Faʼahi 5
Ko Te Loto Faʼifaʼitaliha: ʼe Ko He Meʼa ʼOfa Fakatalakitupua Ia
1, 2. Koteā te meʼa ʼofa fakatalakitupua ʼaē neʼe foaki ki te tagata?
ʼI MUʼA ʼo te mahino ʼaē pe koʼe neʼe fakagafua e te ʼAtua te mamahi pea mo feafeaʼi anai tana fakatokatoka te fahaʼi aia, ʼe tonu ke tou mahino lelei pe neʼe feafeaʼi tana fakatupu ia tatou. Neʼe mole ina fakatupu pe tatou ʼaki he sino pea mo he ʼuto. Neʼe ina toe fakatupu foki tatou ʼaki he fealagia ki he fai fakakaukau pea mo he ʼu ʼofa makehe.
2 Ko te loto faʼifaʼitaliha ʼe ko he meʼa tāfito ia ʼe kau ki te faʼufaʼu ʼo totatou ʼatamai pea mo totatou loto. ʼIo, neʼe ʼai e te Atua kia tatou te fealagia ʼaē ki he filifili faʼifaʼitaliha. ʼE ko he meʼa ʼofa fakatalakitupua ʼaia mai ʼa te ia.
Neʼe feafeaʼi totatou fakatupu
3-5. He koʼe ʼe tou leleiʼia te loto faʼifaʼitaliha?
3 Tou vakaʼi te ʼalu tahi ʼo te loto faʼifaʼitaliha pea mo te fakagafua e te ʼAtua te mamahi. Moʼo kamata, koutou fakakaukau ki te ʼu fehuʼi ʼaenī: ʼE koutou leleiʼia koa takotou fili faʼifaʼitaliha te meʼa ʼaē ka koutou fai pe ko te meʼa ʼaē ka koutou palalau ki ai, te meʼa ʼaē ka koutou kai pea mo te mutuʼi meʼa ʼaē ka koutou ʼai anai, te faʼahiga gāue ʼaē ka koutou fai, peʼe ko te fahaʼi fea ʼaē ka koutou maʼuli anai ʼi ai pea mo feafeaʼi anai tokotou maʼuli? Peʼe, koutou fakaʼamu koutou ke fakatotonu atu ʼe he tahi takotou ʼu palalau pea mo te meʼa fuli ʼe koutou fai, ʼi te temi fuli pe ʼo tokotou maʼuli?
4 ʼE mole he tahi ʼe holi ke puli feiā tana faʼifaʼitaliha ʼaē ki tona maʼuli. Koteā koa tona tupuʼaga? ʼE ʼalu tahi mo te faʼahiga fakatupu ʼaē ʼo tatou e te ʼAtua. Ko te Tohi-Tapu ʼe ina ʼui mai ko te ʼAtua neʼe ina fakatupu te tagata ‘ki tona paki, ke hoko ia ki ai’; ko te fealagia ʼaē ʼe maʼu e te ʼAtua ko te filifili faʼifaʼitaliha (Senesi 1:26; Teutalonome 7:6). ʼI tana fakatupu te tagata, neʼe ina foaki age ki ai te meʼa ʼofa fakatalakitupua ʼaia: te loto faʼifaʼitaliha. Ko te tupuʼaga ʼaia ʼo te hage kia tatou ʼe puli he meʼa mokā ʼe fatogiaʼi tatou ʼe he pule takitaki ʼe faka hau.
5 Ko te holi ʼaē ki te ʼāteaina neʼe mole haʼu noa pe ia, heʼe ko te ʼAtua ʼe ko te ʼAtua ʼo te ʼāteaina. Neʼe ʼui fēnei e te Tohi-Tapu: “ ʼI te faʼahi ʼaē ʼe nofo ai te laumālie ʼo Sehova, ʼi te faʼahi ʼaia ʼe nofo ai te ʼāteaina.” (2 Kolonito 3:17). Koia, ko te loto faʼifaʼitaliha ʼaē neʼe foaki mai e te ʼAtua ʼe kau ki totatou sino katoa. Neʼe ina ʼiloʼi pe ʼe feafeaʼi anai te haʼele ʼo totatou ʼatamai pea mo te ʼu meʼa ʼaē ʼe tou logoʼi; neʼe ina ʼiloʼi ia ʼe tou fiafia ʼaupito anai mokā ʼe tou maʼu te loto faʼifaʼitaliha.
6. Ko te ʼu fealagia feafeaʼi ʼaē neʼe ʼai e te ʼAtua ki totatou ʼuto ke haʼele ʼo felogoi mo te loto faʼifaʼitaliha?
6 Ki te meʼa ʼofa ʼaia ko te loto faʼifaʼitaliha, neʼe toe foaki mai e te ʼAtua te fealagia ʼaē ki te fakakaukau, te fakafuafua ʼo te ʼu meʼa, te fai ʼo he ʼu tonu pea mo te ʼiloʼi kehekehe ʼo te lelei ʼi te kovi (Hepeleo 5:14). Neʼe tonu foki ke fakatafito te loto faʼifaʼitaliha ki te fili ʼaē ka tou fai ʼaki tatatou mālama lelei ki ai. Neʼe mole fakatupu tatou ohage he ʼu masini mole honatou ʼatamai, mole ʼi ai honatou finegalo. Neʼe mole fakatupu tatou, ohage ko te ʼu manu ʼaē ʼe nātou fai pe te ʼu meʼa ʼaē ʼe logo ʼi ʼonatou sino. Kailoa, ko totatou ʼuto fakatalakitupua neʼe fai ia ke haʼele ʼo felogoi mo totatou ʼāteaina ʼaē ʼi te filifili faʼitaliha.
Ko he kamataʼaga lelei
7, 8. Koteā koa te kamataʼaga lelei ʼaupito ʼaē neʼe foaki e te ʼAtua ki tatatou ʼu ʼuluaki mātuʼa?
7 Pea tahi foki ʼaē, ʼaki te meʼa ʼofa ʼaia ko te loto faʼifaʼitaliha, neʼe maʼu ʼe tatatou ʼu ʼuluaki mātuʼa, ia Atama pea mo Eva, te meʼa fuli ʼe holi ki ai te tagata, ʼo hā mai ai neʼe tokaga te ʼAtua kia nāua. Neʼe tuku nāua ki he palatiso ʼe fakatatau ki he ʼōloto. Neʼe nā maʼu te ʼu meʼa fakamālama fuli. Neʼe haohaoa tonā ʼu ātamai pea mo tonā ʼu sino; neʼe mole ko he tōfiga ke nā matutuʼa, ke nā mahahaki peʼe ke nā mamate: neʼe tonu ʼe nā maʼuʼuli ʼo heʼegata. Neʼe feala ke haohaoa tanā fānau mo maʼuli fimalie ki ʼa muli. Ko te famili faka malamanei katoa ʼe tuputupu anai pea ʼe ʼi ai anai mo hanatou gāue ʼe lelei: ko te fakaliliu ʼo te kele katoa ko he palatiso. — Senesi 1:26-30; 2:15.
8 ʼO ʼuhiga mo te meʼa ʼaē neʼe tuku age kia nāua, neʼe ʼui fēnei e te Tohi-Tapu: “Neʼe sio te ʼAtua kia meʼa fuli neʼe ina fai pea koʼeni ko te meʼa ʼaia neʼe lelei ʼaupito.” (Senesi 1:31). Neʼe ʼina toe ʼui fēnei ʼo ʼuhiga mo te ʼAtua: “ ʼE haohaoa tana gāue.” (Teutalonome 32:4). ʼIo, ko te Tupuʼaga neʼe ina foaki ki te hahaʼi katoa he kamataʼaga haohaoa. Neʼe mole he tahi meʼa neʼe toe lelei age. Neʼe tokaga moʼoni te ʼAtua kia nātou!
Ko te ʼāteaina ʼe ʼi ai tona ʼu tuʼakoi
9, 10. He koʼe ko te fakaʼaogaʼi ʼo te loto faʼifaʼitaliha ʼe tonu ke ʼi ai hona tuʼakoi?
9 Kae, neʼe fakatuʼutuʼu koa e te ʼAtua ko te loto faʼifaʼitaliha ʼe mole hona tuʼakoi? Koutou fakakaukauʼi muʼa he kolo lahi ʼe ko te haʼele ʼa te ʼu motokā ʼe mole ʼi ai hona ʼu lao, ʼe tahi haʼele faʼitaliha pea mo tahi fakalogo kia kita te gaholo ʼo te motokā. ʼE koutou taki motokā anai mokā ʼe feiā? Kailoa, heʼe mole kei fai he felogoi pea ʼe feala anai te hoko ʼo he ʼu tuʼutāmaki.
10 ʼE toe feiā foki mo te loto faʼifaʼitaliha, ʼaē ko te meʼa ʼofa ʼo te ʼAtua. Ko he ʼāteaina mole hona tuʼakoi ko tona ʼuhiga ko te sosiete mole kei felogoi. ʼE ʼaoga ke ʼi ai he ʼu lao moʼo fakaʼaluʼalu lelei ʼo te ʼu gāue ʼa te tagata. Neʼe ʼui fēnei e te Folafola ʼa te ʼAtua: “Koutou fai te ʼu meʼa ohage he ʼu tagata ʼāteaina, ʼo mole hage ko nātou ʼaē ʼe nātou fakaʼaoga te ʼāteaina moʼo takuʼaki ʼo te fai ʼo te meʼa ʼaē ʼe kovi.” (1 Petelo 2:16, Crampon-Tricot). ʼE loto te ʼAtua ke faka tuʼakoi te loto faʼifaʼitaliha ke lelei ai ki te hahaʼi fuli. Ko tona finegalo ke tou maʼu he ʼāteaina, mole katoa, kae faka feʼauga pe, ʼo faka tuʼakoi ʼaki te pule ʼa te lao.
Ko te ʼu lao fea koa?
11. Neʼe fakatupu tatou ke tou fakalogo ki te lao ʼa ai?
11 Neʼe fakatupu tatou ke tou fakalogo koa ki te ʼu lao ʼa ai? Ia 1 Petelo 2:16 ʼe hā ai, ʼi he tahi fahaʼi ʼo te vaega, te kupu ʼaē “ ʼu kaugana ʼa te ʼAtua”. ʼE mole talanoa ia ʼi heni ki he kaugana fakafitaʼa; ko tona ʼuhiga ʼaenī neʼe fakatupu tatou ke tou fiafia ʼaupito mokā ʼe tou fakalogo ki te ʼu lao ʼa te ʼAtua (Mateo 22:35-40). Ko tana ʼu lao ʼe ina foaki mai he takitaki, ʼo lelei age ia ʼi he faʼahiga lao neʼe fakatuʼutuʼu e te tagata. “Ko ʼau, Sehova, ko ʼau tou ʼAtua, ia Ia ʼaē ʼe ina akoʼi koe ke ʼaoga kia te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai.” — Isaia 48:17.
12. Ko te ʼāteaina fea koa ʼaē ʼe tou maʼu ʼi loto ʼo te ʼu tuʼakoi ʼaē neʼe fakatuʼutuʼu e te ʼu lao fakaʼatua?
12 ʼO ʼalu tahi mo te fahaʼi ʼaia, ko te ʼu lao ʼa te ʼAtua ʼe ina foaki ʼi loto ʼo te ʼu tuʼakoi ʼaē neʼe ina fakatuʼutuʼu he ʼāteaina lahi ki te fili faʼifaʼitaliha. ʼE tupu ai te ʼu faʼahiga ʼāteaina kehekehe, ʼo tuku ai ki te hahaʼi katoa tona agaaga ʼe matalelei age. Koutou manatuʼi te ʼu faʼahiga meʼa kai kehekehe, te ʼu mutuʼi meʼa, te ʼu musika, te ʼu faʼahiga meʼa teuteu pea mo te ʼu ʼapi ʼe maʼu ʼi te malamanei. ʼE tou loto anai ke tou fili totonu te meʼa ʼaē ʼe tou loto ki ai ʼi te fahaʼi ʼaia, kae mole tou loto ke fili ʼe he tahi maʼa tatou.
13. Koteā koa te ʼu lao fakasino ʼaē ʼe tonu ke tou mulimuli ki ai ke fua lelei kia tatou?
13 Neʼe fakatupu tatou ke tou fiafia lahi mokā ʼe tou fakalogo ki te ʼu lao fakaʼatua ʼaē ʼe ina takitaki te ʼu gāue ʼa te tagata. ʼE feala te fakatatau ʼo te meʼa ʼaia ki te fakalogo ki te ʼu lao fakasino ʼaē neʼe fakatuʼu e te ʼAtua. Ka pau la, ʼe mole tou fakalogo ki te lao ʼaē ʼo te takafoli pea tou fakatō ʼi he fahaʼi ʼe maʼoluga, ʼe feala ke tou lāvevea peʼe tou mamate. Kapau ʼe mole tou mulimuli ki te lao ʼaē ʼe ʼi loto ʼo totatou sino ʼo mole kei tou kai, pea mo ʼiʼinu pea mo tuku tatatou mānava, pea ʼe tou mamate anai.
14. ʼE feafeaʼi koa tatatou ʼiloʼi neʼe mole fakatupu te hahaʼi ke nātou ʼāteaina mai te ʼAtua?
14 Ohage ko totatou fakatupu ʼaki te ʼaoga ki te mulimuli ki te ʼu lao fakasino ʼaē neʼe fakatuʼu e te ʼAtua, neʼe fakatupu foki tatou ʼaki te ʼaoga ʼaē ke tou fakalogo ki tana ʼu lao ʼo ʼuhiga mo te aga pea mo te ʼu faʼahi faka sosiale (Mateo 4:4). Ko te hahaʼi neʼe mole fakatupu nātou ke nātou maʼu he ʼu lelei ʼo nātou faʼifaʼitaliha mole nātou fakalogo ki tonatou Tupuʼaga. Ko tana polofeta ko Selemia neʼe ina ʼui fēnei: “ ʼE mole ʼa te tagata ʼaē ʼe haʼele te fili ʼo tona ala. Akonakiʼi mai ʼau, e Sehova.” (Selemia 10:23, 24). Koia, ʼi te ʼu faʼahi fuli, neʼe fakatupu te hahaʼi ke nātou maʼuʼuli ʼo fakalogo ki te pule ʼa te ʼAtua, ka mole ki tanatou pule pe ʼaē ʼanatou.
15. Ko te ʼu lao ʼa te ʼAtua neʼe tonu koa ko he ʼamo mamafa kia ʼAtama pea mo Eva?
15 Ko te fakalogo ki te ʼu lao ʼa te ʼAtua neʼe mole tonu ko he ʼamo mamafa ki tatatou ʼu ʼuluaki mātuʼa. Kailoa, neʼe ko he tokoni ʼaia ke nā fiafia lahi pea mo feiā foki ki te famili katoa ʼo te kele. Ka na pau neʼe nonofo maʼu te ʼuluaki taumātuʼa ʼi te ʼu tuʼakoi ʼaē neʼe fakatuʼu e te ʼu lao fakaʼatua, neʼe nā maʼu he maʼuli fīmālie. ʼO feala ai ke tou maʼuʼuli ʼi te temi nei ʼi he palatiso taulekaleka pea mo tou nonofo ko he famili faʼifaʼitahi ʼi te ʼofa. Ka na ʼaua la neʼe mole ʼi ai he agakovi, he mamahi pea mo he mate.
[Paki ʼo te pasina 11]
Ko te Tupuʼaga neʼe ina foaki ki te hahaʼi he kamataʼaga haohaoa.
[Paki ʼo te pasina 12]
ʼE koutou fia taki motokā koa ʼi he ʼu ala ʼo he kolo lahi ʼe mole ʼi ai hana lao ʼo te ala?