Neʼe Kua Kotou Pioniē Kātoa Koa ʼi Muʼa Atu?
1. Koteā te pilivilēsio ʼaē ʼe maʼu e te tokolahi, kae koteā ʼaē neʼe tonu ke fai e ʼihi?
1 Talu mai ni ʼu taʼu, ko te ʼu toko lauʼi afe ʼe natou maʼu te pilivilēsio ʼaē ke natou pioniē kātoa ʼo natou “akoʼi pea mo tala te logo lelei” ki te hahaʼi. (Gāue 5:42) Kae ko ʼihi, neʼe tonu ke natou tuku tanatou pioniē ʼuhi ko ni ʼu ʼaluʼaga kehekehe. Kapau neʼe kotou pioniē kātoa ʼi muʼa atu, kua kotou vakavakaʼi koa tokotou ʼaluʼaga ʼi te temi nei, peʼe mole feala lā ke kotou toe toʼo takotou selevisi pioniē?
2. He koʼē ʼe lelei kiā nātou ʼaē neʼe pioniē ʼi muʼa atu ke natou toe vakavakaʼi tonatou ʼu ʼaluʼaga ʼi te temi nei?
2 ʼE Fetogi Te ʼu ʼAluʼaga: Kua lagi fetogi te ʼaluʼaga ʼaē neʼe tupu ai takotou tuku takotou pioniē. Ohagē lā, mo kapau neʼe kotou tuku takotou pioniē he neʼe mole kotou lava fai te ʼu hola e 90 ʼi te māhina, kua feala ʼapē ʼi te temi nei, ke kotou toe toʼo te selevisi pioniē ʼi te kua hifo ʼo te ʼu hola ʼaē ʼe fakamaʼua, ʼaē ko hola e 70? Kua lagi siʼisiʼi age tokotou ʼu maʼua gāue peʼe ko tokotou ʼu maʼua fakafāmili, ʼo mole hagē ko te temi ʼaē neʼe kotou tuku ai takotou pioniē? Ko te tuagaʼane neʼe ina tuku tana selevisi he neʼe mahaki, neʼe kua feala tana toe toʼo tana selevisi ʼi tona taʼu 89. Mai tona ʼaluʼaga ʼaē neʼe kua taʼu kātoa tana mole heʼeki toe hū ki te lōpitali, neʼe ina logoʼi ai kua feala hana toe toʼo tana selevisi pioniē.
3. ʼE lava fetokoniʼaki feafeaʼi he fāmili ke feala ai ki he tahi ʼi tonatou fāmili ke pioniē?
3 Neʼe lagi mole kotou pioniē ʼi muʼa atu, kae ko he tahi ʼo tokotou fāmili neʼe ina tuku tana pioniē moʼo tokaga ki he tahi neʼe mahaki ʼi te fāmili, ohagē ko he tamai peʼe ko he faʼē kua vaivai matuʼa. (1 Tim. 5:4, 8) Kapau koia, ʼe feala koa kiā koutou peʼe ko ʼihi atu ʼo te fāmili ke lahi age hakotou tokoni kiā ia ʼaē neʼe ina tuku tana selevisi? He koʼē ʼe mole kotou fai palalau fakatahi ki te faʼahi ʼaia? (Taag. 15:22) Kā fetokoniʼaki te fāmili ke feala ai ki he tahi iā nātou ke pioniē, ʼe feala ke logoʼi e te fāmili kātoa tanatou lagolago ki tana selevisi.
4. Koteā ʼaē ʼe feala ke kotou fai mo kapau ʼe mole heʼeki feala ke kotou toe pioniē kātoa ʼi te temi nei?
4 ʼAua naʼa kotou lotovaivai mo kapau ʼe mole feala ʼi tokotou ʼu ʼaluʼaga ʼo te temi nei ke kotou toe toʼo te selevisi pioniē. Ko takotou fakaʼamu ki te faʼahi ʼaia ʼe fakafiafia kiā Sehova. (2 Ko. 8:12) Kotou fakaʼaogaʼi te ʼu poto ʼaē neʼe kotou maʼu ʼi takotou selevisi pioniē mokā kotou fai fakamafola ʼi te temi nei. Kotou fakahā ʼi takotou faikole takotou fakaʼamu ʼaia, pea kotou vakaʼi tuʼumaʼu pē te ʼu faʼahi ʼaē ʼe feala ke kotou fetogi ʼi tokotou ʼaluʼaga. (1 Soa. 5:14) ʼAki te temi, ʼe lagi ʼavahi atu anai e Sehova kiā koutou he “matapā lahi ki te gāue” ke feala ai ke kotou toe maʼu te ʼu fiafia ʼo te selevisi ʼo te pioniē kātoa!—1 Ko. 16:9.