Ko Te Temi ʼAenī ʼo Te Fai Faka Mafola!
1. He koʼe ʼe ko te temi ʼaenī ʼo te fai faka mafola?
1 “Koutou manavasiʼi ki te ʼAtua pea mo koutou faka kolōlia kiā te ia.” ʼAki te takitaki ʼa te kau ʼāselo, ʼe tala te logo ʼaia ki “te ʼu puleʼaga kehekehe, te telepi kehekehe, te lea kehekehe pea mo te hahaʼi kehekehe.” Koteā tona tupuʼaga? “Heʼe kua hoko mai te hola ʼo [te] fakamāu [ʼa te ʼAtua].” ʼE tou māʼuʼuli nei ʼi te ‘hola ʼo te fakamāu’ ʼaia, ʼaē ʼe iku anai ki te fakaʼauha ʼo te tuʼu ʼo te ʼu faʼahiga meʼa ʼaenī. Kua maʼuhiga ki te hahaʼi ke nātou “atolasio kiā te Ia ʼaē neʼe ina faʼu te lagi mo te kele mo te tai pea mo te ʼu matapuna vai.” ʼI te temi nei, ʼe mole he tahi age gāue ʼe maʼuhiga age ʼi te gāue ʼaē ko te faka mafola ʼo te ‘logo lelei heʼegata.’ Ei, ko te temi ʼaenī ʼo te fai faka mafola!—Apk. 14:6, 7, MN.
2. Neʼe fakahā feafeaʼi e te ʼu kaugana ʼa Sehova tanatou ʼiloʼi ʼaē ia te maʼuhiga ʼo te temi?
2 ʼI te ʼu taʼu e hogofulu kua hili, ko te ʼu kaugana ʼa Sehova neʼe nātou fai ia hola e teitei 12 miliale moʼo faka mafola ia te logo ʼo te Puleʼaga pea mo fai ʼo ni ʼu tisipulo. Tokolahi neʼe nātou fai ia te ʼu fetogi ʼi tonatou maʼuli ke nātou fakaʼaogaʼi lahi tonatou temi ki te taʼukai fakalaumālie. (Mat. 9:37, 38) Ohage la ʼi te taʼu kua ʼosi, ko te toko 850 000 tupu kau fai faka mafola neʼe nātou pionie ʼi te māhina fuli. Ko te kau pionie kātoa, neʼe nātou faka mafola ʼi te māhina fuli ia hola e 70, kae ko te kau pionie vaeluaʼi temi, ko hola e 50.
3. ʼI te agamāhani, koteā te ʼu fetogi ʼaē ʼe fai e te kau fai faka mafola ke feala hanatou pionie?
3 Te ʼu Fakatuʼutuʼu Ke Kita Pionie: Ko te kau pionie ʼe nātou faka faigafua ia tonatou maʼuli heʼe nātou ʼiloʼi te “kua nounou ʼo te temi.” (1 Ko. 7:29, 31, MN ) ʼE nātou tōkakaga ʼo fakaʼaogaʼi fakapotopoto tanatou falā, ke mole lahi fau te temi ʼaē ʼe nātou gāue ai ʼi he gāue faka mālama. Ohage la, ko ʼihi kua nātou nonofo ʼi he ʼu ʼapi ʼe veliveli. Ko ʼihi ʼe mole kei nātou totogi he ʼu meʼa ʼe mole loko ʼaoga. (Mat. 6:19-21) ʼI ʼihi temi, ʼe tonu foki ke nātou fakasiʼisiʼi tanatou ʼu gāue takitokotahi. ʼE nātou fai ia te faʼahi ʼaia, heʼe nātou fia fakaʼaogaʼi tāfito tonatou temi ki te minisitelio. (Ef. 5:15, 16) Neʼe feala ki te ʼu kaugā fai faka mafola e tokolahi ke nātou pionie, he neʼe nātou faʼa kātaki, mo maʼuli faka sākilifisio, pea mo falala kiā Sehova ʼi te faikole.
4. Koteā te ʼu fakatuʼutuʼu lelei ʼe feala ai anai hakotou liliu ʼo pionie?
4 ʼE feala koa ke koutou pionie? He koʼe koa ʼe mole koutou fakalavelave ia te faʼahi ʼaia ki he ʼu pionie ʼe fua lelei tanatou selevisi? Koutou gāue mo nātou ke koutou sio ki te ʼu fiafia ʼaē ʼe nātou maʼu ʼi te selevisi ʼaia. Koutou lau ia te ʼu alatike ʼaē ʼe talanoa ai ki te selevisi pionie. Koutou fai he ʼu fakatuʼutuʼu lelei ʼe feala ai anai ke koutou liliu ʼo pionie. Kapau ʼi te temi nei, ʼe ʼi ai he ʼu fihifihia ʼe nātou faka faigataʼa takotou liliu ʼo pionie, koutou fakahā te faʼahi ʼaia kiā Sehova ʼi te faikole, pea mo koutou kole ke tokoni atu ke koutou fakatokatoka te ʼu fihifihia ʼaia.—Taag. 16:3.
5. ʼE hikihiki feafeaʼi e te selevisi pionie tatatou faiva ʼi te minisitelio?
5 Te ʼu Tapuakina Pea Mo Te ʼu Fiafia: ʼAki te selevisi pionie ʼe tou faiva ai ʼi te fakaʼaogaʼi ʼo te Folafola ʼa te ʼAtua, pea ʼe ko he faʼahi ʼe ina fakatuputupu tatatou fiafia. Neʼe ʼui fēnei e te tuagaʼane pionie kei finemui: “ ʼE maʼuhiga hata poto lelei ʼi te fakaʼaogaʼi ʼo te moʼoni ʼo te Folafola ʼa te ʼAtua. Ka koutou pionie, ʼe lahi takotou fakaʼaogaʼi ia te Tohi-Tapu. ʼI te temi nei, ka au fai faka mafola ʼi te ʼu ʼapi, ʼe au maʼu gafua te ʼu vaega faka Tohi-Tapu ʼaē ʼe tāu anai mo te faʼahiga tagata fuape.”—2 Tim. 2:15.
6. Koteā te ako ʼe tou tāʼofi ʼi te selevisi pionie?
6 ʼAki te selevisi pionie, ʼe tou toe maʼu ai te ʼu kalitātē ʼe ʼaoga ki totatou maʼuli. ʼE lava tokoni ki te kau tūpulaga ke nātou fakaʼaluʼalu lelei tanatou falā pea mo fakaʼaogaʼi fakapotopoto, pea mo nātou popoto ʼi te felogoi mo te hahaʼi. ʼAki te selevisi pionie, ko te tokolahi ʼe nātou maʼu ia he fakasiosio poto ʼi te faʼahi fakalaumālie ʼo ʼuhiga mo te maʼuli. (Ef. 4:13) Tahi ʼaē, ʼi te agamāhani ʼe sio te kau pionie ki te lagolago ʼa Sehova ki tanatou gāue.—Gaue 11:21; Filp. 4:11-13.
7. ʼE tokoni feafeaʼi mai te selevisi pionie ke tou felogoi lelei mo Sehova?
7 Ko te tahi tapuakina lahi ʼaē ʼe lagi tou maʼu ʼi te selevisi pionie, ʼe ko tatatou felogoi lelei mo Sehova. ʼE ko he faʼahi ʼe tokoni kiā tatou ʼi te ʼu temi faigataʼa. Neʼe ʼui fēnei e te tuagaʼane neʼe tau mo tona temi faigataʼa: “Ko taku felogoi lelei ʼaē mo Sehova ʼi taku selevisi pionie neʼe tokoni mai ke au maʼu puleʼaki ki toku ʼu fihifihia fuli.” Neʼe ina toe ʼui fēnei: “ ʼE au fiafia ʼaupito ʼi taku fakaʼaogaʼi toku temi mālohi moʼo tauhi ʼi te temi kātoa kiā Sehova. Neʼe au fai ia te ʼu gāue ʼaē neʼe mole au manatu ʼe mole au lava fai anai ʼi he ʼaho.” (Gaue 20:35) ʼOfa pe, mo tatou ke tou maʼu he ʼu tapuakina lahi feiā, mo kapau ʼe tou faiga mālohi ʼo fai ia te gāue ʼaē ʼe maʼuhiga ʼaupito: te fai faka mafola.—Taag. 10:22.