Tou Fakamaʼuhigaʼi Totatou Loto Faʼitaliha

1, 2. (1) Kotea te manatu ʼa te hahaʼi ʼo ʼuhiga mo te loto faʼitaliha? (2) Kotea ʼe tou ako ʼi te Tohi-Tapu ʼo ʼuhiga mo te loto faʼitaliha pea ko te ʼu fehuʼi fea ka tou vakaʼi anai?

NEʼE maʼua ke toʼo e he fafine ia te tonu pea neʼe ina ui fenei ki tona kaumeʼa: “Ui mai pe koe te meʼa ʼae ʼe tonu ke au fai, ʼe faigafua age pe ʼaia he ʼe mole au fakakaukau ai.” Neʼe loto ia te fafine ke fakaha age te meʼa ʼae ʼe tonu ke ina fai, kaʼe ke mole ina fakaʼaogaʼi tona loto faʼitaliha, ia te meʼa ʼofa maʼuhiga ʼae neʼe foaki age e tona Tupuʼaga. ʼE feafeaʼi kia koe? ʼE ke toʼo koa ʼau tonu, peʼe ke loto koe ke toʼo e he tahi maʼa ʼau? Kotea tau manatu ʼo ʼuhiga mo tou loto faʼitaliha?

² ʼE kehekehe te manatu ʼa te hahaʼi ʼo ʼuhiga mo te loto faʼitaliha. Ko ʼihi ʼe natou ui ʼe mole ʼi ai he loto faʼitaliha koteʼuhi kua fakatuʼutuʼu pe e te ʼAtua ʼatatou gaue fuli. Pea ʼe ui leva e ʼihi, ʼe hoki tou maʼu pe te loto faʼitaliha mo kapau kua tou maʼu te ʼateaina moʼoni. Kaʼe, ʼe tou ako ʼi te Tohi-Tapu neʼe fakatupu tatou mo te fealagia ʼae ke tou toʼo ʼatatou tonu. (Lau ia Sosue 24:15.) ʼE tou toe maʼu foki ʼi te Tohi-Tapu te ʼu tali ki te ʼu fehuʼi ʼaeni: ʼE fakatuʼakoi koa totatou loto faʼitaliha? ʼE feafeaʼi hatatou fakaʼaogaʼi lelei totatou loto faʼitaliha ʼi te ʼu tonu ʼae ʼe tou toʼo? ʼE ha feafeaʼi ʼi ʼatatou tonu ʼe tou ʼoʼofa moʼoni ia Sehova? ʼE feafeaʼi hatatou fakaha ʼe tou fakaʼapaʼapa ki te ʼu tonu ʼae ʼe toʼo e ʼihi?

TE ʼU AKO ʼE TOU MAʼU MAI IA SEHOVA PEA MO SESU

3. Neʼe fakaʼaogaʼi feafeaʼi e Sehova ia tona ʼateaina?

³ ʼE mole he tuʼakoi ʼo te ʼateaina ʼo Sehova, koia ʼe feala hatatou ako mai tana faʼahiga fakaʼaogaʼi tona ʼateaina. Ohage la, neʼe fili e Sehova ia te puleʼaga ʼo Iselaele ke liliu ko hana hahaʼi, ko hona “koloa makehe.” (Teutalonome 7:6-8, MN) Koteʼuhi neʼe ina fia fakahoko tana fakapapau ʼae neʼe ina fai ki tona kaumeʼa ko Apalahamo. (Senesi 22:15-18) Pea tahi, ʼe fakaʼaogaʼi tuʼumaʼu pe e Sehova ia tona ʼateaina ʼi te ʼofa mo te faitotonu. ʼE tou mahino ki te faʼahi ʼaia ʼi tana faʼahiga fakatonutonuʼi te kau Iselaele ʼi te temi ʼae neʼe natou talagataʼa ai. ʼI te temi ʼae neʼe natou fakahemala moʼoni ai ki ʼanatou aga, neʼe ʼofa mo lotomanavaʼofa ia Sehova kia natou. Neʼe ina ui fenei: “ ʼE au fakamalolo anai tonatou heʼe agatonu. ʼE au ʼofa anai kia natou ʼaki toku loto lelei.” (Osea 14:4, MN) ʼI tana fakaʼaogaʼi tona ʼateaina moʼo tokoni ki ʼihi, neʼe tuku mai ai e Sehova he faʼifaʼitaki ʼe lelei.

4, 5. (1) Ko ai ʼae neʼe ina ʼuluaki maʼu te meʼa ʼofa ʼo te ʼAtua ʼae ko te loto faʼitaliha, pea neʼe ina fakaʼaogaʼi feafeaʼi? (2) Kotea te fehuʼi ʼe tonu ke tou tahi fai?

⁴ Neʼe toʼo e Sehova te tonu ʼae ke ina foaki te loto faʼitaliha ki te ʼu ʼaselo pea mo te tagata. Neʼe ina ʼuluaki fakatupu ia Sesu mo te loto faʼitaliha ʼo mulimuli ki tona pāki. (Kolose 1:15) Kaʼe neʼe fakaʼaogaʼi feafeaʼi e Sesu ia tona ʼateaina? ʼI muʼa ʼo tana hifo mai ki te kele, neʼe filifili e Sesu ke nofo agatonu ki te ʼAtua kaʼe mole kau ki te agatuʼu ʼa Satana. ʼI tana kua nofo leva ʼi te kele, neʼe ina toʼo aipe te tonu ʼae ke ina teteke te ʼu fakahala ʼa Satana. (Mateo 4:10) Pea ʼi te po ʼi muʼa ʼo tona mate, neʼe fakapapau e Sesu ki tana Tamai ʼe ina fia fakahoko ia Tona finegalo. Neʼe ina ui fenei: “Tamai, kapau ʼe ke loto ki ai, ke ke fakamamaʼo atu te ipu ʼaeni ia te au. Kaʼe ke hoko tou finegalo kaʼe mole ko toku finegalo.” (Luka 22:42) ʼE feala koa hatatou faʼifaʼitakiʼi ia Sesu, ʼo tou fakaʼaogaʼi totatou loto faʼitaliha moʼo fakavikiviki kia Sehova pea mo fai ia tona finegalo?

⁵ ʼEi, ʼe feala hatatou faʼifaʼitakiʼi ia Sesu koteʼuhi neʼe fakatupu tatou ʼo mulimuli ki te pāki ʼo te ʼAtua. (Senesi 1:26) Kaʼe ʼe ʼi ai te ʼu tuʼakoi ʼo totatou ʼateaina. ʼE fakamahino mai ʼi te Folafola ʼa te ʼAtua, ko Sehova ʼae neʼe ina fakatuʼakoi totatou ʼateaina pea neʼe fakaʼamu ke tou fakaʼapaʼapa ki te ʼu tuʼakoi ʼaia. Ohage la, ʼi te maʼuli fakafamili, ʼe tonu ke fakalogo te fafine ki tona ʼohoana pea ke fakalogo te ʼu fanau ki ʼanatou matuʼā. (Efeso 5:22; 6:1) ʼE malave feafeaʼi kia tatou te ʼu tuʼakoi ʼaia moka tou fakaʼaogaʼi totatou loto faʼitaliha? ʼE fakalogo totatou maʼuli heʼe gata ki te tali ki te fehuʼi ʼaia.

TE FAʼAHIGA FAKAʼAOGAʼI ʼO TE LOTO FAʼITALIHA

6. Kotou tuku mai he faʼifaʼitaki ʼe ha ai te maʼuhiga ʼo te fakatuʼakoi ʼo totatou ʼateaina.

⁶ Kapau ʼe fakatuʼakoi totatou ʼateaina, ʼe feala koa ke tou maʼu ai te ʼateaina moʼoni? ʼEi. Kotea tona tupuʼaga? Koteʼuhi ko te ʼu tuʼakoi ʼo te ʼateaina ʼe ko hotatou puipuiʼaga. Tou toʼo he faʼifaʼitaki. Ohage la, ʼe tou faifagona ʼi tatatou motoka ki he kolo ʼe tuʼu mamaʼo. Kaʼe ʼe mole ʼi ai he ʼu lao ʼo ʼuhiga mo te feoloʼaki ʼa te ʼu motoka pea ʼe feala ke tahi fili pe te gaholo ʼo tana motoka pea mo te kauala ʼae ʼe fia alu ai. ʼI takotou manatu la, ʼe feala koa ke tou haohaoa ʼi te ala? Kailoa ia. Koia ʼe ʼaoga ai te ʼu tuʼakoi ke maʼu e te hahaʼi fuli te ʼu fua lelei ʼo te ʼateaina moʼoni. Tou vakaʼi he ʼu faʼifaʼitaki Fakatohi-tapu ʼe ha ai te ʼu fua lelei ʼo te ʼu tuʼakoi ʼae neʼe fakatuʼu e Sehova.

7. (1) Kotea ʼae neʼe kehekehe ai ia Atama mo te ʼu manu? (2) Kotou fakamatala te faʼahiga fakaʼaogaʼi e Atama ia tona loto faʼitaliha.

⁷ ʼI te temi ʼae neʼe fakatupu ai e Sehova ia Atama, te ʼuluaki tagata, neʼe ina foaki age ki ai te meʼa ʼofa ʼae neʼe ina foaki ki ʼana ʼaselo, ko te loto faʼitaliha. Kaʼe neʼe mole foaki e te ʼAtua ia te loto faʼitaliha ki te ʼu manu. Neʼe fakaʼaogaʼi feafeaʼi e Atama ia tona loto faʼitaliha? Neʼe ina maʼu te pilivilesio ʼae ke ina fakahigoaʼi te ʼu manu. Koia neʼe taki mai e te ʼAtua te ʼu manu ke sioʼi e Atama, ke ina iloʼi pe ʼe feafeaʼi anai tonatou fakahigoaʼi. ʼI te hili ʼo tana vakavakaʼi te ʼu manu fuli, neʼe ina fakahigoaʼi leva natou ʼo mulimuli ki ʼonatou agaaga. Neʼe mole fetogi e te ʼAtua te ʼu tonu ʼa Atama. Kaʼe neʼe ina tuku ʼaki pe te ʼu higoa ʼae kua foaki e Atama ki te ʼu manu.—Senesi 2:19.

8. Neʼe fakaʼaogaʼi kovi feafeaʼi e Atama ia tona loto faʼitaliha, pea neʼe kotea ʼona nunuʼa?

⁸ Neʼe toe foaki e Sehova kia Atama ia te gaue ʼae ke ina fakaliliu te kele ko he palatiso, ʼo ina ui fenei ki ai: “Kolua fanaunau, kolua liuliuga, kolua fakahahai te kele, pea kolua pulei ia ia; kolua pule ki te u ika o te tai, mo te u manulele o te lagi, pea mo te u manu fuli ae e taka i te kele.” (Senesi 1:28) Kaʼe neʼe filifili e Atama ke ina kai te fuaʼi ʼakau ʼae neʼe tapuʼi age e te ʼAtua, ʼo mole ina tokagaʼi ai te ʼu tuʼakoi ʼae neʼe fakatuʼu e Sehova. Pea talu mai ai mo te maʼuli mamahi ʼa te hahaʼi ʼuhi ko tana fakaʼaogaʼi kovi ia tona loto faʼitaliha. (Loma 5:12) Tou fakakaukauʼi te ʼu nunuʼa kovi ʼo te tonu ʼae neʼe toʼo e Atama. Koteʼuhi ʼe ʼekenaki ai tatou ke tou fakaʼaogaʼi lelei totatou loto faʼitaliha pea mo tali te ʼu tuʼakoi ʼae neʼe fakatuʼu e Sehova.

9. Kotea te fealagia ʼae neʼe foaki e Sehova ki tana hahaʼi, pea kotea te fakapapau ʼae neʼe natou fai?

⁹ Neʼe tuku holo mai e Atama mo Eva ia te maʼuli heʼe haohaoa mo te mate ki te tagata fuli. Kaʼe ʼe tou maʼu te fealagia ʼae ke tou fakaʼaogaʼi totatou loto faʼitaliha. Pea ʼe tou mahino ki te faʼahi ʼaia ʼi tatatou iloʼi te ʼu felogoʼi ʼa te ʼAtua mo te puleʼaga ʼo Iselaele. Neʼe foaki age e Sehova kia natou te fealagia ʼae ke natou liliu ko hona koloa makehe peʼe kailoa. (Ekesote 19:3-6) Neʼe filifili ai e te puleʼaga ʼo Iselaele ke natou liliu ko te hahaʼi ʼa te ʼAtua pea neʼe natou tali te ʼu tuʼakoi ʼae neʼe fakatuʼu e te ʼAtua. Pea neʼe natou ui fenei ai: “E matou fai ki te u mea fuli ae kua fakatotonu e [Sehova].” (Ekesote 19:8) Kaʼe ki muli age, neʼe natou veteki leva te fakapapau ʼae neʼe natou fai kia Sehova. ʼE feala ke tou taʼofi he ako maʼuhiga mai te faʼifaʼitaki ʼaia. Koia, tou fakamaʼuhigaʼi tuʼumaʼu totatou loto faʼitaliha, mo tou pipiki maʼu kia Sehova pea mo tou fakalogo ki ʼana lao.—1 Kolonito 10:11.

10. Ko te ʼu faʼifaʼitaki Fakatohi-tapu fea ʼe ha ai, ʼe feala kia tatou kau agahala ke tou fakaʼaogaʼi totatou loto faʼitaliha moʼo fakavikiviki ki te ʼAtua? (Vakaʼi te ʼuluaki pāki.)

¹⁰ ʼI te kapite 11 ʼo Hepeleo, ʼe tou maʼu ai te ʼu higoa ʼo te ʼu tagata mo te ʼu fafine agatonu ʼe toko 16, neʼe natou filifili ke natou fakaʼapaʼapa ki te ʼu tuʼakoi ʼae neʼe fakatuʼu e Sehova. Koia ʼae neʼe natou maʼu ai ni tapuakina pea mo he ʼamanaki fakaofoofo ki te ka haʼu. Ohage la ko Noe, neʼe malohi tana tui pea neʼe fakalogo ki te ʼu fakatotonu ʼa te ʼAtua ʼo ʼuhiga mo te faʼu ʼo te aleka pea mo te haofaki ʼo tona kiʼi famili mo te ʼu taʼiake ki muli mai. (Hepeleo 11:7) Neʼe fakalogo lelei ia Apalahamo mo Sala ki te ʼAtua ʼo nā olo ki te fenua ʼae neʼe Ina fakapapauʼi age. Logo la neʼe feala pe ke nā maʼu “he faigamalie ke [nā] toe liliu “ ki te kolo ko Ulu, kaʼe neʼe mole nā olo. Koteʼuhi neʼe fakahagahaga tuʼumaʼu pe tonā maʼuli ki te ʼu fakapapau ʼa te ʼAtua ʼo ʼuhiga mo te ka haʼu. ʼE ui mai ʼi te Tohi-Tapu, neʼe nā “holi ki he koga meʼa ʼe lelei age.” (Hepeleo 11:8, 13, 15, 16) Neʼe situʼa ia Moisese ki te ʼu koloa ʼo Esipito, he neʼe ina filifili “ke gaohi koviʼi ia ia mo te hahaʼi ʼa te ʼAtua, ʼi hana maʼu te ʼu fakafiafia fakatemi ʼo te agahala.” (Hepeleo 11:24-26) Koia tou faʼifaʼitaki ki te ʼu tagata mo te ʼu fafine agatonu ʼaia ʼae neʼe malohi tanatou tui. Pea tou fakamaʼuhigaʼi totatou loto faʼitaliha ʼo tou fakaʼaogaʼi ke alu tahi mo te finegalo ʼo te ʼAtua.

11. (1) ʼAki totatou loto faʼitaliha, ko te tapuakina fea ʼae ʼe feala ke tou maʼu? (2) Kotea ʼae ʼe ina uga koutou ke kotou fakaʼaogaʼi lelei ai tokotou loto faʼitaliha?

¹¹ ʼE lagi faigafua age hatatou tuku ke toʼo e he tahi kehe ʼatatou tonu. Kaʼe ʼe mole tou maʼu ai anai te tapuakina ʼae ke tou fai he tonu ʼaki totatou loto faʼitaliha. Kotea te tapuakina ʼaia? ʼE fakamahino ʼi te Tohi-Tapu ia Tetelonome 30:19, 20. (Lau.) ʼI te vaega 19, ʼe tou lau ai neʼe fakagafua age e te ʼAtua ki te kau Iselaele ke natou filifili he tonu. ʼI te vaega 20, ʼe tou ako ai neʼe toe tuku age e Sehova te faigamalie ʼae ke natou fakaha tonatou ʼofa ʼae kia te ia. ʼO toe feia foki mo tatou, ʼe feala ke tou filifili ke tou tauhi kia Sehova. Pea ʼe tou toe maʼu mo te pilivilesio fakaofoofo ʼae ke tou fakaʼaogaʼi totatou loto faʼitaliha moʼo fakavikiviki ki te ʼAtua pea mo fakaha ʼe tou ʼoʼofa ia te ia.

ʼAUA NAʼA KOTOU FAKAʼAOGAʼI KOVI TOKOTOU LOTO FAʼITALIHA

12. Kotea ʼe mole tonu ke tou fai ʼaki totatou loto faʼitaliha?

¹² Kotou fakakaukauʼi te aluʼaga ʼaeni: ʼE kotou foaki he meʼa ʼofa ki hokotou kaumeʼa. Kaʼe kotea anai ka kotou logoʼi mo kapau ʼe ina liakī tokotou meʼa ʼofa ki te ʼaiʼaga ʼotaʼota peʼe ʼe ina fakaʼaogaʼi moʼo fakamamahiʼi ʼo he tahi? ʼE mahino papau ia, ʼe kotou lotomamahi anai. Neʼe foaki mai e Sehova ia te meʼa ʼofa ʼae ko te loto faʼitaliha. Pea ʼe toe feia pe mo ia, ʼe lotomamahi anai mo kapau ʼe fakaʼaogaʼi kovi e te hahaʼi tonatou ʼateaina pea mo natou toʼo he ʼu tonu ʼe mole lelei peʼe moʼo fakamamahiʼi ʼo ʼihi. Neʼe ui ʼi te Tohi-Tapu, ko te hahaʼi ʼe natou “maʼuli galo” anai ʼi “te ʼu ʼaho fakamuli.” (2 Timoteo 3:1, 2) Koia ʼe tou fakaha feafeaʼi ʼe tou lotofakafetaʼi ki te meʼa ʼofa maʼuhiga ʼaia neʼe foaki mai e Sehova? Pea ʼe feafeaʼi hatatou mole fakaʼaogaʼi kovi ia te meʼa ʼofa ʼaia?

13. Kotea ʼae ʼe feala ke tou fai ke mole tou fakaʼaogaʼi kovi ai totatou ʼateaina Fakakilisitiano?

¹³ ʼE tou maʼu fuli te ʼateaina ʼae ke tou filifili ʼotatou kaumeʼa, ʼotatou faʼahiga teu mo te faʼahiga faʼu ʼo totatou lauʼulu pea mo ʼatatou fakafiafia. Kaʼe ʼe feala pe ke tou fakaʼaogaʼi totatou ʼateaina ʼaia ko he takuʼaga moʼo fai te ʼu meʼa ʼae ʼe mole leleiʼia e te ʼAtua peʼe ko te ʼu meʼa ʼae ʼe leleiʼia e te hahaʼi ʼo te malama. (Lau ia 1 Petelo 2:16.) ʼAua naʼa liliu totatou ʼateaina ko he takuʼaga ke tou fai ai te meʼa ʼae ʼe kovi, kaʼe tou fakaʼaogaʼi moʼo “fai ia meʼa fuli moʼo fakakololiaʼi ia te ʼAtua.”—1 Kolonito 10:31; Kalate 5:13.

14. He koʼe ʼe tonu ke tou falala kia Sehova moka tou fakaʼaogaʼi totatou loto faʼitaliha?

¹⁴ Neʼe ui fenei e Sehova: “Ko au, [Sehova], tou Atua, e au ako ia koe ke ke manuia, e au taki ia koe i te ala ae e tonu ke ke mulimuli ai.” (Esaia 48:17) Ke feala hatatou toʼo he ʼu tonu ʼe lelei, ʼe maʼua ke tou falala kia Sehova pea mo tali te ʼu tuʼakoi ʼae neʼe ina fakatuʼu. Pea ʼaki he lotovaivai ʼe tou fakamoʼoni ki te ʼu palalau ʼaeni: “E mole pule te tagata ki tona ala; e mole ko te tagata ae e ina taki ona lakaaga moka haele.” (Selemia 10:23) Neʼe filifili e Atama mo te kau Iselaele logogataʼa ke mole natou mulimuli ki te ʼu tuʼakoi ʼae neʼe fakatuʼu e Sehova, kaʼe neʼe natou falala kia natou totonu pe. Koia, tou taʼofi he ʼu ako mai tonatou faʼifaʼitaki. Pea ʼaua naʼa tou falala kia tatou totonu, kaʼe tou ʻfalala kia Sehova ʼi totatou loto katoa.’—Taaga Lea 3:5.

TOU FAKAʼAPAʼAPA KI TE LOTO FAʼITALIHA ʼO ʼIHI

15. Kotea ʼe tou ako mai te pelesepeto ʼae ʼe tou maʼu ia Kalate 6:5?

¹⁵ ʼE toe tonu foki ke tou fakaʼapaʼapa ki te ʼateaina ʼae ʼe maʼu e ʼihi ke natou toʼo ai ʼanatou tonu. Kotea tona tupuʼaga? ʼUhi ʼae he ʼe tou maʼu fuli ia te loto faʼitaliha, pea koia ʼae ʼe mole tatau ai tuʼumaʼu ʼatatou tonu. Pea ʼe kau ki ai mo te ʼu tonu ʼae ʼo ʼuhiga mo tatatou aga mo tatatou tauhi. Tou fakakaukauʼi te pelesepeto ʼae ʼe tou maʼu ia Kalate 6:5. (Lau.) Ka tou mahino ʼe tahi utu pe anai e te Kilisitiano te ʼu nunuʼa ʼo ʼana tonu, pea ʼe tou fakaʼapaʼapa anai ki tonatou loto faʼitaliha.

16, 17. (1) Neʼe liliu feafeaʼi te ʼateaina ko he fihifihia ʼi Kolonito? (2) Neʼe tokoni feafeaʼi ia Paulo ki te kau Kilisitiano ʼo Kolonito, pea kotea ʼae ʼe tou ako mai te aluʼaga ʼaia?

¹⁶ Tou vakaʼi te faʼifaʼitaki Fakatohi-tapu ʼe ha ai te maʼuhiga ʼae ke tou fakaʼapaʼapa ki te loto faʼitaliha ʼo ʼotatou tehina mo tuagaʼane. Neʼe fihi te kau Kilisitiano ʼo te kokelekasio ʼo Kolonito ʼo ʼuhiga mo te kai ʼo te kanoʼi manu ʼae neʼe fakatau kaʼe neʼe lagi kua momoli ki te ʼu taula ʼatua. Ko ʼihi Kilisitiano neʼe mole tautea natou e tonatou leʼo ʼo loto moka natou kai te kanoʼi manu ʼaia, koteʼuhi neʼe natou meʼa noaʼi te ʼu taula ʼatua. Kaʼe ko ʼihi ʼae neʼe tauhi taula ʼatua ki muʼa atu, neʼe hage pe kia natou ia te kai ʼo te kanoʼi manu ko hanatou atolasio ki te ʼu taula ʼatua. (1 Kolonito 8:4, 7) Neʼe ko he fihifihia neʼe feala ke tuʼutamaki ai te logo tahi ʼo te kokelekasio. Kaʼe neʼe tokoni feafeaʼi ia te apositolo ko Paulo ki te kau Kilisitiano ke natou fakatokatoka te fihifihia ʼaia?

¹⁷ ʼUluaki, neʼe fakamanatuʼi age e Paulo kia natou, ʼe mole ko te meʼa kai ʼae ʼe malohi ai ʼanatou felogoʼi mo te ʼAtua. (1 Kolonito 8:8) Lua, neʼe fakatokagaʼi age e Paulo kia natou ke ʼaua naʼa natou fakaʼaogaʼi tonatou ʻfealagia ʼae ke natou filifili,’ moʼo fakatupu tukia kia natou ʼae ʼe vaivai tonatou leʼo ʼo loto. (1 Kolonito 8:9) Pea tolu leva, neʼe ina ui age kia natou ʼae ʼe vaivai tonatou leʼo ʼo loto ke mole natou fakamauʼi ia natou ʼae ʼe natou kai te kanoʼi manu. (1 Kolonito 10:25, 29, 30) Koia, ʼi te ʼu aluʼaga maʼuhiga ʼae ʼe pipiki ki te tauhi, ʼe tonu ke tahi toʼo pe e te Kilisitiano ia tana tonu. Pea ʼe tonu ke tou fakaʼapaʼapa ki te ʼateaina ʼae ʼe maʼu e ʼotatou tehina mo tuagaʼane ke natou toʼo ʼanatou tonu maʼia mo te ʼu aluʼaga ʼae ʼe mole faʼa maʼuhiga.—1 Kolonito 10:32, 33.

18. ʼE feafeaʼi hakotou fakaha ʼe maʼuhiga kia koutou tokotou loto faʼitaliha?

¹⁸ Neʼe foaki mai e Sehova ia te loto faʼitaliha, pea ʼe tou maʼu ai te ʼateaina moʼoni. (2 Kolonito 3:17) ʼEi, ʼe maʼuhiga te meʼa ʼofa ʼaia kia tatou, koteʼuhi ʼe tou maʼu ai te fealagia ʼae ke tou toʼo he ʼu tonu ʼe ha ai ʼe tou ʼoʼofa ia Sehova. Koia tou haga fai he ʼu tonu ʼe fakavikiviki ki te ʼAtua, mo tou fakaʼapaʼapa ki te fealagia ʼo ʼihi ke natou filifili te faʼahiga fakaʼaogaʼi ʼo te meʼa ʼofa maʼuhiga ʼaia.