Ko Te Selevisi Pionie—Ko He Fakaʼaogaʼi Fakapotopoto ʼo Tokotou Temi!
1 ‘ ʼE ʼau maʼumaʼua fau! ʼE ko he aga fakapotopoto moʼoni koa haku toʼo te selevisi pionie ʼi te temi ʼaenī?’ Neʼe manatu feiā te tuagaʼane ʼi tana fakalogo ki te akonaki ʼaē neʼe fai e te tagata ʼāfea mo pionie ʼi te fakatahi faka silikosipisio, neʼe ko tona kupu tāfito “Koutou Lotomālohi ʼi Te Selevisi Pionie.” Neʼe manatu fēnei te tēhina tūpulaga neʼe kau ʼi te fakatahi ʼaia, ‘ ʼE ina lavaʼi feafeaʼi tana fakahoko te selevisi pionie? ʼE mole ʼau tagata ʼāfea, kae kua lahi ʼaupito taku ʼu gāue!’
2 ʼI te hoko atu ʼa te tagata ʼāfea tana palalau ʼo ʼuhiga mo te ʼu tapuakina ʼo te selevisi pionie, neʼe ina fakafehuʼi he ʼu pionie ʼo te silikosipisio, pea neʼe nātou fakahā te ʼu fetogi ʼaē neʼe tonu ke nātou fai ke feala hanatou liliu ʼo pionie, pea mo te tapuakinaʼi lahi e Sehova tanatou ʼu faiga. Ko te tahi neʼe māʼimoa, pea ko te tahi neʼe mole kau tona ʼohoana ʼi te moʼoni, pea ko te tahi logope la neʼe ina līaki tana gāue fakamālama, kae neʼe maui mālie tona maʼuli. ʼI tanā logo ʼaē ko te kau pionie ʼaia neʼe nātou lavaʼi tanatou selevisi ʼaki te tokoni ʼa Sehova, neʼe uga ai te tēhina pea mo te tuagaʼane ke nā vakavakaʼi tanā ʼu manatu pea mo tonā ʼaluʼaga. ʼE mātou fakaafe koutou ke koutou fai te faʼahi ʼaia, tāfito la he kua fakahifo te ʼu hola ʼaē ʼe fakamaʼua kiai ʼo feala ai ke kaugamālie age te kau fai faka mafola ʼo te logo lelei ʼaē ka nātou pionie.
3 ʼE tou ʼiloʼi ʼe ko Sehova te Tupuʼaga pea mo te Tuʼi ʼo te ʼAtulaulau, pea ko ia ʼaē neʼe ina foaki mai te maʼuli. (Tan. 4:17; Gaue 17:28) ʼE tou ʼiloʼi lelei ʼe fakaʼaogaʼi e Sehova te kautahi pe e tahi. ʼE tou maʼu te pilivilesio ʼaē ke tou tauhi agatonu mo te kautahi ʼaia, ʼo tou lagolago ki te “tagata kaugana agatonu mo poto” ʼi tatatou faka mafola te Puleʼaga ʼi muʼa ʼo te hoko mai ʼo te fakaʼosi. (Mateo 24:45; 25:40; 1 Pet. 2:9) ʼI tatatou maʼuli ʼi “te u aho fakamuli,” ʼe tou mahino ai ki te kua nounou ʼo te temi ʼaē ʼe tonu ke tou fai faka mafola ai. (2 Tim. 3:1) ʼI te tahi faʼahi, ʼe tonu ke tou tokaga ki te maʼuli fakasino ʼo totatou famili. (1 Tim. 5:8) ʼE mole kei lagi feʼauga te litotogi ʼa he tahi moʼo foaki te meʼa ʼaē ʼe ʼaoga ki tona famili ohage ko te temi muʼa. Peʼe lagi tou mahamahaki. Pea ʼi tona fakahagatonu, ʼe tou fia fakaʼaogaʼi he kiʼi temi pea mo he kiʼi falā maʼa tatou totonu. (Tnk. 3:12, 13) Koia, ʼe feala ke tou feʼekeʼaki peʼe ko he aga fakapotopoto anai hatatou toʼo te selevisi pionie.
4 ʼE ʼa tatou takitokotahi te vakavakaʼi fakalelei ʼo totatou ʼaluʼaga ʼi te temi ʼaenī, pea mo tou fai he tonu peʼe feala ke tou pionie. (Loma 14:12; Kal. 6:5) ʼE ko he meʼa fakaloto mālohi tatatou fakatokagaʼi te tuputupu ʼo nātou ʼaē ʼe nātou toʼo te selevisi pionie. Logope la te ʼu faigataʼaʼia pea mo te ʼu fihifihia ʼi te ʼu ʼaho fakamuli ʼaenī, ko te tānaki gāue ʼo te Annuaire 1999, ʼe fakahā mai ko te teitei toko 700 000 ʼi te hahaʼi ʼa Sehova neʼe nātou mālolohi ʼo hoko atu tanatou selevisi pionie. Logope la tanatou tauhi ʼi he ʼu ʼaluʼaga faigataʼa ʼi te faʼahi faka ekonomika, mo te mole maʼu ʼo he ʼu meʼa feʼoloʼaki, mo tanatou mahamahaki, pe ko ʼihi ʼu fihifihia pea mo faigataʼaʼia, kae neʼe mole fiu te ʼu tēhina mo te ʼu tuagaʼane ʼaia ʼi te fai ʼo te meʼa ʼaē ʼe lelei, pea ʼe tonu ai ke vikiʼi nātou. (Kal. 6:9) Neʼe nātou tali te fakaafe ʼaē neʼe fai age e Sehova kia nātou, ke nātou ʼahiʼahiʼi ia ia. (Mala. 3:10) ʼE nātou ʼui ko te selevisi pionie ʼe ko he fakaʼaogaʼi fakapotopoto ʼaia ʼo tonatou temi ʼaē ʼe faka tuʼakoi pea mo tanatou ʼu koloā, pea neʼe tapuaki moʼoni nātou e Sehova ʼi tanatou fai te ʼu fetogi ke feala hanatou toʼo pea mo hoko atu tanatou selevisi pionie.
5 ʼE Tapuakina Te Kau Pionie: Ko te tuagaʼane ʼi Kameluna mo tana kiʼi taʼahine, ʼe ina fakamahino fēnei: “Talu tana tupu, neʼe kau tuʼumaʼu taku kiʼi taʼahine mo ʼau ʼi te fai faka mafola. Māʼiape la ʼi muʼa ʼo tana poto ʼi te haʼele, neʼe ʼau fua ia ia ʼi toku tuʼa, ʼo ʼau haʼi lelei ia ia ʼaki te moʼi kie. ʼI te tahi ʼaho ʼi te fai faka mafola, neʼe ʼau tuʼu ʼi te laupapa faifakatau ʼi te vaʼe ala. Neʼe ʼalu taku kiʼi taʼahine ki te laupapa ʼaē neʼe ōvi age, ʼaki he ʼu nusipepa neʼe ina toʼo ʼi taku kato. Logope la neʼe mole heʼeki poto ʼi te palalau fakalelei, kae neʼe kamokamo ki te fafine faifakatau pea neʼe ina fakahā age te nusipepa. Neʼe ōfo te fafine ʼi tana sio ʼaē ki te kau ʼa te kiʼi tamasiʼi veliveli ki te gāue ʼaia. Neʼe ina toʼo te nusipepa pea neʼe ina tali ke fai hana ako Tohi-Tapu!”
6 Moʼo tali ki te kole ʼaē ke tokolahi te kau pionie vaeluaʼi temi, ko te tagata ʼāfea pea mo maʼu fānau ʼi Zambie, neʼe gāue ʼaho katoa, pea neʼe ina fakatotonu ke ina toʼo te selevisi pionie vaeluaʼi temi logope la tona maʼumaʼua. Neʼe ina fia foaki ki te kokelekasio he faʼifaʼitaki, ʼo feiā ki tona famili. ʼI ʼihi lakaga, neʼe ina tau tana motokā ʼi te vaʼe ala pea ina fakatatagi te foʼi fime Le secret du bonheur familial, pea neʼe ina fakaafe ia nātou ʼaē neʼe fakalaka ke nātou ʼōmai ʼo fakalogo te meʼa ʼaē neʼe tatagi ʼi te foʼi fime. ʼAki te faʼahiga fai ʼaia, neʼe ina tufa te ʼu tohi Bonheur familial e 16 pea mo te ʼu tohi Te ʼAtamai Mālama e 13, pea neʼe ina kamata te ʼu ako Tohi-Tapu e lua.
7 Ko te manatu lelei ʼaia ʼo ʼuhiga mo te selevisi pionie neʼe toe fakahā ʼi Zimbabwe. Lolotoga te māhina ʼo ʼApelili 1998, ʼi te kokelekasio ʼe ko ʼona kaugā fai faka mafola ʼe toko 117, neʼe ko te toko 70 neʼe nātou pionie vaeluaʼi temi pea ko te ʼu pionie katoa ʼe toko 9. ʼI te tahi kokelekasio ʼaē ko ʼona kaugā fai faka mafola ʼe toko 94, ko te toko 58 neʼe nātou pionie vaeluaʼi temi. Pea ʼi te tahi kokelekasio, ʼaē ko ʼona kaugā fai faka mafola ʼe toko 126, ko te toko 58 neʼe nātou toʼo te selevisi pionie vaeluaʼi temi pea ko te ʼu pionie katoa ʼe toko 4. Ko te taʼu gāue ʼaē kua hili neʼe ko he toe tuputupu lahi ʼi Zimbabwe. Logope la neʼe maʼumaʼua ʼaupito te ʼu tēhina ʼuhi ko te ʼu fihifihia faka famili, mo te ʼu gāue ʼo ʼuhiga mo te kokelekasio, pea mo te laga ʼo te filiale, kae neʼe nātou tokaga ʼo fakaʼaogaʼi fakapotopoto tonatou temi ki te fai faka mafola.
8 ʼE mahino ki te kau pionie ʼe mole feala ke nātou kamata tanatou selevisi pionie pea mo hoko atu ʼaki pe tanatou mālohi ʼo nātou totonu. ʼE ko nātou ʼaē ʼe nātou ʼuluaki ʼui neʼe nātou lava fai ia meʼa fuli ʼaki “te malohi e foakiʼage e te Atua.” (1 Pet. 4:11) ʼAki tanatou tui, ʼe feala ai ke nātou fai faka mafola ʼi te ʼaho fuli pe. ʼE mole nātou manatu kia nātou pea mo kumi te ʼu meʼa ʼaē ʼe lelei kia nātou, kae ʼe mahino ki te kau pionie ʼaē ʼe fua tanatou gāue, ʼe tonu ke nātou mālohi ʼi te “lotolotoga o te u fakafehagai,” pea ʼe nātou maʼu anai he ʼu tapuakina lahi.—1 Tes. 2:2.
9 ʼE Tonu Ke Tou Mulimuli Ki Te Faʼifaʼitaki ʼo Paulo: ʼE fakamatala mai e te Tohi-Tapu te ʼu meʼa ʼaē neʼe fai e te ʼapositolo ko Paulo ʼi te minisitelio pea mo tana tokoni lelei ki te hahaʼi tokolahi. Tahi ʼaē meʼa, neʼe mafasia ʼaupito. Neʼe ina kātakiʼi te ʼu fakataga pea mo te ʼu faigataʼaʼia ʼi tana faka mafola te logo lelei pea mo fakaloto mālohiʼi te ʼu kokelekasio. Neʼe toe mahaki kovi. (2 Ko. 11:21-29; 12:7-10) Neʼe ina fakatotonu ke ina fakaʼaogaʼi fakapotopoto tona temi. Neʼe mahino kia ia neʼe feala ke ina fai te ʼu gāue fuli ʼaia ʼaki te tokoni ʼa Sehova. (Filp. 4:13) Neʼe mole manatu e he tahi ia nātou ʼaē neʼe tokoniʼi e Paulo, neʼe vaʼiganoa tona temi pea mo tana faiga ʼaē ʼi tana tauhi kia Sehova, peʼe nātou manatu neʼe feala ke ina fakaʼaogaʼi ki he gāue ʼe lelei age. ʼE kei ʼaoga kia tatou ia ʼaho nei te fakaʼaogaʼi fakapotopoto ʼa Paulo tona temi! ʼE tou leleiʼia ʼaupito tana tokoni ke feala ke tou ʼiloʼi lelei te ʼu meʼa ʼaē ʼe tonu ke tou fakamuʼamuʼa, pea mo tou mulimuli ki te moʼoni ʼi te ʼu temi faigataʼa ʼaenī!
10 Tāfito ʼi te ʼu ʼaho ʼaenī, ‘ko te temi ʼaē kei toe moʼo faka mafola te logo lelei kua nounou.’ (1 Ko. 7:29; Mateo 24:14) Koia ʼe lelei hatatou fai te fehuʼi ʼaenī, ‘Kapau ʼe ʼau mate fakafokifā ʼapogipogi, pea ʼe feala koa ke ʼau ʼui kia Sehova ʼi te ʼaho ʼaenī, neʼe ʼau fakaʼaogaʼi fakapotopoto toku temi?’ (Skp. 4:14) He koʼe koa ʼe mole koutou fakahā lelei kia Sehova ʼi te temi nei, takotou fia fakaʼaogaʼi fakapotopoto tokotou temi, ʼi tokotou ʼuhiga Fakamoʼoni ʼaʼana? (Pes. 90:12) Koutou kole te tokoni ʼo Sehova, ke feala hakotou faka faigafua tokotou faʼahiga maʼuli. Tatau aipe pe neʼe koutou fakatotonu ʼi te temi muʼa ʼe mole koutou pionie anai, kae kua feala koa ke koutou fetogi takotou manatu ʼo koutou toʼo te selevisi pionie ʼi te temi nei?
11 Tou Fakaʼaogaʼi Fakalelei Totatou ʼu ʼAluʼaga: ʼE mahino papau ia, ʼuhi ko totatou ʼu ʼaluʼaga, ʼe mole feala kia tatou fuli ke tou fai te ʼu hola e 70 ʼi te selevisi pionie katoa. Kae tokolahi te kau kaugā fai faka mafola ʼe nātou fai he ʼu fakatuʼutuʼu ke nātou fai te ʼu hola e 50 ʼi te māhina, ʼo nātou toʼo putuputu te selevisi pionie vaeluaʼi temi mokā feala peʼe nātou toʼo hoholo. Kapau ʼe mole feala ke koutou toʼo ʼi te temi nei te selevisi pionie vaeluaʼi temi peʼe pionie katoa ʼuhi ko tokotou ʼaluʼaga, ʼaua naʼa koutou lotovaivai. Koutou haga faikole ke fetogi tokotou ʼaluʼaga ʼaia. Kapau ʼe mole hoko he fetogi, pea ʼaua naʼa hoha tokotou loto heʼe koutou ʼiloʼi ko Sehova ʼe fiafia ia meʼa fuli pe ʼaē ʼe feala ke koutou fai ʼaki tokotou nefesi katoa ʼi te tauhi kia te ia. (Mateo 13:23) ʼE ina fakatokagaʼi ʼe tou lagolago mālohi kia te ia pea ʼe tou faiga ʼaupito ke tou liliu ko he ʼu kaugā fai faka mafola agatonu, ʼe tou fai faka mafola ʼi te māhina fuli pe. ʼE lagi feala hakotou haʼele ki muʼa ʼaki te fakatuputupu ʼo takotou poto ʼi te fakahā ʼo te moʼoni, ʼo koutou gāue moʼo hikihiki takotou fai faka mafola pea mo te akoʼi ki te hahaʼi te logo lelei.—1 Tim. 4:16.
12 ʼI te kua ōvi mai ʼo “te ʼaho lahi pea mo fakamanavahe” ʼo Sehova, ʼe tonu ke tou fakaʼaogaʼi fakapotopoto te temi ʼaē kei toe moʼo fakaʼosi te gāue ʼaē neʼe fakatotonu mai ke tou fai. (Soele 2:31) ʼE ʼiloʼi e Satana ʼe nounou tona temi, pea tāfito ʼi te temi ʼaenī, ʼe ina ʼahiʼahiʼi ia meʼa fuli ʼaē ʼe ina maʼu ke tou maʼumaʼua pea ke faigataʼa ai kia tatou ke tou tokagaʼi te ʼu meʼa ʼaē ʼe maʼuhiga moʼoni. (Filp. 1:10; Apk. 12:12) ʼAua naʼa koutou meʼa noaʼi te tokaga ʼa Sehova kia koutou. ʼE feala ke tokoni atu Sehova ke koutou faka faigafua tokotou maʼuli, pea mo koutou fai te meʼa fuli ʼaē ʼe feala ke koutou fai ʼi te minisitelio. (Pes. 145:16) Meʼa fakafiafia foki, he kua fakatokagaʼi e te tokolahi, ʼi tanatou toe vakavakaʼi tonatou ʼu ʼaluʼaga, kua feala ke nātou toʼo te selevisi pionie vaeluaʼi temi peʼe ke nātou pionie katoa. Koia, ʼe ko he meʼa fakafiafia ʼaupito ki te kau pionie ke nātou fakaʼaogaʼi fakapotopoto tonatou temi. ʼE koutou kau anai koa ia nātou ʼaia?