Kapite Nima
Te ʼĀteaina ʼa Te Kau Atolasio ʼa Sehova
1, 2. (a) Koteā te faʼahiga ʼāteaina ʼaē neʼe foaki e te ʼAtua ki te ʼuluaki taumatuʼa? (b) Koutou fakahā mai he ʼu lao neʼe tonu ke fakalogo kiai te maʼuli ʼo Atama mo Eva.
ʼI TE fakatupu e Sehova te ʼuluaki tagata pea mo te ʼuluaki fafine, neʼe nā maʼu te ʼāteaina ʼe lahi age ʼi te ʼāteaina ʼaē ʼe maʼu e te hahaʼi ia ʼaho nei. Ko tonā nofoʼaga neʼe ko te Palatiso, te ’Ōloto matalelei ʼo Eteni. Neʼe mole nā maʼuli mamahi ʼuhi ko he mahaki, he neʼe haohaoa tonā ʼatamai pea mo tonā sino. Neʼe mole nā ʼamanaki ʼe nā mamate anai, ohage ko te meʼa ʼaē kua hoko ki te hahaʼi fuli ia ʼaho nei. Pea neʼe mole ko he ʼu masini, kae neʼe nā maʼu te meʼa ʼofa fakaofoofo ʼaē ko te loto faʼifaʼitaliha, he neʼe feala ke nā fai hanā ʼu tonu. Kae ke feala hanā maʼu tuʼumaʼu te ʼāteaina ʼaia, neʼe tonu ke nā fakalogo ki te ʼu lao ʼa te ʼAtua.
2 Ohage la, ko te ʼu lao ʼaē neʼe fakatuʼu e te ʼAtua ʼo ʼuhiga mo te kele. ʼE mahino ia neʼe mole tohi te ʼu lao fuli ʼaia, kae neʼe fakatupu ia Atama pea mo Eva ʼaki te fealagia ke nā ʼiloʼi pea mo nā fakalogo ki te ʼu lao ʼaia. Ka nā logoʼi ʼe nā fia kakai, pea neʼe nā kakai, peʼe ka nā fia ʼiʼinu pea nā ʼiʼinu, ka tō te laʼā pea neʼe nā ʼiloʼi ʼe tonu ke nā momoe. Neʼe toe foaki e Sehova kia nāua he gāue, neʼe hage pe ko he lao, he neʼe tonu ke nā mulimuli kiai ʼi te ʼu meʼa fuli ʼaē neʼe tonu ke nā fai. Neʼe tonu ke nā fakatupu hanā fānau, ke nā puleʼi te ʼu manu fuli pe ʼi te kele, pea mo fakalahi te Palatiso ki te kele katoa. (Senesi 1:28; 2:15) Neʼe ko he lao neʼe lelei pea mo ʼaoga kia nāua! ʼAki te lao ʼaia neʼe nā maʼu ai he gāue fakafiafia, ʼo feala ai ke nā fakaʼaogaʼi katoa tonā ʼu fealagia fakakaukau, pea mo fakaʼaogaʼi ʼi hona ʼu ʼaluʼaga lelei. Pea neʼe toe feala foki ke nā fai he ʼu tonu ʼo ʼuhiga mo tanā faʼahiga fakahoko ʼo tanā gāue ʼaia. Neʼe ʼi ai koa he tahi age meʼa neʼe ʼaoga kia nāua?
3. Neʼe lava ako feafeaʼi e Atama pea mo Eva te fakaʼaogaʼi fakapotopoto ʼo tanā ʼāteaina moʼo fai he ʼu tonu?
3 ʼE mahino ia, ko te fealagia ʼa Atama pea mo Eva ke nā fai hanā ʼu tonu, neʼe mole faka ʼuhiga leva ko te ʼu tonu fuli ʼaē ka nā fai ʼe fua lelei anai. Ko tanā ʼāteaina moʼo fai he ʼu tonu, neʼe maʼua ke mulimuli ki te ʼu lao pea mo te ʼu pelesepeto ʼa te ʼAtua. Neʼe lava feafeaʼi hanā ako te ʼu lao pea mo te ʼu pelesepeto ʼaia? ʼAki tanā fakalogo ki tonā Tupuʼaga, pea mo sioʼi tana ʼu gāue. Neʼe foaki e te ʼAtua kia Atama pea mo Eva he poto feʼauga ke nā mulimuli ki te ʼu meʼa ʼaē neʼe nā ako. Neʼe fakatupu haohaoa nāua, koia neʼe tonu ke faigafua kia nāua tana fakahā te ʼu kalitate ʼa te ʼAtua mokā nā fai he ʼu tonu. Kae neʼe feala ke nā fai te faʼahi ʼaia mo kapau neʼe nā loto fakafetaʼi moʼoni ki te ʼu meʼa neʼe fai e te ʼAtua maʼa nāua, pea mo kapau neʼe nā fia fakafiafia tona loto.—Senesi 1:26, 27; Soane 8:29.
4. (a) Neʼe pulihi koa te ʼāteaina ʼa Atama mo Eva e te fakatotonu ʼaē ke mole nā kai ki te fua ʼo te fuʼu ʼakau e tahi? (b) He koʼe neʼe matatonu te fakatotonu ʼaia?
4 Koia neʼe loto ai e te ʼAtua ke ina ʼahiʼahiʼi te pipiki ʼa Atama pea mo Eva kia te ia, ʼi tona ʼuhiga Tupuʼaga, pea mo tanā lotolelei ke nā nonofo ʼi te ʼu tuʼakoi ʼaē neʼe ina tuku age kia nāua. Neʼe fai e Sehova te fakatotonu ʼaenī kia Atama: “Ko te ʼu fuʼu ʼakau fuli ʼo te ʼōloto ʼe feala anai hau kai kiai ʼo aʼu ki tau mākona. Kae ki te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi, ʼe mole tonu anai ke ke kai kiai, heʼe ko te ʼaho ʼaē ka ke kai anai kiai, ʼe ke mate moʼoni ai anai.” (Senesi 2:16, 17) ʼI te ʼosi fakatupu ʼa Eva, neʼe toe fakahā age ki ai te lao ʼaia. (Senesi 3:2, 3) ʼAki te fakatotonu ʼaia, neʼe puli ai koa tanā maʼuli ʼāteaina? Kailoa ia. Neʼe mahu tanā ʼu meʼa kai lelei pea mo kehekehe, tatau aipe hanā mole kai ki te fua ʼo te ʼakau ʼaia. (Senesi 2:8, 9) Neʼe tonu ke nā ʼiloʼi ʼe pule te ʼAtua ki te kele, he neʼe ina fakatupu. Koia neʼe feala ke ina fai he ʼu lao neʼe ʼalutahi mo tana fakatuʼutuʼu, pea mo fua lelei ki te malamanei katoa.—Pesalemo 24:1, 10.
5. (a) Neʼe pulihi feafeaʼi e Atama pea mo Eva tanā ʼāteaina fakafiafia? (b) Koteā ʼaē neʼe ina fetogi te ʼāteaina ʼaē neʼe maʼu e Atama pea mo Eva, pea neʼe koteā tona ʼu fua kia tatou?
5 Kae koteā ʼaē neʼe hoko? Ko te ʼaselo, ʼi tana loto mānumānu, neʼe ina fakaʼaogaʼi kovi tana loto faʼitaliha pea neʼe liliu ko Satana, ko tona faka ʼuhiga ko he “Fakafeagai.” Neʼe ina kākāʼi ia Eva ʼo ina fakapapau age te faʼahi neʼe fakafeagai ki te finegalo ʼo te ʼAtua. (Senesi 3:4, 5) Neʼe mulimuli ia Atama kia Eva ʼo nā talagataʼa ki te lao ʼa te ʼAtua. ʼI tanā toʼo te meʼa ʼaē neʼe mole ʼa nāua, neʼe puli ai tanā ʼāteaina fakafiafia. Neʼe puleʼi nāua e te agahala, pea ohage ko tana tala age e te ʼAtua, neʼe nā mamate ki muli age. Ko te tofiʼa ʼaē neʼe nā tuku ki tonā hōloga neʼe ko te agahala—ʼaē ʼe fakaʼiloga ʼi te holi ʼa te hahaʼi ki te meʼa ʼaē ʼe kovi. ʼAki te agahala neʼe toe hoko ai mo te ʼu vaivaiʼaga ʼo te sino, ʼaē ʼe iku ki te mahaki, mo te matutuʼa, pea mo te mate. ʼAki te mālohi ʼa te ʼu fakaneke ʼa Satana, ko te holi ki te meʼa ʼaē ʼe kovi, neʼe ina fakatupu he sosiete fakatagata ʼe maʼu ʼi tona hisitolia, te fehiʼa, te ʼu fai fakapō, te ʼu takitaki aga fefeka, pea mo te ʼu tau neʼe mamate ai te lauʼi miliona hahaʼi. ʼI kehekehe leva mo te ʼāteaina ʼaē neʼe foaki e te ʼAtua ki te malamanei ʼi te kamata!—Teutalonome 32:4, 5; Sopo 14:1, 2; Loma 5:12; Apokalipesi 12:9.
Te Potu ʼAē ʼe Feala Ke Maʼu Ai Te ʼĀteaina
6. (a) ʼE lava maʼu ʼifea te ʼāteaina moʼoni? (b) Ko te faʼahiga ʼāteaina feafeaʼi ʼaē neʼe talanoa kiai Sesu?
6 ʼUhi ko te ʼu ʼaluʼaga fakaʼofaʼofa ʼaē kua hoko ʼi te ʼu potu fuli ia ʼaho nei, kua tou mahino ai ki te holi ʼa te hahaʼi ki he ʼāteaina lahi age. Kae ʼe feala ke maʼu ʼifea te ʼāteaina moʼoni? Neʼe ʼui fēnei e Sesu: “Kapau ʼe koutou nonofo ʼi taku folafola, pea ko koutou ko ʼaku tisipulo moʼoni, pea ʼe koutou ʼiloʼi ai anai te moʼoni, pea ko te moʼoni ʼe ina faka ʼāteaina anai koutou.” (Soane 8:31, 32) Ko te ʼāteaina ʼaia ʼe mole ko ia ʼaē ʼe ʼamanaki kiai te hahaʼi mokā nātou fakafisi ki he faʼahiga pule peʼe ko he puleʼaga, kae nātou tali he tahi age. Kae ko te ʼāteaina ʼaia ʼe pipiki ki te ʼu fihifihia ʼo te tagata. Ko te meʼa ʼaē neʼe talanoa kiai Sesu neʼe ko te ʼāteaina mai te agahala. (Soane 8:24, 34-36) Koia, kapau ʼe liliu he tahi ko he tisipulo moʼoni ʼa Sesu Kilisito, pea ʼe hoko ʼi tona maʼuli he fetogi lahi, ʼe ko he ʼāteaina!
7. (a) Neʼe faka ʼāteaina feafeaʼi tatou mai te agahala ʼi te temi nei? (b) Ke tou maʼu te ʼāteaina ʼaia, koteā ʼaē ʼe tonu ke tou fai?
7 ʼE mole ʼui leva ko te kau Kilisitiano moʼoni ʼi te temi nei, ʼe mole kei malave kia nātou te ʼu fua ʼo tonatou ʼu vaivaiʼaga ʼo ʼuhiga mo te ʼu meʼa ʼaē ʼe kovi. ʼUhi ko tanatou tutupu ʼi te agahala, koia ʼe kei nātou tauʼi te agahala. (Loma 7:21-25) Kae kapau ʼe mulimuli moʼoni he tahi ki te ʼu akonaki ʼa Sesu, pea ʼe mole toe kaugana anai ki te agahala. ʼE mole kei hage anai te agahala ko he pule ʼe ina fakatotonu age he meʼa ke ina fai pea ʼe ina fai atu aipe. ʼE mole mulimuli anai ki he maʼuli ʼe mole lelei pea mo fakatupu hoha ki tona leʼo ʼo loto. ʼE ina maʼu anai he leʼo ʼo loto ʼe maʼa ia muʼa ʼo te ʼAtua, heʼe kua fakamolemole tana ʼu agahala ʼi tana tui ki te sakilifisio ʼo Kilisito. ʼE feala ke mālohi te ʼu holi ki te agahala, kae kapau ʼe fakafisi kiai heʼe ina manatuʼi te ʼu akonaki ʼa Kilisito, pea ʼe ina fakahā ai ʼe mole kei puleʼi ia ia e te agahala.—Loma 6:12-17.
8. (a) Neʼe faka ʼāteaina tatou e te Lotu Faka Kilisitiano moʼoni mai teā? (b) ʼE tonu ke feafeaʼi tatatou aga ki te ʼu puleʼaga ʼo te malamanei?
8 ʼE lahi te ʼu agaaga ʼo te ʼāteaina ʼaē ʼe tou maʼu ʼi totatou ʼuhiga Kilisitiano. Neʼe faka ʼāteainaʼi tatou mai te ʼu fua kovi ʼo te ʼu akonaki hala, mai te mataku ki te ʼu meʼa fakatemonio pea mo te maʼuli popūla ki te agahala. Ko te ʼu moʼoni taulekaleka ʼo ʼuhiga mo te ʼaluʼaga ʼo te kau mate pea mo te fakatuʼuake, neʼe nātou faka ʼāteainaʼi tatou mai te mataku fakavalevale ki te kau mate. Ko tatatou ʼiloʼi ʼaē kua vave fetogi te ʼu puleʼaga fakatagata e te Puleʼaga faitotonu ʼa te ʼAtua, ʼe ina faka ʼāteaina ai tatou mai te heʼe ʼamanaki. (Taniela 2:44; Mateo 6:10) Kae ko tatatou ʼāteaina ʼaia ʼe mole ina fakagafua mai ke tou meʼa noaʼi te ʼu puleʼaga pea mo tanatou ʼu lao.—Tito 3:1, 2; 1 Petelo 2:16, 17.
9. (a) ʼE tokoni feafeaʼi mai ia Sehova ʼi tona ʼofa ke tou maʼu he ʼāteaina lahi ia ʼaho nei? (b) ʼE lava feafeaʼi hatatou fai he ʼu tonu ʼe fakapotopoto?
9 ʼE mole loto e Sehova ke tou maʼu e tatou totonu ʼi te ʼu faigataʼaʼia pea mo te faihala peʼe ko te maʼuli fea ʼaē ʼe lelei age. ʼE ina ʼiloʼi tatatou faʼahiga faʼu, mo te meʼa ʼaē ʼe ina ʼaumai te fiafia moʼoni kia tatou, pea mo te meʼa ʼaē ʼe ʼaoga ki totatou fīmālie heʼegata. ʼE ina ʼiloʼi te ʼu manatu pea mo te aga ʼaē ʼe feala ke mole felogoi lelei ai he tahi mo Ia pea mo te hahaʼi, ʼo feiā mo te mole fealagia ʼaē ke kita hū ki te mālama foʼou. ʼAki he agaʼofa, ʼe fakahā mai e Sehova te ʼu meʼa fuli ʼaia ʼaki te Tohi-Tapu pea mo tana kautahi ʼi te kele. (Maleko 13:10; Kalate 5:19-23; 1 Timoteo 1:12, 13) ʼOsi ʼaia, pea ʼa tatou leva te fakaʼaogaʼi totatou loto faʼitaliha ʼaē neʼe foaki mai e te ʼAtua, moʼo vakaʼi peʼe tou fakalogo anai kia te ia peʼe kailoa. ʼO mole hage ko Atama, kapau ʼe tou fakalogo ki te ʼu meʼa ʼaē ʼe ʼui mai e te Tohi-Tapu kia tatou, pea ʼe tou fai anai he ʼu tonu ʼe fakapotopoto. ʼE tou fakahā anai ʼe tou tokakaga tāfito ʼi totatou maʼuli ke lelei tatatou ʼu felogoi mo Sehova.
ʼE Kumi e Te Hahaʼi He Tahi ʼĀteaina
10. Koteā te ʼāteaina ʼe fakaʼamu kiai ʼihi kau Fakamoʼoni ʼa Sehova?
10 ʼI ʼihi temi, ko ʼihi kau tūpulaga Fakamoʼoni ʼa Sehova—ʼo feiā mo ʼihi hahaʼi lalahi—ʼe lagi nātou kumi he tahi faʼahiga ʼāteaina. ʼE nātou leleiʼia te mālama, pea ka lahi tanatou manatu kiai, pea ʼe toe mālohi ai mo tanatou loto ʼaē ke nātou fai te ʼu aga ʼaē ʼe fai māhani ʼi te mālama, kae ʼe mole ko he ʼu aga faka Kilisitiano. Lagi ʼe mole nātou fia fakaʼaogaʼi anai te toloke, peʼe ko te ʼinu ʼo te kava, peʼe ko te fai ʼo te folonikasio. Kae ʼe nātou kamata fakatahi mo he ʼu hahaʼi ʼe mole ko he kau Kilisitiano moʼoni, heʼe nātou loto ke tali nātou e te ʼu hahaʼi ʼaia. ʼE lagi feala pe ke nātou kamata faʼifaʼitakiʼi tanatou faʼahiga palalau pea mo tanatou aga.—3 Soane 11.
11. ʼI ʼihi temi, ʼe haʼu maifea te fakaneke ke fai he aga ʼe kovi?
11 ʼI ʼihi temi, ko te fakaneke ʼaē ke fai he aga ʼe mole faka Kilisitiano, ʼe haʼu mai he tahi ʼe ina ʼui ʼe tauhi kia Sehova. Neʼe hoko te meʼa ʼaia ki ʼihi Kilisitiano ʼo te ʼuluaki sēkulō, pea ʼe feala ke toe hoko te faʼahi ʼaia ia ʼaho nei. Ko nātou ʼaia ʼe nātou fia fai he ʼu meʼa ʼe nātou manatu ʼe nātou maʼu ai anai te fiafia, kae ko te ʼu meʼa ʼaia ʼe fakafeagai ki te ʼu lao ʼa te ʼAtua. ʼE nātou uga ʼihi ke nātou fai hanatou ʼu fakafiafia. ʼE nātou ‘fakapapau te ʼāteaina kae ko nātou totonu ʼe nātou kaugana ki te fakahala.’—2 Petelo 2:19.
12. Koteā te ʼu fua kovi ʼo he aga ʼe fakafeagai ki te ʼu lao pea mo te ʼu pelesepeto ʼa te ʼAtua?
12 ʼE kovi tuʼumaʼu te ʼu fua ʼo te faʼahiga ʼāteaina ʼaia, heʼe ko he talagataʼa ʼaia ki te ʼu lao ʼa te ʼAtua. Ohage la, ko te ʼu felāveʼi fakasino heʼeʼaoga ʼe ina fakatupu he lotomamahi, te mahaki, te mate, te faitama neʼe mole kita loto kiai, pea mo he mavete ʼa he taumatuʼa. (1 Kolonito 6:18; 1 Tesalonika 4:3-8) Ko te toloke ʼe ina fakatupu te ʼita, te faigataʼa ʼa te palalau, te sio nenefu, te ninimo, te faigataʼa ʼa te mānava, takita sio ki he ʼu meʼa ʼe mole moʼoni pea mo te mate. ʼE tupu ai hakita popūla kiai, ʼo feala ai ki he tahi moʼo taupau ʼo tana popūla kiai, ke ina fai he fakapō moʼo totogi tana toloke. ʼE teitei tatau mo te ʼu fua kovi ʼo te ʼinu kava. (Tāʼaga Lea 23:29-35) Ko te hahaʼi ʼaē ʼe nātou fai te ʼu aga ʼaia, ʼe lagi nātou manatu ʼe nātou ʼāteaina, kae ki muli age ʼe mahino leva kia nātou kua nātou liliu ʼo popūla ki te agahala, kae kua tauhala. Pea ko te agahala ʼe ko he pule aga fefeka pea mo fekai. Tou fakakaukauʼi te ʼu faʼahi ʼaia ʼi te temi nei, ke tou hāo mai te ʼu tuʼutāmaki ʼaia.—Kalate 6:7, 8.
ʼE Kamata ʼi Teā Te ʼu Fihifihia
13. (a) Koteā ʼaē ʼe ina tau fakaneke te ʼu holi ʼaē ʼe iku ki he ʼu fihifihia? (b) Ke tou mahino peʼe ko ai “te ʼu fakakaugā kovi,” ʼo ai te manatu ʼaē ʼe tonu ke tou ʼiloʼi? (c) ʼI takotou tali ki te ʼu fehuʼi ʼo te palakalafe 13, koutou fakahā lelei te manatu ʼa Sehova.
13 Tou vakaʼi age muʼa peʼe ʼi te agamāhani, ʼe kamata ʼi teā te ʼu fihifihia. ʼE fakamahino fēnei e te Tohi-Tapu: “ ʼE ʼahiʼahiʼi te tagata takitokotahi mokā ina tuku ia ia ke taki pea mo kākāʼi ʼe tona holi ʼo ia totonu. Pea ko te holi, mokā kua fakatupu, pea ʼe ina fānauʼi te agahala, pea ko te agahala, mokā kua ʼosi fai, pea ʼe ina fakatupu te mate.” (Sakopo 1:14, 15) Koteā ʼaē ʼe ina fakaneke te holi? Ko te ʼu meʼa ʼaē ʼe hū ki te ʼatamai. ʼE tau hoko te faʼahi ʼaia ʼuhi ko tatatou fakakaugā mo te ʼu hahaʼi ʼe mole nātou mulimuli ki te ʼu pelesepeto ʼa te Tohi-Tapu. ʼE moʼoni, ʼe tou ʼiloʼi fuli ʼe tonu ke tou tekeʼi “te ʼu fakakaugā kovi.” (1 Kolonito 15:33) Kae ko te ʼu fakakaugā fea ʼaē ʼe kovi? Koteā te manatu ʼa Sehova ki te faʼahi ʼaia? Tou fakakaukauʼi te ʼu fehuʼi ʼaē ʼe hoa mai, pea mo te ʼu vaega, ke feala hatatou fai he ʼu tonu ʼe lelei.
Ko he ʼu hahaʼi ʼe hage ʼe lelei tanatou aga, ʼe ko he ʼu fakakaugā lelei koa? (Senesi 34:1, 2, 18, 19)
Ko tanatou ʼu fai palalau, peʼe ko tanatou ʼu fakahuahua, ʼe hā ʼaki ai koa ʼe feala ke tou kaumeʼa lelei mo nātou? (Efeso 5:3, 4)
Koteā te manatu ʼa Sehova mo kapau ʼe tou fili ke tou kaumeʼa lelei mo he ʼu hahaʼi ʼe mole nātou ʼoʼofa kia te ia? (2 Fakamatala 19:1, 2)
Kapau ʼe tonu ke tou fakakaugā ʼi te fale gāue, ʼi te faleako, mo ni ʼu hahaʼi ʼe mole nātou tui tahi mo tatou, he koʼe ʼe tonu ke tou nonofo tokakaga? (1 Petelo 4:3, 4)
ʼAki te televisio, te sinema, te Internet, te ʼu tohi, mo te ʼu nusipepa, pea mo te ʼu sulunale, ʼe tou fakakaugā mo te ʼu hahaʼi. Koteā ʼaē ʼe tonu ke tou tokakaga kiai ʼi te ʼu faʼahiga meʼa ʼaia? (Tāʼaga Lea 3:31; Isaia 8:19; Efeso 4:17-19)
Ko tatatou ʼu fakakaugā, ʼe hā kia Sehova, ko tatou ko he ʼu faʼahiga hahaʼi feafeaʼi? (Pesalemo 26:1, 4, 5; 97:10)
14. Koteā te ʼāteaina fakaofoofo ʼaē ka maʼu e te hahaʼi ʼaē ʼe nātou mulimuli agatonu ʼi te temi nei ki te ʼu tokoni ʼa te Folafola ʼa te ʼAtua?
14 Kua ōvi mai te mālama foʼou ʼa te ʼAtua. ʼAki te Puleʼaga ʼa te ʼAtua ʼaē ʼi selo, ʼe faka ʼāteainaʼi anai te malamanei mai te pule ʼa Satana pea mo tana tuʼu agakovi katoa. ʼAki te temi, ʼe pulihi anai te ʼu fua ʼo te agahala ʼi te hahaʼi fakalogo, ʼo nātou liliu anai ʼo haohaoa ʼi tonatou ʼatamai pea mo tonatou sino, pea ʼe feala anai ke nātou fiafia ʼo heʼegata ʼi te maʼuli ʼi te Palatiso. Ko te ʼāteaina ʼaē ʼe ʼalutahi mo “te laumālie ʼo Sehova” ʼe maʼu anai e te hahaʼi fuli pe. (2 Kolonito 3:17) Moʼoā hatatou pulihi te ʼu meʼa fuli ʼaia ʼuhi pe ko tatatou meʼa noaʼi te ʼu tokoni ʼa te Folafola ʼa te ʼAtua? Tou fakahā fuli ʼi tatatou fakaʼaogaʼi fakapotopoto totatou ʼāteaina faka Kilisitiano, ʼe tou fakaʼamu moʼoni ki “te ʼāteaina faka kolōlia ʼo te fānau ʼa te ʼAtua.”—Loma 8:21.
Fakamanatu
• Ko te faʼahiga ʼāteaina fea ʼaē neʼe maʼu e te ʼuluaki taumatuʼa? Koteā te kehekehe ʼo te ʼāteaina ʼaia pea mo te ʼāteaina ʼaē ʼe maʼu e te malamanei ia ʼaho nei?
• Ko te ʼāteaina fea ʼaē ʼe maʼu e te kau Kilisitiano moʼoni? Koteā tona kehekehe mo te faʼahiga ʼāteaina ʼa te mālama?
• He koʼe ʼe maʼuhiga ʼaupito ke tou fakamamaʼo mai te ʼu fakakaugā kovi? ʼO mole hage ko Atama, ko te ʼu manatu ʼa ai ʼaē ʼe tou tali ʼo ʼuhiga mo te meʼa ʼaē ʼe kovi?
[Paki ʼo te pasina 46]
ʼE fakatokaga fēnei mai e te Folafola ʼa te ʼAtua: “ ʼAua naʼa koutou faihala. Ko te ʼu fakakaugā kovi, ʼe nātou maumauʼi te ʼu agamāhani ʼaoga”