Te ʼu Fehuʼi ʼa Te Kau Lautohi
Ko ai ia Koke ʼo Makoke ʼae ʼe talanoa ki ai te tohi ʼo Esekiele?
Lolotoga ni taʼu, neʼe fakamahino ʼi ʼatatou tohi ko te higoa Koke ʼo Makoke ʼe fakaʼuhiga kia Satana hili ia tana li ifo mai te lagi. Kotea tona tupuʼaga? Koteʼuhi ʼi te tohi ʼo Apokalipisi ʼe fakaha ai ko Satana ia te pule ʼo te ʼohofi fakamalamanei ʼa te hahaʼi ʼa te ʼAtua. (Apokalipisi 12:1-17) Koia, neʼe tou mahino ai ʼe lagi ko Koke ʼe ko he tahi higoa ʼaia ʼo Satana.
Kaʼe ʼe ʼi ʼai he fihifihia ʼo ʼuhiga mo te fakamahino ʼaia. Kotou fakakaukauʼi age muʼa ia te aluʼaga ʼaeni: ʼI te temi ʼae neʼe palalau ai ia Sehova ki te fakaʼauha ʼo Koke, neʼe ina ui ʼe ina foaki anai ia Koke “ko te meakai a te u manulele fekai fuli, pea mo te u manu o te u gaueaga.” (Esekiele 39:4) Pea neʼe toe ui fenei e Sehova: “I te aho aia, e au foaki anai kia Koke he kogamea ke fai ai tona tanuma i Iselaele.” (Esekiele 39:11) Kaʼe ʼe lava kai feafeaʼi anai ia Satana ʼae ko he laumalie e te ʼu manulele pea mo te ʼu manu fekai? Pea ʼe lava tanu feafeaʼi anai ia ia ʼi te kele? ʼE fakaha lelei ʼi te Tohi-Tapu, ʼe li anai ia Satana ki te vanu lolotoga taʼu ʼe 1 000. ʼE mole kai peʼe tanu anai ia ia.—Apokalipisi 20:1, 2.
ʼE ui ʼi te Tohi-Tapu hili te ʼu taʼu ʼe 1 000, ʼe toe tuku age anai ia Satana mai te vanu, pea “e alu anai ia ia, o fakahalai te u puleaga ae e tuu i te u potupotu e fa o te kele, ia Koke mo Makoke, ke fakatahii naua ki te tau.” (Apokalipisi 20:8) Kaʼe kapau ʼe ko Satana ia Koke, ko tona fakaʼuhiga ʼe kakāʼi pe anai e Satana ia ia totonu. Koia ʼe ha lelei mai ai, ko “Koke” ʼe mole fakaʼuhiga kia Satana ʼi te tohi ʼo Esekiele peʼe ko te tohi ʼo Apokalipisi.
Kaʼe ko ai ia Koke ʼo Makoke? Moʼo tali ki te fehuʼi ʼaia, ʼe tonu ke tou kumi ʼi te Tohi-Tapu pe ko ai ʼae ʼe ina ʼohofi ia te hahaʼi ʼa te ʼAtua. ʼE talanoa ʼi te Tohi-Tapu ki te ʼohofi ʼo ‘Koke ʼo Makoke,’ mo te ʼohofi ʼo “te hau o te noleto” pea mo te ʼohofi ʼo “te u hau o te kele.” (Esekiele 38:2, 10-13; Taniela 11:40, 44, 45; Apokalipisi 17:14; 19:19) ʼE kehekehe koa ia te ʼu ʼohofi ʼaia? ʼE mole tou iloʼi papau ia te faʼahi ʼaia. Kaʼe ʼe feala ke fakaʼaogaʼi ʼi te Tohi-Tapu he ʼu higoa kehekehe moʼo talanoa ki he ʼohofi ʼe tahi. He koʼe ʼe tou ui ia te faʼahi ʼaia? Koteʼuhi ʼe fakaha mai ʼi te Tohi-Tapu ʼe kau anai ia te ʼu puleʼaga fuli ʼo te kele ki te ʼohofi fakaʼosi ʼaia ʼae ko te kamataʼaga ʼo te tau ʼo Halamaketone.—Apokalipisi 16:14, 16.
Moka tou fakatatau ia te ʼu vaega Tohi-Tapu fuli ʼaia ʼo ʼuhiga mo te ʼohofi fakaʼosi ʼo ʼuhiga mo te hahaʼi ʼa te ʼAtua, ʼe ha lelei mai ai ko te higoa Koke ʼo Makoke ʼe mole fakaʼuhiga kia Satana. Kaʼe ʼe fakaʼuhiga ia Koke ʼo Makoke ki he ʼu puleʼaga. ʼE takitaki anai koa e “te hau o te noleto” ia te ʼu puleʼaga ʼaia? ʼE mole tou lava fakamoʼoni ia te faʼahi ʼaia. Kaʼe ʼe feala ke alu tahi ia te fakamahino ʼaia mo te faʼahi ʼaeni ʼe ui e Sehova ʼo ʼuhiga mo Koke: “E ke mavae anai i tou fenua, i te potupotu o te noleto, ia koe mo tau hahai kaugamalie ae e kau mo koe, ae e heheka fuli i ni hosi, ko he hahai lahi osi, ko he solia malohi osi.”—Esekiele 38:6, 15.
Ko te polofeta ko Taniela ʼae neʼe maʼuli ʼi te temi ʼo Esekiele, ʼe ina ui fenei ʼo ʼuhiga mo te hau ʼo te noleto: “E kaku mai anai ni logo mai te esite mo te noleto, o fakamatakui ia ia, pea e alu anai ia ia mo he ita lahi, o maumaui mo tamatei he hahai kaugamalie. E ina fakatuu anai ona falela fakahau i te vaha o te tai mo te mouga tapu o te fenua manuia. Pea e kaku anai ia ia ki tona fakaosi, kae e mole pe tokoni he tahi kia ia.” (Taniela 11:44, 45) ʼE tatau ia te faʼahi ʼaia mo te manatu ʼae ʼe ui ʼi te tohi ʼo Esekiele ʼo ʼuhiga mo te faʼahi ʼae ka fai anai e Koke.—Esekiele 38:8-12, 16.
Kotea ʼae ka hoko anai hili te ʼohofi fakaʼosi? ʼE ui fenei e Taniela: “Lolotoga te temi ʼaia ʼe tuʼu ake anai [ʼi Halamaketone] ia Mikaele, [ʼae ko Sesu Kilisito] te tama ʼaliki lahi ʼae ʼe tuʼu [talu mai te taʼu 1914] moʼo haofaki te ʼu foha ʼo tau hahaʼi. Pea ʼe mahino papau ia, ʼe ko he temi mamahi anai [te mamahi lahi] ʼe mole heʼeki hoko talu mai te tuʼu ʼo he puleʼaga ʼo aʼu ki te temi ʼaia. Pea lolotoga te temi ʼaia, ʼe hao anai tau hahaʼi, ia natou fuli ʼae ʼe tohi ʼonatou higoa ʼi te tohi.” (Taniela 12:1, MN) ʼE tou maʼu tatau ia te fakamatalatala ʼaia ia Apokalipisi 19:11-21 ʼo ʼuhiga mo te faʼahi ʼae ka fai anai e Sesu.
Kaʼe ko ai koa ia “Koke mo Makoke” ʼae ʼe talanoa ki ai ia Apokalipisi 20:8? ʼE fakaʼuhiga kia natou fuli ʼae ʼe agatuʼu kia Sehova pea mo ʼohofi ia tana hahaʼi lolotoga ia te ʼahiʼahi fakaʼosi ʼo te ʼu taʼu ʼe 1 000. ʼE natou maʼu tatau anai ia te fehiʼa ʼo Koke ʼo Makoke, ʼae ʼe fakaʼuhiga ki te ʼu puleʼaga ʼae ʼe natou ʼohofi ia te hahaʼi ʼa te ʼAtua ʼi te koga fakaʼosi ʼo te mamahi lahi. Pea ohage ko te fakaʼauha anai ʼo te ʼu puleʼaga fuli ʼaia ʼi Halamaketone, ʼe toe fakaʼauha anai ia Koke mo Makoke. (Apokalipisi 19:20, 21; 20:9) Koia, kua tou mahino leva, ko natou fuli ʼae ʼe agatuʼu ʼi te fakaʼosi ʼo te ʼu taʼu ʼe 1 000, ʼe fakahigoaʼi natou ko “Koke mo Makoke.”
Ko tatou ʼe ko he kau ako fakamalotoloto ʼo te Tohi-Tapu, koia ʼae ʼe tou fia iloʼi ai pe ko ai ʼae ka liliu anai ko “te hau ʼo te noleto” ʼi te ka haʼu. Kaʼe tatau aipe pe ko ai ʼae ʼe ina takitaki ia te ʼu puleʼaga ʼae ʼe fakafeagai ki te hahaʼi ʼa te ʼAtua, ʼe tou tui papau ki te ʼu faʼahi ʼaeni: (1) ʼE mole malo anai ia Koke mo Makoke mo tana kau tau pea ʼe fakaʼauha anai natou. (2) ʼE haofaki anai e totatou Hau ko Sesu Kilisito ia te hahaʼi ʼa te ʼAtua pea ʼe ina taki anai natou ki te malama foʼou ʼae ʼe maʼu ai te tokalelei mo te fimalie moʼoni.—Apokalipisi 7:14-17.