“Te Meʼa Kai ʼi Tona Temi Totonu”
1. Neʼe tokoni feafeaʼi atu kiā koutou pea mo ʼihi age ia te polokalama ʼo te fakatahi makehe ʼaho tahi?
1 Kā ʼosi hatatou fakatahi makehe ʼaho tahi neʼe tou kau kiai, pea ʼi te agamāhani ʼe tou ʼui fēnei: “Neʼe tō tonu mai pē te ʼu tokoni ʼaia!” Neʼe ʼui e te taupau ʼo te silikō, ko ʼihi ʼo tana silikō ʼi tanatou ʼosi logo ʼaē ki te polokalama ʼo te fakatahi ʼaho tahi, neʼe natou fakahā ia tanatou fia lagolago mālohi age ʼaē ki te minisitelio. Neʼe ʼui fēnei e te taupau feʼaluʼaki: “Neʼe tokoni mai te polokalama ʼaia ke tou fakakaukauʼi fakalelei peʼe feafeaʼi totatou maʼuli mokā tou vakavakaʼi te ʼu faʼahi ʼaē ʼe tou fakaʼaogaʼi kiai totatou maʼuli.” Neʼe ʼui fēnei e te tahi taupau feʼaluʼaki: “Tokolahi ia te kau fai fakamafola neʼe natou fakahā neʼe ko he fakamanatu lelei neʼe natou maʼu ʼi te fakatahi ʼaia, ke natou vakavakaʼi ai peʼe natou tōkakaga tāfito ki te gāue ʼaē ʼe maʼuhiga age, ia te minisitelio.” Neʼe tokoni feafeaʼi atu kiā koutou ia te fakatahi makehe ʼaho tahi?
2. Koteā anai kā talanoa kiai ʼi te polokalama ʼo te taʼu gāue ʼaenī kā haʼu?
2 ʼE tou toe maʼu pē anai ʼi te polokalama ʼo te taʼu gāue ʼaenī kā haʼu ia te ʼu tokoni ʼaē ʼe ʼaoga kiā tātou. Ko tona kupu tāfito ʼaenī: “Kotou Feholaki Kiā Sehova,” ʼe toʼo mai iā Pesalemo 118:8, 9. Koʼenī ʼihi akonaki ʼe tou fakalogo anai kiai: “ ʼE Feafeaʼi Te Liliu ʼa Sehova Ko He Tule Mālohi ʼi Te ʼu Temi Mamahi?,” “Tou Tokoni Ki Te Hahaʼi Ke Natou Feholaki Ki Te ʼu Lalo Kapakau ʼa Sehova,” “Tou Faʼifaʼitakiʼi Ia Sehova ʼo Foaki He Holaʼaga Maʼa Te Hahaʼi,” “ ʼU Tūpulaga, Ke Liliu Ia Sehova Ko Tokotou Falalaʼaga!” pea “Totatou Palatiso Fakalaumālie—Ko Te Fakatuʼutuʼu ʼa Sehova Ke Tou Feholaki Kiai.”
3. ʼE feafeaʼi hatatou maʼu kātoa te ʼu lelei ʼo tatatou kau ʼaē ki te polokalama ʼo te fakatahi?
3 Ke Fua Lelei Kiā Tātou Te Polokalama: Kā kua fakahā atu te ʼaho ʼo te fakatahi, pea kotou fai he ʼu fakatuʼutuʼu ke feala hakotou kau kiai, pea kotou fakaafe ia takotou kau ako Tohi-Tapu ke natou ʼomai mo koutou. Ke feala hatatou ‘maʼu he ʼu fua ʼi tatatou faʼa kātaki,’ ʼe tonu ke tou tāʼofi maʼu ia te ʼu tokoni ʼaē ʼe tou logo kiai. (Luka 8:15) Koia, kotou fakalogo fakalelei ki te polokalama, pea mo tohi fakanounou te ʼu puani maʼuhiga mo tona ʼu pelesepeto ʼaē ʼe kotou fakatuʼutuʼu anai ke kotou fakaʼaogaʼi ʼi tokotou maʼuli pea ʼi takotou minisitelio. Kotou toʼo he temi ʼi te ʼosi ʼo te fakatahi ke kotou vakaʼi fakafāmili te ʼu puani ʼaia ʼo te polokalama, pea mo fakakaukauʼi fakatahi peʼe feafeaʼi hakotou maʼuliʼi mo tokotou fāmili ia te ʼu tokoni ʼaia.
4. He koʼē ʼe tonu ke tou fakatalitali fakafiafia ia tatatou fakatahi makehe ʼaho tahi ʼaē kā hoko mai?
4 Ohagē ko he meʼa kai kano lelei pea mo ʼaoga ki totatou sino, ko te fakatahi makehe ʼaho tahi ʼaia neʼe teuteuʼi ʼaki te ʼofa pea neʼe fakakaukauʼi lelei ke ʼaoga kātoa kiā tātou. ʼOfa pē ke tapuakina e Sehova ʼakotou faiga ʼaē ke kotou kau kiai pea mo kotou maʼu te ʼu lelei ʼo te “meʼa kai [ʼaia ʼe foaki mai] ʼi tona temi totonu” moʼo fafaga ʼi te faʼahi fakalaumālie ia te ʼu minisi Kilisitiano.—Mat. 24:45.