ʼE Hāofaki Tatou e Sesu—ʼO Feafeaʼi?

“ ʼE hāofaki tatou e Sesu!” “Ko Sesu totatou Hāofakiʼaga!” ʼE lahi te ʼu fenua ʼi te malamanei, ko te ʼu palalau ʼaia ʼe tohi ʼi te ʼu kaupā ʼo te ʼu falefata pea mo te tahi ʼu koga meʼa ʼe hahaʼi ai. ʼE tui papau te toko lauʼi miliona hahaʼi ko Sesu ʼe ko tonatou Hāofakiʼaga. Kapau ʼe koutou fehuʼi age kia nātou, “ ʼE hāofaki feafeaʼi tatou e Sesu?” ʼe lagi nātou tali fēnei atu anai, “Neʼe mate ia Sesu maʼa tatou” peʼe “neʼe mate ia Sesu maʼa tatatou ʼu agahala.” Ei, ko te mate ʼo Sesu ʼe ina faka fealagia ke hāofaki tatou. Kae ʼe lava feafeaʼi ki te mate ʼo he tagata ke ina totogi te ʼu agahala ʼa te tokolahi? Kapau ʼe fehuʼi atu kia koutou, “ ʼE lava hāofaki feafeaʼi tatou e te mate ʼo Sesu?” koteā anai takotou tali?

ʼE FAIGAFUA te tali ʼa te Tohi-Tapu ki te fehuʼi ʼaia pea ʼe matala lelei pea mo ʼaoga. Kae ke kita mahino kiai, ʼe tonu muʼa ke tou fakamoʼoni ko te maʼuli pea mo te mate ʼo Sesu ʼe ko te puleʼaki pe ʼaia e tahi ki te fihifihia. Hoki tou mahino lelei ai leva ki te maʼuhiga ʼaupito ʼo te mate ʼo Sesu.

ʼI te foaki e Sesu tona maʼuli, neʼe fakatokatoka ai e te ʼAtua te fihifihia neʼe lagaʼi ʼi te agahala ʼa Atama. ʼI meʼa fakaʼofaʼofa neʼe hoko ʼuhi ko te agahala! Neʼe haohaoa te ʼuluaki tagata pea mo tona hoa ko Eva, pea ko tonā ʼapi neʼe ko te ʼōloto taulekaleka ʼi Eteni. Neʼe foaki age e te ʼAtua tanā gāue lelei, ko te tokaga ki tonā ʼōloto. Neʼe tonu ke nā puleʼi ʼaki te ʼofa ia te ʼu meʼa maʼuli fuli ʼi te kele. Pea ʼaki te tuputupu ʼo te hahaʼi pea mo tanatou fakafonu te kele, neʼe tonu ke nātou fakalahi te palatiso ki te ʼu potu taupotu ʼo te kele. (Senesi 1:28) ʼI gāue fakaofoofo pea mo fakafiafia neʼe tuku age kia nāua! Tahi ʼaē meʼa, neʼe tonu ke nā feʼofaʼaki. (Senesi 2:18) Neʼe nā maʼu ia meʼa fuli. Neʼe foaki age kia nāua ia te maʼuli heʼegata pea mo fakafiafia.

ʼE mata faigataʼa hakita fakakaukauʼi pe koʼe neʼe agahala ia Atama mo Eva. Kae neʼe agatuʼu te ʼuluaki taumatuʼa kia ia totonu ʼaē neʼe ina fakatupu ia nāua—ia Sehova ʼAtua. Ko te laumālie fakapulipuli ko Satana te Tevolo neʼe ina fakaʼaogaʼi te gata moʼo kākāʼi ia Eva ke talagataʼa kia Sehova, pea neʼe mulimuli ia Atama ki tona hoa.—Senesi 3:1-6.

Neʼe kua ʼiloʼi papau pe koteā ʼaē ka fai anai e te Tupuʼaga kia Atama mo Eva. Neʼe kua ina fakahā te ʼu ikuʼaga ʼo te talagataʼa, he neʼe ina ʼui fēnei: “Ko te ʼu fuʼu ʼakau fuli ʼo te ʼōloto ʼe feala anai hau kai ki ai ʼo aʼu ki tau mākona. Kae ki te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi, ʼe mole tonu anai ke ke kai kiai, heʼe ko te ʼaho ʼaē ka ke kai anai kiai, ʼe ke mate moʼoni ai anai.” (Senesi 2:16, 17) Ko te fehuʼi maʼuhiga neʼe tonu leva ʼi te temi ʼaia ke tali kiai.

Neʼe Tau Te Malamanei Mo Te Fihifihia Lahi

Neʼe fakatupu e te agahala te fihifihia lahi ki te malamanei. ʼI te kamataʼaga neʼe maʼuli haohaoa ia Atama. Koia neʼe lava maʼuli haohaoa ai tana fānau ʼo talu ai, kae neʼe agahala ia Atama ʼi muʼa ʼo tana maʼu fānau. Ko te malamanei katoa neʼe mole heʼeki tupu ʼi te temi ʼaē neʼe fai age te tautea ʼaenī: “ ʼI te kakava ʼo tou fofoga ʼe ke kai anai te pane, ʼo aʼu ki tau toe liliu ki te kele, he neʼe toʼo koe mai ai. Heʼe ke efu pea ʼe ke toe liliu anai ki te efu.” (Senesi 3:19) Koia ʼi te temi neʼe agahala ai Atama pea neʼe mate ai, ohage pe ko te meʼa ʼaē neʼe ʼui age e te ʼAtua kia ia, neʼe ina tuku te tautea ʼo te mate ki te malamanei katoa.

Koia ki muli age neʼe tohi fēnei e te ʼapositolo ko Paulo: “Aki he tagata e tahi [ia Atama] nee hu mai te agahala ki te malama-nei pea aki te agahala ia te mate, pea nee ausia e te mate te tagata fuape: pea tahi, kua agahala fuli.” (Loma 5:12) Ei, ʼuhi ko te agahala olisinale, ko te fānau ʼaē neʼe tonu ke tutupu haohaoa age ki he maʼuli heʼegata, kua tau leva mo nātou te mahaki, te matutuʼa, pea mo te mate.

ʼE lava ʼui e he tahi: “ ʼE mole ko hamatou hala, he neʼe mole ko mātou ʼaē neʼe talagataʼa ki te ʼAtua, ko Atama pe. He koʼe ʼe pulihi anai tamatou ʼamanaki ki he maʼuli heʼegata pea mo fiafia?” ʼE tou ʼiloʼi kapau ʼe fakatotonu e he telepinale ke pilisoniʼi he foha ʼo he tāmai ʼuhi he neʼe kaihaʼa e tana tāmai he motokā, ʼe lava meo te foha ʼo ʼui fēnei: “ ʼE mole tonu te meʼa ʼaia! Neʼe mole ʼau fai he meʼa ʼe kovi.”—Teutalonome 24:16.

ʼI tana fakahiga ki te agahala te ʼuluaki tagata pea mo tona ʼohoana, neʼe lagi ʼui e Satana ʼe mole maʼu anai e te ʼAtua he puleʼaki kiai. Neʼe fai e te Tevolo tana aga kovi ʼi te kamata pe ʼo te hisitolia ʼo te malamanei—he neʼe heʼeki tupu he fānau. ʼI te temi ʼaē neʼe agahala ai Atama, neʼe malaga ai te fehuʼi maʼuhiga, koteā anai te meʼa ka fai e Sehova maʼa te fānau ʼa Atama mo Eva?

Neʼe fai e Sehova ʼAtua te meʼa ʼaē ʼe totonu. Neʼe ʼui fēnei e te tagata faitotonu ko Eliu: “ ʼE mamaʼo te ʼAtua moʼoni ʼi te fai ʼo he meʼa ʼe kovi, pea ʼe mole fai e te Māfimāfi he meʼa ʼe mole faitotonu!” (Sopo 34:10) Pea ʼo ʼuhiga mo Sehova, neʼe tohi fēnei e te polofeta ko Moisese: “Ko te Maka, ʼe haohaoa tana gāue, heʼe ko tona ʼu ala fuli ʼe faitotonu. ʼAtua ʼo te agatonu, ʼaē ʼe mole ia te ia te heʼe faitotonu; ʼe faitotonu pea mo totonu ia.” (Teutalonome 32:4) Ko te puleʼaki ʼaē neʼe fai e te ʼAtua moʼoni ki te fihifihia ʼaē neʼe hoko ʼuhi ko te agahala ʼa Atama, neʼe mole ina pulihi tatatou fealagia ʼaē ke tou maʼu te maʼuli heʼegata ʼi te palatiso ʼi te kele.

Neʼe Fai e Te ʼAtua Te Puleʼaki Haohaoa

Tou vakaʼi te puleʼaki neʼe fai e te ʼAtua ʼi tana tauteaʼi ia Satana te Tevolo. Neʼe ʼui fēnei e Sehova kia Satana: “ ʼE ʼau tuku anai he fehiʼa ia koe mo te fafine [te kautahi ʼa te ʼAtua ʼi selo], ʼi tou hāko [te malamanei ʼaē ʼe puleʼi e Satana] pea mo tona hāko [Sesu Kilisito]. Pea ʼe ina fakavolu anai koe [ia Satana] ʼi tou ʼulu pea ʼe ke fakavolu anai ia ia ʼi tona muliʼi vaʼe [te mate ʼa Sesu].” (Senesi 3:15) ʼI te ʼuluaki lea faka polofeta ʼaia ʼa te Tohi-Tapu, neʼe talanoa ia Sehova ki tana fakatuʼutuʼu ʼaē ke ina fekauʼi mai tona ʼAlo ko Sesu mai selo ke haʼu ʼo maʼuli ʼi te kele, ko te tagata haohaoa—pea ke fakavolu ʼi tona muli vaʼe—ko tona faka ʼuhiga ke mate ai.

He koʼe neʼe fakamaʼua e te ʼAtua ke mate te tagata haohaoa? Neʼe koteā te tautea neʼe fakahā e te ʼAtua mo kapau ʼe agahala ia Atama? Neʼe mole ko te mate koa? (Senesi 2:16, 17) Neʼe tohi fēnei e te ʼapositolo ko Paulo: “Ko te u totogi o te agahala e ko te mate.” (Loma 6:23) Neʼe totogi e Atama tana agahala ʼaki te mate. Neʼe foaki age te maʼuli, kae neʼe ina filifili ke agahala, pea neʼe tautea ai ki te mate ʼuhi ko tana agahala. (Senesi 3:19) E feafeaʼi ki te tautea ʼaē neʼe tau mo te malamanei katoa ʼuhi ko te agahala ʼaia? Neʼe ʼaoga ke mate he tahi moʼo fakamolemole tanatou ʼu agahala. Kae ko ai koa ka mate moʼo ʼuʼufi te ʼu talagataʼa ʼo te malamanei katoa?

Ko te Lao ʼa te ʼAtua ki te puleʼaga ʼāfea ko Iselaele, neʼe ina fakamaʼua “he nefesi ki he nefesi [peʼe ko he maʼuli ki he maʼuli].” (Ekesote 21:23) ʼO mulimuli ki te pelesepeto faitotonu ʼaia, ko te mate ʼaē neʼe tonu ke ina ʼuʼufi te ʼu agahala ʼa te malamanei, ʼe tonu ke tatau tona maʼuhiga mo te meʼa ʼaē neʼe pulihi e Atama. Neʼe hoki feala pe ki te mate ʼo he tahi tagata haohaoa ke ina totogi te agahala. Neʼe ko Sesu te tagata ʼaia. ʼIo ko Sesu neʼe “ko he totogi ʼe tatau,” moʼo hāofaki te hōloga katoa ʼo Atama.—1 Timoteo 2:6, MN; Loma 5:16, 17.

Neʼe Maʼuhiga ʼAupito Te Mate ʼo Sesu

Neʼe mole he ʼaoga ʼo te mate ʼo Atama, neʼe tonu ke mate he neʼe agahala. Kae ko te mate ʼo Sesu neʼe maʼuhiga ʼaupito ʼuhi he neʼe mate kae mole hana agahala. Neʼe tali e Sehova ʼAtua te maʼuhiga ʼo te maʼuli haohaoa ʼo Sesu ohage ko he totogi maʼa te hahaʼi fakalogo ʼo te hōloga agahala ʼo Atama. Pea ko te sakilifisio ʼa Sesu ʼe mole ina pulihi pe tatatou ʼu agahala ʼaē ki muʼa atu. He kapau ʼe hoko te faʼahi, ʼe mole ʼi ai anai hotatou ka haʼu. ʼI totatou fānauʼi ʼi te agahala, ʼe faigafua hatatou toe hēʼia. (Pesalemo 51:5) ʼE tou loto fakafetaʼi heʼe ʼaki te mate ʼo Sesu, kua tou lava maʼu te fakatuʼutuʼu ki te maʼuli haohaoa ʼaē neʼe loto e Sehova ʼi te kamata maʼa te hōloga ʼo Atama mo Eva!

ʼE lava fakatatau ia Atama ki he tāmai kua mate kae ʼe ina tuku mai kia tatou he toe maʼua lahi, ʼe faigataʼa tona huʼi. ʼI te tahi faʼahi, ʼe hage ia Sesu ko he tāmai ʼofa kua mate kae ina tuku mai te tofiʼa, ke feala he totogi ʼo te maʼua lahi ʼaē neʼe tuku mai e Atama pea mo faka fealagia ai ke tou maʼuʼuli ʼo heʼegata. Ko te mate ʼo Sesu ʼe mole ina molehi pe te ʼu agahala ʼāfea, kae ʼe ina toe faka fealagia ai te fakatuʼutuʼu taulekaleka ki totatou ka haʼu.

ʼE hāofaki tatou e Sesu he neʼe mate maʼa tatou. Pea ko tona mate ʼe ko he fakatuʼutuʼu ʼaoga! Kapau kia tatou ko te mate ʼe ko he puleʼaki ʼaia ʼa te ʼAtua ki te fihifihia lahi ʼo te agahala ʼa Atama, pea ʼe fakamālohiʼi ai tatatou tui kia Sehova pea mo tana faʼahiga fakahoko ʼo te ʼu meʼa. Ei ko te mate ʼo Sesu ʼe ko he puleʼaki ʼaia moʼo hāofaki mai te agahala, te mahaki, te matutuʼa, pea mo te mate “ia natou fuape e tui kia te ia.” (Soane 3:16) ʼE koutou loto fakafetaʼi koa ki te ʼAtua ʼi tana fakatuʼutuʼu ʼofa ʼaē moʼo hāofaki ʼo tatou?

[Paki ʼo te pasina 5]

ʼE agahala pea mo mate te malamanei ʼuhi ko Atama

[Paki ʼo te pasina 6]

Neʼe fai e Sehova te puleʼaki haohaoa