Te Fakatuʼutuʼu Foʼou ʼo ʼUhiga Mo Te Fakamanatu ʼo Te ʼu Polokalama ʼo Te ʼu Fakatahi

ʼI te ʼāsili kovi ʼo te mālama ʼa Satana, ʼe fakaloto mālohi tatou e Sehova ke tou “līaki te heʼe aga faka lotu pea mo te ʼu holi ʼo te mālama, pea mo tou maʼuli fakapotopoto pea mo agatonu, pea mo tou pipiki ki te ʼAtua ʼi te lotolotoiga ʼo te tuʼu ʼo te ʼu faʼahiga meʼa ʼaenī.” (Tito 2:​12, MN ) ʼI te ʼu fakatuʼutuʼu ʼaē ʼe ina fai ʼaki “te tagata kaugana agatonu mo poto,” ʼe kau ai te ʼu polokalama ʼaē ʼe fai ʼi te taʼu fuli ʼo te fakatahi faka silikosikilipisio pea mo te fakatahi ʼo te ʼaho makehe. (Mat. 24:45, MN ) ʼE fakaloto mālohi ʼaupito te ʼu fakatahi fakalaumālie ʼaia!

Moʼo tokoni mai ke tou taupau pea mo maʼuliʼi te ʼu manatu ʼaē ʼe foaki mai, ʼe fai anai he fakatuʼutuʼu foʼou moʼo fakamanatuʼi te ʼu fakatahi ʼaia ʼi te taʼu 2005. ʼI te pasina 5 mo te 6 ʼo te pepa ʼaenī, ʼe maʼu ai te ʼu alatike ʼe fakahā fakatomuʼa mai te ʼu meʼa ʼaē ka tou vakaʼi ʼi te ʼu fakatahi pea mo te ʼu fehuʼi moʼo fakamanatu ʼo te ʼu polokalama ʼo te ʼu fakatahi takitahi. ʼE vakaʼi anai e te ʼu kokelekasio te faʼahi ʼaia ʼi tanatou Fono Gāue ʼi muʼa pea ʼi te ʼosi fai ʼo tanatou fakatahi. ʼE fakahoko feafeaʼi anai te fakamanatu ʼaia?

Ia vāhaʼa e tahi peʼe lua ʼi muʼa ʼo te fakatahi, ʼe fai anai he akonaki ia minuta e hogofulu ʼe fakatafito ki te alatike “Ko He Polokalama Foʼou ʼo Te Fakatahi Faka Silikosikilipisio” ʼi te Fono Gāue moʼo fakatuputupu te fia logo ʼaē ki te polokalama. ʼE fakatokagaʼi anai e te tēhina te ʼu fehuʼi ʼo te fakamanatu pea mo ina fakaloto mālohiʼi te nofoʼaki ke nātou toʼo he ʼu nota moʼo teuteuʼi te fakamanatu ʼaē ka fai ʼi te ʼu vāhaʼa ʼi te ʼosi ʼo te fakatahi.

ʼI te ʼu kiʼi vāhaʼa ʼi te ʼosi ʼo te fakatahi, ʼe fai anai ʼi te Fono Gāue he fakamanatu ia minuta e 15 ʼo ʼuhiga mo te polokalama ʼo te ʼuluaki ʼaho ʼo te fakatahi. Hili te vāhaʼa ʼaia, pea ʼe fakaʼaogaʼi anai ia minuta e 15 moʼo fai te fakamanatu ʼo te polokalama ʼo te lua ʼaho. Ko te ʼu fehuʼi ʼaē ʼe tuʼu ʼi te pepa ʼaē ʼe ʼalutahi mo Te Minisitelio ʼo Te Puleʼaga, ʼe fakaʼaogaʼi anai moʼo fakatafito kiai te fai palalau. ʼE tonu ke vakaʼi tāfito ʼi te fakamanatu te ʼu tokoni ʼaē ʼe tonu ke tou maʼuliʼi. ʼE feala ke fakatuʼutuʼu e te ʼu tagata ʼāfea ke nātou fakanounou, peʼe mole fai peʼe fetogi ʼihi ʼu faʼahi ʼo te Fono Gāue, ke feala ke fai te ʼu fakamanatu.

ʼE toe tatau anai ʼo ʼuhiga mo te polokalama ʼo te fakatahi ʼaho makehe, kae ʼe ʼi ai anai he fakamanatu pe e tahi ia minuta e 15 moʼo toe vakaʼi te polokalama katoa. ʼE tou taupau fuli anai te pepa ʼaenī pea mo fakaʼaogaʼi ke tou maʼu ai te ʼu lelei fuli ʼo te ako ʼaē ʼe foaki mai e Sehova.​—Isa. 48:17, 18.