Ko Te Folafola ʼa Te ʼAtua ʼe Malohi
1. Kotea ia te kupu tafitō ʼo te fakatahi makehe ʼaho tahi ʼo te taʼu 2014?
1 ʼO kehekehe ia mo te ʼu meʼa fuli neʼe fai e te tagata, ʼe feala ki te Tohi-Tapu ke ina fetogi totatou maʼuli, ʼo ina fakaalu tahi ʼatatou manatu mo te ʼu manatu ʼa Sehova. Kaʼe ʼe feafeaʼi ia te malohi ʼo te Folafola ʼa te ʼAtua? ʼE tou lava fakaʼaogaʼi feafeaʼi ia te malohi ʼaia ʼi totatou maʼuli? ʼE tou lava tokoni feafeaʼi ki te hahaʼi ʼaki ia te malohi ʼaia? ʼE mahino ia, ʼe tou malohi anai ʼi te faʼahi fakalaumalie moka tou vakaʼi anai te ʼu tali ki te ʼu fehuʼi ʼaia ʼi te fakatahi makehe ʼaho tahi ʼo te taʼu 2014. Ko te kupu tafitō ʼo te fakatahi ʼaia, “Ko Te Folafola ʼa Te ʼAtua ʼe Malohi,” ʼe toʼo mai ia Hepeleo 4:12.
2. Kotea te ʼu fehuʼi ʼae ka tou tali anai ki ai?
2 Tou Kumi Te ʼu Tali Ki Te ʼu Fehuʼi ʼAeni: ʼI te lolotoga ʼo te fakatahi, kotou tohi ia te ʼu tali ki te ʼu fehuʼi ʼaeni.
• He ko ʼe ʼe tonu ke tou falala ki te Folafola ʼa Sehova? (Pes. 29:4)
• ʼE tou lava sisio feafeaʼi ki te malohi ʼo te Folafola ʼa te ʼAtua ʼi totatou maʼuli? (Pes. 34:9)
• ʼE kotou lava fakaha feafeaʼi ia te malohi ʼo te Folafola ʼa te ʼAtua ʼi takotou minisitelio? (2 Tim. 3:16, 17)
• ʼE tou lava tekeʼi feafeaʼi ia te fakahala ʼo te malohi ʼo te malama ʼa Satana? (1 Soa. 5:19)
• Kapau ʼe kei kotou tupulaga, ʼe kotou lava tuputupu feafeaʼi ʼi te faʼahi fakalaumalie? (Sel. 17:7)
• ʼE tou lava malohi feafeaʼi tatau aipe pe ʼe tou vaivai? (2 Ko. 12:10)
• ʼE lava feafeaʼi hatatou hoko atu ia te fai ʼo he ʼu fetogi ʼi totatou maʼuli logo la te ʼu agamahani pea mo te ʼu manatu kovi ʼae ʼe tou maʼu talu mai fualoa? (Efe. 4:23)
3. Kotea te tahi ʼu lelei ʼe feala ke tou maʼu mai tatatou fakatahi makehe ʼaho tahi?
3 ʼI aluʼaga fakafiafia moka tou logo anai ki te ʼu akonaki maʼuhiga ʼaia! Koia, ko te ʼu fakatahi makehe ʼaho tahi, mo te ʼu fakatahi fakasiliko pea mo te ʼu fakatahi fakatisitilike, ʼe ko he ʼu aluʼaga fakafiafia ke tou fakatahi ai mo ʼotatou tehina mo tuagaʼane. (Pes. 133:1-3; 2 Ko. 6:11-13) Tou toʼo he temi ke tou feiloʼiʼaki lelei mo ʼotatou tehina mo tuagaʼane pea mo natou ʼae kei foʼofoʼou mai. ʼE feala ke tou fakatalitali ia te taupau ʼo te tisitilike pea mo tona ʼohoana, peʼe ko te tehina ʼo te Petele ʼae neʼe hinoʼi ke haʼu ʼo ʼaʼahi tatatou fakatahi. Koia, ʼe tou fakaatalitali fakafiafia ki tatatou fakatahi makehe ʼaho tahi.