Te Maʼuli ʼAē ʼe Leleiʼia e Te ʼAtua

1, 2. Tuku mai he ʼu faʼifaʼitaki ʼo he ʼu hahaʼi neʼe kaumeʼa lelei mo Sehova.

ʼE KOUTOU fia kaumeʼa mo ai? ʼE mahino ia ʼe koutou fia fakatahi anai mo he tahi ʼe tatau takotou ʼu manatu, mo te ʼu meʼa ʼaē ʼe koutou leleiʼia pea mo te ʼu meʼa ʼaē ʼe maʼuhiga kiā koutou. Pea ʼe koutou fia kaumeʼa anai mo he tahi ʼe ina maʼu he ʼu kalitātē lelei, ohage ko te agatonu pea mo te agalelei.

² ʼI te hisitolia, neʼe filifili e te ʼAtua he ʼu hahaʼi ke liliu ko tona ʼu kaumeʼa. Ohage la, neʼe fakahigoaʼi e Sehova ia Apalahamo ko tona kaumeʼa. (Isaia 41:8; Sakopo 2:23) Neʼe ʼui e te ʼAtua ʼo ʼuhiga mo Tavite ko “he tagata ʼe leleiʼia e [tona] loto” he neʼe ko te faʼahiga tagata ʼaia ʼaē neʼe ʼofa ai Sehova. (Gaue 13:​22, MN ) Pea neʼe “leleiʼia ʼaupito” e Sehova ia te polofeta ko Taniela.​—Taniela 9:23.

3. He koʼe neʼe fakakaumeʼa ia Sehova mo ʼihi hahaʼi?

³ He koʼe neʼe fakakaumeʼa ia Sehova mo Apalahamo, mo Tavite, pea mo Taniela? Neʼe ina ʼui fēnei kiā Apalahamo: “Neʼe ke fakalogo ki toku leʼo.” (Senesi 22:18) Koia ʼe fakakaumeʼa ia Sehova mo nātou ʼaē ʼe nātou agavaivai, ʼo fakalogo ki te ʼu meʼa ʼaē ʼe ina kole age kiā nātou. Neʼe ina ʼui fēnei ki te kau Iselaele: “Koutou fakalogo ki toku leʼo, pea ʼe au liliu moʼoni anai ko tokotou ʼAtua, pea ko koutou ʼe koutou liliu anai ko taku hahaʼi.” (Selemia 7:23) Kapau ʼe koutou fakalogo kiā Sehova, pea ʼe koutou lava liliu mo koutou ko tona ʼu kaumeʼa!

ʼE FAKALOTO MĀLOHIʼI E SEHOVA TONA ʼU KAUMEʼA

4, 5. ʼE fakahā feafeaʼi e Sehova tona mālohi ʼo ʼuhiga mo tana hahaʼi?

⁴ Koutou fakakaukauʼi age muʼa te ʼu lelei ʼaē ʼo te fakakaumeʼa mo te ʼAtua. ʼE ʼui ʼi te Tohi-Tapu ko Sehova ʼe ina kumi te ʼu faigamālie “ke ina fakahā tona mālohi kiā nātou ʼaē ʼe kātoa tonatou loto kiā te ia.” (2 Fakamatala 16:9) ʼE lava fakahā feafeaʼi e Sehova tona mālohi ʼaia ʼo ʼuhiga mo koutou? ʼE tou lau fēnei iā Pesalemo 32:8: “[Ko au Sehova] ʼe au fakaliliu anai koe ke ke fakasiosio poto pea mo au akoʼi anai koe ʼi te ala ʼaē ʼe tonu ke ke haʼele ai. ʼE au foaki atu anai he ʼu tokoni, ʼo au leʼoleʼo koe.”

⁵ ʼE malave loto te faʼahiga tokaga ʼaia ʼa Sehova! ʼE ina foaki atu anai te takitaki ʼaē ʼe ʼaoga kiā koutou pea mo ina leʼoleʼo anai koutou ʼi takotou mulimuli ki tana takitaki. ʼE fia tokoni atu te ʼAtua ke koutou lava kātakiʼi tokotou ʼu faigataʼaʼia pea mo tokotou ʼu ʼahiʼahi. (Pesalemo 55:22) Koia, kapau ʼe koutou tauhi kiā Sehova ʼaki he loto kātoa, ʼe feala ke koutou tui papau ohage ko te tagata fai pesalemo, ʼaē neʼe ina ʼui fēnei: “Kua au tuku ia Sehova ʼi ʼoku muʼa tuʼumaʼu pe. ʼE mole au tūkia anai, heʼe nofo ʼi toku toʼomataʼu.” (Pesalemo 16:8; 63:8) Ei ʼe feala ke tokoni atu Sehova ke koutou maʼu te maʼuli ʼaē ʼe ina leleiʼia. Kae ʼe koutou ʼiloʼi, ʼe ʼi ai te fili ʼo te ʼAtua ʼe mole ina loto ke koutou maʼu te maʼuli ʼaia.

TE FAKAFIFIHI ʼAĒ NEʼE LAGAʼI E SATANA

6. Koteā ʼaē neʼe lau e Satana ʼo ʼuhiga mo te hahaʼi?

⁶ ʼI te Kapite 11 ʼo te tohi ʼaenī, neʼe fakamahino mai pe neʼe fakafifihi feafeaʼi e Satana te Tevolo ia te pule ʼa te ʼAtua. Neʼe fasituʼu ia Satana ʼo ʼuhiga mo Sehova ʼAtua ,ʼo ina lau neʼe heʼe faitotonu ia Sehova ʼi tana mole tuku ʼaē ia Atama mo Eva ke nā filifili ʼe nāua totonu te meʼa ʼaē ʼe lelei pea mo te meʼa ʼaē ʼe kovi. Hili te agahala ʼa Atama pea mo Eva, pea ʼi te kamata hahaʼi ʼo tonā hōloga ʼi te kele, neʼe fakahā e Satana tana mahalohalo kovi ʼo ʼuhiga mo te fia tauhi ʼa te hahaʼi ki te ʼAtua, ʼi tana lau fēnei: “Ko te hahaʼi ʼe mole nātou tauhi noa ki te ʼAtua. Kapau ʼe au maʼu he faigamālie, pea ʼe feala anai ke au fakamaliu kehe te hahaʼi fuli pe mai te ʼAtua.” ʼE hā te manatu ʼaia ʼa Satana ʼi te fakamatala ʼo ʼuhiga mo te tagata ko Sopo. Kae neʼe ko ai ia Sopo, pea neʼe koteā tona pikipikiga mo te fakafifihi ʼaē neʼe lagaʼi e Satana?

7, 8. (a) He koʼe neʼe makehe ia Sopo ʼi te hahaʼi ʼo tona temi? (b) Neʼe koteā te mahalohalo kovi ʼa Satana ʼo ʼuhiga mo te tauhi ʼa Sopo ki te ʼAtua?

⁷ Neʼe maʼuli ia Sopo kua hili kiai taʼu e 3 600. Neʼe ko he tagata agalelei, he neʼe ʼui fēnei e Sehova: “ ʼE mole he tahi ʼe tatau mo ia ʼi te kele, ko te tagata ʼe mole hana lākahala pea ʼe totonu ia, ʼe manavasiʼi ki te ʼAtua pea mo fakatafa mai te kovi.” (Sopo 1:8) Neʼe leleiʼia e te ʼAtua ia Sopo.

⁸ Neʼe mahalohalo kovi ia Satana ʼo ʼuhiga mo te tauhi ʼa Sopo ki te ʼAtua. Neʼe ʼui e te Tevolo kiā Sehova: “Neʼe mole koa la ke fakatuʼu he ʼā moʼo puipui ʼo [Sopo], pea mo tona ʼapi, pea mo te meʼa fuli pe ʼaʼana, ʼi te fenua kātoa? Te gāue ʼo ʼona nima, neʼe ke tapuakinaʼi, pea ko tana faga manu kua mafola ʼi te kele. Kae moʼo fetogi, fakalelei muʼa, kae ke faoʼi atu tou nima ki ai, pea ke fā ki te meʼa fuli ʼaʼana, pea ke sio peʼe mole laukovi anai kiā te koe ki tou fofoga.”​—Sopo 1:​10, 11.

9. Neʼe tali feafeaʼi e Sehova ia te fakafifihi ʼa Satana, pea koteā tona tupuʼaga?

⁹ Neʼe lau ai e Satana neʼe tauhi Sopo ki te ʼAtua ʼuhi pe ko te ʼu lelei ʼaē neʼe ina maʼu. Neʼe toe lau e te Tevolo, kapau ʼe ʼahiʼahiʼi ia Sopo pea ʼe maliu kehe anai mai te ʼAtua. Neʼe tali feafeaʼi e Sehova ki te fakafifihi ʼaia ʼa Satana? ʼI tana tukugakoviʼi ia te tauhi ʼa Sopo ki te ʼAtua, koia neʼe fakagafua ai leva e Sehova ke ʼahiʼahiʼi e Satana ia Sopo. ʼAki te ʼahiʼahi ʼaia, ʼe ʼiloʼi ai anai peʼe ʼofa moʼoni ia Sopo ki te ʼAtua peʼe kailoa.

ʼE ʼAHIʼAHIʼI IA SOPO

10. Koteā te ʼu ʼahiʼahiʼi ʼaē neʼe hoko kiā Sopo, pea neʼe tali feafeaʼi e Sopo?

¹⁰ Neʼe lahi te ʼu ʼahiʼahi neʼe fai e Satana kiā Sopo. Neʼe kaihaʼa ʼihi manu ʼa Sopo, pea ko ʼihi manu neʼe matehi. Tokolahi tana ʼu hahaʼi kaugana neʼe fakapogi. Neʼe tupu ai tona ʼu fihifihia faka paʼaga. Neʼe hoko te tahi malaʼia: neʼe mamate tana ʼu fānau e toko hogofulu ʼi te ʼafā. Logola te ʼu ʼahiʼahi fakamataku ʼaia, kae “neʼe mole agahala ia Sopo pea neʼe mole ina tukugakoviʼi ia te ʼAtua ʼo ʼuhiga mo he meʼa ʼe kovi.”​—Sopo 1:22.

11. (a) Koteā ʼaē neʼe toe lau e Satana ʼo ʼuhiga mo Sopo, pea neʼe tali feafeaʼi e Sehova kiai? (b) Neʼe tali feafeaʼi e Sopo ia te mahaki fakatupu mamahi?

¹¹ Kae neʼe mole gata ai te ʼu ʼahiʼahi ʼa Satana. Neʼe lagi manatu ia, ʼe lava kātakiʼi e Sopo te puli ʼo tona ʼu koloā, mo tana ʼu kaugana, pea mo tana fānau, kae kapau ʼe hoko kiā ia totonu he mahaki ʼe mahino ia ʼe lītuʼa anai ia ki te ʼAtua. Pea neʼe fakagafua e Sehova kiā Satana ke ina fakahoko kiā Sopo he mahaki fakalialia pea mo fakatupu mamahi. Kae māʼiape la mo te faʼahi ʼaia neʼe mole lītuʼa ia Sopo ki tana tui ki te ʼAtua. Neʼe ina ʼui fakalelei fēnei: “ ʼO aʼu ki toku mate, ʼe mole au lītuʼa anai ki taku agatonu!”​—Sopo 27:5.

12. Neʼe tali feafeaʼi e Sopo ki te fakafifihi ʼa Satana?

¹² Neʼe mole ʼiloʼi e Sopo ko Satana ia te tupuʼaga ʼo tona ʼu mamahi. ʼI tana mole ʼiloʼi te ʼu ʼaluʼaga ʼo ʼuhiga mo te fakafifihi ʼa te Tevolo ia te pule ʼa Sehova, neʼe tuʼania ia Sopo naʼa ko te ʼAtua ʼaē ʼe tupu ai tona ʼu mamahi. (Sopo 6:4; 16:​11-14) Kae neʼe nofo agatonu pe kiā Sehova. Pea ʼaki tana nofo agatonu ʼaia, neʼe fakamoʼoni ai neʼe gutuloi ia Satana ʼi tana lau ʼaē neʼe tauhi ia Sopo ki te ʼAtua ʼuhi pe ko te ʼu lelei ʼaē neʼe ina maʼu mai ia te ia.

13. Koteā ʼaē neʼe faka fealagia e te nofo agatonu ʼa Sopo ki te ʼAtua?

¹³ ʼAki te agatonu ʼa Sopo, neʼe feala ai kiā Sehova ke ina fai he tali mālohi ki te fakafifihi agatuʼu ʼaia ʼa Satana. Ko Sopo neʼe ko te kaumeʼa moʼoni ʼa Sehova pea neʼe fakapale e Sehova tana agatonu.​—Sopo 42:​12-17.

KOTEĀ TOKOTOU PIKIPIKIGA MO TE FAKAFIFIHI ʼAIA?

14, 15. ʼE tou ʼiloʼi feafeaʼi ko te fakafifihi ʼaē neʼe lagaʼi e Satana neʼe mole ko Sopo tokotahi pe ʼaē neʼe fai ki ai, kae ʼe toe pipiki kiai mo te hahaʼi fuli pe?

¹⁴ Ko te fakafifihi ʼaē neʼe lagaʼi e Satana ʼo ʼuhiga mo te nofo agatonu ki te ʼAtua, neʼe mole ko Sopo tokotahi pe ʼaē neʼe fai ki ai. ʼE toe pipiki mo tatou ki ai. ʼE fakahā lelei te faʼahi ʼaia ia Taʼaga Lea 27:​11, ʼaē ʼe ʼui fēnei ʼi te Folafola ʼa te ʼAtua: “Ke ke fakapotopoto toku foha pea mo ke fakafiafia toku loto, ke feala haku tali kiā ia ʼaē ʼe manukinuki kiā te au.” Ko te ʼu palalau ʼaia, ʼaē neʼe tohi ia taʼu e teau ki muli age ʼi te ʼosi mate ʼa Sopo, ʼe hā ʼaki ai ʼe kei manukinuki pe ia Satana ki te ʼAtua pea ʼe kei hoko atu pe tana tukugakoviʼi ia te ʼu kaugana ʼo te ʼAtua. Ka tou mulimuli ki te maʼuli ʼaē ʼe leleiʼia e Sehova, pea ʼe tou lagolago kiā te ia moʼo tali ki te ʼu loi ʼaē neʼe fai e Satana, pea ʼe tou fakafiafia ai te loto ʼo te ʼAtua. ʼE malave feafeaʼi kiā koutou ia te faʼahi ʼaia? ʼE mahino ia ʼe ko he meʼa fakafiafia anai hakotou lagolago ki te ʼAtua moʼo tali ki te ʼu loi ʼa te Tevolo, tatau aipe peʼe tonu anai ke koutou fai he ʼu fetogi ʼi tokotou maʼuli.

¹⁵ Koutou tokagaʼi te ʼu palalau ʼaenī ʼa Satana: “Ko meʼa fuli ʼe maʼu e te tagata, ʼe ina foaki anai moʼo hāofaki tona maʼuli.” (Sopo 2:4) ʼI tana ʼui ʼaē “te tagata,” neʼe fakahā lelei e Satana neʼe mole ina tukugakoviʼi pe ia Sopo kae ko te hahaʼi fuli pe. ʼE ko he manatu maʼuhiga ʼaupito ʼaia, heʼe fakafifihi ia Satana ki takotou agatonu ʼaē ki te ʼAtua. ʼE loto e te Tevolo ke koutou talagataʼa ki te ʼAtua pea mo koutou lītuʼa ki takotou agatonu mokā hoko he ʼu faigataʼaʼia. Koteā ʼaē ʼe fai e Satana moʼo fakahoko ia te faʼahi ʼaia?

16. (a) Koteā te ʼu faʼahi ʼaē ʼe fakaʼaogaʼi e Satana moʼo fakamaliu kehe te hahaʼi mai te ʼAtua? (b) ʼE lava fakaʼaogaʼi feafeaʼi e te Tevolo te ʼu faʼahi ʼaia kiā koutou?

¹⁶ Ohage ko te meʼa ʼaē neʼe tou vakaʼi ʼi te Kapite 10 ʼo te tohi ʼaenī, ʼe fakaʼaogaʼi e Satana te ʼu faʼahi kehekehe moʼo fakamaliu kehe ʼo te hahaʼi mai te ʼAtua. ʼE feala ke ina ʼohofiʼi te hahaʼi “o hage ko he laione e gugulu, e feʼaluʼaki o kumi he tahi ke ina kai.” (1 Petelo 5:8) Koia ʼaki te fakaneke ʼa Satana, ʼe feala ki tokotou ʼu kaumeʼa, peʼe ko tokotou famili, peʼe ko ʼihi atu ke nātou fakafeagai ki takotou ʼu faiga ʼaē ke koutou ako ia te Tohi-Tapu pea mo takotou maʼuliʼi ia te ʼu meʼa ʼaē ʼe koutou ako.a (Soane 15:​19, 20) ʼI te tahi faʼahi, ko Satana “ ʼe ina fakaliliu tuʼumaʼu pe ia ia ko he ʼāselo ʼo te mālama.” (2 Kolonito 11:​14, MN ) ʼE feala ke fakaʼaogaʼi e te Tevolo he ʼu kākā moʼo fakahiga pea mo fakahēʼi ʼo koutou ke mole koutou fai te ʼu meʼa ʼaē ʼe leleiʼia e te ʼAtua. ʼE ina toe fakaʼaogaʼi mo te lotovaivai, ke lagi koutou manatu ʼe mole feala ke koutou mulimuli ki te ʼu meʼa ʼaē ʼe fiafia ai te ʼAtua. (Tāʼaga Lea 24:10) Peʼe ko Satana ʼe hage ko he “laione e gugulu” peʼe hage “he ʼāselo ʼo te mālama,” kae ʼe kei hoko aipe tana fakafifihi takotou tauhi ki te ʼAtua. ʼE ina ʼui ka koutou tau mo ni ʼu ʼahiʼahi peʼe ko ni ʼu fakahala, pea ʼe koutou lītuʼa anai ki takotou tauhi ʼaē ki te ʼAtua. ʼE koutou lava tali feafeaʼi ki te fakafifihi ʼaia pea mo fakahā takotou fia nofo agatonu ʼaē ki te ʼAtua, ohage ko Sopo?

KOUTOU FAKALOGO KI TE ʼU FAKATOTONU ʼA SEHOVA

17. Koteā ʼaē ʼe ina uga tāfito koutou ke koutou fakalogo ki te ʼu fakatotonu ʼa Sehova?

¹⁷ ʼE feala ke koutou tali ki te fakafifihi ʼaē neʼe lagaʼi e Satana mo kapau ʼe koutou mulimuli ki te ʼu meʼa ʼaē ʼe leleiʼia e te ʼAtua. Koteā te ʼu meʼa ʼaia? ʼE tali fēnei ʼi te Tohi-Tapu: “ ʼE tonu ke ke ʼofa kiā Sehova, tou ʼAtua, ʼaki tou loto kātoa, pea mo tou nefesi kātoa, pea mo tou mālohi maʼuli kātoa.” (Teutalonome 6:5) ʼI te tuputupu ʼo tokotou ʼofa ki te ʼAtua, ʼe koutou fia fai anai te meʼa ʼaē ʼe ina fakamaʼua atu. Neʼe tohi fēnei e te ʼapositolo ko Soane: “Koʼenī te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu.” Kapau ʼe koutou ʼoʼofa kiā Sehova ʼaki tokotou loto kātoa, pea “ko tana ʼu fakatotonu ʼe mole mamafa” anai kiā koutou.​—1 Soane 5:​3, MN.

18, 19. (a) Koteā ʼihi fakatotonu ʼa Sehova? (Vakaʼi te fakamatala ʼaē ʼe ʼātakai ʼi te pasina 122.) (b) ʼE tou ʼiloʼi feafeaʼi ʼe mole kole mai e te ʼAtua he ʼu meʼa ʼe mole tou lavaʼi?

¹⁸ Koteā te ʼu fakatotonu ʼaē ʼa Sehova? Ko ʼihi fakatotonu ʼe faka ʼuhiga anai ki te ʼu aga ʼaē ʼe mole tonu ke tou fai. Ohage la, koutou tokagaʼi te fakamatala ʼaē ʼe ʼātakai ʼi te pasina 122, ko tona kupu tāfito “Koutou Fakafisi Ki Te ʼu Meʼa ʼAē ʼe Fehiʼa Kiai Sehova.” ʼE koutou maʼu ai anai te ʼu aga ʼaē ʼe tauteaʼi ʼi te Tohi-Tapu. ʼI takotou ʼuluaki vakaʼi, ʼe tuʼu ai ʼihi aga ʼe hage ʼe mole faʼa kovi. Kae ʼi takotou ʼosi metitāsio ki te ʼu vaega ʼaē ʼe tuʼu ai, pea ʼe koutou sio anai ki te poto ʼo te ʼu lao ʼa Sehova. ʼE lagi faigataʼa ʼaupito anai hakotou fetogi ʼo takotou aga. Kae ko takotou mulimuli ki te ʼu meʼa ʼaē ʼe leleiʼia e te ʼAtua, ʼe koutou maʼu ai anai te fiafia lahi. (Isaia 48:​17, 18) Pea ʼe ko he faʼahi ʼe koutou lavaʼi. He koʼe ʼe tou lava tui kiai?

¹⁹ ʼE mole kole mai e Sehova he ʼu meʼa ʼe mole tou lavaʼi. (Teutalonome 30:​11-14) ʼE ina ʼiloʼi lelei age totatou ʼu fealagia pea mo totatou ʼu tuʼakoi. (Pesalemo 103:14) Tahi ʼaē meʼa, ʼe lava foaki mai e Sehova te mālohi ke tou fakalogo kiā te ia. Neʼe tohi fēnei e te ʼapositolo ko Paulo: “Ko te ʼAtua ʼe agatonu, ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe koutou lava tali, kae ʼaki te fakahala ʼe ina toe foaki atu anai mo he faigamālie ke koutou hāo ai, ke feala hakotou kātakiʼi.” (1 Kolonito 10:​13, MN ) Moʼo tokoni atu ke koutou kātakiʼi, ʼe toe lava foaki atu e Sehova “te mālohi ʼaē ʼe fakalaka ʼi te mālohi māhani.” (2 Kolonito 4:​7, MN ) ʼI te ʼosi kātakiʼi e Paulo te ʼu tuʼuga ʼahiʼahi, neʼe ina ʼui fēnei: “ ʼE au maʼu te mālohi kiā meʼa fuli, ʼuhi ko ia ʼaē ʼe ina foaki mai te mālohi.”​—Filipe 4:​13, MN.

KOUTOU GĀUEʼI TE ʼU KALITĀTĒ ʼAĒ ʼE LELEIʼIA E TE ʼATUA

20. Koteā te ʼu kalitātē fakaʼatua ʼaē ʼe tonu ke koutou gāueʼi, pea he koʼe ʼe maʼuhiga te ʼu kalitātē ʼaia?

²⁰ ʼE mahino ia, ke feala hakotou fakafiafia ia Sehova ʼe mole gata pe takotou mole fai te ʼu meʼa ʼaē ʼe fehiʼa kiai. ʼE toe maʼua foki ke koutou ʼofa ki te ʼu meʼa ʼaē ʼe ina leleiʼia. (Loma 12:9) ʼE mole koutou fia kaumeʼa koa la mo nātou ʼaē ʼe tatau takotou ʼu manatu, mo te ʼu meʼa ʼaē ʼe koutou leleiʼia, pea mo te ʼu meʼa ʼaē ʼe maʼuhiga kiā koutou? ʼE toe feiā mo Sehova. Koia koutou ako ke koutou ʼofa ki te ʼu meʼa ʼaē ʼe ʼofa ki ai Sehova. ʼE fakahā ʼihi ʼo te ʼu meʼa ʼaia ia Pesalemo 15:​1-5, pea ʼe fakamatala ai te ʼu faʼahiga hahaʼi ʼaē ʼe ko he ʼu kaumeʼa ʼa te ʼAtua. ʼE maʼu e te ʼu kaumeʼa ʼa Sehova te meʼa ʼaē ʼe higoa ʼi te Tohi-Tapu ko “te fua ʼo te laumālie.” ʼE ko te ʼu kalitātē ohage ko “te ʼofa, te fiafia, te tokalelei, te kātaki fualoa, te finegaloʼofa, te agalelei, te tui, te agamālū, te lolomi ʼo kita.”​—Kalate 5:​22, 23, MN.

21. Koteā ʼaē ka tokoni atu anai ke koutou gāueʼi te ʼu kalitātē fakaʼatua?

²¹ Ko te lau pea mo te ako tuʼumaʼu ʼo te Tohi-Tapu ʼe tokoni atu anai ke koutou gāueʼi te ʼu kalitātē ʼaē ʼe leleiʼia e te ʼAtua. Pea ko takotou ʼiloʼi te ʼu meʼa ʼaē ʼe fakamaʼua atu e te ʼAtua, ʼe tokoni anai kiā koutou ke koutou faka ʼalutahi takotou ʼu manatu pea mo te manatu ʼa te ʼAtua. (Isaia 30:​20, 21) Kapau ʼe mālohi tokotou ʼofa kiā Sehova, pea ʼe koutou fia mulimuli anai ki te maʼuli ʼaē ʼe leleiʼia e te ʼAtua.

22. Koteā ʼaē ʼe koutou fakahoko anai mo kapau ʼe koutou mulimuli ki te maʼuli ʼaē ʼe leleiʼia e te ʼAtua?

²² ʼE tonu ke tou faiga mālohi ke tou mulimuli ki te ʼu meʼa ʼaē ʼe leleiʼia e Sehova. ʼE fakatatau e te Tohi-Tapu te fetogi ʼo tokotou maʼuli ki te huʼi ʼo tokotou ʼulugaaga ʼāfea kae koutou kofuʼi ia te ʼulugaaga foʼou. (Kolose 3:​9, 10) Pea ʼo ʼuhiga mo te ʼu fakatotonu ʼa Sehova, neʼe tohi fēnei e te tagata fai pesalemo: “ ʼE ʼi ai te fakapale lahi ʼi tonatou taupau.” (Pesalemo 19:11) ʼE koutou sio anai mo koutou ki te ʼu fakapale lahi ʼaē ka koutou maʼu mo kapau ʼe koutou mulimuli ki te ʼu meʼa ʼaē ʼe leleiʼia e te ʼAtua. Kapau ʼe koutou fai ia te faʼahi ʼaia, pea ʼe koutou tali anai ki te fakafifihi ʼaē neʼe lagaʼi e Satana pea mo koutou fakafiafia te loto ʼo Sehova!