ʼE Feala Koa Hakotou Hū ʼi “Te Matapā Lahi Ki Te Gāue”?
1. Ko ‘te matapā lahi fea ki te gāue’ ʼaē ʼe ʼavahi mai kiā tātou?
1 ʼI te ʼavahi ʼaē ki te ʼapositolo ko Paulo ia “te matapā lahi ki te gāue,” neʼe ina fakaʼaogaʼi ia te faigamālie ʼaia moʼo hoko atu tana gāue fai faka mafola ʼo te Puleʼaga logolā te fakafeagai ʼa te tokolahi. (1 Ko. 16:9) Iā ʼaho nei, ko te toko 642 000 tupu kau fai faka mafola ʼo te Puleʼaga ʼi te mālamanei, neʼe natou hū ʼi te matapā lahi ʼo te gāue, ʼo natou pioniē kātoa.
2. He koʼē ʼe lelei ʼi ʼihi temi ke tou vakavakaʼi totatou ʼaluʼaga takitokotahi?
2 ʼE Fetogi Te ʼu ʼAluʼaga: Tatau aipē peʼe ʼi te temi nei ʼe faka tuʼakoi tatatou fai faka mafola ʼuhi ko totatou ʼaluʼaga, kae ko te ʼu ʼaluʼaga ʼo te maʼuli ʼe fetogi. Koia, ʼe lelei ai ʼi ʼihi temi ke tou vakavakaʼi totatou ʼaluʼaga takitokotahi pea ke tou foimo fakaʼaogaʼi te ʼu faigamālie fuli. (Tnk. 11:4) Ko koe koa ko he tūpulaga, ʼe ke ʼamanaki maʼu hou pepa ʼi te faleako? Ko koutou koa ko he ʼu mātuʼa, ʼe ʼamanaki hū ako hakotou fānau? Peʼe kua kotou letelete koa? ʼAki te ʼu fetogi ʼaia, ʼe lagi lahi ai hokotou temi pea mo feala ai hakotou toʼo te selevisi pioniē kātoa. Ko te tuagaʼane neʼe mahaki kovi ki muʼa atu, neʼe ina fakatotonu ke pioniē ʼi tona taʼu 89. Koteā tona tupuʼaga? Mai tona ʼaluʼaga ʼaē neʼe kua taʼu kātoa tana mole heʼeki toe hū ki te lōpitali, neʼe ina logoʼi ai kua feala hana pioniē.
3. Koteā te ʼu fetogi neʼe fai e ʼihi ke natou pioniē kātoa ai?
3 ʼO ʼuhiga mo Paulo, ʼi te kamata neʼe ina fia ʼaʼahi tona ʼu tehina ʼi Kolonito. Kae neʼe ina fetogi tana ʼu fakatuʼutuʼu ʼuhi ko te logo lelei. Tokolahi iā nātou ʼaē kua pioniē kātoa iā ʼaho nei neʼe tonu ke natou fai he ʼu tuʼuga fetogi ke feala hanatou pioniē. Ko ʼihi neʼe natou faka faigafua tonatou maʼuli ʼo natou toʼo he gāue kogaʼi ʼaho, heʼe feʼauga aipē moʼo totogi te ʼu meʼa ʼaē ʼe ʼaoga kiā nātou. Neʼe natou fiafia ʼi tanatou pilivilēsio ʼaē ko te selevisi pioniē. (1 Tim. 6:6-8) Ko ʼihi taumātuʼa neʼe natou fai he ʼu fetogi ke gāue pē te tagata, ʼo feala ai ki te fafine ke pioniē.
4. Koteā ʼaē ʼe feala ke tou fai mo kapau ʼe tou manatu ʼe mole feala ke tou maʼu te ʼu hola ʼaē ʼe fakamaʼua mai?
4 ʼAua naʼa kotou fakafisi ke kotou pioniē ʼi takotou tuʼania ʼaē naʼa mole feala ke kotou maʼu te ʼu hola. ʼE ko hola pē e lua ʼe ʼaoga ke fai ʼi te ʼaho fuli. Kapau ʼe kotou manatu ʼe mole feala ke kotou fai te faʼahi ʼaia, kotou ʼahiʼahiʼi ke kotou pioniē vaeluaʼi temi ʼi he māhina e tahi peʼe lua, kae kotou fakatuʼutuʼu ke kotou fai te ʼu hola e 70. ʼE feala ai anai ke kotou ʼiloʼi te fiafia ʼo te selevisi pioniē. (Pes. 34:8) Kotou fai palalau mo nātou ʼaē kua pioniē. Neʼe lagi kua natou felāveʼi mo te ʼu fihifihia ʼaē ʼe tau mo koutou. (Taag. 15:22) Kotou kole kiā Sehova ke ina tapuakina takotou ʼu faiga ʼaē ke kotou fakalahi takotou minisitelio.—1 Soa. 5:14.
5. He koʼē ko te selevisi pioniē kātoa ʼe ko he fakatuʼutuʼu ʼe tāu mo feʼauga?
5 Ko He Fakatuʼutuʼu ʼe Tāu Mo Feʼauga: ʼE lahi te ʼu tapuakina ʼi te selevisi pioniē kātoa. ʼE kotou maʼu ai he fiafia lahi ʼuhi ko takotou foaki lahi. (Gāue 20:35) ʼI takotou pioniē ʼaia, ʼe hikihiki ai takotou poto ʼi te fakaʼaogaʼi lelei ʼo te Folafola ʼo te moʼoni ʼa te ʼAtua. (2 Tim. 2:15) ʼE lahi ai anai te ʼu ʼaluʼaga ʼaē kā kotou sio ai ki te tokoni ʼa Sehova kiā koutou. (Gāue 11:21, Filp. 4:11-13) Ko te selevisi pioniē ʼe toe tokoni atu anai ke kotou fakatuputupu te ʼu kalitātē fakalaumālie, ohagē ko te faʼa kātaki pea ʼe feala ai anai hakotou fakaovi kiā Sehova. (Sake 4:8) ʼE kotou lava hū koa ʼi te matapā lahi ʼaia ki te gāue pea mo kotou pioniē kātoa?