ʼE Feala Koa Ke ʼAu Pionie ʼi Te Temi Nei?

¹ ʼE fakamanatuʼi mai e te koga tohi ki te taʼu 1999, ʼe tou maʼuʼuli nei ʼi te “aho o te fakamauli.” (2 Ko. 6:2) Kae kua vave fakaʼosi te ʼaho ʼaia, pea kamata leva te “aho o te Fakamau.” (2 Pet. 2:9) ʼE foaki e Sehova ki te hahaʼi fuli te fealagia ʼaē ke hāofaki nātou, koia ʼe tou fiafia ʼi tatatou sio ki te hahaʼi kaugamālie ʼaē ʼe nātou tali te faʼahi ʼaia!

² ʼE faiga e te kau Fakamoʼoni ʼa Sehova ke nātou maʼu te hahaʼi ʼaē ʼe nātou fia tali te moʼoni ʼi muʼa ʼo te hoko mai ʼo te fakaʼosi. ʼO ʼuhiga mo te faʼahi ʼaia, ko te tokolahi ʼo te kau fai faka mafola, neʼe nātou toʼo te selevisi pionie. ʼE feala koa ke ʼau pionie ʼi te temi nei? He koʼe ʼe tou lagaʼi te fehuʼi ʼaia?

³ ʼE Nātou Fakahā Tonatou Loto Fakafetaʼi: Ohage ko tona fakahā mai e Te Minisitelio ʼo Te Puleʼaga ʼo Sanualio 1999, neʼe fakahifo te ʼu hola ʼaē ʼe fakamaʼua ki te kau pionie katoa pea mo te kau pionie vaeluaʼi temi. Ke feala hanatou fakahoko te fakatuʼutuʼu foʼou ʼaia, ʼe maʼua ke fakaʼaogaʼi e te kau pionie katoa ia hola e 70 ʼi te māhina fuli, ko tona fakakatoa ki te taʼu katoa ko hola e 840. Ko te kau pionie vaeluaʼi temi ʼe nātou fakaʼaogaʼi anai ia hola e 50 ki te selevisi ʼi te māhina fuli. Koʼeni te ʼu palalau fakafetaʼi ʼaē neʼe fai e ʼihi ki te ʼu fakatuʼutuʼu foʼou ʼaia:

“ ʼI meʼa ʼofa taulekaleka leva ʼaē ʼe fai mai e totatou Tāmai ʼaē ʼi selo!”

“ ʼE mole he palalau moʼo fakahā atu toku fiafia, toku ʼofa, pea mo toku loto fakafetaʼi ki te fakatuʼutuʼu ʼaia!”

“ ʼE faigafua age anai hamatou fai katoa tamatou ʼu hola!”

“ ʼE mātou faikole ke hahaʼi age ia nātou ʼaē ka nātou gāue temi katoa ʼi te minisitelio, pea mo maʼu te ʼu tapuakina ʼaē ʼe kita maʼu mokā kita fakalahi takita tauhi kia Sehova.”

⁴ ʼI te kua vave hoko mai ʼo te ʼaho ʼo te hāofaki ʼa Sehova, ʼe loto ai e Sehova ke ʼāsili tona vikiʼi e tana hahaʼi. ʼE ʼāsili mālohi te logo ʼaia (1) ʼaki te tuputupu ʼo te kaugamālie ʼo te kau fai faka mafola ʼo te Puleʼaga pea mo (2) te faiga ʼa tatou takitokotahi ke tou fakalahi tatatou faka mafola ia te Puleʼaga. Ko Sehova, ia ia ʼaē “e ina fakatupu,” neʼe ina fai ke lava lelei te gāue ʼaia ʼo ina tapuakina ia nātou ʼaē ʼe nātou tali te hāofaki.​—1 Ko. 3:​6, 7; Pes. 110:3.

⁵ ʼAua Naʼa Tou Meʼa Noaʼi Te Fakatuʼutuʼu ʼo Te Gāue Pionie: ʼI tana talanoa ki te ʼaho ʼo te hāofaki ʼa Sehova, neʼe fakaloto mālohiʼi fēnei e Paulo te kau Kilisitiano: “E matou gaue fakatahi mo ia [ia Sehova], e matou poupouki koutou, aua naa koutou noai te kalasia nee koutou tali mai te Atua.” ʼE mole tou meʼa “noai” anai te ʼaho ʼaia mo kapau ʼe mahino kia tatou, ko te “temi faigamalie” ʼaenī ke tou gāue ai ʼi te temi fuli pe moʼo hāofaki te hahaʼi. (2 Ko. 6:​1, 2) Ia ʼaho nei, ʼe toe maʼuhiga ʼaupito te ʼu palalau ʼaē neʼe fai e Paulo. Maʼa te kau Kilisitiano ʼaē ʼe nātou ʼofa fakamalotoloto kia Sehova, ʼe ko he pilivilesio lahi hanatou kau mālohi ki te minisitelio ʼaē neʼe ina fakatotonu age kia nātou. ʼE feala koa hakotou fakalahi takotou kau ki te minisitelio ʼo koutou liliu ko he pionie katoa?

⁶ ʼE Mole Faigataʼa Fau Te Selevisi Pionie Katoa: ʼI te ʼu fenua e tolu ʼaē ko Niu-Kaletonia, mo Vanuatu, pea mo Uvea mo Futuna, ʼe tou fakaʼamu ke ʼi ai he kau pionie katoa e toko 60 peʼe laka age ʼi muʼa ʼo te ʼaho 1 ʼo Sepetepeli. Neʼe fakafuafua ʼe tou lavaʼi te faʼahi ʼaia. Koteā tona tupuʼaga? ʼI te māhina ʼo Malesio 1997, neʼe ko te kau pionie vaeluaʼi temi e toko 249 ʼi Niu-Kaletonia pea mo te toko 59 ʼi Vanuatu. ʼI te māhina ʼo ʼApelili 1998, neʼe ko te toko 203 ʼi Niu-Kaletonia pea mo te toko 38 ʼi Vanuatu. Pea ʼi Sanualio 1999, neʼe maʼu te kau pionie vaeluaʼi temi e toko 9 ʼi Uvea mo Futuna. Ko te teitei katoa ʼo nātou ʼaia, neʼe nātou fai ia hola e 60​—ʼo kei toe pe te ʼu kiʼi hola e 10 ke nātou fakahoko te fakatuʼutuʼu foʼou ʼo te ʼu hola ʼa te kau pionie katoa! Kapau ko he foʼi toko 13 pe ʼo nātou ʼaē neʼe nātou pionie vaeluaʼi temi ʼe nātou toʼo te selevisi pionie katoa ʼi te taʼu ʼaenī, pea ʼe tou kamata anai te māhina ʼo Sepetepeli ʼaki te kau pionie katoa ʼe toko 60 peʼe laka age!

⁷ ʼE Tonu Ke ʼi Ai Hakotou Polokalama: ʼE mata faigataʼa koa hakotou fai faka mafola ia hola e 70 ʼi te māhina? E lagi tokoni atu anai kia koutou takotou ʼiloʼi ʼaē, ko tona fakafuafua ʼe ko hola e 17 ʼi te vāhaʼa fuli. ʼAki te ʼu faʼifaʼitaki ʼaē ʼe tuku atu ʼi te pasina ʼaē ʼe hoa mai, koutou fai takotou polokalama pionie katoa ʼaē ʼe ʼalutahi mo tokotou ʼaluʼaga. ʼI takotou fai te polokalama ʼaia, koutou fakalavelave ki te kau pionie ʼaē kua māhani peʼe nātou fakafuafua feafeaʼi tonatou temi ki te selevisi pionie, mo tonatou ʼu maʼua ʼa nātou takitokotahi, pea mo tonatou ʼu maʼua faka famili. Koutou fakalavelave ki te tēhina taupau faka silikosipisio peʼe fakatuʼutuʼu feafeaʼi e te kau pionie tanatou gāue ʼi te vāhaʼa. ʼOsi ʼaia, pea koutou faikole kia Sehova ke ina tapuakiʼi takotou fakatuʼutuʼu ʼaē ke koutou pionie.​—Taag. 16:3.

⁸ ʼE Tonu Ke Lagolago Kiai Te Famili Katoa: Neʼe koutou fakakaukauʼi koa te fealagia ʼaē ke lagolago katoa tokotou famili ki te selevisi pionie? ʼE feala hakotou talaga kiai mo tokotou famili, ʼo koutou vakaʼi peʼe feala ki he toko tahi peʼe lua ʼo te famili ke nā toʼo te selevisi pionie, mo kapau ʼe koutou fai he polokalama lelei pea mo koutou felagolagoʼaki. Kae ʼe mahino anai ʼihi, ʼe mole feala ke nātou pionie katoa ʼuhi ko te ʼaluʼaga ʼe tau mo nātou. Kapau koia ʼaia, pea koutou fakatuʼutuʼu ke koutou pionie ʼi he tahi temi. Kae koutou fai ʼi te temi nei he ʼu fakatuʼutuʼu ke koutou kamata pionie ʼi te temi ʼaē neʼe koutou fakatuʼutuʼu kiai. ʼE lagi feala ke koutou pionie vaeluaʼi temi ʼo fai liuliuga ʼi te taʼu, ʼo koutou aʼu māmālie ki takotou toʼo te selevisi pionie katoa.

⁹ ʼE kehekehe te ʼaluʼaga ʼo te kau pionie katoa ʼe toko 48 ʼo Niu-Kaletonia pea mo Vanuatu. Ko ʼihi ia nātou ʼe mahamahaki, pea ko te teitei katoa ʼo nātou ʼaia, ʼe ʼi ai tonatou ʼu maʼua faka famili pea mo faka paʼaga. Ko te toko 25 ʼe nātou taʼu 50 peʼe laka age, pea ko te toko lua ia nātou ʼe nā taʼu 65 tupu. Ko te toko 16 ʼe ko te kau selipatea, pea ko te toko tolu ia nātou ʼe nātou taʼu 25. ʼE ko tuagaʼane ʼe toko 39 pea mo tēhina ʼe toko 9, pea ʼe ʼi ai tonatou ʼu maʼua faka famili pea mo feiā pe ʼi te kokelekasio. Ko nātou fuli ʼaia, ʼe nātou “too te faigamalie o te temi” ke nātou pionie, pea ʼi te agamāhani neʼe tonu ke nātou faka faigafua tonatou maʼuli, pea ʼe nātou maʼuli fiafia ai.​—Kol. 4:5.

¹⁰ ʼE Tonu Koa Ke Koutou Faka Faigafua Tokotou Maʼuli? Kapau ʼe koutou faka faigafua tokotou maʼuli, pea ʼe lagi feala anai ke koutou toʼo te selevisi pionie. Ko tokotou maʼuli ʼe hage koa ko he toe ʼapi lahi ʼe mahu ai te ʼu kogafale ʼe mole hona ʼaoga, pea ʼe fonu ai te ʼu meʼa ʼe ʼaoga kiai he temi lahi, mo he falā, pea mo he gāue lahi moʼona taupau? Kapau koia ʼaia, pea ʼe hoki feala anai hakotou pionie mo kapau ʼe koutou fakafeauga ki he ʼu meʼa ʼe veliveli age. ʼE feala koa hakotou fakasiʼisiʼi te temi ʼaē ʼe koutou fakaʼaogaʼi ki takotou gāue fakamālama? ʼE feala koa hakotou maʼu he temi lahi ʼo koutou fakafuafua fakapotopoto te temi ʼaē ʼe koutou fakaʼaogaʼi ki te ʼu fakafiafia?

¹¹ Ia 1 Timoteo 6:8, ʼe fakaloto mālohiʼi fēnei tatou e te Tohi-Tapu: “Kapau e tou mau meakai mo mutui mea, e tou feauga i te u mea aia.” Ko tatatou fakafeauga ki te ʼu meʼa ʼaē kua tou maʼu, ʼe tokoni anai kia tatou mo kapau ʼe tou fia gāue lahi kia Sehova pea mo fakamuʼamuʼa te ʼu meʼa fakalaumālie. (Mateo 6:​22, 33) ʼI te pasina 104 ʼo te tohi Annuaire 1998, ʼi te fakamatala ʼo ʼuhiga mo Saponia, ʼe fakahā ai he ʼu manatu ke tou mahino ai pe koʼe ʼe tokolahi te kau pionie ʼi te fenua ʼaia. Koʼeni te tahi manatu: “ ʼE moʼoni, ʼi te agamāhani ʼe mole faʼa lahi te ʼu ʼapi ʼa te kau Saponia, ʼo mole ʼaoga kiai he temi lahi moʼona fakamaʼa, pea ko te tokolahi ʼo te hahaʼi, ʼe faigafua tonatou maʼuli.” ʼE mole ko te manatu koa la ʼaē ʼe fakahā ia 1 Timoteo 6:8?

¹² ʼI te kele katoa, ʼe fakaʼāsili te faka mafola ʼo te logo lelei e te hahaʼi kaugana ʼa te ʼAtua, ʼi muʼa ʼo te hoko mai ʼo te ʼaho ʼo te hāofaki ʼa Sehova. Meʼa lelei foki, he neʼe fakafuafua ʼi te taʼu ʼaenī kua ʼosi, ko te toko 168 (te toko 141 ʼi Niu-Kaletonia, mo te toko 21 ʼi Vanuatu pea mo te toko 6 ʼi Uvea mo Futuna) ʼaē neʼe nātou kau ʼi te selevisi pionie katoa peʼe vaeluaʼi temi ʼi te māhina fuli. ʼE feala koa hakotou fai he ʼu fetogi ʼi tokotou maʼuli ke koutou gāue fakatahi mo nātou? ʼE fakaafe ia tatou fuli ke tou vakaʼi fakalelei ʼi te faikole te fehuʼi ʼaenī: “ ʼE feala koa ke ʼau pionie ʼi te temi nei?”

[Talanoa ʼo te pasina 3]

Tou faiga ke toko 60 te kau pionie katoa!

[Talanoa ʼo te pasina 4]

Ko He ʼu Polokalama Ki Te Kau Pionie Katoa

Ko te ʼu hola ʼaē ʼe fakamaʼua ʼi te vāhaʼa: 17

Ko ʼAho e Tahi ʼi Te Vāhaʼa Pea Mo Te Fakaʼosi Vāhaʼa

ʼAho Hola

Feliaono 8

Moeaki 6

ʼAhotapu 3

Fakakatoa: 17

Ko ʼAho e Lua ʼi Te Vāhaʼa Pea Mo Te Moeaki

ʼAho Hola

Feliatolu 7

Felianima 7

Moeaki 3

Fakakatoa: 17

Ko ʼAho e Tolu ʼi Te Vāhaʼa Pea Mo Te ʼAhotapu

ʼAho Hola

Mōnite 5

Feliafā 5

Feliaono 5

ʼAhotapu 2

Fakakatoa: 17

Ko Afiafi e Lua ʼi Te Vāhaʼa Pea Mo Te Fakaʼosi Vāhaʼa

ʼAho Hola

Mōnite 3

Feliafā 3

Moeaki 8

ʼAhotapu 3

Fakakatoa: 17

Taku Polokalama Pionie Katoa

ʼAho Hola

Mōnite

Feliatolu

Feliafā

Felianima

Feliaono

Moeaki

ʼAhotapu

Fakakatoa: 17