Kapite 12
Kohe fehui mauhiga tafito o uhiga mo koe
1, 2. a) He koe ko tou faahiga mauli o koe eiai tona mauhiga mooni o uhiga mo koe? b) Koai niihi e toe mauhiga kiai, pea kotea tona tupuaga?
KO TOU faahiga mauli o koe eiai tona mauhiga tafito. E feala ke iai hona u fua lelei pee kovi. E koia, ka ina tonu anai o uhiga mo tou mauli ki amuli: pee kote mole mote malama aeni, pee kote hao mai ai pea mo hu kite faka tuutuu foou pea mo fai totonu ate Atua, aia ka ke mauli ai anai o heegata.—I Soane 2:17; II Petelo 3:13.
2 Kae mole ko koe pe e faka uhiga kiai te faahi aia. Ko tou faahiga mauli o koe e toe iai foki mo tona u fua ki ihi age. O hagela, ko tau aga e feala keina faka galipotoi pee ina faka lainoai tau u matua. E ui ete Tohi-Tapu: “Kote foha poto, eina faka fiafia te tamai, pea kihe tama vale e kohe faka loto mamahi ia o tana fae.” (Taagalea 10:1). Kae toe mauhiga age: Ko tou faahiga mauli o koe e toe to foki kia Sehova Atua. E feala keina faka loto fiafiai pee ina faka loto mamahii. Uhi kotea? O uhiga mohe fehui mauhiga tafito o uhiga mo koe.
E NOFO AGATONU ANAI KOA TE TAGATA KITE ATUA?
3. Kotea te fakafifihi a Satana nee ina fai kia Sehova?
3 Koena la te fehui ae nee lagai e Satana te Tevolo. Ite temi ae nee ina kakai ai Atama mo Eva ona holoi ai te lao faka atua pea mo na faka tahi ai mo ia ite agatuu kite Atua (Senesi 3:1-6). Nee ui ai leva e Satana kua feala ke fakafifihi kia Sehova oina lau fenei: ‘Kote tagata e tauhi pe kia koe uhipe ko tana manatu kia ia. Tuku-mai mua kiau pea e feala kau ofei ia natou fuli mai a koe.’ E mooni, kote u palalau aia nee mole tohi feia ite Tohi-Tapu, kae iloga lelei ia ko Satana nee faka alu feia tana palalau kite Atua. E ha mai ia ite tohi o Sopo.
4, 5. a) Koai ia Sopo? b) Kotea te mea nee hoko ite lagi ite temi o Sopo?
4 Ko Sopo nee mauli ihe u sekulo ki muli mai ite agatuu ae nee fai i Eteni. Nee kote tagata kaugana ia ate Atua nee fai totonu pea mo agatonu. Kae kote agatonu a Sopo eiai koa hona mauhiga kite Atua pee ko Satana? Ei, ko tona ui aia ete Tohi-Tapu. E tou lau ai kohe aho nee alu ai Satana o tuu ia mua o Sehova, ite lagi. Koutou faka maumau pe nee kotea te mea ae nee na palalau kiai:
5 “Koia nee hoko mai leva te aho ae nee hu ai te u foha ote Atua mooni ke natou tutuu ia mua o Sehova, pea nee hu ai foki mo Satana ia natou. O fehui atu ai e Sehova kia Satana: ‘Eke hau mai fea?’ Pea tali e Satana kia Sehova o fenei: ‘Nee au evaeva pe i he mo he ite kele pea mo fealu aki ai.’ Pea toe ui atu e Sehova kia Satana: ‘Kua ke tokagai taku kaugana ko Sopo, mole he tahi e tatau mo ia ite kele, kote tagata e mole hana lakahala pea e totonu ia, e manavahe kite Atua pea mo faka tafa mai te kovi?’ ”—Sopo 1:6-8.
6. I tona ha mai ite Tohi-Tapu, kotea ae nee hoko ite temi o Sopo?
6 He koe nee ui age e Sehova kia Satana ko Sopo kote tagata e totonu? Koteuhi kote agatonu a Sopo kia Sehova nee fakafihii. Tou vakavakai lelei te fehui a Sehova: “Eke hau mai fea?”, pea mote tali a Satana: “Nee au evaeva pe i he mo he ite kele pea mo fealu aki ai.” E ha mai ai ko Sehova eina tuku kia Satana te faitaliha moo fai te mea ae e loto kiai, ae kote ofei ote hahai mai te Atua. Kae nee kotea te tali a Satana kite fehui a Sehova o uhiga mote agatonu a Sopo?
7, 8. a) I tona lau e Satana, kotea te tupuaga ote tauhi a Sopo kite Atua? b) Kotea te mea nee fai e Sehova moo motuhi ote fihi?
7 “Pea tali e Satana kia Sehova o fenei: ‘E mole iai koala he tupuaga ote mataku a Sopo kite Atua? Nee mole koala ke faka tuu he a moo puipui o ia, pea mo tona api, pea mote mea fulipe a ia, ite fenua katoa? Te gaue o ona nima, nee ke tapuakinai, pea ko tana faga manu kua mafola ite kele. Kae, moo fetogi, faka lelei mua, kake faoi atu tou nima kiai, pea ke fa kite u mea fulipe a ia, pea ke sio pee mole anai lau kovi kia koe ki tou fofoga.’ ”—Sopo 1:9-11.
8 Ko Satana nee ina kumi he mea moo taku aki te agatonu a Sopo kite Atua. ‘E tauhipe Sopo kia koe kote u mea kehekehe ae kua ke foaki kiai kae mole ko hoona ofa kia koe, ko tana ui aia.’ Nee ina toe lau foki ko Sehova eina faka aoga hala tona malohi mafimafi. ‘Nee ke haofaki tuumau pe ia ia’, ko tana ui aia. Koia, moo motuhi ote fihi, nee tali fenei e Sehova: “Koeni, kote u mea fulipe a ia e iou nima. Kae aua pe naa ke hilifaki tou nima kia ia!”—Sopo 1:12.
9. Nee fuei feafeai e Satana ia Sopo, pea nee kotea tona fua?
9 Pea fakato aipe e Satana ia Sopo kite malaia. O ina matematehi tana faga manu pee kaihaa. Pea ina matematehi mo tana u tamaliki toko hogofulu. Kua teitei puli fulipe te u koloa a Sopo, kae nee nofo agatonu aipe kia Sehova. Nee mole lau kovi kite Atua (Sopo 1:2, 13-22). Kae ko Satana nee mole nofo noa aki ai.
10. Kotea ae e ha mai ai ko Satana nee mole na tuku aki ai?
10 Nee toe tutuu foki ia Satana mote kau aselo ia mua o Sehova, pea fehui atu e Sehova kiai pe nee ina tokagai te agatonu a Sopo. O ina ui: “Kei na taofi maupe tana agatonu.” Pea tali e Satana: “Kote kili moo te kili, pea kote mea fulipe e mau ehe tagata, eina foaki anai ia moo tona mauli. Moo fetogi, faka lelei mua, kake faoi atu tou nima kiai, pea ke fa ke au ki tona hui pea mo tona kakano, pea ke sio pee mole anai lau kovi kia koe ki tou fofoga.”—Sopo 2:1-5.
11. a) Kotea te tahi u mamahi nee hili e Satana kia Sopo? b) Kotea te ikuaga ote u mea fuli aia?
11 O foaki e Sehova kia Satana ke pule kia Sopo, kae ina ui age: ‘Aua naa ke matehi.’ (Sopo 2:6). O fuei atu aipe e Satana ia Sopo aki te mahaki faka mataku. Ite kua lahi fau o tona u mamahi kua ina kole ke mate (Sopo 2:7; 14:13, 14). Ko tona ohoana totonu kua feagai kiai, o ina ui fenei: “Laukovi kite Atua kake mate!” (Sopo 2:9). Nee siaki e Sopo te tokoni aia. “O au ki toku mate, e mole au toe mavae mai taku agatonu!”, ko tana lea aia (Sopo 27:5). O nofo agatonu aipe Sopo kite Atua. Koia nee fakaha aki ai ko Satana nee faihala i tana lau ae kote pateliaka e tauhi pe kite Atua kote u koloa ae eina mau ka mole ko hona ofa mooni. E toe faka mooni ai foki ko Satana e mole ina lavai te ofei ote hahai fulipe mai te Atua.
12. a) Kotea te tali kite fakafifihi a Satana nee foaki e Sopo kite Atua? b) Kotea ae e ha mai ite agatonu a Sesu kite Atua?
12 Kote agatonu a Sopo nee tupu ai koa he fiafia a Sehova? E mahino ia! Kote Folafola ate Atua ena ui fenei: “Ke ke poto ia koe, e hoku foha, pea keke faka fiafia toku loto, koteuhi ke feala kau tali kia ia ae e manuki kia teau.” (Taagalea 27:11). Ko Satana ae e manuki kia Sehova. Aki tana agatonu, nee faka fiafia e Sopo te loto ote Atua. Nee ina faka fealagia hana tali kite fifili ate fialahi ko Satana, kote fifili aia nee ina ui ai mole he tagata e tauhi kite Atua ite mamahi. Tokolahi ia natou nee mole natou faka mooni kia Satana. Ka koia ae nee laka age ia natou fuli nee kote tagata haohaoa ae ko Sesu. Nee nofo agatonu aipe ia kite Atua logope te u mamahi fuli nee ina tali. E ha mai ai kote tagata haohaoa ae ko Atama nee fealape keina fai feia mo kana nee loto kiai, pea e kote Atua nee mole agakovi i tana loto ae ke agatonu te tagata o ateinape kia ia.
E KE KAU KI FEA?
13. a) Kotea te mauhiga o tou faahiga mauli o koe? b) E feala feafeai hatatou faka fiafiai pee faka loto mamahii te Atua?
13 Kotea te ui ia kite faahiga mauli o koe? Eiai tona mauhiga aupito. Pee ke faka tokagai pee kailoa, aki tau aga eke kau pee kite Atua, pee kia Satana. Ko Sehova e fia fai kia koe; eina loto keke tauhi kia teia pea keke mauli o heegata ite palatiso kelekele (Soane 3:16). Kote agatuu ate kau Iselaele nee loto mamahi ai te Atua (Pesalemo 78:40, 41). Ko tou faahiga mauli o koe eina faka fiafia koa te Atua pee ina faka loto mamahii ia? Kote faka fiafia ote Atua, e maua mua ke kita ako tana u lao pea ke kita taupau.
14. a) O uhiga mote u felavei faka sino, kote u lao fea ae e tonu ke tou faka logo kiai moo faka fiafia te Atua? b) He koe kote holoi ote u lao aia e kohe fakapo ia?
14 Kote tahi foki aeni mea tafito e faigai e Satana kote faigai ote hahai ke natou holoi te u lao faka atua ae e natou lagiaki te faka aoga ote fakatupu tamaliki, te ohoana pea mote mauli faka famili. Kote u lao aia e natou tapui te felavei ahe tokolua heeki ohoana pee aki he tahi age mole ko tona ohoana (I Tesalonika 4:3-8; Hepeleo 13:4). Kote maumaui ote u lao aia nee tautau hoko ai teu kavega aeni kote tupu ohe u tamaliki mole loto kiai he tahi pee kote fakato fatu. Tahi aeni mea kote tokolahi o natou e fai folonikasio e natou mau te u mahaki e feala ai ke kovi ki hanatou u fanau e mau ki amuli. Kohe felavei mohe tahi age mole ko tota ohoana e kohe agatuu ia, kote fakapo ia kite Atua. Nee ui e Sopo: “Kapau nee faka halai toku loto ehe fafine, kapau nee au faka siosio faka kaihaa ite matapa o toku kaiga, (. . .) pae nee au fai ai au he mea faka mataku, kohe fakapo ia e tonu ke fakamauii.”—Sopo 31:1, 9, 11 Tohi-Tapu o Selusalemi.
15. a) Koai ia ae eina lelei ia te tagata fai folonikasio? b) He koe ia e kohe mea faka poto te faka logo kite u lao ate Atua?
15 E mole he punamauli kite malama aeni e pulei e Satana i tana mole koviia te felavei a niihi e mole heeki ohoana. Kote loto ia aia o Satana. Moo faka fiafia ote Atua, e tonu ke kita ‘hola mai te folonikasio’. (I Kolonito 6:18.) E mahino ia, e mole kohe mea faigafua te nofo agatonu kite Atua, o hagela ko Sopo. E kohe mea faka poto ia te fakalogo kite u lao faka atua. Kapau e ke fai kiai, pea e ke fimalie lahi age nei, kae tafito foki, eke kau kite Atua pea e ke faka fiafia ai tona loto. Ko tona fetogi, eina foaki atu anai te mauli heegata ite manuia ite kele.
16. a) Nee faka pale feafeai te agatonu a Sopo? b) Kotea he faahiga talanoa e feala ke fai o uhiga mote u mamahi nee hilifaki e Satana kia Sopo, o hagela kote matematehi o tana u tamaliki toko hogofulu?
16 Io, ko Satana nee ina lavai te faka masiva o Sopo pea mote matematehi o ana tamaliki toko hogofulu. E mahino papau ia, nee kote tuutamaki lahi kia Sopo. Kae kote Atua nee ina faka pale tana agatonu o ina foaki tua lua kiai te u koloa ae nee ina mau, i mua ote faka gafua o Satana keina faka mamahii ia ia. Nee toe faka tupu foki e Sopo tana tahi u tamaliki e toko hogofulu (Sopo 42:10-17). Pea ke tou iloi papau kote u uluaki tamaliki ae e toko hogofulu a Sopo ae nee matematehi e Satana e natou kau anai ite toe tuuake ate kau mate. E mooni ia, tatau aipe pe kotea he kovi e feala ke fai e Satana, ko Sehova, tatatou Tamai manavaofa, eina tautea anai ia ia i tona lakaga.
17. He koe ko totatou faahiga mauli o tatou eiai tona mauhiga mooni?
17 Koia, aua naa galo kia koe ko tou faahiga mauli o koe eiai tona mauhiga. E mauhiga tafito kia Sehova Atua pea mo Satana te Tevolo, koteuhi eke kau ite fehui aeni e fai: Kote hahai e natou agatonu anai koa kite Atua pee kailoa?
[Paki ʼo te pasina 106]
Ko Sopo nee ina tali te fakafifihi a Satana ae nee ina lau ai e mole he tagata e nofo agatonu anai kite Atua mo kapau e faka mamahii
[Paki ʼo te pasina 110]
Kohe felavei mohe tahi e mole ko tota ohoana e kohe fakapo ia kite Atua
[Paki ʼo te pasina 111]
Ko Sehova nee ina faka pale ia te agatonu a Sopo o ina foaki tua lua kiai tona u koloa ae nee puli