Te ʼu Tali Ki Te ʼu Fehuʼi Fakatohi-tapu
ʼE tou maʼu anai koa ia he puleʼaga ʼe tahi ʼi te malamanei katoa?
ʼE feala koa ki he puleʼaga fakamalamanei ke ina fakatahiʼi te hahaʼi ʼo te atu ʼu puleʼaga fuli? Esaia 32:1, 17; 54:13
Fakakaukauʼi age pe ʼe feala feafeaʼi ki he puleʼaga fakamalamanei ke ina foaki he ʼu lelei maʼa te tagata. Tokolahi ia te hahaʼi ʼe natou maʼuli mamahi koteʼuhi ʼe natou masisiva kaʼe ko ʼihi ʼe natou mahu ʼi te koloaʼia. Kaʼe kapau ʼe ʼi ai he puleʼaga fakamalamanei ʼe lotomahino ki te meʼa ʼe ʼaoga maʼa te hahaʼi pea ʼe feala tana fai ia meʼa fuli ʼe ʼaoga ki te hahaʼi. ʼI tau manatu la, ʼe feala koa ki te tagata ke ina fakatuʼu he puleʼaga feia?—Lau ia Selemia 10:23.
Lolotoga te hisitolia ʼa te tagata, ʼe lahi te ʼu aluʼaga ʼe ha ai neʼe mole lava tokaga ia te ’u puleʼaga ki ʼana hahaʼi fakalogo, tafitō te hahaʼi masisiva. Ko ʼihi puleʼaga ʼe natou agakovi. (Ekelesiasi 4:1; 8:9) Kaʼe neʼe fakapapauʼi mai e te ʼAtua Mafimafi ʼe ina foaki mai ia he puleʼaga ka ina fetogi anai ia te ʼu puleʼaga fuli. Pea ʼe tokaga moʼoni anai ia te Pule ʼaia ki te hahaʼi.—Lau ia Esaia 11:4; Taniela 2:44.
Kotea ʼae ka fai anai e te Puleʼaga ʼo te ʼAtua?
Neʼe filifili leleiʼi e Sehova ʼAtua ia te Pule lelei ʼo te malamanei, tona ʼAlo ia Sesu. (Luka 1:31-33) ʼI tana nofo ʼi te kele, neʼe tokaga ia Sesu ki te hahaʼi ʼaki tana tokoni kia natou. ʼI tona ʼuhiga Hau, ʼe ina fakatahiʼi anai te hahaʼi ʼo te atu ʼu puleʼaga fuli pea ʼe ina fakalotofimalieʼi anai ia te hahaʼi fuli mai ʼonatou mamahi.—Lau ia Pesalemo 72:8, 12-14.
ʼE tali fuli anai koa e te hahaʼi ia Sesu ʼi tona ʼuhiga Pule? Kailoa. Kaʼe ʼe faʼa kataki ia Sehova. (2 Petelo 3:9) ʼE ina foaki ki te hahaʼi ia te fealagia ʼae ke natou tali ia Sesu ko honatou Pule. Kua vave pe te haga ʼa Sesu ʼo pulihi ʼi te kele ia te hahaʼi agakovi pea mo fakatuʼu ia te tokalelei mo te fimalie ʼi te malamanei katoa.—Lau ia Mikea 4:3, 4.