Kapite 5

Te ʼĀteaina Fakafiafia ʼa Te Hahaʼi ʼAē ʼe Atolasio Kia Sehova

1, 2. (a) Ko te ʼāteaina feafeaʼi ʼaē neʼe foaki e te ʼAtua ki te ʼuluaki taumatuʼa? (b) Koutou fakahāhā he ʼu lao neʼe nātou takitaki tanā gāue.

ʼI TE fakatupu e Sehova te ʼuluaki taumatuʼa, neʼe ina tuku age kia nāua te ʼāteaina ʼaē ʼe lahi ʼaupito age ʼi te ʼāteaina ʼaē ʼe maʼu e te hahaʼi ʼi te temi nei. Neʼe nā maʼuʼuli ʼi te Palatiso. Neʼe mole nā mamahi ʼi tona maʼuli ʼuhi ko te mahaki. Neʼe mole fakatūʼa nāua ke nā mamate. Kae ko te fakaʼapaʼapa ki te ʼu lao ʼa te ʼAtua neʼe ko he faʼahi maʼuhiga ʼaupito mo kapau ʼe nā loto ke hoholo atu tana maʼu ia te ʼāteaina ʼaia.

² Ko ʼihi ʼi te ʼu lao ʼaia neʼe lagi mole fakamahino gutu age, kae neʼe fakatupu Atama mo Eva ʼaki te fealagia ʼaē ke nā māhani ki te fakalogo. Koia ʼi tanā fia kakai ʼe nā ʼiloʼi ai ʼe tonu ke nā kakai, pea mo tanā fia ʼiʼinu ke nā ʼiʼinu. ʼI te tō ʼo te laʼā ʼe nā ʼiloʼi ai ʼe tonu ke nā mālōlō pea mo momoe. Neʼe palalau age foki ia Sehova kia nāua pea mo ina tuku age te gāue ke nā fai. ʼIo, ko te gāue ʼaia neʼe ko he lao, koteʼuhi koia ʼaē ka ina taki tonā maʼuli. Kae neʼe ko he lao neʼe fai ʼaki te ʼofa pea neʼe ʼaoga kia nāua! Neʼe ko he gāue fakafiafia, neʼe feala ai ke nā fakaʼaogaʼi katoa tona poto ʼo fai fakalelei. Neʼe feala ke nā fanaunau, ke nā puleʼi te ʼu manu pea ʼaki te temi ke nā folahi te ʼu tuʼakoi ʼo te palatiso ki te malamanei katoa. (Sen. 1:28; 2:15) Neʼe mole tuku age e te ʼAtua kia nāua he ʼu meʼa ʼe mole ʼaoga. Kae neʼe ina tuku age kia nāua te ʼāteaina lahi ke nā fai ai he ʼu tonu. Koteā la he tahi age meʼa ʼe tou loto kiai?

3. Koteā koa ʼaē neʼe feala ke tokoni kia Atama ke ina fakaʼaogaʼi fakapotopoto tona ʼāteaina moʼo fai ʼo he ʼu tonu ʼe lelei?

³ ʼIo, ʼi te maʼu e Atama ia te pilivilesio ke ina fai tana ʼu tonu, neʼe mole faka ʼuhiga ia ʼe fua lelei anai te ʼu tonu fuli ʼaē ka ina fai. Ko tana ʼāteaina ʼaia neʼe kau kiai mo tona ʼu maʼua. Neʼe feala hana ako ʼi tana fakalogo ki tana Tāmai pea mo ina sioʼi Tana ʼu gāue, pea neʼe foaki age e te ʼAtua kia Atama te ʼatamai poto, ke feala ai hana maʼuliʼi te ʼu meʼa fuli ʼaē ʼe ina akoʼi. ʼUhi ʼaē neʼe fakatupu ia Atama “ ʼaki te paki ʼo te ʼAtua,” koia neʼe tonu ai ke ʼiloga ia te ʼu kalitate ʼo te ʼAtua mokā ʼe ina fai he ʼu puleʼaki. ʼE mahino ia, neʼe feiā anai tana aga mo ka na pau neʼe loto fakafetaʼi moʼoni ki te ʼu meʼa fuli ʼaē neʼe fai e te ʼAtua maʼa ia pea mo ka na pau neʼe loto ia ke leleiʼia ia e te ʼAtua.—Sen. 1:26, 27; vakaʼi ia Soane 8:29.

4. (a) Neʼe pulihi koa e te fakatotonu fakaʼatua ia te ʼāteaina ʼa Atama? (b) He koʼe koa ʼe ʼaoga te lao ʼaia?

⁴ ʼI tana fia fakamanatuʼi age ʼaē ki te tagata ʼe tonu ke fakalogo ki tona Tupuʼaga, neʼe tuku age e Sehova kia ia te lao ʼaenī: “Ki te ʼu fuʼu ʼakau fuli ʼo te ʼōloto ʼe feala tau kai anai kiai ʼo aʼu ki tau mākona. Kae ki te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi, ʼe mole tonu anai ke ke kai kiai, heʼe ko te ʼaho ʼaē ka ke kai anai kiai, e ke mate moʼoni anai.” (Sen. 2:16, 17) Ko te lao ʼaia neʼe ina pulihi ai koa te ʼāteaina ʼa te tagata? Kailoa. Neʼe maʼu e Atama te ʼāteaina ke ina filifili peʼe fakalogo peʼe kailoa. Ko te tapu ʼaia neʼe mole ko he kavega. Neʼe mohu tana meʼa kai, tatau aipe peʼe mole gafua tana kai ki te ʼakau ʼaia. Kae, neʼe tonu ke mahino kiai, ko te kele ʼaē ʼe maʼuli ai ʼe ʼa te ʼAtua pea ko ia te Tupuʼaga neʼe ko te Pule totonu ʼo te ʼu meʼa fuli ʼaē neʼe ina fakatupu.—Pes. 24:1, 10.

5. (a) Neʼe feafeaʼi te pulihi e Atama mo Eva tonā ʼāteaina faka kolōlia? (b) Koteā te meʼa ʼaē neʼe hoko, pea koteā tona ʼu fua kia tatou?

⁵ Kae, koteā koa te meʼa ʼaē neʼe hoko? ʼI tana mānumānu, neʼe kākāʼi e te ʼaselo ia Eva ʼo hā kia ia ohage ko he tagata fai tokoni moʼoni, kae ko tana ʼu palalau neʼe fakafeagai ia ki te finegalo ʼo te ʼAtua. Neʼe mole kei fakalogo leva Atama ki tana Tāmai, kae neʼe ina muliʼi ia Eva ʼi tana talagataʼa. ʼI tanā kaihaʼa te meʼa ʼaē ʼe mole ʼa nāua, neʼe puli ai ia Atama mo Eva te ʼāteaina faka kolōlia. Neʼe liliu leva te agahala ko tonā pule pea, ohage pe ko te fakatokaga ʼaē neʼe fai age e te ʼAtua, neʼe fakatūʼa moʼoni ia nāua ki te mate. Pea koteā koa te tōfiga ʼaē neʼe nā tuku ki tanā fānau? Ko te agahala, ʼaē ʼe hā lelei ʼi te holi ʼaē ki te fai ʼo te meʼa ʼe kovi, pea mo te vaivai ʼaē ʼe hoko ai mo te mahaki pea mo te matuʼa pea mo te hifohifo māmālie ʼo te sino. ʼE toe kau foki kiai mo te mate. Ko te holi māhani ʼo te loto ki te ʼu meʼa ʼaē ʼe kovi, neʼe toe kovi ʼaupito ʼaki te fakahala ʼa Satana, ʼaē neʼe tupu ai te sosiete fakatagata ʼe maʼuli faka temi pe. ʼI kehekehe leva mo te ʼāteaina ʼaē neʼe tuku age e te ʼAtua ki te tagata ʼi te kamataʼaga!—Lom. 5:12; Sopo 14:1; Fkhā. 12:9.

ʼE Tou Maʼu ʼIfea Te ʼĀteaina

6. (a) ʼE tou maʼu koa ʼifea te ʼāteaina moʼoni? (b) Ko te faʼahiga ʼāteaina fea ʼaē neʼe palalau kiai ia Sesu ia Soane 8:31, 32?

⁶ ʼAki te ʼu meʼa ʼaē ʼe hoko ʼi te temi ʼaenī, ʼe mole tou punamaʼuli ki te holi ʼa te hahaʼi ki he ʼāteaina lahi. Kae ʼe tou maʼu koa ʼifea te ʼāteaina moʼoni? Neʼe ʼui fēnei e Sesu Kilisito: “Kapau ʼe koutou nonofo ʼi taku folafola, ko koutou ko ʼaku ʼu tisipulo moʼoni, pea ʼe koutou ʼiloʼi ai te moʼoni, pea ko te moʼoni ʼe ina faka ʼāteaina anai koutou.” (Soane 8:31, 32) Ko te ʼāteaina ʼaenī ʼe mole ko te ʼāteaina ʼaē ʼe faka tuʼakoi, ʼaē ʼe fakaʼamu kiai te hahaʼi ke nātou fakahifo he pule faka politike peʼe ko he puleʼaga moʼo fetogi ʼo he tahi age. Kae, ko te ʼāteaina ʼaē neʼe talanoa kiai ia Sesu ʼe ina tauʼi te ʼu faigataʼaʼia ʼo te hahaʼi. Neʼe talanoa ia Sesu ki te faka ʼāteaina mai te agahala, mo te maʼuli popūla ki te agahala. (Vakaʼi ia Soane 8:24, 34-36) Koia kapau ʼe liliu he tahi ko he tisipulo moʼoni ʼa Sesu Kilisito, ʼe hoko ai te fetogi maʼuhiga ʼi tona maʼuli, ko he ʼāteaina.

7. (a) ʼE faka ʼuhiga feafeaʼi koa tatatou faka ʼāteaina mai te agahala ʼi te temi ʼaenī? (b) Moʼo maʼu ʼo te ʼāteaina ʼaia, koteā koa te meʼa ʼaē ʼe tonu ke tou fai?

⁷ ʼE mole faka ʼuhiga leva ia ko te kau Kilisitiano moʼoni ʼe mole kei nātou tau ʼi te temi nei mo te holi ʼaē ki te agahala. Kailoa ia, ʼe tonu ke nātou tauʼi te holi ʼaia. (Lom. 7:21-25) Kae kapau ʼe muliʼi fakalelei e he tahi te ʼu akonaki ʼa Sesu ʼi tona maʼuli, ʼe mole liliu anai ia ko he tagata popūla ki te agahala. ʼE mole toe fakalogo anai ki te agahala ohage ko he fakalogo ki te ʼu fakatotonu ʼa he hau. ʼE mole toe popūla anai ki he maʼuli ʼe mole hona fua pea ʼe fakatupu tuʼania ki tona leʼo ʼo loto. ʼE fakafiafia anai ia muʼa ʼo te ʼAtua, ʼaki tona leʼo ʼo loto kua maʼa, koteʼuhi kua fakamolemole e te ʼAtua tana ʼu agahala ʼāfea ʼi tana tui ʼaē ki te sakilifisio ʼo Kilisito. Ko te ʼu holi ʼo te agahala e lagi faiga anai ke hoko, kae kapau ʼe ina manatuʼi tuʼumaʼu te ʼu akonaki maʼa ʼa Kilisito, ʼe ina fakahā anai ʼe mole kei popūla ia ki te agahala.—Lom. 6:12-17.

8. (a) Koteā te tahi ʼāteaina ʼe foaki mai kia tatou e te lotu faka Kilisitiano moʼoni? (b) Koteā koa tona pikipikiga mo te aga ʼaē ʼe tou fai ki te ʼu takitaki pule ʼo te malamanei?

⁸ ʼI totatou ʼuhiga Kilisitiano, ʼe tou maʼu te ʼāteaina lahi. Neʼe kua ʼāteaina tatou mai te ʼu akonaki hala pea mo tonā ʼu ikuʼaga, ʼo feiā mo te maʼuli popūla ki te mataku ʼaē ki te ʼu meʼa fakatemonio, pea mo te agahala. Ko te ʼu moʼoni fakatalakitupua ʼo ʼuhiga mo te ʼaluʼaga ʼo te kau mate pea mo te fakatuʼuake, neʼe nātou faka ʼāteaina tatou mai te tuʼania fakavale ki te mate faka tuʼutāmaki, ʼaē ʼe nātou fakaneke te hahaʼi ke mole nātou fakalogo ki ʼonatou leʼo ʼo loto. ʼAki te ʼiloʼi ʼaē ko te ʼu puleʼaga fakatagata heʼe haohaoa ʼe fetogi anai e te Puleʼaga faitotonu ʼo te ʼAtua, ʼe toe faka ʼāteaina ai tatou mai te loto heʼe ʼamanaki. Kae ko te taʼi ʼāteaina ʼaia, ʼe mole ina fakagafua ke tou meʼa noaʼi te ʼu lao peʼe ke mole tou fakaʼapaʼapa ki te ʼu puleʼaga, ʼuhi heʼe pulihi anai te tuʼu ʼaenī.—2 Pe. 2:16, 17; Tito 3:1, 2.

9. (a) ʼAki tona ʼofa, e feafeaʼi te tokoni ʼa Sehova ke tou maʼu he ʼāteaina lahi ʼi te temi nei? (b) Mokā tou fai he ʼu tonu, e feafeaʼi koa hatatou fakahā, ʼe tou mahino lelei ki te ʼu ikuʼaga ʼo te aga ʼa Atama ʼi tana fakaʼaogaʼi fakavale tona ʼāteaina?

⁹ ʼE mole tuku tatou e Sehova ke tou fakafuafua, ʼaki te meʼa ʼaē ʼe hoko pea mo te faihala, pe ko te faʼahiga maʼuli fea ʼaē ʼe lelei. ʼE ina ʼiloʼi totatou natula, te meʼa ʼaē ka ina ʼaumai anai te fīmālie moʼoni pea mo te aga ʼaē ʼe mata feʼauga mo tatou, pea mo te meʼa ʼaē ka ina foaki mai he ʼu fua lelei heʼegata. ʼE ina toe ʼiloʼi foki mo te temi ʼaē ka ina fakahoko ai tona finegalo, koia ʼaē, ʼe ina ʼiloʼi lelei te ʼu gāue ʼaē ʼe tonu ke tou kau tāfito kiai. ʼE molemo puli kia te ia te ʼu manatu pea mo te ʼu gāue ʼe feala ke nātou fakahehema he tagata peʼe nātou fakatupu kovi ki tanā ʼu felogoi mo niʼihi, peʼe puli ai ia mo ni ʼu tapuakina ʼe tuku mai anai e te Puleʼaga ʼo te ʼAtua. ʼAki he loto manavaʼofa ʼe ina fakahā mai kia tatou te ʼu meʼa fuli ʼaia ʼaki te Tohi-Tapu pea mo tana kautahi fakahāhā. (Ka. 5:19-23; Maleko 13:10; vakaʼi 1 Timoteo 1:12, 13) Ki muli age, ʼa tatou leva te fakaʼaogaʼi ʼo te loto faʼitaliha ʼaē neʼe tuku mai e te ʼAtua moʼo fili ʼo te aga ʼaē ka tou fai. Kapau neʼe tou tali te meʼa ʼaē ʼe fakamatala e te Tohi-Tapu ʼo ʼuhiga mo te pulihi e Atama ia te ʼāteaina ʼaē neʼe foaki age ki te malamanei, ʼe tou tokakaga anai ʼo fai he ʼu puleʼaki fakapotopoto. ʼE tou fakahā ai anai ko te meʼa ʼaē ʼe maʼuhiga ʼi totatou maʼuli, ko totatou vāhaʼa lelei mo Sehova.

Ko Te Kumi ʼo He Tahi ʼĀteaina

10. Koteā te faʼahiga ʼāteaina ʼaē neʼe faiga ke maʼu e ʼihi ʼe nātou lau ko nātou ko te kau Kilisitiano?

¹⁰ ʼI ʼihi temi ko ʼihi talavou neʼe taupau e te ʼu mātuʼa kua Fakamoʼoni kia Sehova, ʼo feiā aipe mo ʼihi kei liliki, kua nātou kamata holi ki he tahi age faʼahiga ʼāteaina. E lagi hage kia nātou ʼe lelei te mālama, pea ʼi te lahi ʼo tanatou fakakaukau ki te meʼa ʼaia, pea ʼe toe lahi ai foki mo tanatou holi ʼaē ke nātou fai te ʼu meʼa ʼaē ʼe fai e te hahaʼi ʼo te mālama. E lagi ʼe mole nātou fakatuʼutuʼu ke nātou fakaʼaogaʼi te toloke, mo ʼinu kava peʼe ke nātou fai te folonikasio. Kae ʼe nātou kamata fakatahi mo te tamaliki ʼaē ʼe nātou kaugā ako peʼe ko ʼonatou ʼu kaugā gāue ʼaē ʼe manako ki te malamanei. ʼE mahino ia, ʼe nātou loto ke tali nātou e ʼonatou ʼu kaumeʼa foʼou, koia ʼaē ʼe nātou faʼifaʼitakiʼi ai ʼanatou ʼu palalau pea mo ʼanatou ʼu aga.—3 Soane 11.

11. ʼE haʼu koa maifea, te holi ʼa ʼihi Kilisitiano ke nātou kumi te faʼahiga ʼāteaina ʼaia?

¹¹ ʼI ʼihi temi, ko he tahi age, ʼe ʼui maʼana ʼe kaugana ia kia Sehova, ʼe ina taki pea mo fakaneke nātou ke nātou faʼifaʼitakiʼi te aga ʼa te hahaʼi ʼo te mālama. Ko te meʼa la ʼaia neʼe fai e Satana ʼi tana fakahalaʼi ia Eva, pea mo te fakaneke ʼaē e Eva ia Atama ke muli age ia ia. Ko te meʼa ʼaia neʼe toe hoko pe ki te ʼu ʼuluaki Kilisitiano, pea ʼe toe hoko pe ʼi te temi nei. Ko te taʼi hahaʼi ʼaia ʼe nātou fia fai ki te ʼu holi ʼo te kakano pea mo holi ʼaupito ki te ʼu lelei fakasino. ʼE nātou fakaneke niʼihi “ke nātou fakafīfīmālie.” ʼE nātou fakapapau age te ʼāteaina kae ʼe kaugana ia nātou totonu ki te ʼu aga fakahehema.’—2 Pe. 2:18, 19.

12. (a) Koteā te ʼu fua fakaʼofaʼofa ʼo te aga ʼa te mālama? (b) Kapau ʼe mahino kia nātou ʼaē ʼe nātou fai te ʼu aga ʼaia koteā anai tona ʼu ikuʼaga, he koʼe ʼe nātou haga fai te faʼahi ʼaia?

¹² Ko te ʼu fua ʼo te taʼi aga ʼaia ʼe mole lelei. Ko te folonikasio ʼe ina fakatupu ia te ʼu faigataʼaʼia ʼi te ʼaluʼaga ʼo te ʼu fakakaukau. ʼE feala foki ke tupu ʼaki ai he ʼu mahaki, mo he faitatama ʼo he taʼahine kae ʼe mole loto kiai peʼe ko he mavete ʼo he taumatuʼa. (Taag. 6:32-35; 1 Ko. 6:18; 1 Tes. 4:3-8) Ko te fakaʼaogaʼi ʼo te toloke ʼe fakatupu ʼita, ʼo tupu ai te faigataʼa ʼo te palalau ʼo feiā mo te sio pea mo te mānava, ʼe toe fakatupu minomino, mo sio ki he ʼu meʼa ʼe hā ka mole moʼoni pea ʼe tupu ai mo te mate. (Vakaʼi Tāʼaga Lea 23:29-35.) Ko ia ʼaē ʼe toloke ʼe liliu anai ʼo popūla ki te meʼa ʼaia, pea ʼe feala ke ina matehi he tahi moʼo fakafimālieʼi ʼo tona fia toloke. ʼI te agamāhani, ko nātou ʼaē ʼe nātou fai te taʼi aga ʼaia, ʼe nātou ʼiloʼi, te meʼa ʼaē ʼe feala ke hoko kia nātou. Kae ʼi tanatou holi ʼaē ki te ʼu logo lelei mo te ʼu holi ʼo te kakano, ʼe mole nātou fia tokagaʼi ai tonā ʼu ikuʼaga. ʼI tanatou manatu ʼe ko te ʼāteaina pe ʼaia, kae ka hoki tauhala pe, pea hoki mahino leva kia nātou ʼe nātou popūla ki te agahala, pea ʼe ko he pule agakovi ia te agahala! Ko tatatou fakakaukau ki te ʼu meʼa fuli ʼaia ʼi te temi ʼaenī, ʼe feala ai hatatou hāo mai te ʼu meʼa ʼaia.—Kal. 6:7, 8.

Te Faʼahi ʼAē ʼe Kamata Ai Te ʼu Faigataʼaʼia

13. (a) ʼI te agamāhani ʼe tupu feafeaʼi koa te ʼu holi ʼaē ʼe iku ai ki te ʼu faigataʼaʼia ʼaia? (b) Ke feala hatatou mahino pe ko ai te ʼu “fakakaugā kovi,” ko te manatu koa ʼaē ʼa ai ʼe tonu ke tou ʼiloʼi? (c) Lolotoga takotou tali ki te ʼu fehuʼi ʼaenī ʼe tuʼu ʼi te palakalafe, koutou fakahā tāfito te manatu ʼa Sehova. Koutou vakaʼi takitahi te ʼu fehuʼi.

¹³ Tou fakakaukauʼi muʼa pea mo tou vakaʼi peʼe kamata ʼifea te ʼu faigataʼaʼia. ʼE fakamahino fēnei mai e te Tohi-Tapu: “ ʼE ʼahiʼahiʼi te tagata takitokotahi mokā ina tuku ia ia ke taki pea mo kākāʼi e tona holi ʼo ia totonu. Pea ko te holi, ka fakatupu, pea ʼe ina fānauʼi te agahala, pea ko te agahala, ka kua ʼosi fai, pea ʼe ina fakatupu te mate.” (Sake 1:14, 15) Ka koteā koa ʼaē ʼe ina fakatupu te ʼu holi ʼaia? Ko te meʼa ʼaē ʼe fafaga ʼaki tatatou fakakaukau, pea ʼe hoko tāfito te faʼahi ʼaia mokā ʼe tou fakatahi mo te hahaʼi ʼaē ʼe mole nātou muliʼi te ʼu fakatuʼutuʼu ʼa te Tohi-Tapu. ʼE moʼoni, ʼe tou ʼiloʼi fuli pe ʼe tonu ke tou tekeʼi “te ʼu faka kaugā kovi.” Kae koʼeni te fehuʼi tāfito, Ko te ʼu fakakaugā fea ʼaē ʼe kovi? Koteā koa te manatu ʼa Sehova ʼo ʼuhiga mo te fehuʼi ʼaia? Ko tatatou fakakaukauʼi te ʼu fehuʼi pea mo te ʼu vaega ʼaenī ʼe tokoni anai kia tatou ke tou maʼu te ʼu manatu ʼaē ʼe lelei:

Kapau ʼe hage ʼe agalelei ni hahaʼi, ʼe faka ʼuhiga koa ʼe ko he ʼu fakakaugā lelei? (Vakaʼi ia Senesi 34:1, 2, 18, 19.)

Ko te ʼu palalau peʼe ko te ʼu fakahuʼahuʼa ʼaē ʼe nātou fai mai ʼe feala koa ke fakahā ʼaki ai, ʼe tou kaumeʼa lelei mo nātou peʼe kailoa? (Ef. 5:3, 4)

ʼE tonu koa ke tou tuʼania mokā ʼe hā lelei mai ʼe mole tatau tanatou tauhi mo tatou ʼo ʼuhiga mo te finegalo ʼo te ʼAtua? (Vakaʼi ia 1 Kolonito 15:12, 32, 33.)

Koteā anai te manatu ʼa Sehova mo kapau ʼe tou fakatotonu ke tou fakakaugā mo ni hahaʼi ʼe mole ʼoʼofa kia te ia? (Vakaʼi ia 2 Fakamatala 19:1, 2.)

Tatau aipe, peʼe tou gāue, peʼe tou ʼolo ʼo ako mo ni hahaʼi ʼe mole tui, e feafeaʼi hatatou fakahā ʼe mole tou fakakaugā mo nātou? (1 Pe. 4:3, 4)

Ko te televisio ʼo feiā mo te ʼu tohi, te ʼu nusipepa pea mo te ʼu sulunale ʼaē ʼe tou lau ʼe nātou fakakaugā tatou mo niʼihi hahaʼi. Ko te ʼu faʼahiga ʼata fea pea mo te ʼu tohi fea ʼe tonu ke tou tokakaga kiai ia ʼaho nei? (Taag. 3:31; Is. 8:19; Ef. 4:17-19)

ʼAki tatatou fili ʼo tatatou fakakaugā, e feafeaʼi koa ia tatou ia mata ʼo Sehova? (Pes. 26:1, 4, 5; 97:10)

14. Ko te ʼāteaina taulekaleka fea ʼaē ʼe ʼamanaki kiai ia nātou ʼaē ʼe nātou maʼuliʼi fakalelei ʼi te temi nei te ʼu tokoni ʼa te Folafola ʼo te ʼAtua?

¹⁴ Ko te Tuʼu Foʼou ʼaē neʼe fakapapau mai e te ʼAtua kua ʼamanaki nei ke hoko. ʼAki Tona Puleʼaga, ʼe faka ʼāteaina anai te malamanei katoa mai te fakahala ʼa Satana pea mo tana tuʼu agakovi katoa. ʼAki te temi, ko te ʼu fua fuli ʼo te agahala ʼe pulihi anai. ʼE foaki age anai te maʼuli heʼegata kia nātou ʼi te Palatiso. Ki muli age, ko te ʼāteaina moʼoni, ʼaē ʼe ʼalutahi mo te “laumālie ʼo Sehova” ʼe maʼu anai e tana ʼu meʼa fuli ʼaē neʼe fakatupu. (2 Ko. 3:17) ʼE ko he aga fakapotopoto koa hatatou pulihi te ʼu meʼa fuli ʼaenī ʼi hatatou meʼa noaʼi te tokoni ʼa te Folafola ʼa te ʼAtua ʼi te temi nei? ʼOfa pe ke tou fakahā fakalelei, ʼaki tatatou faʼahiga fakaʼaogaʼi ʼo te ʼāteaina faka Kilisitiano ia ʼaho nei, ʼe tou loto moʼoni ke tou “maʼu te ʼāteaina faka kolōlia ʼo te fānau ʼa te ʼAtua.”—Lom. 8:21.

Toe Fakamanatu

● Ko te ʼāteaina feafeaʼi koa ʼaē neʼe maʼu e te ʼuluaki taumatuʼa? Koteā koa ʼaē ʼe kehekehe ai mo te ʼāteaina ʼaē ʼe ʼiloʼi e te hahaʼi ʼi te temi ʼaenī?

● Ko te ʼāteaina fea koa ʼaē ʼe maʼu e te kau Kilisitiano moʼoni, ʼo kehekehe mo te mālama? E feafeaʼi koa te maʼu ʼo te ʼāteaina ʼaia?

● Koteā te ikuʼaga kia nātou ʼaē ʼe nātou fia kumi te ʼāteaina ʼo te mālama ʼaenī?

● He koʼe koa ʼe maʼuhiga ʼaupito ke tou fakamamaʼo mai te ʼu “fakakaugā kovi?” ʼO mole hage ko Atama, ko ai ʼaē ʼe tou fakalogo ki ai mokā tou fai he ʼu tonu ʼo ʼuhiga mo te ʼu meʼa ʼaē ʼe kovi?