Tou Maʼuli ʼi Te Agapoto Pea Mo Faitotonu
1 ʼE tou maʼuli ʼi he mālama ʼe ina ʼeke te aga fakalotu hāla. Ko te ʼu lao ʼo te tuʼu ʼaenī kua kovi ʼosi (2 Tim. 3:3). Ko te kau kilisitiano ʼe tonu ke nātou pipiki maʼu ki te faitotonu pea ke nātou mahino peʼe koʼe ʼe ʼaoga ke hoko atu tanatou aga fēnei. Kae ʼe maʼu koa ʼifea he takitaki pea mo te ʼu tokoni? Ko te ʼu lao fea koa ʼe tonu ke tou muliʼi? “Tou maʼuli ʼi te agapoto pea mo faitotonu”, ʼe ko te kupu fakaloto mālohi ʼaenī ʼo te fakatahi makehe ʼaho tahi ʼo te taʼu gāue 1993. — Tito 2:12.
2 Ko te ʼu ʼakonaki, te ʼu faʼifaʼitaki pea mo te ʼu fakamatala ʼe akoʼi ai tatou pe ʼe feafeaʼi hatatou mālohi ʼo fakatutuʼu ki te aga fakalotu hāla pea mo tekeʼi te ʼu holi ʼo te mālama. ʼE tou vakaʼi anai pe ʼe feafeaʼi te feala ʼo te maʼuli ʼi te agapoto pea mo te faitotonu ʼi te mālama agakovi ʼaenī. ʼE ʼi ai anai mo te tokoni ʼo ʼuhiga mo tatatou ʼu manatu (1 Petelo 4:7). Ko te ʼu mātuʼa pea mo te kau tūpulaga ʼe fakaafe nātou ke nātou tokaga lelei ki te ʼu akonaki pea mo te ʼu fai fehuʼi ʼe fai ʼi te hoʼatā. Ko te ʼu akonaki ʼaia ʼe fakahā mai anai ʼe ʼaoga ke taupau te poto fakaʼatua pea mo te māhani, ʼo feiā foki mo te gāue tahi ke tou tahi teuteu ki he maʼuli fiafia ka haʼu ʼi te teokalasia.
3 Kae, ʼe tou maʼuli ʼi loto ʼo he mālama agakovi, kae ko te Folafola ʼa te ʼAtua ʼe ina fakahā mai kia tatou te ala lelei ʼe tonu ke tou muliʼi. Ko te akonaki “Ke tou fakapelepeleʼi te meʼa ʼaē ʼe feala ai tatatou fiafia ʼi he mālama heʼefiafia” ʼe ina fakahā anai te ʼu manuʼia ʼe tou maʼu anai mokā ʼe tou mulimuli ki te ʼu tokoni ʼo te Tohi-Tapu. Lolotoga tatatou teuteu ki te fakatahi, tou manatuʼi kapau, ʼe tou tokaga lelei tafito ki te ʼu akonaki pea kapau ʼe tou maʼuliʼi te ʼu tokoni, ʼe tou gāue fakapotopoto anai kia Sehova. — Filp. 3:15, 16.