ʼE Mafola ʼi Te Malamanei

ʼE ui e te ʼu puleʼaga, kapau ʼe mole fetogi te aluʼaga ʼaia, pea ʼi te taʼu 2030, ʼe ko te toko 8 miliona tupu ʼae ka mamate anai ʼi te taʼu fuli. Pea ʼe natou fakafuafua ʼe ko te toko 1 miliale ʼae ka mamate anai ʼi te fakaʼosi ʼo te ʼu taʼu 2000, ʼuhi ko te suluka.

Ko te suluka ʼe mole fakatupu kovi pe kia natou ʼae ʼe suluka. ʼE toe fakatupu kovi ki ʼonatou famili, koteʼuhi ʼe natou lotomamahi pea mo natou fihifihia ʼi te faʼahi ʼo te falā. ʼE toe kau ki ai ia te toko 600 000 ʼae ʼe mamate ʼi te taʼu fuli ʼuhi ko tanatou manava ki te ʼaele ʼo te suluka. Pea ʼe fakatupu kovi kia tatou fuli heʼe hiki ai te totogi ʼo te ʼu faitoʼo.

ʼO mole hage ko te ʼu mahaki ʼae ʼe faigaʼi e te kau toketa ke natou maʼu he faitoʼo ki ai, ʼe feala pe ke fakagata te ʼu tuʼutamaki ʼuhi ko te suluka. Neʼe ui fenei e te toketa ko Margaret Chan, ko te pule ʼaia ʼo te Kautahi Fakamalamanei ʼo Te Maʼuli Malolō: “Kua lahi te mafola ʼo te suluka ʼuhi ko te tagata pea ʼe feala pe ke fakagata te kovi ʼaia mo kapau ʼe faiga fakatahi ki ai te ʼu puleʼaga pea mo te hahaʼi.”

Neʼe ko te hoki faiga ʼae ʼa te ʼu puleʼaga fuli ke natou tauʼi ia te kovi ʼaia. ʼI te mahina ʼo ʼAukusito 2012, neʼe fai e te ʼu fenua ʼe 175 he ʼu fakatuʼutuʼu ke natou fakasiʼisiʼi te fakaʼaogaʼi ʼo te suluka.a Kaʼe neʼe mole hona fua. Koteʼuhi ʼi te taʼu fuli, ʼe fakaʼaogaʼi e te ʼu fale faisikaleti ia he toe falā lahi ki te ʼu publicités moʼo fakaneke te hahaʼi ke natou suluka, tafitō ia te hahaʼi fafine pea mo te kau tupulaga ʼi te ʼu fenua masisiva. Pea mai tona aluʼaga ʼae ko te suluka ʼe ko he toloke, ʼe mole feala anai ki te toko 1 miliale ʼae kua suluka ke natou taʼofi tanatou suluka. Kapau ʼe mole fakagata e te hahaʼi tanatou suluka, ʼe tuputupu pe anai ia te lahi ʼo te kau mateā ʼi te ʼu taʼu ʼaeni ka hoa mai.

Tokolahi kua natou popula ki te suluka, kaʼe ʼe natou fia taʼofi tanatou suluka. Neʼe ko te aluʼaga ʼaia neʼe hoko kia Naoko. Neʼe kamata suluka ʼi tana kei finemui. Neʼe ina faʼifaʼitakiʼi te ʼu publicités, ʼo fia fafine ai. Logo la neʼe mamate ʼana matuʼā ʼuhi ko te suluka, kaʼe neʼe toe hoko atu aipe tana suluka pea mo tana taupau ʼana taʼahine ʼe tokolua. Neʼe ina ui fenei: “Neʼe au mataku naʼa au maʼu te kosea pea neʼe au tuʼania naʼa mahaki ʼaku taʼahine, kaʼe neʼe au manatu ʼe mole feala anai ke au tuku taku suluka.”

Kaʼe neʼe lava taʼofi e Naoko tana suluka ohage pe ko te toko lau ʼi miliona ʼae neʼe natou ʼateaina mai te suluka. Kotea ʼae neʼe tokoni kia natou? Kotou lau ia te alatike ʼae ka hoa mai.