ʼE Fakamalohiʼi e Te Selevisi Pionie ʼAtatou Felogoʼi Mo Te ʼAtua

1, 2. (1) Kotea ʼae ʼe hoko moka tou manatuʼi pea mo tou palalau tuʼumaʼu ki he tahi ʼe tou ʼofa ai? (Vakaʼi te ʼuluaki pakī.) (2) Kotea te ʼu fehuʼi ʼe tonu ke tou fai?

ʼE FEALA ke tou fakamalohiʼi ʼatatou felogoʼi mo he tahi ʼe tou ʼofa ai mo kapau ʼe tou manatuʼi pea mo tou palalau tuʼumaʼu ʼo ʼuhiga mo ia. ʼE toe feia pe mo ʼatatou felogoʼi mo Sehova ʼAtua. ʼI te temi ʼae neʼe kei tauhi ovi ai, neʼe sio ia Tavite ki te ʼu fetuʼu ʼi te ʼu afiafi pea mo metitasio ki te Tupuʼaga ʼae ʼe mole hona fakatatau. Neʼe ina tohi fenei: “Ka au sio ki te atu lagi, te gaueaga o ou nima, mo te mahina, mo te u fetuu ae nee ke fakatupu: Kotea te tagata ke ke manatu ai kia ia? Pea mo te foha o te tagata ke ke tokaga ai kia ia!” (Pes. 8:4, 5) ʼI tana mahino ʼae ki te faʼahiga fakahoko ʼo Sehova ʼana fakatuʼutuʼu ʼo ʼuhiga mo te Iselaele fakalaumalie, neʼe ui fenei e te apositolo ko Paulo: “Oiau! Te loloto o te u koloa, mo te poto, pea mo te [ʼatamai] malama o te Atua!”—Loma 11:17-26, 33.

² Ka tou faifakamafola, ʼe tou fiafia koteʼuhi ʼe tou manatuʼi pea mo tou palalau tuʼumaʼu pe kia Sehova. Tokolahi ia natou ʼae neʼe natou toʼo tanatou selevisi pionie katoa, neʼe natou tokagaʼi ko te ʼuluaki tapuakina ʼe natou maʼu moka natou fakalahi tanatou gaue faifakamafola, ʼe ko te tuputupu ʼo tonatou ʼofa ʼae ki te ʼAtua. Kapau ʼe kotou pionie katoa peʼe kotou fakatuʼutuʼu nei ki ai, kotou fai te fehuʼi ʼaeni: “ ʼE fakamalohiʼi feafeaʼi e te selevisi pionie katoa ʼatatou felogoʼi mo Sehova?” Kapau ʼe kotou pionie, kotou fai te fehuʼi ʼaeni: “Kotea ʼae ʼe tokoni mai anai ke au hoko atu taku selevisi?” Kapau heʼeki kotou pionie, kotou fai te fehuʼi ʼaeni: “Kotea te ʼu fetogi ʼe tonu ke au fai ke feala ai haku liliu ʼo pionie?” Tou vakaʼi pe ʼe lava fakamalohiʼi feafeaʼi e te selevisi pionie katoa ʼatatou felogoʼi mo te ʼAtua.

TE SELEVISI PIONIE KATOA PEA MO ʼATATOU FELOGOʼI MO TE ʼATUA

3. Ka tou faifakamafola, kotea ʼae ʼe tou logoʼi moka tou palalau ʼo ʼuhiga mo te ʼu tapuakina ʼae ka foaki mai anai e te Puleʼaga?

³ ʼE tou fakaovi ki te ʼAtua moka tou palalau ki ʼihi ʼo ʼuhiga mo te ʼu tapuakina ʼae ka foaki mai anai e te Puleʼaga. Kotea te ʼu vaega Fakatohi-tapu ʼe kotou fia lau ki te hahaʼi moka kotou olo ʼi te ʼu ʼapi? ʼE lagi kotou leleiʼia te ʼu vaega ʼo Pesalemo 37:10, 11, peʼe ko Taniela 2:44, peʼe ko Soane 5:28, 29, peʼe ko Apokalipisi 21:3, 4. Ka tou palalau ki ʼihi ʼo ʼuhiga mo te ʼu fakapapau ʼaia, ʼe tou toe manatuʼi ʼe ko totatou ʼAtua manavaʼofa ʼae ʼe ina foaki mai ia te ʼu “meʼa ʼofa lelei fuli pea mo te molaga haohaoa fuli.” Ka tou fai ia te faʼahi ʼaia, ʼe tou toe fakaovi ai kia Sehova.—Sakp. 1:17, MN.

4. He ko ʼe ʼe tou fiafia lahi ʼuhi ko te manavaʼofa ʼo te ʼAtua moka tou tokagaʼi te masiva fakalaumalie ʼo ʼihi?

⁴ ʼE tou fiafia ʼi te iloʼi ʼo te moʼoni moka ʼe tou tokagaʼi te masiva fakalaumalie ʼo natou ʼae ʼe tou faifakamafola ki ai. ʼI te malamanei, ʼe mole maʼu e te hahaʼi he takitaki lelei ʼe feala ke natou manuʼia ai pea mo fiafia ai tonatou maʼuli. Tokolahi ʼe natou tuʼania ʼo ʼuhiga mo te ka haʼu pea ʼe natou manatu ʼe mole he ʼamanaki lelei. ʼE natou kumi te fakaʼuhiga ʼo tonatou maʼuli. Maʼiape la mo natou ʼae ʼe tauhi lotu lelei, ʼe mole natou maʼu he ʼatamai malama feʼauga ʼo ʼuhiga mo te Tohi-Tapu. ʼE natou hage ko te hahaʼi ʼo Ninive ʼo te temi muʼa. (Lau ia Sonasi 4:11.) Ka lahi tatatou gaue ʼi te faifakamafola, ʼe tou tokagaʼi ai te kehekehe ʼo te maʼuli fakalaumalie ʼo te hahaʼi ʼa Sehova pea mo natou ʼae ʼe tou faifakamafola ki ai. (Esa. 65:13) ʼE tou tokagaʼi ai te manavaʼofa ʼo Sehova, heʼe mole ina foaki mai pe te ʼu meʼa ʼae ʼe ʼaoga ki totatou maʼuli fakalaumalie, kaʼe ʼe ina toe fakaafe tatou fuli ke tou toʼo noa ia te vai ʼo te maʼuli pea mo maʼu he ʼamanaki lelei.—Apk. 22:17.

5. ʼE tou lava katakiʼi feafeaʼi ʼotatou fihifihia moka tou tokoni ki ʼihi ʼi te faʼahi fakalaumalie?

⁵ Ka tou tokoni ki ʼihi ʼi te faʼahi fakalaumalie, ʼe faigafua tatatou katakiʼi ʼotatou fihifihia. Neʼe tokagaʼi e Trisha, ko he tuagaʼane pionie, ia te moʼoni ʼo te manatu ʼaia, ʼi te temi ʼae neʼe mavete ai ʼana matuʼā. Neʼe ina fakamatala fenei: “Neʼe faigataʼa ʼaupito te aluʼaga ʼaia ʼi toku maʼuli.” ʼI te tahi ʼaho, neʼe lotomamahi ʼaupito pea neʼe fia nofo ʼi tona ʼapi, kaʼe logo la te faʼahi ʼaia, neʼe alu ʼo fai ia te ako Tohi-Tapu ʼa te ʼu tamaliki ʼe toko tolu. Neʼe faigataʼa ʼaupito te aluʼaga ʼo tonatou maʼuli. Neʼe liʼakina natou e tanatou tamai pea neʼe fakaʼalikiʼi natou e tonatou taʼokete. Neʼe ui fenei e Trisha: “Neʼe mole he fihifihia peʼe ko he faigataʼaia neʼe tau mo au neʼe lahi age ʼi te ʼu fihifihia ʼae neʼe tau mo natou. Ka matou fai te ako, ʼe au tokagaʼi moka malave ki ʼonatou loto pea moka natou kakata ʼi tonatou fiafia. Neʼe hage te ʼu tamaliki ʼaia ko he meʼa ʼofa neʼe foaki mai e Sehova, tafitō ʼi te ʼaho ʼaia.”

6, 7. (1) ʼE fakamalohiʼi feafeaʼi tatatou tui moka tou ako ki ʼihi te ʼu moʼoni Fakatohi-tapu? (2) ʼE tou mahino feafeaʼi ki te lahi ʼae ʼo te poto ʼo te ʼAtua moka tou tokagaʼi te fetogi ʼo te maʼuli ʼo ʼatatou kau ako?

⁶ Ka tou akoʼi ki ʼihi te ʼu moʼoni Fakatohi-tapu, ʼe tou fakamalohiʼi ai tatatou tui. Neʼe tohi fenei e te apositolo ko Paulo ʼo ʼuhiga mo te kau Sutea ʼo tona temi, ʼae neʼe mole kei natou maʼuliʼi te ʼu meʼa ʼae neʼe natou akonakiʼi: “Ko koe ae e ke ako te tahi kaiga, e mole ke ako ia koe totonu!” (Loma 2:21) ʼE mole natou hage ko te kau pionie ʼo te temi nei. ʼE lahi te ʼu faiga malie ʼe natou maʼu ke natou akoʼi te moʼoni ki ʼihi pea mo fai he ʼu ako Tohi-Tapu. Ke lava lelei ia te faʼahi ʼaia, ʼe maʼua ke natou teuteuʼi lelei ia te ʼu ako takitahi pea mo lagi fai he ʼu fekumi moʼo tali ki te ʼu fehuʼi. ʼE fakamahino fenei e te pionie ʼe higoa ko Janeen: “ ʼI te ʼu lakaga fuli ʼae ʼe au akoʼi ai te moʼoni ki ʼihi, ʼe au logoʼi taku taʼofi lelei te ʼu moʼoni ʼaia ʼi toku ʼatamai pea mo toku loto. Pea ʼe au logoʼi te malohi ʼo taku tui.”

⁷ Ka tou tokagaʼi te fetogi ʼo te maʼuli ʼa te kau ako Tohi-Tapu, ʼuhi ko tanatou maʼuliʼi te ʼu pelesepeto Fakatohi-tapu, ʼe tou mahino ai ki te lahi ʼae ʼo te poto ʼo te ʼAtua. (Esa. 48:17, 18) ʼE ko he fakalotomalohi ʼaia kia tatou ke tou haga maʼuliʼi te ʼu pelesepeto ʼaia. ʼE fakamatala fenei e te tahi pionie ʼe higoa ko Adrianna: “ ʼE feala ke liliu te maʼuli ʼo te hahaʼi ʼo kovi age mo kapau ʼe natou falala pe ki tonatou poto fakatagata. Kaʼe ʼi te temi leva ʼae ʼe natou falala ai ki te poto ʼo Sehova, ʼe kamata fua lelei kia natou.” Neʼe hoko te faʼahi ʼaia kia Phil, ʼo ina ui fenei: “ ʼE ke tokagaʼi ai te malohi ʼo Sehova, heʼe ina lava fetogi te ʼu aluʼaga ʼo te maʼuli ʼo te hahaʼi ʼae neʼe mole natou lava fetogi ʼaki pe ʼanatou faiga.”

8. Kotea ʼae ʼe tou logoʼi moka tou fakatahi mo he ʼu kaumeʼa lelei ʼi te gaue faifakamafola?

⁸ ʼE tou malohi ʼi te faʼahi fakalaumalie moka tou fakatahi mo he ʼu kaumeʼa lelei ʼi te gaue faifakamafola. (Taag. 13:20) Tokolahi te kau pionie ʼe natou fakaʼaogaʼi lahi tonatou temi ʼi te minisitelio mo ʼihi atu kau faifakamafola. ʼE ko he ʼu faiga malie ʼaia ke natou fefakalotomalohiʼaki ai. (Loma 1:12; lau ia Hepeleo 10:24.) ʼE fakamatala fenei e te pionie ʼe higoa ko Lisa: “ ʼI toku fale gaue, ʼe fefakataupiepie pea mo femahekaʼaki tuʼumaʼu te kau gaue. ʼI te ʼaho fuli, ʼe natou fatufatuʼi pea mo tauveleʼi au. ʼE natou faigaʼi tuʼumaʼu ke natou malo. ʼI ʼihi temi, ʼe natou fakalainoaʼi au ʼuhi ko taku faʼahiga maʼuli Fakakilisitiano. Koia, ko te gaue fakatahi mo te kau Kilisitiano ʼi te faifakamafola, ʼe ko he aluʼaga ʼe fakalotomalohi moʼoni. Pea ʼi te fakaʼosi ʼo te ʼaho, ʼe au toe liliu ki fale ʼaki he loto fiafia, logo la toku gaʼegaʼe.”

9. ʼE feafeaʼi ʼatatou felogoʼi fakataumatuʼa mo kapau ʼe tou pionie taumatuʼa?

⁹ ʼE malohi te ʼu felogoʼi fakataumatuʼa moka ʼe nā pionie taumatuʼa. (Ekl. 4:12) ʼE fakamahino fenei e Madeline, ʼe nā pionie taumatuʼa: “ ʼE au toʼo he temi mo toku ʼohoana ke ma palapalalau ʼo ʼuhiga mo tama gaue faifakamafola ʼo te ʼaho, peʼe ko he manatu neʼe ma lau ʼi te Tohi-Tapu ʼe feala ke ma fakaʼaogaʼi ʼi te gaue faifakamafola. ʼAki te temi, neʼe lelei age ʼama felogoʼi.” ʼE toe ui fenei e Trisha: “Neʼe ma faigaʼi ke ʼaua naʼa ma toʼo maʼua, koia ʼe mole ma fihifihia ai ʼi te faʼahi ʼo te falā. ʼE tatau ʼama fakatuʼutuʼu gaue, koia ʼe ma faigaʼi ai ke ma tokaga lelei ki ʼama ʼaʼahi pea mo ʼama ako Tohi-Tapu. ʼAki tamā fakahoko te gaue ʼaia, neʼe lelei age ʼama felogoʼi fakataumatuʼa pea mo ʼama felogoʼi mo Sehova.”

10. Kapau ʼe tou fakamuʼamuʼa te Puleʼaga pea mo tou tokagaʼi ia te tokoni ʼa te ʼAtua, kotea anai tona fua ki tatatou falala ʼae kia Sehova?

¹⁰ ʼE tuputupu tatatou falala ʼae kia Sehova mo kapau ʼe tou fakamuʼamuʼa te Puleʼaga, koteʼuhi ʼe tou tokagaʼi ai te tokoni ʼa Sehova pea mo tana tali ki ʼatatou faikole. ʼE fakamoʼoni ki ai te kau Kilisitiano agatonu fuli. Kaʼe ʼe maʼu e te kau pionie katoa ia te falala ʼaia kia Sehova, ʼae ʼe tokoni ai kia natou ke natou hoko atu tanatou selevisi pionie. (Lau ia Mateo 6:30-34.) Neʼe ʼi ai te aluʼaga neʼe hoko kia Curt, neʼe nā pionie taumatuʼa, pea neʼe tautau fakaʼaogaʼi ia ia ʼi ʼihi temi ki te gaue taupau ʼo te siliko. Neʼe ina tali ke alu ʼo ʼaʼahi ia he kokelekasio ʼe hola lua vaelua tona vaha mamaʼo mo tona ʼapi. Neʼe feʼauga pe tanā moʼi penisini ke nā tau atu ki te kokelekasio ʼaia, kaʼe neʼe mole feʼauga ki te liliu. Pea ʼe li totogi pe ʼi te vahaʼa ʼae ʼe hoa mai ki ai. Neʼe fakamatala fenei e Curt: “Neʼe au kamata feʼekeʼaki pe neʼe lelei koa te tonu ʼae neʼe au toʼo.” Neʼe nā faikole, ʼosi ʼaia, pea neʼe nā fakatuʼutuʼu ke nā fakahoko te gaue ʼaia mo falala ʼe foaki age anai e te ʼAtua ia te ʼu meʼa ʼae ʼe ʼaoga kia naua. ʼI tanā teuteu mavae mai tonā ʼapi, neʼe telefoni age te tuagaʼane ʼo ui age ʼe ʼi ai tana meʼa ʼofa ʼe ina fia foaki age. Neʼe ko te foʼi falā ʼae neʼe ʼaoga moʼo totogi ʼaki te penisini ki te liliu. Neʼe ui fenei e Curt: “Ka hoko liuliuga he ʼu aluʼaga feia, ʼe faigafua taku tokagaʼi te tokoni ʼa Sehova.”

11. Kotea te ʼu tapuakina ʼe maʼu e te kau pionie?

¹¹ ʼE moʼoni, neʼe tokagaʼi e te kau pionie, moka natou gaue maʼa Sehova pea mo fakaovi tuʼumaʼu kia te ia, ʼe lahi ʼaupito te ʼu tapuakina ʼe natou maʼu. (Tet. 28:2) ʼE moʼoni, ʼe tau ia te kau pionie mo te ʼu fihifihia. ʼE mole he kaugana ʼa te ʼAtua ʼe hao mai te ʼu faigataʼaia neʼe tupu mai ʼi te talagataʼa ʼa Atama. Kapau ʼe ʼi ai ʼihi kau pionie ʼe natou fia taʼofi muʼa tanatou selevisi ʼuhi ko he ʼu fihifihia, ʼi te agamahani ʼe feala pe ke fakatokatoka te ʼu fihifihia ʼaia peʼe ke natou faigaʼi ke ʼaua naʼa hoko. Kotea ʼae ka tokoni anai ki te kau pionie ke natou hoko atu tanatou selevisi ʼaki he loto fiafia?

KOTOU HOKO ATU TAKOTOU SELEVISI PIONIE KATOA

12, 13. (1) Kotea ʼae ʼe tonu ke fai e he pionie mo kapau ʼe faigataʼa tana fakakatoa ʼona hola gaue? (2) He ko ʼe ʼe maʼuhiga ke fakatuʼutuʼu ke ina lau pea mo metitasioʼi te Tohi-Tapu ʼi te ʼaho fuli pea mo fai tana ako takitokotahi?

¹² Tokolahi te kau pionie ʼe natou maʼumaʼua. ʼE lagi faigataʼa tatatou fakahoko ia meʼa fuli, koia ʼe maʼuhiga ai ke tou fai he ʼu fakatuʼutuʼu lelei. (1 Ko. 14:33, 40) Kapau ʼe faigataʼa ki he pionie hana fakakatoa ʼona hola gaue, ʼe lagi lelei ke ina vakavakaʼi tana faʼahiga fakaʼaogaʼi tona temi. (Efe. 5:15, 16) ʼE feala ke ina fai ia te ʼu fehuʼi ʼaeni: “Ko temi ʼe fia ʼe au fakaʼaogaʼi ki te ʼu fakafiafia? ʼE tonu koa ke au gaueʼi te loto lolomi? ʼE tonu koa ke au fai he ʼu fetogi ʼo ʼuhiga mo taku gaue?” ʼE lagi mata faigafua ki he Kilisitiano hana hilifaki he tahi age ʼu gaue ki tana polokalama, kaʼe ʼe maʼua ki te kau pionie katoa ke natou vakavakaʼi tuʼumaʼu tonatou aluʼaga pea mo fai te ʼu fetogi ʼae ʼe ʼaoga.

¹³ ʼE tonu ki te kau pionie ke natou fakatuʼutuʼu he polokalama ke natou lau pea mo metitasioʼi te Tohi-Tapu ʼi te ʼaho fuli pea mo fai tanatou ako takitokotahi. Koia ʼe tonu ki he pionie ke tokaga ke ʼaua naʼa lahi fau ia te temi ʼae ʼe ina fakaʼaogaʼi ki te ʼu gaue ʼae ʼe mole maʼuhiga. (Filp. 1:10) Ohage la, kotou fakakaukauʼi age muʼa ko he tehina pionie neʼe faifakamafola ʼi te foʼi ʼaho katoa pea ʼe tau atu ki tona ʼapi. Neʼe fakatuʼutuʼu ʼi te afiafi ke ina teuteuʼi te fono ʼae ka hoko mai. Kaʼe ʼi muʼa ʼo tana fakahoko ia te faʼahi ʼaia, ʼe fia sio muʼa ʼi te tala logo. ʼOsi ʼaia, pea ʼe toe fia sio ʼi te ʼu talalogo fakamalamanei. ʼI tana lolotoga sioʼi te televisio, ʼe ina fetogi te polokalama televisio ʼo sioʼi he tahi age ʼata ʼe malie. Neʼe mole ina tokagaʼi kua teitei fakalaka ia hola ʼe lua, kaʼe heʼeki kamata tana ako ʼae neʼe ina fakatuʼutuʼu ki te afiafi. Kotea ʼae ʼe kovi? Ohage la, kapau ʼe loto e natou ʼae ʼe faigaoʼi ke fualoa tanatou faigaoʼi, ʼe tonu ke natou tokakaga lelei ki tonatou sino. ʼO toe feia pe ki te kau pionie, ʼe maʼua ke natou fai tuʼumaʼu tanatou ako takitokotahi ke natou tologa ʼi te faʼahi fakalaumalie pea mo hoko atu tanatou selevisi pionie katoa.—1 Tim. 4:16.

14, 15. (1) He ko ʼe ʼe tonu ke haga fakafaigafua e te kau pionie tonatou maʼuli? (2) Kotea ʼae ʼe tonu ke fai e he pionie moka ʼe tau mo he ʼu fihifihia?

¹⁴ ʼE faiga malohi ia te kau pionie faiva ke natou haga fakafaigafua tonatou maʼuli. Neʼe fakalotomalohiʼi e Sesu ʼana tisipulo ke natou taupau he mata ʼe lelei. (Mat. 6:22) Neʼe ina fakafaigafua tona maʼuli ke ʼaua naʼa ina tuku he aluʼaga ke ina fakaleluʼi tana fakahoko ia tana minisitelio. Neʼe ina ui fenei: “E mau e te u lenato ni onatou nofoaga, pea e mau e te u manulele o te lagi ni onatou fatai; kae e mole mau e te Foha o te tagata he kogamea ae ke malolo ai tona ulu.” (Mat. 8:20) Kapau ʼe fia faʼifaʼitakiʼi e he pionie ia Sesu, ʼe tonu ke ina manatuʼi, kapau ʼe lahi ʼona koloa pea ʼe lahi anai tana gaue moʼo ʼona taupau.

¹⁵ ʼE mahino ki te kau pionie, ʼe natou lava pionie mole ʼuhi pe ko ʼanatou faiga. Kaʼe ʼe tou maʼu ia te ʼu meʼa ʼofa fuli mo te ʼu pilivilesio fuli ʼuhi pe ko te ʼofa makehe ʼo te ʼAtua. Koia, kapau ʼe tou loto ke hoko atu tatatou selevisi pionie, ʼe maʼua kia tatou takitokotahi ke tou falala kia Sehova. (Filp. 4:13) ʼE ʼi ai pe anai he ʼu fihifihia pea mo he ʼu faigataʼaia. (Pes. 34:20) Pea kapau ʼe hoko mai te ʼu aluʼaga ʼaia, ʼe tonu ke haga te kau pionie kia Sehova pea mo natou tuku ia te fealagia ʼae ke tokoni age, kaʼe ʼaua naʼa natou tuku fakavilivili tonatou pilivilesio gaue. (Lau ia Pesalemo 37:5.) Ka natou tokagaʼi te tokoni ʼofa ʼo te ʼAtua, ʼe natou fakaovi ai kia te ia, tanatou Tamai ʼofa ʼae ʼe ʼi selo.—Esa. 41:10.

ʼE KOTOU PIONIE ANAI KOA?

16. Kotea ʼae ʼe tonu ke kotou fai mo kapau ʼe kotou fia pionie?

¹⁶ Kapau ʼe kotou fia maʼu he ʼu tapuakina ohage ko te kau pionie katoa, kotou fakaha te faʼahi ʼaia kia Sehova ʼi te faikole. (1 Soa. 5:14, 15) Kotou fakafehuʼi ia natou ʼae ʼe lolotoga pionie nei. Kotou fai he ʼu fakatuʼutuʼu ke kotou liliu ʼaki te temi ʼo pionie. Neʼe fai e Keith pea mo Erika ia te faʼahi ʼaia. Neʼe nā gaue toko lua, pea ʼi te hili ʼo tanā ʼohoana, neʼe nā totogi tonā ʼapi pea mo tanā motoka foʼou, ohage pe ko te fai ʼe te ʼu taumatuʼa fuli. Neʼe nā ui fenei: “Neʼe ma manatu ʼe ma fiafia anai ʼuhi ko te ʼu meʼa ʼaia, kaʼe neʼe mole ma logoʼi te faʼahi ʼaia ʼi he temi.” ʼI te temi ʼae neʼe mavae ai ia Keith mai tana gaue, neʼe ina toʼo tana selevisi pionie vaelua ʼi temi. ʼE ina fakamatala fenei: “ ʼI taku pionie, neʼe au toe tokagaʼi te toe fiafia lahi ʼe feala ke tou maʼu ʼi te minisitelio.” Neʼe nā kaumeʼa lelei mo he taumatuʼa pionie. Neʼe tokoni age kia naua ke nā fiafia ʼi te minisitelio pea mo fakafaigafua tonā maʼuli. Kotea neʼe fai e Keith pea mo Erika? “Neʼe ma tohi ki he pepa ʼama fakatuʼutuʼu fakalaumalie pea mo fakapipiki ki te ʼaisi, pea mo fakaʼiloga te ʼu fakatuʼutuʼu takitahi ʼae neʼe ma lava fakahoko.” ʼAki te temi, neʼe kua feala leva ke nā pionie.

17. He ko ʼe ʼe lelei ke kotou fai he ʼu fetogi ʼi ʼakotou fakatuʼutuʼu pea mo tokotou maʼuli ke feala hakotou liliu ʼo pionie?

¹⁷ ʼE kotou pionie anai koa? Kapau ʼe mole kotou iloʼi pe ʼe feala anai, kotou faigaʼi ke kotou lagolago malohi ki te minisitelio ke feala hakotou fakaoviovi kia Sehova. Pea ʼaki te faikole, ʼe kotou tokagaʼi anai ʼe lagi lelei ke kotou fai ni fetogi ʼi ʼakotou fakatuʼutuʼu pea mo tokotou maʼuli ke feala hakotou liliu ʼo pionie. Pea kapau leva ʼe kotou pionie, ʼe lahi age leva te ʼu tapuakina ʼe kotou maʼu ʼi te ʼu sakilifisio ʼae neʼe kotou fakahoko. ʼE kotou fiafia ʼaupito koteʼuhi neʼe kotou fakamuʼamuʼa te ʼu gaue ʼo te Puleʼaga ʼi tokotou maʼuli. (Mat. 6:33) ʼE lahi age leva tokotou fiafia ʼuhi ko takotou tokoni ki ʼihi. Pea tahi, mai tona aluʼaga ʼae ʼe lahi age te ʼu aluʼaga ʼe kotou manatuʼi pea mo palalau ai ʼo ʼuhiga mo Sehova, ʼe tuputupu ai tokotou ʼofa ʼae kia te ia pea mo takotou fakafiafiaʼi tona loto.