Te ʼu Tapuakina ʼo Te Gāue Pionie
1, 2. Koteā te ʼu tapuakina ʼe pipiki tāfito ki te gāue pionie, pea koteā tona tupuʼaga?
1 Neʼe ʼui fēnei e te tēhina pionie: “ ʼE ʼau ʼiloʼi ʼe mole he tahi age gāue ʼe ina foaki mai kia ʼau ia te fiafia ʼaē ʼe ʼau maʼu ʼi taku fakahā ia te moʼoni ki te hahaʼi.” Neʼe ʼui fēnei e te tuagaʼane: “ ʼI te ʼu afiafi fuli, ʼe ʼau moe fīmālie, pea ʼe fiafia ʼaupito toku loto.” ʼE tatau te manatu ʼa te ʼu pionie ʼaia mo te ʼu tēhina mo tuagaʼane ʼi te potu fuli ʼi te kele ʼaē kua nātou ʼiloʼi te ʼu tapuakina ʼo te gāue pionie.—Taag. 10:22.
2 ʼE maʼu te fiafia moʼoni ʼi te tokoni ki te hahaʼi ke nātou maʼu ia te ʼatamai mālama ʼo te Folafola ʼa te ʼAtua, ʼaē ʼe ina taki ki te maʼuli heʼegata. (Gaue 20:35; 1 Tes. 2:19, 20) Neʼe tohi fēnei e te tēhina kua fualoa tana gāue pionie: “ ʼE ko he meʼa fakaloto mālohi pea mo fakamālohiʼi ʼo te tui, hakita sio ki te mālohi ʼo te Folafola ʼa te ʼAtua ʼe ina uga te hahaʼi, ke nātou fai he ʼu fetogi ʼi tonatou maʼuli ke leleiʼia nātou e Sehova.” ʼAki tanatou fakatuʼutuʼu ʼaē ke nātou ʼāteaina moʼo tokoni ki te hahaʼi pea mo fai he ʼu ako Tohi-Tapu, ʼe ʼiloʼi anai e te kau pionie ia te ʼu tapuakina ʼaia.
3, 4. ʼE akoʼi feafeaʼi mai e te gāue pionie ke kita falala kia Sehova, pea ʼe tokoni feafeaʼi mai te faʼahi ʼaia ke kita tuputupu ʼi te faʼahi fakalaumālie?
3 Te Falala Kia Sehova: Ko te falala ʼi te ʼaho fuli ki te laumālie ʼa te ʼAtua moʼo fakahoko tanatou gāue, ʼe tokoni ai ki te kau pionie ke nātou fakatuputupu “te fua o te Laumalie” pea ʼe hage ai kia nātou ko he puipui. (Kal. 5:16, 22, 23) Pea tahi ʼaē meʼa, ʼuhi ko tanatou fakaʼaogaʼi tuʼumaʼu te Folafola ʼa te ʼAtua, ʼi te agamāhani ʼe nātou liliu ai ʼo faiva ʼi te fakaʼaogaʼi ʼo te Tohi-Tapu moʼo fakahā ʼo te moʼoni pea mo fakaloto mālohiʼi ʼo niʼihi. (2 Tim. 2:15) Neʼe fakamatala fēnei e te tēhina kua lauʼi hogofulu taʼu tana gāue pionie: “Ko te gāue pionie neʼe tokoni kia ʼau ke loloto taku mahino ki te Tohi-Tapu, pea ʼe ʼau fakaʼaogaʼi moʼo tokoni ki te hahaʼi ke nātou ʼiloʼi ia Sehova pea mo tana ʼu fakatuʼutuʼu.” ʼE ko he faʼahi fakaloto fīmālie ia!
4 ʼE tonu foki ke toe fakahā e te kau pionie katoa tanatou falala kia Sehova ʼi te tahi ʼu ʼaluga. ʼE fakamālohiʼi tanatou tui mokā nātou sisio ʼe ina tapuakina tanatou ʼu faiga, ʼo ina foaki age kia nātou te ʼu meʼa fakasino ʼe ʼaoga kia nātou. Neʼe ʼui fēnei e te tēhina pionie kua taʼu 72 neʼe gāue pionie katoa lolotoga taʼu e 55: “Neʼe mole he temi neʼe līaki ai ʼau e Sehova.” Pea tahi ʼaē meʼa, ʼaki tanatou faka faigafua tonatou maʼuli, ʼe hāo te kau pionie mai te ʼu tuʼuga hoha ki te ʼu meʼa ʼo te maʼuli. ʼE mole koa koutou fia fai ki te faʼahiga maʼuli ʼaia?—Mat. 6:22; Hep. 13:5, 6.
5. ʼE tokoni feafeaʼi mai te gāue pionie ke kita fakaōvi kia Sehova?
5 Ko Te Fakaōvi Ki Te ʼAtua: Ko tatatou ʼu felogoi mo Sehova ʼe ko he koloā maʼuhiga ʼaupito. (Pes. 63:3) Ka tou fakahoko totatou minisitelio ʼuhi ko totatou ʼofa kia Sehova, pea ʼe tuputupu ai tatatou ʼu felogoi mo ia. (Skp. 4:8) Neʼe ʼui fēnei e te tēhina neʼe fakalaka ʼi te taʼu 18 tana gāue pionie: “Ko te gāue pionie ʼe ina faka fealagia mai ke tou ‘ ʼiloʼi pea ke tou sio ko Sehova ʼe lelei,’ pea ʼi te ʼaho fuli ʼe toe ʼāsili mālohi ai tatatou ʼu felogoi mo totatou Tupuʼaga.”—Pes. 34:8.
6. Koteā ʼaē ʼe tonu ke maʼu e te kau pionie, pea ʼi tuʼa atu ʼo te kau pionie, ko ai ʼaē ʼe ina maʼu tona ʼu fua lelei?
6 ʼE mole tonu pe ke maʼu e te kau pionie te ʼu ʼaluʼaga ʼaē ʼe feala ai ke nātou pionie, kae ʼe tonu ke nātou toe maʼu mo he tui mālohi, mo he ʼofa moʼoni ki te ʼAtua pea mo tonatou kāiga, pea mo nātou tali lelei ke nātou maʼuli faka sakilifisio. (Mat. 16:24; 17:20; 22:37-39) Kae, ohage ko tatatou tokagaʼi te ʼu mata fiafia ʼa te kau pionie ʼi te potu fuli ʼo te kele, ʼe laka age te ʼu tapuakina ʼe maʼu mai te gāue pionie ʼi te ʼu sakilifisio ʼaē ʼe nātou fai. (Mal. 3:10) ʼE mole maʼu pe te ʼu tapuakina ʼaia e te kau pionie, kae ʼe toe lahi pe foki tona fua lelei ki tonatou ʼu famili ʼo feiā mo te kokelekasio ʼuhi ko tonatou faʼahiga maʼuli ʼaia.—Filp. 4:23.