Te ʼu Tali Ki Te ʼu Fehuʼi Fakatohi-tapu
Kotea te ʼu lelei ʼe tou maʼu mai te mate ʼa Sesu?
Neʼe fakatupu e te ʼAtua ia te tagata ke maʼuli fimalie mo haohaoa ʼi te kele ʼo talu ai. Kaʼe neʼe talagataʼa ia Atama ki te Tupuʼaga, koia neʼe mate ai. Pea ko tatou ʼaeni ko tona hologa, ʼe tou mamate ʼuhi ko ia. (Loma 5:8, 12; 6:23) Neʼe fekauʼi mai e Sehova tona ʼAlo ko Sesu ki te kele, ke haʼu ʼo mate ke feala ke tou toe maʼu ia te maʼuli heʼe gata.—Lau ia Soane 3:16.
Neʼe mate ia Sesu ke feala ki te malamanei ke natou toe maʼu ia te maʼuli heʼe gata. ʼE kotou lava fakakaukauʼi pe feafeaʼi anai ia te maʼuli heʼe gata ʼi te kele?
ʼAki te mate ʼa Sesu, kua feala ke fakamolemole ʼatatou agahala pea mo tou maʼu ia te maʼuli heʼe gata. ʼE fakamatalatala ʼi te Tohi-Tapu peʼe feafeaʼi anai ia te maʼuli moka puli anai ia te vaivai matuʼa, mo te mahaki pea mo te mate.—Lau ia Esaia 25:8; 33:24; Apokalipisi 21:4, 5.
ʼE tonu ke feafeaʼi ia te fakamanatu ʼo te mate ʼa Sesu?
ʼI te po ʼi muʼa ʼo tana mate, neʼe kole e Sesu ki tana kau tisipulo ke natou fakamanatu tona mate. Neʼe ina fakaha age kia natou ia tona faʼahiga fai. Ka tou fakamanatu feia ia te mate ʼa Sesu ʼi te taʼu fuli, ʼe tou manatuʼi ai te toe ʼofa lahi ʼo Sesu pea mo Sehova ki te malamanei.—Lau ia Luka 22:19, 20; 1 Soane 4:9, 10.
ʼI te taʼu ʼaeni, ʼe fai anai ia te ʼAho Fakamanatu ʼo te mate ʼa Sesu ʼi te Monite ʼaho 14 ʼo Apelili, ʼi te kua ʼosi to ʼo te laʼa. ʼE fakaafe koutou ke kotou kau ki ai pea mo te kau Fakamoʼoni ʼa Sehova ʼo tokotou kolo.—Lau ia Loma 1:11, 12.