“ ʼE Feala Ke Ke Pioniē!”
1. Koteā ʼaē neʼe ʼui e te tuagaʼane ʼo ʼuhiga mo tana selevisi pioniē?
1 “Neʼe mole he tahi age gāue neʼe feala ai ke au maʼu ia te maʼuli fakafeʼauga peʼe ke au maʼu ai he ʼu lelei lahi ʼi te faʼahi fakalaumālie.” Neʼe ko te ʼu palalau ʼaia neʼe fai e Kathe B. Palm. Neʼe fualoa tana pioniē, ʼo maʼuli fakasākilifisio ʼi tana fai fakamafola mai te potu taupotu ʼo Sili ki tona tahi taupotu, ʼi Amelika Sautē. Ko he tahi, ʼaki tana manatu ki te maʼuli fiafia ʼo nātou ʼaē ʼe pioniē kātoa, neʼe lagi ina ʼui atu fēnei: “ ʼE feala ke ke pioniē!”
2. Kotou fakamahino pe koʼē ʼe tou maʼu he fiafia lahi mokā tou fai he ʼu gāue fakalaumālie.
2 Ko He Maʼuli ʼe Fakafiafia: Ko totatou Faʼifaʼitakiʼaga ko Sesu, neʼe ina maʼu ia he toe fiafia lahi ʼi tana fai ia te finegalo ʼo tana Tamai. (Soa. 4:34) Koia lā ʼaē, ʼaki he loto fakamālotoloto, neʼe akoʼi ai e Sesu tana kau tisipulo, ʼe natou maʼu ia te fiafia moʼoni ʼaki tanatou fai ia he ʼu gāue ʼe pipiki ki te tauhi kiā Sehova. ʼE tou fiafia mokā ʼe lahi tatatou fai ʼi totatou maʼuli ia he ʼu gāue ʼe feala ai ke ʼofa Sehova kiā tātou. ʼO hilifaki mai kiai, kā lahi tatatou foaki ʼaē ʼo totatou temi, mo totatou mālohi pea mo totatou ʼu koloa moʼo tokoni ki te hahaʼi, pea ʼe toe lahi ai mo tatatou fiafia.—Gāue 20:31, 35.
3. Koteā te fiafia ʼe feala ke tou maʼu mo kapau ʼe lahi age totatou temi ʼaē ʼi te minisitelio?
3 Kapau ʼe lahi totatou temi ʼi te minisitelio, pea ʼe toe lahi ai anai mo tatatou fiafia ʼi te kamata ʼaē ʼo he ʼu ako Tohi-Tapu. Tatau aipē peʼe tokolahi te hahaʼi ʼi totatou telituale ʼe mole fia logo, kae lagi ʼi te temi nei ʼi tatatou manatu kua lelei age ia ʼi te temi muʼa, he kua hikihiki age tatatou faiva ʼi te fai fakamafola pea mo tatatou popoto ʼi te fai ʼo tatatou minisitelio. ʼE feala ki te kau pioniē ke natou fakaʼaogaʼi kātoa te ʼu tokoni ʼaē neʼe natou ako ʼi te Ako ʼa Te Kau Pioniē, ʼaē ʼe feala ke natou kau kiai mokā kua taʼu kātoa tanatou pioniē. (2 Tim. 2:15) ʼI tatatou faʼa kātaki, ʼe feala ai ke tou tō he ʼu pulapula ʼo te moʼoni ʼe fua anai ki ʼamuli.—Tnk. 11:6.
4. Koteā ʼaē ʼe tonu ke fakakaukauʼi e te kau tūpulaga ʼaē kua vave maʼu pepa ʼi te fakaʼosi ako?
4 Te ʼu Tūpulaga: ʼI te ʼamanaki ʼosi ʼo tokotou temi ako, kua kotou fakakaukauʼi lelei koa ia tokotou kā haʼu? ʼO aʼu mai ki te temi nei, neʼe kotou fai tāfito takotou polokalama ʼo mulimuli ki takotou ako. Kā kotou maʼu anai tokotou pepa, koteā ʼaē kā kotou fai anai mokā ʼosi takotou ako? He koʼē ʼe mole kotou fakakaukauʼi ʼi te faikole ke kotou pioniē kātoa, ʼi hakotou gāue temi kātoa ʼi te mālama? Ko te ʼu poto kehekehe ʼaē kā kotou maʼu anai: te fakamafola ki te hahaʼi lanu kehekehe, mo te tauʼi ʼaē ia te ʼu faigataʼaʼia, ia te gāueʼi te kalitātē ʼaē ko te loto lolomi, pea mo te fakatuputupu ia te poto faiako, ʼe fua lelei anai kiā koutou ʼi tokotou maʼuli kātoa.
5. ʼE lava feafeaʼi ki te ʼu mātuʼa pea mo te kōkelekāsio ke natou fakalotomālohiʼi ia te selevisi pioniē?
5 ʼU mātuʼa, ʼe kotou fakahoko koa tokotou maʼua ʼaē ke kotou tokoni ki takotou fānau ke natou filifili ia te selevisi temi kātoa? Ko takotou ʼu palalau pea mo takotou faʼifaʼitaki lelei ʼe lava tokoni lahi kiā nātou ke natou fakamuʼamuʼa ia te ʼu gāue ʼo te Puleʼaga. (Mat. 6:33) Ko Ray, ʼaē neʼe kamata pioniē ʼi te ʼosi ʼo tana ako, ʼe ina manatuʼi te faʼahi ʼaenī: “Neʼe ʼui tuʼumaʼu pē e taku faʼē, ko te kau ʼaē ki te selevisi pioniē ʼe ko te faʼahiga maʼuli pē ʼaia ʼaē ʼe fakafiafia lahi age.” Ko te kōkelekāsio kātoa ʼe feala ke ina fakalotomālohiʼi ia te selevisi pioniē ʼaki tanatou ʼu palalau pea mo tanatou lagolago ki te gāue ʼaia. Ko Jose, mai Sepania, ʼe ina ʼui fēnei: “ ʼI taku kōkelekāsio ko te selevisi pioniē neʼe ko te gāue lelei pē ʼaia e tahi maʼa te kau tūpulaga. Ko te ʼu palalau pea mo te leleiʼia ʼa te ʼu tehina mo tuagaʼane ia te selevisi pioniē pea mo tanatou tokoni mai, neʼe fakafaigafua ai kiā au ke au kamata te selevisi pioniē.”
6. Koteā ʼaē ʼe feala ke tou fai mo kapau ʼe mole tou fia pioniē?
6 Tauʼi Te ʼu Faigataʼaʼia: Kae ʼe feafeaʼi mo kapau ʼe kotou ʼui fēnei: ‘ ʼE mole au fia pioniē.’ Kapau ʼi te kamata, ʼe ko takotou manatu ʼaia, kotou faikole kiā Sehova ʼo ʼuhiga mo te ʼu meʼa ʼaē ʼi tokotou loto pea mo kotou ʼui fēnei age: ‘ ʼE mole au ʼiloʼi peʼe lelei kiā au ia te selevisi pioniē, kae ʼe au fia fakafiafiaʼi tou loto.’ (Pes. 62:8; Taag. 23:26) Pea kotou kumi tana takitaki ʼi tana Folafola pea mo tana kautahi. Tokolahi te ʼu pioniē kātoa neʼe natou ʼuluaki “ ʼahiʼahiʼi” muʼa te selevisi pioniē ʼaki tanatou toʼo te selevisi pioniē vaeluaʼi temi, pea ko te fiafia ʼaē neʼe natou maʼu neʼe ina uga ai nātou ke natou toʼo te selevisi temi kātoa.—Pes. 34:8.
7. ʼE tou lava tauʼi feafeaʼi tatatou ʼu lotolotolua ʼaē ki tatatou lava fai ia te ʼu hola e 70 ʼi te māhina fuli?
7 ʼE feafeaʼi mo kapau ʼe mole kotou ʼiloʼi papau peʼe feala ke kotou fai ia te ʼu hola e 70 ʼaē ʼe fakamaʼua kiai ʼi te māhina fuli? He koʼē ʼe mole kotou fai palalau mo he ʼu pioniē ʼe tatau tonatou ʼaluʼaga mo koutou? (Taag. 15:22) Pea kotou fai hakotou ʼu polokalama kehekehe. ʼE lagi kotou fakatokagaʼi ai anai ʼe feala noa pē hakotou toʼo mai te temi ʼaē neʼe kotou fakaʼaogaʼi ki he ʼu gāue ʼe mole faʼa maʼuhiga ke kotou kau ai ki te minisitelio.—Efe. 5:15, 16.
8. He koʼē ʼe tonu ʼi ʼihi temi ke tou toe vakavakaʼi totatou ʼaluʼaga?
8 Toe Vakavakaʼi Tokotou ʼAluʼaga: ʼE feala ke fetogi totatou ʼaluʼaga. ʼE lelei ke tou toe vakavakaʼi ʼi ʼihi temi totatou ʼaluʼaga. Ohagē lā, kua kotou vave letelete koa? Ko Randy, ʼaē neʼe letelete fakatomuʼa, ʼe ina ʼui fēnei: “ ʼAki te tonu ʼaia neʼe au fai, neʼe feala ai ke au kamata pioniē kātoa mo toku ʼohoana, pea neʼe mā maʼu ai te fealagia ʼaē ke mā ʼolo ʼo gāue ʼi te ʼu koga meʼa ʼaē ʼe ʼaoga lahi kiai he ʼu kaugā fai fakamafola. Neʼe au maʼu te ʼu tuʼuga tapuakina ʼaki te tonu ʼaē neʼe au fai, kae ko te tapuakina ʼaē ʼe lahi tokotahi ʼe ko taku maʼu he leʼo ʼo loto ʼe lelei.”
9. Koteā ʼaē ʼe tonu ke vakavakaʼi e te ʼu taumātuʼa?
9 Ko ʼihi taumātuʼa, ʼi tanatou ʼosi vakavakaʼi fakalelei tonatou maʼuli, neʼe natou mahino ai ʼe mole he ʼuhiga ʼo hanā gāue toko lua temi kātoa. Koia, ʼe maʼua ai ki te fāmili ke fakafaigafua tonatou maʼuli, pea ʼe lahi ai anai tona ʼu lelei ʼi tanatou fai te ʼu sākilifisio ʼaia. Ko John, ʼaē mole heʼeki faʼa fualoa te mavae ʼo tona ʼohoana mai tana gāue temi kātoa, ke feala ke lahi age tana kau ki te minisitelio, ʼe ina ʼui fēnei: “ ʼE fīmālie toku loto ʼi taku ʼiloʼi ʼe fai e toku ʼohoana he ʼu gāue fakalaumālie ʼi te ʼaho kātoa.”
10. Koteā ʼaē ʼe ina uga te kau Kilisitiano ke natou toʼo ia te selevisi pioniē?
10 Ko He Fakahā ʼo Te ʼOfa Pea Mo Te Tui: Neʼe fakaliliu e Sehova ia te fai fakamafola ko te gāue ʼaē ʼe maʼuhiga ʼaupitō age ʼe feala ke tou kau fuli kiai. Ko te tuʼu ʼāfea ʼaenī kua vave fakaʼauha, pea ʼe gata pē kiā nātou ʼaē ʼe natou fetapa ki te huafa ʼo Sehova ʼaē kā haofaki anai. (Loma 10:13) Ko he loto ʼe fonu ʼi te ʼofa kiā te ia pea mo he fakafetaʼi ki te ʼu meʼa ʼaē neʼe ina fai maʼa tātou, ʼe ina uga anai tātou ke tou fakalogo ki te fakatotonu ʼo tona ʼAlo ʼaē ke tou faʼafai ʼi te fai fakamafola. (Mat. 28:19, 20; 1 Soa. 5:3) Tahi ʼaē meʼa, ko tatatou tui ʼaē ʼe tou māʼuʼuli ʼi te ʼu ʼaho fakamuli ʼe ina uga anai tātou ke tou fai ia meʼa fuli ʼi te minisitelio heʼe kei maʼu te temi, kae mole tou fakaʼaogaʼi kātoa ia te ʼu meʼa ʼo te mālama ʼaenī.—1 Ko. 7:29-31.
11. ʼE tonu ke tou feafeaʼi mokā ʼui mai e he tahi ʼe feala ke tou pioniē?
11 Ko tatatou toʼo ia te selevisi pioniē kātoa ʼe mole ko hatatou tali pē ke tou fai he ʼu hola ʼe lahi ʼi te minisitelio; ʼe ko tatatou fakahā ʼaia ʼo tatatou foaki kātoa ia tātou totonu ki te ʼAtua. Koia kapau ʼe ʼui atu ʼe feala ke ke pioniē, ke ke fiafia ai. Pea ke ke fakakaukau ʼi te faikole, ke ke gāue fakatahi mo nātou ʼaē kua natou kau ki te selevisi fakafiafia ʼaia.
[Fakamatala ʼo te pasina 4]
ʼU mātuʼa, ʼe kotou fakahoko koa tokotou maʼua, ʼo kotou tokoni ki takotou fānau ke natou filifili ia te selevisi temi kātoa?
[Fakamatala ʼo te pasina 5]
Neʼe fakaliliu e Sehova ia te fai fakamafola ko te gāue ʼaē ʼe maʼuhiga ʼaupitō age ʼe feala ke tou kau fuli kiai.