“Neʼe Koutou Maʼu Noa, Koutou Foaki Noa”
“NEʼE koutou maʼu noa, koutou foaki noa.” (Mateo 10:8, MN ) Neʼe fai e Sesu te fakatotonu ʼaia ki tana kau ʼapositolo ʼi te temi ʼaē neʼe ina fekauʼi ai nātou ke nātou ʼolo ʼo faka mafola te logo lelei. Neʼe fakalogo koa te kau ʼapositolo ki te fakatotonu ʼaia? Ei, pea neʼe nātou hoko atu te faʼahi ʼaia logola te kua mavae ʼa Sesu ʼi te kele.
Ohage la ko Simone ʼaē ʼi muʼa atu neʼe gaohi meʼa fakatemonio, ʼi te temi ʼaē neʼe sio ai ki te mālohi ʼaē neʼe fai ʼaki te ʼu milakulo e te ʼu ʼapositolo ko Petelo pea mo Soane, neʼe ina fia totogi nāua ke nā foaki age kia ia he ʼu mālohi moʼo fai ni ʼu milakulo. Kae ko Petelo neʼe ina fakatonutonuʼi ia Simone, ʼo ʼui maʼana: “Ke puli atu tau paʼaga mo koe, he neʼe ke manatu ʼe ke maʼu anai ʼaki tau falā te meʼa ʼofa ʼaē ʼe foaki mai e te ʼAtua.”—Gaue 8:18-20, MN.
Neʼe maʼu e te ʼapositolo ko Paulo ia te manatu pe ʼaē neʼe maʼu e Petelo. Neʼe feala ke liliu ia Paulo ko he kavega maʼa tona ʼu tēhina ʼi Kolonito, kae neʼe gāue ia moʼo totogi te ʼu meʼa ʼaē ʼe ʼaoga kia te ia. (Gaue 18:1-3) Koia, neʼe feala ai ke ina ʼui fakahagatonu, neʼe “mole totogi” tana faka mafola ia te logo lelei ki te kau Kolonito.—1 Kolonito 4:12; 9:18.
Kae tokolahi ʼe nātou tala ko nātou ko te kau tisipulo ʼa Kilisito, ʼe mole nātou fia “foaki noa” te logo lelei. ʼIo, tokolahi te kau takitaki lotu ʼo te Keletiate ʼe nātou “faiakonaki [anai] . . . ki he totogi.” (Mikea 3:11) Ko ʼihi takitaki lotu neʼe nātou maʼu koloā ʼuhi ko te falā ʼaē ʼe nātou maʼu mai tanatou ʼu hahaʼi. ʼI te taʼu 1989, neʼe fakatūʼa te tagata fai evaselio ʼi Amelika ke pilisoniʼi ia taʼu e 45. Koteā tona tupuʼaga? Neʼe ina “kaihaʼa te ʼu lauʼi miliona tola mai te hahaʼi fakalogo, ʼo ina fakaʼaogaʼi te falā ʼaia moʼo totogi te ʼu ʼapi, te ʼu motokā, tona ʼu temi mālōlō pea mo te fale fakamokomoko maʼa tana kuli.”—People’s Daily Graphic, ʼaho 7 ʼo ʼOketopeli 1989.
ʼI Ghana, neʼe tohi ʼi te sulunale te Times ʼo te ʼaho 31 ʼo Malesio 1990, ko te patele Katolika neʼe ina tae te falā ʼi te tahi misa pea neʼe ina lī ki te hahaʼi. ʼE ʼui fēnei e te sulunale: “Neʼe ina fai te faʼahi ʼaia heʼe ʼi tana manatu, maʼa ni ʼu hahaʼi lalahi, neʼe tonu ke lahi age te ʼu meʼa ʼofa ʼaē ʼe nātou foaki age.” Ko te tupuʼaga la ʼaia ʼe lahi ai te ʼu ʼēkelesia ʼe nātou fakatuputupu te loto mānumānu ʼi tanatou hahaʼi, ʼo nātou fai te ʼu gaoʼi paʼaga pea mo ʼihi fakatuʼutuʼu moʼo tānaki he paʼaga lahi.
Kae ko te kau Fakamoʼoni ʼa Sehova ʼe nātou faiga ke nātou muliʼi te faʼifaʼitaki ʼa Sesu pea mo te kau ʼuluaki tisipulo. ʼE mole totogi tonatou kau takitaki. Ko te kau Fakamoʼoni fuli ʼe ko he ʼu minisi neʼe foaki kia nātou te gāue ko te faka mafola ʼo te “Logolelei . . . o te Puleaga” ki te hahaʼi. (Mateo 24:14) Koia ko te toko ono miliona tupu ia nātou ʼi te malamanei ʼe nātou foaki noa te “vai mauli” ki te hahaʼi. (Apokalipesi 22:17) Māʼiape la mo nātou ʼaē ʼe “mole hanatou paʼaga,” ʼe feala ke nātou maʼu te logo ʼo te Tohi-Tapu. (Isaia 55:1) Logola ko tanatou gāue ʼaē ʼe fai ʼi te malamanei ʼe fakahoko ʼaki te ʼu meʼa ʼofa, kae ʼe mole nātou kole falā. ʼI tonatou ʼuhiga minisi moʼoni ʼa te ʼAtua, ʼe mole nātou “fakatotogi te folafola ʼa te ʼAtua,” kae ʼe nātou “faiga fakamalotoloto [ʼo palalau], ei, ohage ko he kau fakafofoga ʼa te ʼAtua.”—2 Kolonito 2:17, MN.
Koia, koteā ʼaē ʼe lotolelei ai te kau Fakamoʼoni ʼa Sehova ke nātou ʼolo ʼo tokoni ki te hahaʼi, pea mo fakaʼaogaʼi tonatou ʼu koloā ki te faʼahi ʼaia? Koteā tona tupuʼaga? Ko tona faka ʼuhiga koa ko tanatou foaki noa ʼe mole ʼi ai honatou fakapale ki tanatou ʼu faiga?
Ko He Tali Ki Te Fakafihi ʼa Satana
Ia ʼaho nei ko te kau Kilisitiano moʼoni ʼe nātou fai te faʼahi ʼaia, ʼuhi heʼe nātou fia fakafiafia ia Sehova—kae ʼe mole nātou fai ke maʼu ai honatou ʼu koloā. Koia ʼe feala ai ke nātou tali ki te fakafifihi ʼaē neʼe lagaʼi e Satana te Tevolo kua hili kiai te ʼu sēkulō. ʼO ʼuhiga mo te tagata faitotonu neʼe higoa ko Sopo, neʼe fakafihiʼi e Satana ia Sehova ʼaki te fehuʼi ʼaenī: “ ʼE mole ʼi ai koa la he tupuʼaga ʼo te manavasiʼi ʼa Sopo ki te ʼAtua?” Neʼe lau e Satana ko Sopo ʼe tauhi ki te ʼAtua koteʼuhi neʼe Ina puipui ia ia. Neʼe ʼui e Satana, kapau ʼe toʼo te ʼu koloā ʼo Sopo, pea ʼe laukovi anai ki te ʼAtua!—Sopo 1:7-11.
Moʼo tali ki te fifihi ʼaia, neʼe tuku e te ʼAtua ke ʼahiʼahiʼi e Satana ia Sopo, ʼo ʼui maʼana: “Ko te ʼu meʼa fuli ʼa ʼana ʼe tuku atu ki ʼou nima.” (Sopo 1:12) Neʼe koteā tona fua? Neʼe fakamoʼoni e Sopo ko Satana ʼe gutu loi. Koia neʼe nofo agatonu aipe ia Sopo logola te ʼu fihifihia ʼaē neʼe hoko kia ia. Neʼe ina ʼui fēnei: “ ʼO aʼu ki toku mate, ʼe mole ʼau tuku anai taku agatonu!”—Sopo 27:5, 6.
Ia ʼaho nei, ko te kau atolasio moʼoni ʼe nātou agatonu pe ohage ko Sopo. ʼE mole nātou gāue ki te ʼAtua ʼuhi heʼe nātou fia maʼu koloā.
Ko Te ʼOfa Makehe ʼe Ko He Meʼa ʼOfa ʼe Foaki Noa e Te ʼAtua
ʼE toe “foaki noa” e te kau Kilisitiano moʼoni koteʼuhi neʼe nātou “maʼu noa” mai te ʼAtua. Ko te malamanei ʼe haʼisia ʼi te agahala pea mo te mate, ʼuhi ko te agahala ʼo tatatou kui ko Atama. (Loma 5:12) Meʼa lelei, heʼe ko Sehova neʼe ina fakatuʼutuʼu ke mate faka sakilifisio tona ʼAlo—ʼe ko he meʼa neʼe faigataʼa ʼaupito ki te ʼAtua. ʼE mole tau te malamanei mo te meʼa ʼofa ʼaia. Kailoa, ʼe ko he meʼa ʼofa ia mai te ʼAtua.—Loma 4:4; 5:8; 6:23.
Koia ia Loma 3:23, 24 (MN ) neʼe ʼui fēnei ai e Paulo ki te kau Kilisitiano fakanofo: “Ko tatou fuli neʼe tou agahala pea mole tou aʼu ki te kolōlia ʼo te ʼAtua, pea ʼe hage ko he meʼa ʼofa ʼe foaki noa ʼaē ʼe tala ai ko nātou ko te kau faitotonu ʼaki tona ʼofa makehe, ʼuhi ko te faka ʼāteaina ʼaē neʼe totogi e Kilisito Sesu.” Ko nātou ʼaē ka maʼuʼuli ʼo heʼegata ʼi te kele, ʼe nātou toe maʼu te “meʼa ʼofa [ʼaia] ʼe foaki noa.” Ko te meʼa ʼofa ʼaia ʼe kau ai mo te pilivilesio ʼaē ke tala ʼe nātou faitotonu ohage ko ni ʼu kaumeʼa ʼo Sehova.—Sakopo 2:23; Apokalipesi 7:14.
Ko te sakilifisio faitotogi ʼa Kilisito ʼe ina toe faka fealagia ki te kau Kilisitiano fuli ke nātou tauhi ohage ko ni ʼu minisi ʼa te ʼAtua. Neʼe tohi fēnei e te ʼapositolo ko Paulo: “Kua ʼau liliu ko te minisi ʼuhi ko te [meʼa fakalilo taputapu] ʼo te meʼa ʼofa ʼaē ʼe mole totogi ʼo te ʼofa makehe ʼo te ʼAtua.” (Efeso 3:4-7, MN ) Neʼe mole tau te minisitelio ʼaia mo te kau minisi moʼoni ʼa te ʼAtua, kae ʼe nātou fai ʼaki pe te meʼa ʼofa ʼaia, koia ʼe mole nātou ʼamanaki ai ʼe totogi nātou mokā nātou faka mafola ki te hahaʼi ia te logo ʼo te meʼa ʼofa ʼaia.
ʼE Tou Tauhi Pe Koa Ke Tou Maʼu Ai Te Maʼuli Heʼegata?
Ko tona faka ʼuhiga koa ʼe loto e te ʼAtua ke tauhi age te kau Kilisitiano kae mole tonu ke nātou fakaʼamu ki he fakapale? Kailoa, he neʼe ʼui fēnei e te ʼapositolo ko Paulo ki tona ʼu kaugā fagona: “E mole agakovi te Atua pea e mole ina galoi tautou gaue mo toutou ofa nee koutou fakaha o uhiga mo tona Huafa.” (Hepeleo 6:10) Pea ko Sehova ʼe mole heʼe faitotonu. (Teutalonome 32:4) Kailoa, ko Sehova ʼe ina “fakapale natou e natou kumi iaʼia.” (Hepeleo 11:6) Kae ko te fakapapau ʼo ʼuhiga mo te maʼuli heʼegata, ʼe mole ina fakatupu koa ia tatou he faʼahiga manatu pe kia kita totonu?—Luka 23:43.
Kailoa ia. ʼUluaki, ko te ʼAtua totonu ʼaē ʼe ina foaki mai kia tatou te fia maʼuli heʼegata ʼi te Palatiso ʼi te kele. Neʼe ina fakahā ki te ʼuluaki taumatuʼa ia te ʼamanaki ʼaia. (Senesi 1:28; 2:15-17) Neʼe ina toe faka fealagia foki ke toe fakahoko te fakatuʼutuʼu ʼaia ʼaē neʼe pulihi e Atama mo Eva ki tonā hōloga. Koia ʼe fakapapau ia te ʼAtua ʼi tana Folafola “ko te ʼu meʼa ʼaē neʼe fakatupu ʼe toe faka ʼāteaina anai nātou mai te popūla ki te popo pea ʼe nātou maʼu anai te ʼāteaina faka kolōlia ʼo te fānau ʼa te ʼAtua.” (Loma 8:21, MN ) Koia ʼe tau mo te kau Kilisitiano ia ʼaho nei, ohage ko Moisese ʼo te temi muʼa, ke nātou sio “fakamamaʼu . . . ki te totogi ʼo te fakapale.” (Hepeleo 11:26, MN ) ʼE mole foaki e te ʼAtua ia te fakapale ʼaia ohage ko he totogi fakakākā. ʼE ina foaki ʼaki tona ʼofa katoa te fakapale kia nātou ʼaē ʼe nātou tauhi kia te ia. (2 Tesalonika 2:16, 17) Moʼo tali ki te ʼofa ʼaia, “e tou ofa, koteuhi nee uluaki ofa ia kia tatou.”—1 Soane 4:19.
Te Fakatuʼutuʼu Lelei Ki Te Tauhi Ki Te ʼAtua
Kae ko te kau Kilisitiano ia ʼaho nei ʼe tonu ke nātou vakavakaʼi tuʼumaʼu pe koʼe ʼe nātou gāue maʼa te ʼAtua. Ia Soane 6:10-13, ʼe tou lau ko Sesu neʼe ina fafaga faka milakulo te toko nima afe tupu hahaʼi. Koia, ko ʼihi neʼe nātou kamata muliʼi ia Sesu ʼuhi pe ko te ʼu faʼahi ʼaia. Neʼe ʼui fēnei e Sesu kia nātou: “E . . . koutou kumi au . . . uhi nee koutou kai te u pane pea nee koutou makokona.” (Soane 6:26) Hili te ʼu taʼu e tolugofulu, ko ʼihi Kilisitiano neʼe feiā tanatou tauhi taputapu ki te ʼAtua kae “neʼe mole nātou fai ʼaki he tupuʼaga ʼe maʼa.” (Filipe 1:17, MN ) Ko ʼihi ‘neʼe mole nātou tapiki ki te ʼu folafola ʼo te maʼuli ʼa Sesu Kilisito’ neʼe nātou kumi te ʼu puleʼaki ke nātou maʼu koloā ʼi tanatou ʼu fakatahi mo te kau Kilisitiano.—1 Timoteo 6:3-5.
Ia ʼaho nei, kapau ʼe tauhi pe he Kilisitiano ʼuhi pe heʼe fia maʼuli heʼegata ʼi te Palatiso, ʼe mole lelei tana tauhi. ʼE feala aipe ke hoko he tuʼutāmaki fakalaumālie. ʼI te hage ʼaē kei fualoa te tuʼu ʼa te ʼu faʼahiga meʼa ʼa Satana, ʼe feala pe ke “lotovaivai,” heʼe ʼi tana manatu ʼe kei tuai te ʼaho fakaʼosi. (Kalate 6:9) ʼE toe feala pe foki ke fakahemala ki te ʼu koloā ʼaē neʼe lītuʼa kiai. ʼE fakamanatuʼi fēnei mai e Sesu kia tatou: “ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa.” (Mateo 22:37, MN ) Ei, ko ia ʼaē ʼe tauhi ki te ʼAtua koteʼuhi heʼe ʼofa kia te ia, ʼe mole ina faka tuʼakoi anai tona temi tauhi ʼaē kia te ia. ʼE ina fakatuʼutuʼu ke tauhi kia Sehova ʼo talu ai! (Mikea 4:5) ʼE mole fakahemala ki te ʼu sakilifisio fuli ʼaē neʼe ina fai ki te tauhi ki te ʼAtua. (Hepeleo 13:15, 16) Ko tona ʼofa ʼaē ki te ʼAtua ʼe ina uga ia ia ke ina fakamuʼamuʼa ʼi tona maʼuli tana ʼu gāue ʼaē kia te ia.—Mateo 6:33.
Ia ʼaho nei, ko te toko ono miliona tupu kau atolasio moʼoni ʼe nātou “foaki fakamalotoloto . . . ia nātou” moʼo gāue maʼa Sehova. (Pesalemo 110:3) ʼE koutou kau ai koa? Kapau ʼe mole koutou kau ai, pea koutou metitasioʼi te ʼu meʼa ʼaē ʼe foaki atu e te ʼAtua: te ʼatamai mālama maʼa ʼo te moʼoni; (Soane 17:3) te ʼāteaina mai te haʼisia ki te ʼu akonaki lotu hala; (Soane 8:32) te ʼamanaki ʼo te maʼuli heʼegata. (Apokalipesi 21:3, 4) ʼE feala ke tokoni atu te kau Fakamoʼoni ʼa Sehova ke koutou maʼu te ʼu meʼa fuli ʼaia mai te ʼAtua, kae mole fakamaʼua kiai he totogi.
[Talanoa ʼo te pasina 22]
Ia ʼaho nei ko te kau Kilisitiano moʼoni ʼe nātou fia fakafiafia ia Sehova—kae mole ko honatou fia fai koloā
[Paki ʼo te pasina 21]
Ko te meʼa ʼofa ʼo te ʼAtua ʼe ina uga te kau Kilisitiano ke nātou vaevae noa te logo lelei