenī. Kapau kua koutou liliu ko he kau Fakamoʼoni ʼa Sehova, kua foaki tokotou maʼuli kia Sehova, pea kua koutou fakahā takotou loto ʼaē ke koutou tauhi kia Sehova ʼaki tokotou nefesi katoa. (Hep. 10:7) Ko te ʼuluaki fealagia ʼaē ʼe koutou maʼu ʼe ko te ʼahiʼahiʼi te selevisi pionie vaeluaʼi temi ki te māhina e tahi peʼe laka atu. ʼE koutou ʼiloʼi ai anai te fiafia pea mo te ʼu maʼua ʼa te pionie katoa, pea ʼe faigafua anai kia koutou takotou vakaʼi pe koteā ʼaē ʼe tonu ke koutou fai. Koia ka ʼosi takotou ako, he koʼe koa ʼe mole koutou ʼahiʼahi te gāue pionie katoa? Ko ʼihi neʼe nātou talitali ke nātou toʼo te selevisi pionie ʼi tonatou temi matuʼa, kae neʼe nātou fakahemala ʼi tanatou mole kamata ki muʼa atu.

¹² ʼI takotou kei finemui peʼe talavou, koutou fakaʼaogaʼi lelei tokotou temi selipatea pea mo te faʼahiga ʼāteaina ʼaia ki te gāue fai faka mafola temi katoa. Kapau ʼe koutou fia ʼohoana ki muli age, pea ʼe ʼaoga lelei anai mo kapau ʼe koutou pionie katoa muʼa. ʼI takotou lahilahi ake ʼi te fakapotopoto pea mo te faʼahi fakalaumālie, ʼe lagi koutou fili anai ke koutou ʼohoana mo he tēhina peʼe ko he tuagaʼane ʼe toe fia pionie foki mo ia. Ko ʼihi taumatuʼa ʼaē neʼe nātou pionie fakatahi, ki muli age neʼe nātou kau ki te gāue faka silikosikilipisio peʼe faka misionea. ʼE ko he faʼahiga maʼuli fakafiafia ʼaupito!

¹³ Tatau aipe peʼe fualoa takotou pionie peʼe kailoa, kae ʼe lahi ai anai te ʼu meʼa ʼaē ka koutou ako ai, pea mo te faʼahiga faʼufaʼu ʼo tokotou maʼuli ʼe mole feala ke foaki atu e he tahi gāue ʼi te kele katoa. Ko te gāue pionie ʼe ina akoʼi kita ke kita fakatonutonuʼi tokita maʼuli, ke kita fakatuʼutuʼu lelei tokita temi, ke kita felogoi mo te hahaʼi, ke kita falala kia Sehova, pea mo kita loto faʼa kātaki pea mo agalelei​—ko te ʼu kalitate ʼaia ʼe tokoni anai kia koutou ke koutou fakahoko he ʼu maʼua ʼe lahi age.

¹⁴ ʼE mole ʼiloʼi papau pe koteā anai te ka haʼu ʼo te malamanei. ʼE lahi tuʼumaʼu te ʼu fetogi ʼaē ʼe hoko, kae ʼe mole feiā ʼo ʼuhiga mo te ʼu meʼa ʼaē neʼe fakapapauʼi mai e Sehova. Mai tona ʼuhiga ʼaē ʼe ʼi ai takotou ka haʼu, ʼe mole koa la ko he temi lelei ʼaenī ke koutou fakakaukauʼi lelei pe koteā ʼaē ka koutou fai anai ʼi te ʼu taʼu ka haʼu? Koutou fakafuafua lelei te fealagia ʼaē ke koutou kau ki te pilivilesio ʼaē ko te selevisi pionie. ʼE mole koutou fakahemala ai anai ʼi he temi ke koutou gāue ʼi te selevisi pionie.

FEHUʼI 4: “ ʼE mole faigataʼa koa la te fai katoa ʼo te ʼu hola? Pea e feafeaʼi mo kapau ʼe ʼau tauhala ʼi toku ʼu hola?”

¹⁵ Ka koutou tohi tokotou pepa pionie katoa, ʼe tonu ke koutou tali ki te fehuʼi ʼaenī: “Neʼe koutou fai koa hakotou ʼu fakatuʼutuʼu ke feala ai hakotou fai ia hola e 1 000 ʼi te taʼu fuli?” Ke koutou fai te ʼu hola ʼaia, ʼe ʼaoga ke koutou gāue ia hola e tolu ʼi te ʼaho fuli. ʼE mahino ia, ʼe tonu ke kita poto ʼi te takitaki tokita maʼuli, pea ke kita fakatuʼutuʼu lelei tokita temi. ʼI te hili ʼo he ʼu kiʼi māhina, ko te tokolahi ʼo te kau pionie kua nātou lava fai he polokalama lelei pea ʼe ʼalutahi mo tonatou ʼaluʼaga.

¹⁶ Kae, ohage ko tona ʼui moʼoni ia Tagata Tānaki 9:​11, ‘ko te ʼu temi pea mo te ʼu meʼa fakafokifā ʼe hoko ia kia tatou fuli.’ Ko te meʼa ʼaē ʼe feala ke hoko, ko he pionie ʼe lagi mole ina fai fuli anai tona ʼu hola heʼe mahaki peʼe hoko kia ia he meʼa fakafokifā. Kapau ʼe mole hoko fualoa te fihifihia ʼaia pea ʼe hoko ʼi te kamata ʼo te taʼu gāue, lagi ʼe ʼaoga anai ke ina fai he tahi polokalama moʼo fakakatoa tona ʼu hola. Kae e feafeaʼi mo kapau ʼe hoko te fihifihia ʼaia ʼi te ʼu māhina fakamuli ʼo te taʼu gāue ʼo mole feala ai ki te pionie ke ina fai tona ʼu hola?

¹⁷ Kapau ʼe koutou mahaki faka temi lolotoga he ʼu māhina, peʼe mole feala ke koutou fai hakotou ʼu hola ʼuhi ko he ʼu meʼa maʼuhiga ʼe mole koutou lava fakatokatoka, koutou ʼolo ʼo palalau ki he tēhina ʼe kau ki te Komite Gāue ʼo te Kokelekasio pea koutou fakahā age ki ai tokotou fihifihia. ʼE feala ke fai he tonu e te kau tagata ʼāfea ke koutou hoko atu takotou selevisi pionie, ʼo mole nātou fakamaʼua atu ke koutou fai katoa te ʼu hola ʼaē ʼe kei toe. Ko te sikalaipe ʼe ina tohi anai te faʼahi ʼaia ki takotou Pepa Tānaki. ʼE mole ko he temi mālōlō ʼaē ʼe foaki atu, kae ʼe ko he manavaʼofa ʼe fakahā atu ʼuhi ko tokotou ʼu ʼaluʼaga.​—Vakaʼi te pepa ʼe ʼalutahi mo Te Minisitelio ʼo Te Puleʼaga Fakafalani ʼo Sepetepeli 1986 ʼi te palakalafe 18.

¹⁸ Ko te kau pionie ʼaē kua māhani ʼe nātou fai tāfito tonatou ʼu hola ʼi te kamata ʼo te taʼu gāue. ʼE nātou fakamuʼamuʼa tanatou gāue pionie, pea ʼe mole nātou tokaga ki te ʼu meʼa ʼaē ʼe mole faʼa maʼuhiga. Kapau ʼe tauhala te pionie ʼi tona ʼu hola koteʼuhi ʼe mole lelei tona polokalama peʼe mole lelei tana mulimuli kiai, pea ʼe tonu ke mahino kia ia ʼe ko tona maʼua ke ina fakakatoa tona ʼu hola pea ʼe mole ʼamanaki anai ia ke fai he fakatuʼutuʼu makehe maʼa ia.

¹⁹ ʼI ʼihi temi ʼe hoko te ʼu fetogi fakafokifā ki te maʼuli ʼo te pionie, pea ʼe mole feala ke ina tekeʼi. ʼE mole lagi kei feala anai kia ia ke ina fai tona ʼu hola ʼuhi ko tana mahaki pea mo hana ʼu maʼua faka famili. Kapau koia ʼaia pea ʼe ko he aga fakapoto anai ke ina tuku tana pionie ʼo toe liliu ko he kaugā fai faka mafola pea ʼe feala anai ke pionie vaeluaʼi temi ʼi ʼihi māhina. ʼE mole ʼi ai he fakatuʼutuʼu ʼe ina faka fealagia ki he tahi ke nofo ʼi te gāue pionie mo kapau ʼe mole kei feala hana fai hona ʼu hola.

²⁰ ʼE tou ʼamanaki ko te fakatuʼutuʼu manavaʼofa ʼaia ʼaē ʼe fai ki te kau pionie ʼaē ʼe tau mo he ʼu fihifihia, ʼe ina fakaloto mālohiʼi anai te tokolahi ke nātou toʼo te selevisi pionie, ʼo mole lahi fau tanatou hoha ʼo ʼuhiga mo te faʼahi ʼaia. ʼE tonu ke ina toe uga foki mo te kau pionie ke nātou hoko atu tanatou gāue. ʼE tou loto ke lavaʼi e te kau pionie tanatou gāue temi katoa.

FEHUʼI 5: “ ʼE ʼau fia fai he meʼa ʼe ʼau fiafia ai anai. ʼE ʼau fiafia anai koa ʼi te gāue pionie?”

²¹ Ko te fiafia moʼoni ʼe fakalogo tāfito ki takita felogoi mo Sehova pea mo takita tui papau ʼaē ʼe tou tauhi kia ia ʼaki he agatonu. Neʼe kātakiʼi e Sesu te pou fakamamahi “ ʼuhi ko te fiafia ʼaē neʼe fakapapauʼi age kia te ia.” (Hep. 12:2) Neʼe fiafia he neʼe ina fai te finegalo ʼo te ʼAtua. (Pes. 40:8) ʼI te mālama ʼaenī, ʼe feala ke tou fiafia moʼoni mo kapau ko te ʼu meʼa tāfito ʼo tatatou maʼuli ʼe pipiki ki tatatou tauhi kia Sehova. ʼE ʼi ai anai he ʼuhiga moʼoni ki totatou maʼuli, mo kapau ʼe tou kumi te ʼu meʼa fakalaumālie, pea ʼe tou ʼiloʼi papau anai ʼi totatou loto ʼe ko te meʼa ʼaia ʼaē ʼe tonu ke tou fai. Ko te fiafia ʼe tupu ʼi te foaki, pea ʼe mole ʼi ai he faʼahiga foaki ʼe lelei age ʼi te akoʼi kia ʼihi peʼe feala feafeaʼi tanatou maʼu te maʼuli heʼegata ʼi te mālama foʼou ʼo te ʼAtua.​—Gāue 20:35.

²² ʼE fakamahino fēnei mai e te tēhina pionie ʼaē neʼe tou talanoa ki ai ʼi te ʼuluaki palakalafe: “ ʼE ʼi ai koa he fiafia ʼe lahi age ʼi takita sio ʼaē ki he tahi neʼe kita fai tana ako, kua liliu ʼo vikiʼi ia Sehova? ʼE ko he meʼa fakaofoofo pea mo fakaloto mālohi ki takita tui, mokā kita sio ki te mālohi ʼo te Folafola ʼa te ʼAtua ʼe ina uga te hahaʼi ke nātou fetogi tonatou maʼuli ke leleiʼia nātou e Sehova.” (Koutou vakaʼi Te Tule Leʼo Fakaʼuvea ʼo te ʼaho 15 ʼo ʼOketopeli 1997, ʼi te pasina 18 ki te 23.) Koia, koteā ʼaē ʼe tupu ai takotou fiafia? Kapau ʼe koutou faka maʼuhigaʼi te ʼu gāue ʼaē ʼe ʼaoga pea mo tologa, kae mole koutou faka maʼuhigaʼi te fakafiafia faka temi ʼo te mālama, ko te gāue pionie ʼe ina foaki atu anai kia koutou te fiafia pea ʼe koutou maʼu ai anai he ʼuhiga moʼoni ʼo tokotou maʼuli.

FEHUʼI 6: “Mai tona ʼuhiga ʼaē ʼe mole fakamaʼua mai ke kita pionie ke feala ai hakita maʼu te maʼuli heʼegata, pea ʼe mole ʼaʼaku koa la te filifili peʼe ʼau pionie peʼe kailoa?”

²³ ʼE moʼoni ʼe ʼa koutou totonu te vakaʼi ia te faʼahi ʼaia. Ko Sehova tokotahi pe ʼaē ʼe feala ke ina fakamāuʼi te ʼu ʼaluʼaga ʼo tokotou maʼuli. (Loma 14:4) ʼE ina loto ke koutou tauhi kia te ia ʼaki tokotou loto katoa, mo tokotou nefesi katoa, mo tokotou ʼatamai katoa pea mo tokotou mālohi katoa. (Mko. 12:30; Kal. 6:​4, 5) ʼE ina leleiʼia ia ia ʼaē ʼe ina foaki fakafiafia, pea mo ia ʼaē ʼe tauhi kia te ia ʼaki he lotolelei, kae mole ko ia ʼaē ʼe ina fai ʼaki he loto fakahemala peʼe ʼaki he loto fakakinau. (2 Ko. 9:7; Kol. 3:​23) ʼE tonu ke koutou fia pionie heʼe koutou ʼofa kia Sehova pea mo te hahaʼi ʼo tokotou telituale. (Mateo 9:​36-38; Mko. 12:30, 31) Kapau ʼe koutou maʼu te ʼofa ʼaia, pea ʼe lelei ke koutou fakakaukauʼi fakalelei te gāue pionie.

²⁴ ʼE mātou fakaʼamu, ʼaki te ʼu tokoni ʼaē neʼe tuku atu, ke ʼaoga kia koutou ke koutou fakafuafua peʼe feala ke koutou pionie. ʼE feala koa ke koutou fai he ʼu fetogi ʼi tokotou maʼuli ke koutou pionie katoa? ʼE hoa atu kiai te polokalama ʼaki tona kupu tāfito ʼaenī “Toku Polokalama Ki Te Gāue Pionie ʼi Te Vāhaʼa Fuli.” Koutou vakaʼi peʼe feala ke koutou fai hakotou polokalama lelei moʼo fai ia hola e 23 ʼi te minisitelio ʼi te vāhaʼa fuli. Koutou tui pea mo falala kia Sehova. ʼAki tana tokoni ʼe koutou lavaʼi anai! Neʼe ina fakapapauʼi fēnei mai: “ ʼE ʼau . . . huaʼi anai kia koutou he tapuakina ʼo aʼu ki te mole toe ʼi ai ʼo he hoge.”​—Mala. 3:10.

²⁵ Koia ʼe mātou fai atu te fehuʼi ʼaenī, “ ʼE feala koa ke koutou pionie?” Kapau ʼe feala ke koutou tali “Ei,” pea koutou fakatuʼutuʼu he ʼaho ke koutou kamata ai takotou pionie katoa, pea koutou tui papau ʼe tapuakina anai koutou e Sehova ʼo ina foaki atu kia koutou he maʼuli fiafia!

[Talanoa ʼo te pasina 6]

Toku Polokalama Ki Te Gāue Pionie ʼi Te Vāhaʼa Fuli

MŌNITE Uhu fai faka mafola

FELIATOLU Uhu fai faka mafola

FELIAFĀ Uhu fai faka mafola

FELIANIMA Uhu fai faka mafola

FELIAONO Uhu fai faka mafola

MOEAKI Uhu fai faka mafola

ʼAHOTAPU Uhu fai faka mafola

MŌNITE Hili hoʼatā fai faka mafola

FELIATOLU Hili hoʼatā fai faka mafola

FELIAFĀ Hili hoʼatā fai faka mafola

FELIANIMA Hili hoʼatā fai faka mafola

FELIAONO Hili hoʼatā fai faka mafola

MOEAKI Hili hoʼatā fai faka mafola

ʼAHOTAPU Hili hoʼatā fai faka mafola

MŌNITE Afiafi fai faka mafola

FELIATOLU Afiafi fai faka mafola

FELIAFĀ Afiafi fai faka mafola

FELIANIMA Afiafi fai faka mafola

FELIAONO Afiafi fai faka mafola

MOEAKI Afiafi fai faka mafola

ʼAHOTAPU Afiafi fai faka mafola

Koutou fakaʼaogaʼi he peni moʼo tohi tokotou polokalama ʼi te ʼaho fuli ʼo te vāhaʼa.

Koutou fakatuʼutuʼu ke koutou fai ia hola e 23 ʼi te vāhaʼa fuli. ʼI te vāhaʼa katoa ko ʼaku hola e ____________________