Fakamanatu ʼo Te Ako ʼo Te Minisitelio Faka Teokalatike
Ko te ʼu fehuʼi ʼaenī, ʼe vakaʼi anai ʼi te fai palalau ʼo te fakamanatu ʼo te Ako ʼo Te Minisitelio Faka Teokalatike lolotoga te vāhaʼa ʼaē ʼe kamata ʼi te ʼaho 29 ʼo ʼAukusitō 2005. Ko te tagata taupau ʼo te ako ʼe ina fai anai te fakamanatu ia minuta e 30, ʼo fakatafito ki te ʼu akonaki ʼaē neʼe vakaʼi ʼi te ʼu vāhaʼa ʼo te ʼaho 4 ʼo Sūlio ki te ʼaho 29 ʼo ʼAukusitō 2005. [Nota: Ko te ʼu fehuʼi ʼaē ʼe mole tuʼu ai he tohi ke vakaʼi, ʼe koutou fai anai e koutou totonu hakotou ʼu kumi moʼo maʼu te ʼu tali.—Vakaʼi te tohi École du ministère pp. 36-37.]
HE KALITĀTĒ KI TE FAIAKONAKI
1. Ka tou fakahā ia tatatou tui ki te hahaʼi, koteā ʼaē ʼe feala ke tou fai “ke ʼiloʼi [tatatou] aga fakapotopoto e te hahaʼi fuli,” pea he koʼe ʼe maʼuhiga ia te faʼahi ʼaia? (Filp. 4:5, MN; Skp. 3:17) [be p. 251 pal. 1-3, te fakamatala ʼaē ʼe ʼātakai]
2. He koʼe ʼe tonu ke tou lotomahino ke tou lava felogoi mo te hahaʼi? [be p. 253 pal. 1-2]
3. He koʼe ʼe tonu ke tou fakaʼeteʼete mokā tou fai he ʼu fehuʼi moʼo tokoni ki te hahaʼi ke nātou mahino ki he akonaki? [be p. 253 pal. 3-4]
4. Koteā te ʼu faʼahi ʼe tonu ke tou tōkakaga kiai ke tui te nofoʼaki ki tatatou akonaki? [be p. 255 pal. 1-4, te fakamatala ʼaē ʼe ʼātakai; p. 256 pal. 1, te fakamatala ʼaē ʼe ʼātakai]
5. Koteā ʼaē ʼe mole tonu ke galo ia tatou mo kapau ʼe tou fia talanoa ki he ʼu fakamoʼoni faka mālama ʼe lagolago ki te moʼoni ʼo te Tohi-Tapu? [be p. 256 pal. 3-5, te fakamatala ʼaē ʼe ʼātakai]
AKONAKI N° 1
6. Ko te ʼu fakamoʼoni fea ʼaē ʼe nātou lagolago ki te maʼuli moʼoni ʼa Sesu? [w03 15/6 pp. 4-7]
7. E feafeaʼi ‘te hāofaki ʼo te kau faitotonu e tonatou ʼu gutu,’ pea ‘ ʼe haga tuʼu’ feafeaʼi koa ia te ʼapi ʼo te kau faitotonu? (Taag. 12:6, 7) [w03 15/1 p. 30 pal. 1-3]
8. Logola ʼe mole tuʼu ʼi te Tohi-Tapu he lisi ʼo te ʼu meʼa ʼaē ʼe tonu ke fai pea mo te ʼu meʼa ʼaē ʼe tapu, kae ʼe tou lava ‘mahino feafeaʼi ki te finegalo ʼo Sehova’? (Ef. 5:17) [w03 1/12 p. 21 pal. 2–p. 22 pal. 2]
9. Ko te ʼu pelesepeto faka Tohi-Tapu fea mo kapau ʼe maʼuliʼi, ʼe nātou lava tokoni ki he tahi ke ina ʼutakiʼi te maʼuli masiva peʼe ko te ʼu fihifihia faka ekonomika? [w03 1/8 p. 5 pal. 2-5]
10. ʼO ʼuhiga mo te foaki noa, ʼe malave feafeaʼi kiā tatou ia te faʼifaʼitaki ʼa Sehova? (Mat. 10:8) [w03 1/8 pp. 20-22]
LAU ʼO TE TOHI-TAPU ʼI TE VĀHAʼA FULI
11. Neʼe faka ʼuhiga ki tea ia te ʼu pou ʼaē neʼe tuʼu ʼi te hūʼaga ʼo te fale lotu ʼo Salomone, ʼaē neʼe higoaʼi ko Sakini pea mo Poase? (1 Hau 7:15-22)
12. ʼO mulimuli ki te Lao ʼa Moisese, neʼe feala koa kiā Salomone ke ina foaki ki te Hau ko Ilame ʼo Tile, ia te ʼu kolo e 20 ʼo te fenua ʼo Kalilea? (1 Hau 9:10-13)
13. Koteā te ako ʼe tou tāʼofi mai te talagataʼa ʼa “te tagata [kaugana] ʼa te ʼAtua”? (1 Hau 13:1-25)
14. Ko te ʼaluʼaga fea ʼaē neʼe fakahā ai e Asa te Hau ʼo Suta ia tona lototoʼa, pea koteā te ako ʼe tou tāʼofi mai tana faʼifaʼitaki? (1 Hau 15:11-13)
15. Koteā te ako ʼe tou tāʼofi ʼi te hisitolia ʼo te Hau ko Akape pea mo Napote mokā tou fakaʼofaʼofa ʼuhi ko he meʼa ʼe mole tou maʼu? (1 Hau 21:1-16)